Taura vei Keda na Yaca i Jisu Karisito.

Mai vei Elder Robert C. Gay

Ena Mataveiliutaki ni Vitusagavulu

Meda taura mada vei keda na Yaca i Jisu Karisito—ni da rai me vaka sa rai O Koya, ni da na veiqaravi me vaka sa veiqaravi O Koya, ka meda vakabauta ni Nona loloma soliwale sa veirauti.

Kemuni ni na wekaqu lomani, gauna oqo, niu a vakasamataka tiko na ivakavuvuli nei Peresitedi Russell M. Nelson me kacivi na Lotu ena yacana vakatakilai, au a vuki ena nona vakarota na iVakabula vei ira na Nifai baleta na yaca ni Lotu.¹ Niu a wilika na vosa ni iVakabula, au a kurabui ena nona kaya talega vei ira na tamata “mo ni vakatokai ena yacai Karisito.”² Na ka oqo e vakavuna meu raici au ka taroga, “Au sa taura tiko li vei au na yaca ni iVakabula me vaka e vinakata O Koya vei au?”³ Nikua au vinakata meu wasea eso na rai kau ciqoma mei sau ni noqu taro.

Matai, meda taura na yaca i Karisito e tukuna ni da na saga meda raica me vaka sa raica na Kalou.⁴ E dau rai vakacava na Kalou? E kaya o Josefa Simici, “Ni yaco e dua na iwase levu ni kawa tamata e vakalewa ka rulaka sega ni loloma tiko e dua tale, na iTubutubu Levu ni ka kecega e raibaleta na matavuvale kece vakatamata ena kauwai vakatama kei loloma vakaitubutubu” ni sa “Tawakilai na levu ni Nona loloma.”⁵

Ena vica na yabaki sa oti a toki yani kina na ganequ qase. E dau bolei nona bula. E vakatovolei vakalevu ena kosipeli ka sega ni kaukauwa sara. Na watina a biuta tu nodrau vakamau kei na va na luvedrau me qai susuga tu. Ena yakavi ni nona takali, ena dua na rumu ka ra tu kina na luvena, au a vakalougatataki koya me lesu ena vakacegu ki vale. Ena gauna oya au kila kina niu dau raica na bula nei ganequ mai na yasa ni nona dredre kei na tawalotu. Niu sa vakotora na ligaqu ki uluna ena yakavi oya, au a ciqoma e dua na cudruvi katakata mai na Yalo. Sa caka meu vakila vakaukauwa na nona vinaka kau vakatarai meu raici koya me vaka e raici koya na Kalou—ka sega ni vaka e dua e tovolea vakaukauwa voli ena kosipeli kei na bula, ia me vaka e dua ka sotava na veika dredre ka sega ni tu vei au. Au raici koya me vaka e dua na tina uasivi ka, dina ga ni tu na itatarovi lelevu, a susuga e va na gone totoka, ka vakasakiti. Au raici koya ni a itokani nei tinai keitou ka dau soli gauna me raici koya ka tiko kei koya ni sa takali ko tamai keitou.

Ena iotioti ni yakavi oya kei ganequ, au vakabauta ni a tarogi au tiko na Kalou, “O sega li ni raica ni ko ira era wavoliti iko era ka bula mareqeti?”

Ea vakatavulica o Brigham Young:

“Au gadreva meu uqeti ira na Yalododonu … mera kilai ira na tagane kei na yalewa me vakai ira ga ka sega ni kilai ira me vakai iko.”⁶“

Sa vakawasoma ni dau tukuni—‘Na tamata vakaoya e sa cakacala ka sega ni rawa ni Yalododonu.’ … Eda rogoca ni dua e vosaca se lasu … [se] voroka na Siga ni vakacecegu. … Kakua ni vakalewa na tamata vakaoya, ka ni ko sega ni kila na ituvatuva ni Turaga me baleti ira. … [Ia,] vosoti ira ga.”⁷

E dua beka vei kemuni e rawa ni raitayaloyalotaka na iVakabula ni laivi iko kei na nomu icolacola me lakosiviti Koya ka sega ni raici iko? Na iVakabula a raica na kai Samaria, na dauyalewa, na kumuni ivakacavacava, na vukavuka, na vakaleqai ni vakasama, na ivalavalaca ena mata vata ga O keda kece eda luvei Tamada Vakalomalagi. Eda rawa ni vueti kece.

E rawa beka ni ko raitayaloyalotaki Koya ni vuki tani mai vua ka yalobibi ka vakatitiqataka na nona tikina ena matanitu ni Kalou se mai vua e dua e sotava tu na dredre cava ga e lako curuma tiko?⁸ Au sega ni rawa. Ena mata i Karisito, na tamata yadua e tawayalani ka yaga. E sega ni dua e lesi rawa tu mai me mai druka. Na bula tawamudu e rawa vei keda kece.⁹

Mai na veicudruvi ni Yalo ena tiki ni idavodavo nei ganequ, au a vulica e dua na lesoni levu: ni da rai me vaka e raica O Koya, ena noda na qaqa tabeirua—na veisereki vei ira eda tara kei na veisereki vei keda.

