Bunimoa, Biuti, ao te Onimaki

Alvaro Alcaino

Antofagasta, Chile

Teuana mai ibuakon ara kouru n te utu bon kaikoan te mwane ae tau nakon te Bangke bwa e aonga ni kukurei n anga te tangomwane ni kaboa oin mweengara. N akean te kouru anne, tao N na kabanebuaka au wiikente ni mamataku n te terewition, n tataninga ana tai te mwane n roko nakoiu.

Ibukina bwa ngai te turaiwa n te kambwana ni kenikoora i meangin Chile, I mwakuri aua te bong n raroa man mweengau n te tabo n te kenikoora ao ngkanne tenibong au motirawa—te Kaonobong nakon te Moanibong. Ni karakaan ara karekemwane ao arakaiko ni karekean mweengara, ti baireia bwa ti na moana kabonakoan te bunimoa. Ara babaire bwa ti na anai aia oota raoraora, kaain rarikira, ao membwa n te Ekaretia; tina kabooi 1,000 bunimoa ni katoa wiiki man taabo ni bunimoa, ao ngkanne ti na anai ao ninikiri bunimoa n te Kaonobong ao te Moanibong.

Kainabau, Laura ao Ngai ti baireia bwa ti kairiia natira uoman bwa raora n nikirikiri ao ni kukurei n ara tai ni ikotaki. Ngke iaon kawaira ni kabooi ara moan babati ni bunimoa, e ngae na anne, ea reke te kangaanga. Temanna natira, e takakaro ma te bwai n taim bentira ae te biti, e tewenakoa te bwai n taitaim ao e rin raoi inanon bwain kauraam te tikareti are bon akea kanoana. E kia te ura, ao e bua korakoran tin te kaa, ao e waekoa n toki i nukan te kawai ae abwabwaki. Ti a tia ni kabueka te biuti.

Ngke ti tekateka ni buraokini butiia kaa n te kawai ao a warenako ara iango bwa tera ae ti na karaoia, ti rang un n te aro are ti a kuri n tang. Ma n te tai anne, I uringa bwa te Uea e a tia ni berita bwa e na uotiira ao e na buokiira ngkana ti katuka ara onimaki Irouna. E roko te raoi irou. I ataia bwa ti aki ti tekatekaikekei ni ngurengure. Iai ara kangaanga, ao nAna ibuobuokite Atua, ti na konaa n tokanikai.

Laura ao Ngai ti itaramata ao n taku, “Ti riai ni kaota ara onimaki.” Ti tataro ao ti kaoi ranimatara. Ngkanne, Laura e toka n te bwee, ao I otinako ni kooka te kaa. Tabeman aomata a otinako man aia kaa ao a buokai.

Ti kooka te kaa tao 200 te miita imwain reken te tabo ae mano ni bwaaki iai n raroa man te kawai ni buti ibukin katean ara kaa. Ngke e nang toki te kaa, I ataia bwa ti a tei raoi imoan te titoa ibukin bwaain tenaan kaa ake a titeerio.

I anaa te biuti are e buee, n rin te titoa, ao n titiraki, “Iai iroumi te aekaki aei?”

E kaeka te tia bobwai, “Eng.”

I kabooa te biuti ao I oneia, ea manga maiu te kaa, ao ti a reitaanako kawaira. Te tabo ni kaboo bunimoa e nang bon iin ngke ti a roko. Ti kabooi ara bunimoa ao ti a karaoa ara nikirikiri.

Ngkana ti karekei kakaewenako, ti kainanoa uringakin Tamara are i Karawa ni bubutia ibukin ana ibuobuoki. I ataia bwa E na kaekaira ngkana ti waakirake ao ti kaota ara onimaki Irouna.