Na iTubutubu kei na Gonelalai

Mai vei Peresitedi Dallin H. Oaks

iMatai ni Daunivakasala ena Mataveiliutaki Taumada

Na nona ituvatuva cecere ni marau na Tamada Vakalomalagi e tukuna vei iko o cei o iko kei na inaki ni nomu bula.

Kemuni na ganequ lomani, sa dua na ka vakasakiti na soqoni vou ni koniferedi raraba ni Lotu oqo baleti kemuni na marama yabaki 8 lako cake. Eda sa rogoca na itukutuku veivakauqeti mai vei iratou na marama iliuliu vakakina mai vei Peresitedi Henry B. Eyring. Keirau taleitaka kei Peresitedi Eyring na cakacaka ena ruku ni nona veidusimaki o Peresitedi Russell M. Nelson, ka da sa vakanamata ki na nona vosa vakaparofita.

I.

O ira na gone na noda isolisoli vakamareqeti duadua mai vua na Kalou—o ira na noda tubu tawamudu. Ia eda bula ena dua na gauna era sa sega ni vinakata e levu na marama me ra vakasucu se susu gone. E levu na itabagone qasecake era vakadaroya tu na vakamau me yacova ni sa rawa vinaka na veika ni bula vakayago. Sa tubucake sivia ena rua na yabaki na ivakatautauvata ni vakamau ena YDE, ka lutu na iwiliwili ni sucu ena Lotu. O Amerika kei na so tale na matanitu sa voleka mai me lailai sara na gone era matua cake me ra uabula ka veisosomitaki yani vei ira na qase era sa na vakacegu mai na cakacaka.¹ E sivia na 40 na pasede ni vakasucu gone e Amerika o ira na tina sega ni vakawati. O ira na gone era sega ni tudei. Na veituvaki oqo era veisaqasaqa ki na ituvatuva vakalou ni veivakabulai nei Tamada.

II.

O ira na marama Yalododonu Edaidai era kila ni itavi vakatina e nodra itavi bibi duadua, na ituvuka ni nodra bulamarau. A kaya vaqo o Peresitedi Gordon B. Hinckley: “Na iwase levu ni marama era kunea nodra vakataucokotaki, nodra bulamarau cecere duadua ena nodra itikotiko kei na nodra matavuvale. Sa teivaka na Kalou e lomadra na marama e dua na ka vakalou ka dau tukuni koya ena igu malumu, ena savasava, ena sautu, ena vinaka, ena ivalavala dodonu, ena dina, ena loloma. Na veitiki ni bula vakasakiti oqo era na vakaraitaki ena kedra ituvaki dina sara ka taucoko ena bula vakatina.”

E tomana o koya, “Na cakacaka cecere duadua ena cakava e dua na marama sai koya na nona vakamareqeta ka vakavulica ka bulataka ka vakayaloqaqataka ka susuga na luvena ena buladodonu kei na dina. E sega tale ni dua na ka ena vakatautauvatataki rawa kei na ka oqo, se cava ga ena cakava.”²

Kemuni na tina, na ganequ lomani, keimami lomani kemuni ena ituvaki cava ga o ni tu kina kei na veika o ni dau cakava vei keimami kece.

Ena nona itukutuku bibi ena 2015 ka kena ulutaga “E Dua Na Vakatakekere Vei Ira na Ganequ,” e kaya kina o Peresitedi Russell M. Nelson:

“Na matanitu ni Kalou ena sega ni taucoko, ka na sega ni rawa ni taucoko kevaka e sega na marama era cakava nodra veiyalayalati ka bulataka, na marama era na rawa ni vosa ena kaukauwa kei na veivakadonui ni Kalou!

“Nikua, … eda gadreva na marama era kila na vakayaco veika bibi ena nodra vakabauta ka ra sa dau yalodina saraga ena taqomaki ni tiko savasava kei na matavuvale ena vuravura tauvimate tu ena ivalavala ca. Eda gadrevi ira na marama yalodina ena nodra vakasarati na luve ni Kalou ena sala yalataki ki na bula vakacerecerei; na marama era kila na ciqoma nodra ivakatakila vakataki ira, era kila na kaukauwa kei na yalovakacegu ni edaumeni ni valetabu; na marama era kila na kaciva na kaukauwa vakalomalagi me maroroya ka vakaukauwataki ira na gone kei na matavuvale; na marama era na veivakavulici ena yaloqaqa.”³

Na veivakavuvuli vakauqeti oqo era yavutaki kecega e “Na Matavuvale: Ai Vakaro ki Vuravura Raraba,” ka vakadeitaka kina na Lotu vakalesui mai oqo na ivunau kei na ivalavala itakele ni nona ituvatuva na Dauveibuli ni se bera ni bulia na vuravura.

