Me Baleti Koya

Mai vei Joy D. Jones

Peresitedi Raraba ni Lalai

Noda kila o cei kei na vuna me da qaravi ira kina na tani ena vukea noda kila na ivakaraitaki cecere duadua ni loloma, na yalodina vua na Kalou.

Ena bogi vakairogorogo oqo au vakaraitaka na noqu iloloma kei na vakavinavinaka vei kemuni yadua, na taciqu lomani. Se cava ga na noda yabaki ni bula, vanua eda tu kina, se ituvaki cava ga, eda soqoni nikua ena duavata, ena kaukauwa, ena inaki, ka vakadinadinataka ni da lomani ka liutaki tiko mai vua na Tamada Vakalomalagi, noda iVakabula, o Jisu Karisito; kei na noda parofita bula o Peresitedi Russell M. Nelson.

Ni keirau se veiwatini gone, a kacivi keirau kei watiqu na bisopi me keirau sikova ka qarava e dua na matavuvale sa sega tu ni mai lotu ena vica vata na yabaki. Keirau ciqoma ena lomasoli na ilesilesi ka lako ki nodratou vale ena vica na siga ka tarava. E matata sara tu ga vakasigalevu vei keirau ni ratou sega ni taleitaka na veisiko mai ni Lotu.

Ena neirau veisiko tarava, keirau a kauta yani e dua na peleti bisikete, keirau yalodei ni na vakawaicalataka na yalodratou na bisikete jokeliti. E sega ni vakakina. Erau vosa mai vei keirau na veiwatini mai na katuba lawalawa, ka vakamatatataka mai vei keirau ni keirau sega ni ciqomi. Ni keirau draiva lesu i vale, e vaka me keirau nanuma ni na vinaka cake beka kevaka keirau a kauta na iVakalomavinaka na Rice Krispies.

Na lailai ni neirau rai vakayalo sa vakavuna me vakatubu rarawa na neirau sasaga matewale. E sega ni dau logavinaka na noda sega ni ciqomi. Ni toso na gauna sa tekivu me keirau taroga, “Na cava daru cakava tiko kina na ka oqo. Na cava na nodaru inaki?”

Oqo na ka e dikeva rawa o Elder Carl B. Cook: “Ia, na veiqaravi ena Lotu sa rawa ni veibolei kevaka eda sa kerei meda cakava e dua na ka e vakarerei keda, kevaka eda sa vakacauoca ena veiqaravi, se da kacivi meda cakava e dua na ka eda sega taumada ni taleitaka.”¹ Keirau vakila tiko na dina ni vosa nei Elder Cook ena gauna keirau lewa kina me keirau qara na veidusimaki mai Vua e dua e cecere cake nona rai mai vei keirau.

O koya, ni oti na vakamamasu yalodina kei na vuli, keirau qai ciqoma na isaunitaro na cava na vu ni neirau veiqaravi. Sa veisau na ka keirau kila, veisau na yalo, sa sobu na ivakatakila.² Ni da vakasaqara na veidusimaki mai na ivolanikalou, e vakavulica vei keda na Turaga me vakarawarawataki ka vakaibalebale vakalevu cake na veiqaravi vei ira na tani. Oqo na tikina keirau wilika ka veisautaka ruarua na yaloi keirau kei na neirau iwalewale: Mo lomana na Turaga na nomu Kalou ena lomamu taucoko, nomu igu taucoko, vakasama, kei na kaukauwa; io mo qaravi koya ena yacai Jisu Karisito.”³ E dina ni kilai vinaka tu na tikina oqo, e vaka me vosa vei keda ena dua na ivakarau e vou ka bibi.

Keirau vakila ni keirau a segata tiko ena yalodina me keirau qarava na matavuvale oqo ka qarava na bisopi, ia me keirau tarogi keirau kevaka keirau a veiqaravi dina tiko ena dela ni loloma vua na Turaga. E vakamatatataka na duidui oqo na Tui o Penijamini ena nona kaya: “Raica au sa kaya vei kemuni, au sega ni via dokai ena noqu kaya ni’u sa qaravi kemuni ena noqu bula taucoko, niu sa vakayacora ga na itavi sa lesia vei au na Kalou.”⁴

O cei dina beka a qarava tiko na Tui o Penijamini? Na Tamada Vakalomalagi kei na iVakabula. Noda kila o cei kei na vuna me da qaravi ira kina na tani ena vukea noda kila ni ivakaraitaki cecere duadua ni loloma sai koya na yalodina vua na Kalou.

