5 Kawai aika Ko Kona iai ni Buoka Am Bitiobi bwa E na Buokiko

Iroun Chakell Wardleigh

Ana Maekatin te Ekaretia

E karaoa ana kabanea n tamaroa, ma n taai tabetai e kainanoa buokana.

Tamnei

young adult talking with bishop

E kamauriko ma baina ae e matoa ni katoa tai are ko kaitibo iai ma ngaia, e tekateka n ana tabo are e katauaki iai n tain te taromauri n toa, ao e kabanea mwaitin ana tai ni buokiko ao ni buoka te Uea.

Bon am bitiobi: te tia kairiiri n te nakoanibonga are e weteaki mai iroun te Uea bwa e na tararua n am uoote. E aki konaa ni bane kanoan ana mwakuri are e korei n te beba bwa e na katiai, e marooro ma membwa n ana aobiti imwin kabanea ana tai ae e abwabwaki n ana tabo ni mwakuri, ao e tiku imwin te tai inanon aoa aika mwaiti imwin bwaran te taromauri ni katiai raoi tabena.

Am bitiobi e na taraa n ae akea tokin korakorana, ma kairan te uoote ae bwanin e kona n rangi ni kakua! E kekeiaki ni karaoa ana kabanea n tamaroa, ma n tabetai e kainanoa buokana. Aikai nimaua kawai aika ko kona iai ni buoka am bitiobi bwa e na buokiko.

Tataro ibukina. Wetean te bitiobi e kona ni kataa tian ana konabwai n ana iango, tamneina, ao korakorana n rabwata. E kainanoa te korakora are bon ti te Atua ae e kona n anga ma e kona n riki anne man am onimaki ao am tataro. (taraa. Iakobo 5: 16).
Onimakina te nakoa. Ko kamatoaa bwa am bitiobi, ma am onimaki e aki boboto iaonte aomata; bon inanon te nakoa ke te wewete ae te bitiobi ao iroun te Atua are e anganga te wewete ao e kamatoa. Ko na kangaa ni kaota am onimaki? Tatauraoi ni kakoroi nanon wewete ao mwioko. Ngkana ko kawara am bitiobi, roko n te bowi ao tauraoi—tataro, aki mamatam ngkana e riai, ao onoiko n am kunikai ae tamaroa ni kaota am karinerine nakon te Uea. Iangoi raoi ana taeka n reirei. E tei ibukin te Uea.
Kataia kinaa. Kabanea am konaa bwa ko na kinaa raoi. Titirakinna aron maiuna, ana reirei ke bwai ake e babane nanona ao ni mwaatai iai, ao ana taneiai are e a tia n rinanona ma ana utu Kaotia ae ko kakaitau ibukin ana mwakuri ao iai am onimaki irouna ni kakoroan bukin weteakina. (Taraa 1 I Tetaronike 5:12–13.)
Tai anganna am kangaanga are e na karika rawawatana. E kan buokiko am bitiobi, ma ngkana iai am kangaanga ae e kona n rinanoaki irouia am tia reirei n te kakawari, iroun temanna ana kauntira te bitiobi, ke am beretitenti n te Bootaki n Aine ke aia kooram unimwaane, ao kawariia moa. A weteaki nakon nakoaia bwa iai bukina! A mena ikanne bwa ana buokiko ao bwa e aonga naba ni konaa am bitiobi ni karaoi tabena are bon ti ngaia ae e konaa ni karaoi.
Taraia bwa bon te aomata naba ngaia. N taraan ae am bitiobi e bon tau nakon nakoana, e bon aki kororaoi. Iai irouna te nanokokoraki, ao e karaoi naba kairua. Ma e rang tangiriko ao e anga ana kabanea ni kona nakon weteana. Reitaki ma ngaia. Kinaakim ao ataakin am kangaanga irouna, e na kakorakora ana konaa ni buokiko.