Bannan te Onimaki
Michael Isaac
Bydgoszcz, Poland
“Te aoraki e kona n riki bwa te bwai ae tamaroa,” e taku Michael, are e rootaki n te korakai n aki mwakurin raoi ana kirine. Ibukin aorakina ae korakora aio are e a karikirakea ana kakaitau ibukin te euangkerio, e taku, “bon te kataaki ae tamaroa.”
Leslie Nilsson, te Tia Rawetamnei
I bungiaki i Ethiopia n 1942 ao n nako Poland ni kamatebwai n 1965. N 1991, I kaitibo ma mitinare ao ni kaaina te Ekaretia. I a tia ni mwakuri bwa te beretitenti n te mwaanga inanon teniua ma te iterana te ririki. I mwakuri bwa te kaauntira n te beretitentii n te mition ibukin 12 te ririki. I a manga moan beretitenti riki n te mwaanga ao imwiina te beretitenti n te mwakoro. Ngkanne I a taonaki n te aoraki bwa e aki mwakuri raoi au kirine.
Ngkai I tii kona ni karaoi tabeua bwaai inanon te Ekaretia. I kataia n nanako n taromauri n te Tabati.
N te moantai I un.
“Bukin tera ngkai ngai?” I tataro. “I a tia ni beku ibukim, te Uea.” Imwiin teutana te tai, I a mataata. E taekinaki ni koroboki aika tabu, “Ane iai ana onimaki irou bwa e na kamarurungaki, ao e aki motikaki bwa e na mate, e na kamarurungaki” (R&B 42:48).
E taekinaki n te kibu aei bwa ti na kamarurungaki ngkana tao bon nanona bwa ti na aki mate
Kaain te Ekaretia a teimatoa n tataro ibukiu, ma marurungiu e tabe ni kekerikaaki. A taku bwa aki kaekaaki aia tataro, ma a bon kaekaaki ibukina bwa aomata ngaiia aika raoiroi ao ibukina I namakina aia tangira ae a kaotia nakoiu.
E ngae ngkana I marurung, a na mwaitira nikiran au tai n au ririki aei? N teimatoa, a mwaiti bwaai aika a mena imwaaiu.
I tangiria n tarai koroboki aika tabu ao ni kakaeia naake a ninikoria ake a na buokai. Ngke I marurung ao ni beku, I tangiria n iriira NIbwaai, ma ngkai n te tai ae mwaiti e nako au iangoa nakon Iobi. Bon te mwaane ae tamaroa, ao e korakai naba. Iai te kantaninga n taainako n te euangkerio.
N te kaawa n aron Bydgoszcz, ngkana I kan kawara te meeia, e aki kona n reke au tai ibukina ngkai Ngai kaain te aba ao akea bonganau n te kairiiri. Ma rinanon te euangkerio, e uki te mataroa n taainako ni wetean te Atua. Anne bukina ngkai I tangira au ekaretia.
E a reke te Ekaretia irou. Iai au anga n reitaki ma te Atua rinanon te tataro, rinanon te aki mamatam, rinanon bwaai ni kabane ake ti karaoi. Tera riki bwaai aika I kainnanoi?
N tabetai I a manga bon taku nakoiu, “Tao anne bukina ngkai I aoraki—bwa I aonga ni mataata bwa e korakora te Ekaretia, ao te euangkerio ae I mena inanona.”
I noora kainnabau, Renata, e rootaki n te nanokawaki ibukina ngkai I aoraki. I aki tangiria bwa e na riki n arona anne, ma te nanokawaki bon mwiin te tangira. Ngke akea ana tangira, e na bon aki nanokawaki. Te tangira e buokiko n namakinna bwa ko aki maroaa ao iai aomata aika a mwamwannano.
Te mate bon tiaki te bwai ae bubura. A na bane ni mate aomata. E kaineti ma arora bwa ti na kanga ni kaitara te mate. I ataia bwa E maiu. E tangiriira ni kabane—ngai naba. Anne te bwai ae I kona n taekinna.
E riki aorakin Michael bwa te kataaki ae kaangaanga ibukin kainnabana, Renata. “I noora kainnabau n nanokawaki ibukina ngkai I aoraki,” e taku. “Ma te nanokawaki bon mwiin te tangira. Te tangira e buokiko n namakinna bwa ko aki maroaa ao iai aomata aika a mwamwannano.”
N aki tabe ma mamaaran ana konabwai ake a riki man aorakina, e teimatoa, Michal ni kakaea naba angana n ibuobuoki ao n tabekiiarake ake irarikina.
Michael e kunea te kantaninga ao kairakina inanon koroboki aika tabu. Ngke e marurung ao ni karaoa ana beku, e mataiakina Nibwaai. “Ma ngkai e mwaiti te tai ae I iangoa iai Iobi,” e taku. “Bon te mwaane ae raoiroi, ao e bon korakai naba.”