Ni sa veisau tiko noda vakanamata, sa vakatalega kina noda masu. Sa tekivu me keirau nanamaki ki na neirau veisiko ki na matavuvale lomani oqo baleta na neirau lomana na Turaga.⁵ Keirau cakava tiko ena Vukuna. E vakavuna o Koya me sega ni dredre na dredre. Ni oti e vicavata na vula na neirau dau tu ga e matani katuba, sa tekivu me ratou vakacurumi keirau ki loma. Sa yaco, me keitou masu vata ka veitalanoataka na kosipeli. Sa tekivu buroro e dua na isema vakaveitokani tudei. Keitou a qarava ka lomani Koya tiko ena neitou lomani ira na Luvena.

E rawa beka ni o nanuma lesu e dua na gauna o a qarava kina e dua e vakaleqai tu ena sasaga yalodina ka qai vakila ni a sega ni kauwaitaki nomu igu se sega beka ni marautaki se sega sara ga ni vinakati? Ena gauna oya, o a taroga beka na yaga ni nomu veiqaravi? Kevaka sa vakakina, me vakaisosomitaka na nomu vakatitiqa se na nomu mosi na vosa i Penijamini na Tui: “Dou sa qarava tikoga kina na nomudou Kalou.”⁶

Me da kua ni dau yaloca, ia e rawa ni da tara cake, ena noda veiqaravi, e dua na isema ni veiwekani uasivi kei na Tamada Vakalomalagi. Na noda loloma kei na yalodina Vua ena uabaleta na gagadre me da kilai ka vakavinavinakataki ka na vakatara me drodro mai vei keda ka drodro yani mai vei keda na Nona loloma.

Ena so na gauna eda na veiqaravi taumada baleta ni noda itavi ka icolacola, ia na veiqaravi oqori e rawa ni vakavuna noda dreta mai e dua na ka cecere cake e tu vei keda, ka na vakavuna me da veiqaravi ena “ivalavala uasivi cake”⁷—me vaka ena veisureti nei Peresitedi Nelson ki na dua na “iwalewale vou ka savasava cake ni nodra kauwaitaki ka qaravi na tani.”⁸

Ni da vakanamata ki na veika kece sa vakayacora vei keda na Kalou, ena drodro na noda veiqaravi mai na yalo e vakavinavinaka. Ni sa yaco me da sega ni kauwaitaka noda vakalevulevui ena noda veiqaravi, eda na raica ni sa inaki ni noda veiqaravi me vakaliuci na Kalou.⁹

E vakavuvulitaka o Peresitedi M. Russell Ballard, “Ena gauna duadua ga eda sa lomana kina na Kalou kei Karisito ena yaloda taucoko, noda nanuma kecega kei na noda vakasama sa na qai rawa ni da wasea na loloma oqo vei ira na wekada ena ivalavala vakayalo vinaka kei na veiqaravi.”¹⁰

E vakamatatataka na vuku vakalou oqo na imatai ni ivakaro ena iVakaro e Tini: “Koi Au na Turaga na nomu Kalou. … Me kakua vei iko na kalou tani, koi au duadua ga.”¹¹ Na vakayagataki ni ivakaro oqo ena vukea me da kila ni kevaka eda biuti Koya me liu duadua, ena donu na veika kece tale—noda veiqaravi sara mada ga vei ira na tani. Ni sa dabeca o Koya na itutu cecere duadua ena noda bula ena noda lewa vakataki keda, sa na qai rawa ni vakalougatataka noda bula me da vinaka ka ra vinaka kina na tani.

E kaya na Turaga, “Ia mo drau vakaliuci au ena nomudrau nanuma kecega.”¹² Eda yalataka e veimacawa me da kitaka oqori—me da “dau nanumi koya tikoga.”¹³ E rawa beka ni yaco ena veika kece eda cakava na vakanamata vakalou oqo? E rawa beka ni dua na madigi me da vakaraitaka kina noda loloma kei na yalodina Vua na noda cakava e dua na cakacaka beci? Au vakabauta ni rawa ka na vakakina.

