Nai Dola ni Vosa
Mai vei Peresitedi Russell M. Nelson
Sa gauna oqo ena Lotu me kena usutu na vuvale, tokoni ena veika e yaco ena loma ni noda tabana, tabanalevu, kei na iteki.
Kemuni na taciqu kei na ganequ lomani, keimami sa nanamaki tiko meda mai soqoni vata tale ena koniferedi raraba ni Lotu ni Okotova oqo. Keimami sa veikidavaki yani ena yalololoma vei kemuni yadua. Keimami sa vakavinavinakataka vakalevu na nomuni masu veitokoni. Keimami sa mai vakila na kena mana. Vinaka vakalevu!
Sa vakavinavinakataki vakalevu na nomuni sasaga cecere mo ni muria na ivakasala ni koniferedi raraba ni vula ono sa oti. Era vakasaqara na peresitedi ni Iteki e vuravura taucoko na ivakatakila me tuvai vou na kuoramu ni italatala qase. O ira na tagane ena vei kuoramu oqori kei ira na marama yalodina ni iSoqosoqo ni Veivukei era sa gumatua ena veiqaravi vei ira na wekada turaga kei na marama ena sala cecere, ka vakalou sara. Keimami sa vakauqeti ena nomuni vinaka kei na sasaga qaqa me kau yani na loloma ni iVakabula ki na nomuni vuvale, vei ira na wekamuni, kei na itokani ena veiqaravi me vakataki Koya.
Tekivu mai na koniferedi ni Epereli, keirau sa sotava tiko kei Sis. Nelson na lewenilotu e vuravura raraba kei na veiyanuyanu. Mai Jerusalemi ki Harare, mai Winnipeg ki Bangkok, keirau a sovata na nomuni vakabauta cecere kei na qaqaco ni nomuni ivakadinadina.
E ka levu neirau marautaki ira na itabagone era sa lewena na mataivalu ni itabagone ni Turaga me vukea na sokumuni Isireli sa veiseyaki.1 Keimami sa vakavinavinaka vei kemuni! Me vaka ko ni sa vakamuria tiko na noqu veisureti ena lotu e vuravura raraba ni itabagone, ko ni sa tura tiko na itagede me keimami na muria yani. Sa laurai levu na veisau ko ni sa cakava tiko na itabagone!
Ena veiyabaki sa oti, keimami a vakacolati na matabose veiliutaki ni Lotu ena dua na taro bibi: meda kauta vakacava na kosipeli ena kena savasava kei na cakacaka vakalotu kei na kena mana tawamudu, vei ira kece na luve ni Kalou?
Vei keda na Yalododonu Edaidai, sa matau meda nanuma tu ni “lotu” sai koya na ka e yaco e noda valenilotu, ka tokoni ena ka e yaco ena noda itikotiko. Sa dodonu me veisautaki na ivakarau oqo. Sa gauna oqo ena Lotu me kena usutu na vuvale, tokoni ena veika e yaco ena loma ni noda tabana, tabanalevu, kei na iteki.
Ena kena sa tete tiko na Lotu e vuravura taucoko, e vuqa na lewenilotu era tiko ena vanua e sega kina na valenilotu—ka na sega tiko beka ga ena veisiga ni mataka. Au nanuma kina e dua na matavuvale, ena vuku ni ka oqo, ratou sa lotu ga kina e nodratou itikotiko. Au a tarogi tinadratou e taleitaka vakacava nodratou lotu tiko e nodratou itikotiko. A sauma mai, “Au taleitaka! Sa mai vosavosa vinaka sara na watiqu ena neitou itikotiko, baleta ni kila ni na masulaka tiko na sakaramede eke ena vei Siga Tabu.”
Sa inaki tudei tu mai ni Lotu me vukei ira kece na lewenilotu me tubu nodra vakabauta noda Turaga o Jisu Karisito kei na Nona Veisorovaki, ka vukei mera cakava ka maroroya nodra veiyalayalati kei na Kalou, ka me qaqaco ka vauci nodra vuvale. Ni sa veimedreyaki sara o vuravura nikua, ena sega ni rawarawa. O vu-ni-meca sa valuta tikoga na noda vakabauta kei keda kei na noda vuvale ena kena kaukauwa sara. Meda bulaqaqa tiko ga vakayalo, ena gadrevi noda viribaita ka qaseta noda lalawa ka ni tuvatuva. Sa vakakina, kena gadrevi oqo meda tuva vou na mataisoqosoqo eso mera vaqaqacotaki ira noda lewenilotu kei na nodra vuvale.
Ena vuqa na yabaki, era sa cakacakataka tiko mai na iliuliu ni Lotu e dua na lewenivuli cokovata me qaqaco na vuvale kei na tamata yadua ena ituvatuva e kena usutu na vuvale ka tokona-na Lotu me vulici na vunau, qaqacotaka na vakabauta, ka me cecere na sokalou ni tamata yadua. Na noda sasaga ena veiyabaki oqo me rokovi na Siga ni Vakacecegu—me rekitaki ka noda dui ivakadinadina vua na Kalou ni da lomani Koya—ena semati ena veisau vou sa vakatakilai yani oqo.
Ena mataka nikua sa na vakaraitaki yani e dua na vakatauvata vou sema ni ivakasala ni kosipeli ena itikotiko kei na Lotu. Sa noda itavi yadua meda vaqaqacotaka na noda dui bula vakayalo. Na ivolanikalou e vakamatatataka ni sa nodra itavi taumada na itubutubu mera vakavulica na vunau vei ira na luvedra.2 Sa nona itavi na Lotu me vukea na lewenilotu yadua ena inaki tuvai vakalou o ya me tubu cake na nodra kilaka ena kosipeli.
Ena qai vakamacalataka oqo o Elder Quentin L. Cook na veisau bibi oqo. Na lewe kece ni Matabose ni Mataveiliutaki Taumada kei na Kuoramu ni iApositolo Le Tinikarua era sa duabau ena vakadonui ni itukutuku oqo. Eda sa vakavinavinaka ki na veivakauqeti ni Turaga sa vakayaloqaqataka me tarai cake na ituvatuva kei na ivakarau ena vakaraitaka tiko o Elder Cook.
Kemuni na taciqu kei na ganequ, au kila ni bula tiko na Kalou! Sai Jisu na Karisito! Oqo na Nona lotu sa dusimaka tiko ena parofisai kei na ivakatakila vei ira na Nona italai yalomalua. Sa noqu ivakadinadina oqo ena yaca i Jisu Karisito, emeni.