Te Kakai n Ana Auti te Uea i Kyiv

Doru Vasile

Bucharest, Romania

President Monson greeting members in the temple

Ngai ma au utu ti rang kukurei ni mwananga n te kaa mai Romania nako Kyiv, Ukraine, ibukin katabuan te tembora n Aokati 2010. Ataakina bwa aio e na riki bwa aia tembora aika a itiaki i Romania/Moldova Mition, ti mwananga n te maan ae tao 14 te aoa bwa ti aonga n roko ikekei. Ngke ti roko, ti kaitibo ma te kurubu teuana ake a mwananga naba mai Romania. Ti bane ni kukurei n roko i Kyiv ti ibukin te tai ae tabu aei.

N te bong are e nang katabuaki iai te tembora, ara kurubu mai Romania ti katabeaki bwa ti na mataku n te katabu inanon ruun te tembora ae mena inano. Tabeman a moanna ni kaota uniia. A kantaningaia bwa a na ira te katabu ma te burabeti inanon te ruu ae te tiretio. Tabeman a bon taekinna bwa e raoiroi riki ngke a tiku ni mweengaia ni mataku n te kanakobwana man aia umwantabu i Romania.

I waaki n tataro inanou,“Tamara are i Karawa, ti na kanga ni buokiia kain te aro mai Romania bwa a na karekea te namakin ae aki kona ni mwaninga n Am auti?”

I bon tuai naba ni karekea te kaeka ngke e a waaki te tetere. N te tai ae waekoa ti a ataia bwa te burabeti, Beretitenti Thomas S. Monson (1927–2018), e na ruorikaaki ni katuka atibun te maninganinga n ana tabo. Tao bon aio te kaeka nakoira! I tataro ibukin te kawai are e na roko iai ara burabeti ao ni butimwaiia aika Itiaki mai Romania.

“I aki bubuti aei ibukiu,” I tataro, “ma ibukiia tariu ao mwaneu.”

Imwiin bukamaruan atibun te maninganinga, e nakonako Beretitenti Monson irarikin ara ruu n okina nakon te ruu ae te tiretio. N te tai ae tawe, I namakinna inanou bwa I riai n teirake ao ni kaoa bwa e na rin inanon ara ruu.

I tei man taku, “Ara burabeti! Nakomai ao noorira. Ngaira kain Romania.”

E taraa n aki ongo bwanaau. Imwiina, tabeua te tai imwiina, e oki rikaaki. “Romania!” e taetae ao e rinnako n te ruu.

E kamauriira ngaira ni kabane ao e taku bwa e rang n tangiriira. E kaonaki nanou ngke I noora te mata ni kukurei irouia raora aika tangiraki. “Ko rabwa, Tamara ae ko tangiraki,” I a tia n tataro, “ibukin te kakai aei n Am auti.”

Ngke e kitana te ruu te burabeti, ai akea ae nanokawaki. I namakinna bwa ti mena n te ruu ae moan te kakabwaiaki inanon te tembora. Bon te bwai are ti rinanona ae I aki kona ni mwaninga.