III.

Au na vosa ena gauna oqo vei ira na gone sobu ena ivavakoso oqo. Kemuni na ganequ gone lomani, ena vuku ni veika o ni kila me baleta na kosipeli vakalesui mai i Jisu Karisito, o ni sa duatani kina. Na nomuni kila ena rawa kina mo ni vosota ka ulabaleta na dredre ni tubucake tiko. Ni o se gonelailai, sa tekivu mo vakaitavi ena cakacaka kei na parokaramu ka vakatorocaketaki kina nomu taledi, me vaka na volavola, vosa, kei na tuvaka. O sa vulica na itovo nuitaki kei na ivakarau mo vorata kina na veitemaki ni lasu, lawaki, butako, se vakayagataka na alakaolo se waigaga.

Na kemuni duatani a kilai ena dua na vakadidike a vakayacori ena dua na Univesiti mai North Carolina me baleti kemuni na yabaki tinivakacaca kei na lotu. E dua na itukutuku ena Charlotte Observer e kena ulutaga “Mormon teens cope best: Study finds they top peers at handling adolescence.” E tukuna na itukutuku oqo ni “vinaka duadua o ira na Momani ena kena levei na itovo rerevaki, vinaka ena ka ni vuli ka vinaka nodra vakanamata ki na veisga ni mataka.” E dua vei ira na dauvadidike ena vuli oya, ka a vakataroga e levu duadua na noda itabagone, e kaya, “Ena veiwasewase kece e dikevi, e matata e dua na ivakarau: Era liu na Momani.”⁴

Cava na vuna o ni sotava vakavinaka duadua kina na dredre ni tubu cake tiko? Kemuni na goneyalewa, e baleta ni o ni kila na nona ituvatuva cecere ni marau na Tamada Vakalomalagi. Oqo e tukuna vei iko o cei o iko kei na inaki ni nomu bula. O ira na itabagone era kila oya era na matai ena walia na leqa ka matai ena digia na dodonu. O ni kila ni rawa ni nomuni nona veivuke na Turaga ena kena ulabaleti na dredre kece ni tubucake tiko.

E dua tale na vuna o vinaka kina sai koya ni o kila ni o luvena na Tamada Vakalomalagi ka lomani iko. Au vakabauta ni o ni kila na noda serenilotu cecere “Sa Voleka na Kalou.” Oqo na imatai ni qaqana eda sa lagata kece ka vakabauta:

I ragone sa voleka, vei keda noda Kalou
Sa dau marautaki keda, na muria na ivunau,
Kalougata, kalougata,
Ni ko ravi tu vua6

E rua na ivakavuvuli ena qaqana oya: Matai, e volekati keda na Tamada Vakalomalagi ka wanonovi keda ena siga kei na bogi. Vakasamataka mada! E lomani keda na Kalou, e voleka vei keda, ka wanonovi keda. iKarua, dau marau me vakalougatataki keda ni da “ravi tu Vua.” Sa ivakavakacegu ena loma ni nuiqawaqawa kei na dredre!

Io, kemuni na goneyalewa, o ni sa vakalougatataki ka vakasakiti, ia ko ni vakataki ira kecega na luvena na Tamada Vakalomalagi ena nomuni “sasaga mo ni ravi tu Vua.”

E rawa niu vakasalataki kemuni eke ena vuqa na veika duidui, ia au sa digitaka meu vosa walega ena rua.

Na imatai ni noqu ivakasala e baleta na selevoni. E dua na vakadidike ena matanitu raraba se qai oti walega e kunei ni sivia na veimama ni gone yabaki tinivakacaca e Amerika era kaya ni sa rui levu na gauna era vakayagataka ena nodra selevoni. E sivia ni 40 na pasede era kaya ni ra lomaleqa ena gauna e kautani kina nodra televoni.⁶ Oqo e vakalevu vei ira na goneyalewa mai vei ira na tagane. Kemuni na ganequ gone—kei na marama uabula talega—ena vakalougatataki nomuni bula kevaka o yalana nomu vakayagataka kei na vakararavi ena selevoni.

