Kabutan ana Tangira te Atua

Iroun Allie B., ana ririki 12, Kentucky, USA

Tabeua te tai ae nako Ngai ma au utu ti mwaing nako Kentucky. I bon rangin nanokawaki ibukina ngkai I a kitaniia raoraou ni kabane ao au utu. E rang kaokoro Kentucky ma are I tataneiai iai. N te moan tai ngke ti nako n taromauri, I nooria bwa a aki rang mwaiti aomata ikekei. Ngke I ataia bwa e rang uarereke au mwaanga, I baireia bwa n oneanmwiin ae N na aki kabuakaka au iango ibukina, iai te bwai ae N na karaoia nako iai.

N te bong are imwiina, Ngai ma tinau ti nako n te titooa. Imwaain ae ti kitana te auti, I tauii ni baiu bwabwati ni kaati aika a na kabutaki. Ngke ti a roko n te titooa, I karekea te kanree ao n nako bwa a na tuoaki au bwai. Te tia bobwai e orea boon te kanree, imwina e a anganai. I a manga kaokia nakoina. E taraai ma te nanououa ao n taku, “Ko a tia ni kabooa aio, neiko.”

I taku, “I ataia, ma I anganiko bwa te bwaintangira.” Ngkanne I a katokaa te kaati iaon te kanree. E moangare ao e karabwaai. E taraa aan te kaati, are I korea taekana iaona, “Aomata ni kabane bon natin te Atua.” I boonako ma te kukurei, n ataia bwa e ngae ngke tiaki kaain te Ekaretia, I a tia ni karaoa te bwai ae tamaroa.

Rimwi n te bong anne, I uringnga bwa I kaitkui nikiran taian kaati irarikin te mitiin n oromwane! N are imwiina ti nako n te titooa, I nako n titiraki ngkana a bon tiku naba kaati ikekei. Ngkanne iai te bwai ae I nooria, ao I tei n aki kakamakuri. Tao bon nimaua mitiin n oromwane ae iai irouia kaati akanne ae kangai taekana, “Aomata ni kabane bon natin te Atua.” E tibwatibwai te tia oromwane! I namakina te kukurei ibukin te bwai are I karaoia.