Reireinaki iroun te Tamnei ae Raoiroi

Roronrikirake aikai a katauraoi bwa a na reireinaki iroun te Tamnei imwain te maungatabu ni kabuta Aio te bwai are a reiakinna man te maungatabu are mai imwaina ao kakoron bwaai ake a karaoi mai iai.

Kaetieti aika a anainano

I kaungaaki man te maungatabu ni kabuta. Ngke I kakauongo nakon te kaetieti mairouia ara mataniwi ni beku ibukiia tabeman, onimakinan Kristo, ao n teimatoa n taua te kai te biti, I namakina ana kakoaua te Tamnei are Raoiroi bwa e koaua te euangkerio aei, ao ti kona ni karekea te maiu ae akea tokina man kawakinan tuua ao iriiran ana taeka te Atua. I a tia ni katei au kouru bwa N na anga riki te ibuobuoki inanon au komiunitii ao ni kakorakora au kakoaua rinanon au tataro ni katoa bong ao ni kamatebwaia koroboki aika a tabu. I ataia bwa ngai te nati te aine iroun Tamara are i Karawa. E maiu ao te tangirai n aki toki ao n tainako.

Madelyn B., ana ririki 16, Delaware, USA

Kaeka Nakon Titiraki

Imwain te maungatabu ni kabuta Iai au titiraki aika uoua: (1) N na kanga ni kateimatoa anuau ae tamaroa ao ni buokiia raraou ngkana a karaoa te babaire ae buakaka? a (2) N na kanga ni kakoaua n te Ekaretia ao a na aki bwainikirinai? N tain te maungatabu, te Tamnei e kakoaua nakoiu bwa I aki maroa. Ngkai I ataia bwa man kamatebwaian koroboki aika a tabu ma nanou ni kabane, N na karekei kaeka nakon au titiraki ibukiia raoraou. I ataia bwa Tamau e kakauongo nakon au tataro, ao N na kataia n tamaroa arou ni katoa bong.

Isaak R., ana ririki 13, Pichincha, Ecuador

Ingainga n Reirei

I namakina te Tamnei ae rang korakora n te maungatabu ni kabuta. Ngkai I waaki ni katauraoi titiraki ao ni katauraoai n te maiu n tamnei ibukin te maungatabu, e a tia n rang ni kakorakora nanona inanon maiu, ao I a kona n reiakina ae mwaiti riki rinanon maroro teuana imwiin teuana. I rang kakaitau ibukin te burabeti ao abotoro, ao I ataia bwa a karokoaki mairoun Tamara are i Karawa bwa a na kairiira ao ni bweeni maiura!

Ben H., ana ririki 17, Kentucky, USA

Kaokao nakon te Rikirake

Maungatabu ni kabuta e kakorakoraai ma te nano n ira kawain ana euangkerio Iesu Kristo. E buokai bwa N na ataia ao n ota bwa aio bon te Ekaretia ae koaua, are e uota te ota ao te kakukurei. I namakinna bwa te TamneI e kaoai bwa N na rikirake ni katoa bong ao N na wareware n ana boki Moomon ni karekea te kakoaua ae matoatoa n te euangkerio. I kakoaua bwa Tamara are i Karawa e tangiraki bwa N na kakauongo nakon rongorongo aikai.

Vicente A., ana ririki 16, Metropolitan Region, Chile

Ukoukora te Ota

Te ririki are mai imwaaina e bon rang matoatoa irou. Tamau e taonaki n te aoraki ae te kaentia, ao iai taan iowawa aika a kakiriwe n ara kaawa. I taonaki n te maaku, ni kan ataia bwa N na kanga n namakina te rau ngkai I maaku ibukin kamanoau n te maiu n rabwata ao n tamnei. Man te maungatabu ni kabuta I reiakinna bwa I kona ni karekea te rau ngkai ti maiuakina te raoiroi, ni kaoni nanora n te onimaki, ao ni kawakin iango aika akea tokiia. I kaungaaki bwa N na rairaki nakon Kristo n taai ni kanganga n onea mwiin onimakinan oin wanawanau. I ataia bwa I kona n tokanikai n ana kariiri te roo man ukoukouran otan Kristo ae otamwaaka.

Olivia H., ana ririki 17, Belgium