Na ikarua ni noqu ivakasala e bibi cake sara. Ni dau yalovinaka vei ira na tani. Na yalovinaka e dua na ka era sa cakava oti tiko e vuqa na noda itabagone. Eso na ilawalawa itabagone ena so na itikotiko era sa vakaraitaka tiko vei keda kece na sala. Eda sa vakauqeti ena nodra yalovinaka na noda itabagone vei ira era vakaleqai tu ka gadreva me ra vukei. Ena vuqa na ivakarau o ni sa veisolitaka kina vakataki kemuni na loloma oya. Keimami diva me ra na muria na tamata kecega na nomuni ivakaraitaki.

Ena gauna vata oqori, eda kila ni temaki keda tiko na vunica me da dau yaloca, ka levu na kena ivakaraitaki, vei ira sara mada ga na gonelalai kei na itabagone. Na yaloca e kilai tu ena vuqa na yaca, me vaka na veivaqaseni, veibuturaki, se cokovata me da saqata e dua. Na ivakaraitaki oqo e dau vakavuna na mosi vei ira eda kalasi vata se itokani. Kemuni noqu itokani lomani, e sega ni marautaka na Turaga kevaka eda cakaca se itovo ca vei ira na tani.

Oqo e dua na kena ivakaraitaki. Au kila e dua na cauravou, e dua na ise e Utah, a vakalialiai ni duatani, oka kina ena so na gauna ni dau vosa ena nona ivosavosa. A vosa vakacacani mai vei ira eso na itabagone bula galala me yacova ni veivorati ka vakavuna nona vesu tu me 70 na siga ni waraka tiko nona vakau lesu ki nona vanua. Au sega ni kila se cava e uqeti ira na ilala itabagone oqo, e levu era Yalododonu Edaidai vakataki kemuni, ia au rawa ni raica na imawe ni nodra itovo ca, yaco kina e dua na gauna ca vua e dua na luvena na Kalou. Na ivalavala lalai ni yaloca e rawa ni levu na kena revurevu.

Niu rogoca na italanoa oya, au vakatauvatana ki na veika a tukuna noda parofita, o Peresitedi Nelson, ena lotu raraba ni itabagone se qai oti wale toka. Au kerei kemuni kei ira kece tale na vo ni itabagone mo ni veivuke ena vakasoqoni Isireli, e kaya o koya: “Tucake; mo duatani mai vei vuravura. E daru sa kila vinaka tu ni dodonu mo dua na rarama kei vuravura. Koya gona, sa gadreva na Turaga mo irairai, vosa, itovo, ka isulusulu vakatisaipeli dina i Jisu Karisito.”⁷

Na mataivalu ni itabagone e sureti iko o Peresitedi Nelson mo lewena era na sega ni dau veivakacacani. Era na muria na ivakavuvuli ni iVakabula me ra dauloloma ka dau kauwaitaki ira na tani, me ra goleya yani na baludra kadua ni dua e cakacala vei keda.

Ena dua na vosa ni koniferedi raraba rauta na gauna o ni a sucu kina, a vakacaucautaki ira na “goneyalewa rairai totoka era segata tiko me ra bulataka na kosipeli” o Peresitedi Gordon B. Hinckley. A vakamacalataki ira, me vaka au nanuma meu vakamacalataki kemuni kina nikua:

“Era dau lomasoli vei ira tale eso. Era veivakaukauwataki vakataki ira. Era isolisoli vinaka vei ira nodra itubutubu kei na vuvale era cavutu mai kina. Era sa vavaca tiko yani na bula vakamarama ka na kauta voli ena nodra bula taucoko na veika talei era bulataka tu ena gauna oqo.”⁸

Niu italai ni Turaga, au kaya vei kemuni na goneyalewa, e gadreva na vuravura na nomuni vinaka kei na loloma. Ni dau yalovinaka vakataki kemuni. E vakavuvulitaka vei keda o Jisu me da veilomani ka cakava vei ira na tani na veika eda vinakata me caka vei keda. Ni da segata me da yalo vinaka, eda sa toro voleka yani kina Vua kei na Nona veivakayarayarataki loloma.

Kemuni na ganequ lomani, kevaka o ni dau vakaitavi ena veika ca—o iko duadua se vakailawalawa—yalataka oqo mo veisau ka vakauqeti ira tale eso me ra veisau. Oqori na noqu ivakasala, kau solia vei kemuni niu dua na italai ni Turaga o Jisu Karisito baleta ni uqeti au na Yalona meu vosa vei kemuni ena ulutaga bibi oqo. Au vakadinadinataki Jisu Karisito, na noda iVakabula, o koya a vakavulica vei keda me da veilomani me vaka ni sa lomani keda. Au masuta me da vakayacora vakakina. Ena yaca i Jisu Karisito, emeni.