E rawa ni da kitaka me sala ni noda vakalagilagi Koya na veika yadua ena noda ituvatuva ni cakacaka. E rawa ni da raica na cakacaka yadua me madigi dokai ni qaravi Koya, kevaka sara madaga sa voleka ni oti na kena gauna, na itavi, se na veisautaki daipa.

Me vaka e tukuna o Amoni, “Io, au kila niu sa ka walega; kau sa tamata malumalumu sara; o koya au na sega ni dokadokai au kina, au na dokadokataka ga na noqu Kalou, niu sa rawa ni kitaka na ka kecega ena nona kaukauwa.”¹⁴

Ni sa yaco me ka bibi duadua ena noda bula na qarava noda Kalou, eda sa vakayali keda, ia ena yaco na gauna me da kunei keda.¹⁵

Na iVakabula e vakatavulivulitaka na ivakavuvuli e rawarawa ka matau “O koya me caudre vakakina nomudou rarama e matadra na tamata me ra raica nomu ivalavala vinaka ka vakarokorokotaka na Tamamudou sa tiko mai lomalagi.”¹⁶

Meu wasea mada vei keda eso na vosa yalomatua a kunei ena lalaga ni dua na nodra vale na gone vakaloloma mai Calcutta e Idia: “Ni o yalovinaka, era na beitaki iko beka na tamata ni o kocokoco, na inaki vuni. Ia mo yalovinaka tikoga. Na veika o taracake ena vica vata na yabaki, e rawa ni vakarusa e dua, ena dua ga na bogi. Tara tikoga. Na vinaka o kitaka nikua, vakawasoma, era na guilecava ni mataka na tamata. Cakavinaka tikoga Solia e vuravura na nomu vinaka duadua, ena sega beka ni veirauti. Solia tikoga na nomu vinaka duadua. O na raica, ni sa oti na veika kece, sa na qai vo ga o iko kei na nomu Kalou … .”¹⁷

Kemuni na taciqu, sa na qai vo ga o keda kei na Turaga. Me vaka e tukuna o Peresitedi James E. Faust: “‘Na cava na ka e gadrevi vakalevu duadua e vuravura?’ … ‘E sega ni gagadre levu duadua e vuravura taucoko sai koya me na tiko ki na tamata kecega na isema ni veiwekani yadua e veisiga kei na iVakabula?’ Ni tiko na veiwekani vakaoqo e rawa ni sereka na veika vakalou e tu e lomada, ka sega na ka ena vakavinakataka cake noda bula ni yaco me da kila ka ciqoma na keda isema vakalou vua na Kalou.”¹⁸

A vakasalataka vakakina na luvena o Alama: “Ia mo vakaliuca na Turaga ena nomu cakacaka kecega, ka vakarorogotaka vua na nomu sala kecega; mo dau nanuma tikoga na Turaga; ia mo lomani Koya ena gauna taucoko.”¹⁹

Sa vakavulici keda vakakina o Peresitedi Russell M. Nelson, “Ni da sa kila taucoko na Nona soli Koya ena Veisorovaki, sa na kovuta na solibula cava ga eda sa cakava ena yalo ni vakavinavinaka ena madigi dokai me da qaravi Koya.”²⁰

Kemuni na taciqu, au vakadinadinataka ni gauna e cakacaka kina vei keda e lomada o Jisu Karisito ena mana ni Nona Veisorovaki, sa na tekivu me vakayagataki keda me vakalougatataki ira eso tale. Eda qaravi ira, ia eda vakayacora vakakina ena noda lomana ka qaravi Koya. Sa yaco me da vaka e tukuna na ivolanikalou: “Na tamata yadua me vukea na wekana, ia me caka na ka kecega ena mata sa vakatabakidua ki na lagilagi ni Kalou.”²¹

Rairai sa kila tu na neirau bisopi ni oqori na lesoni keirau na vulica kei watiqu mai na veisasaga donu kena inaki, ia sega ni uasivi sara, me keirau qaravi ira kina na Luvena tagane kei na yalewa na Kalou. Au wasea noqu ivakadinadina dei ena vinaka kei na loloma e wasea vei keda o Koya ni da segata me da veiqaravi ena Vukuna. Ena yaca tabu i Jisu Karisito, emeni.