Karua, meda taura na yaca i Karisito, e sega walega ni dodonu meda rai me vaka sa raica na Kalou, ia e dodonu meda cakava Nona cakacaka ka veiqaravi me vaka e veiqaravi O Koya. Eda na bulataka na rua na ivunau lelevu, cuva ki na lewa ni Kalou, soqona na Isireli, ka biuta na noda rarama “me caudre e matadra na tamata.”¹⁰ Eda ciqoma ka bulataka na veiyalayalati kei na cakacaka vakalotu ni Nona Lotu vakalesuitale.¹¹ Ni da cakava oqo, ena solia vei keda na Kalou na kaukauwa me vakalougatataki keda, noda matavuvale, kei na nodra bula na tani.¹² Ni tarogi kemuni, “Au kila beka e dua ka sega ni gadreva na kaukauwa kei lomalagi ena nona bula?”

Na Kalou ena cakacaka vakurabui ena keda maliwa ni da vakatabui keda vakai keda.¹³ Eda vakatabui keda ni da vakasavasavataka na lomada.¹⁴ Eda vakasavasavataka na lomada ni da rogoci Koya,¹⁵ veivutunitaka noda ivalavalaca,¹⁶ ka veisau,¹⁷ ka loloma me vaka sa loloma O Koya.¹⁸ E tarogi keda na iVakabula, “Ia kevaka dou lomani ira sa lomani kemudou, a cava ena kemudou isau?”¹⁹

Au qai vulica walega baleta e dua na ka sotavi ena bula nei Elder James E. Talmage ka yaco meu tu vakadua ka vakasamataka na noqu lomani ka qaravi ira ka wavoliti au. Ni se dua na parofesa gone, ni se bera ni iApositolo ka ni se tavuso tu na mate dewa rerevaki na diptheria ni 1892, a kunea o Elder Talmage e dua na matavuvale vulagi, sega ni lewe ni Lotu, ka ra bula volekati koya ka ratou bitaki tu ena mate koya. E sega ni dua e via rivarivabitaka nona bula me lako ki loma ni nodratou vale na tauvimate. Ia ko Elder Talmage, a qai lako vakusakusa yani ki nodratou vale. E kunea e va na gone, e dua na gone yabaki-rua-veimama sa mate tu ena davodavo, e dua na yabaki lima kei na dua na yabaki tini ka mosi vakalevu, kei na dua na yabaki tini-ka-tolu e malumalumu. O irau na itubutubu erau rarawa ena lolosi kei na wawale.

E vakasuluma na mate kei na bula o Elder Talmage, taviraka na rumu, kauta ki tuba na isulu duka, ka vakama na isulu vakasisila ka tauva tu na mate. E cakacaka ena siga taucoko ka lesu tale ena siga ka tarava. Ko koya na yabaki tini e mate ena bogi. E keveta ka roqota na gone yabaki lima. E vutaka mai na luka dra o goneyalewa ki matana kei na nona isulu. E vola, “Au sega ni rawa ni biuti koya tani mai vei au,” ka a roqoti koya me yacova ni sa mate e ligana. E veivuke o koya me buluti ratou na tolu na gone ka vakarautaka mai na kakana kei na isulu ki na vuvale lolosi. Ena nona lesu mai ki vale, a biuta tani o Brother Talmage na nona isulu, ka sili ena wainimate, vakatikitiki mai na nona matavuvale, ka voraki ni tauvi koya vakalailai na mate.²⁰

E levu na bula wavoliti keda era leqa tu. O ira na Yalododonu era taura vei ira na yaca ni iVakabula ni ra yaco mera savasava ka veiqaravi raraba se evei se vakacava nodra ituvaki—na bula ena vakabulai ni da vakayacora vakaoqo.²¹

Kena icavacava, au vakabauta ni da taura vei keda na Yacana e dodonu meda vakabauti Koya. Ena dua na soqoni kau a tiko kina ena dua na Sigatabu, a taroga e dua na goneyalewa vakaoqo: “Keirau qai veitalatala ga kei noqu itau, ka sa digia o koya me biuta na Lotu. E tukuna vei au ni se sega ni bau marau vakalevu cake. E yaco vakacava evei na ka oqo?”

E sauma na taro oqo na iVakabula ena Nona tukuna vei ira na Nifai, “Ia kevaka sa sega ni tara cake ena noqu kosipeli ka sa tara cake ga ena cakacaka ni tamata se ena cakacaka ni tevoro, au sa kaya vakaidina vei kemuni, ena vakalekaleka ga na nodra marautaka na nodra cakacaka, ia ena dua na gauna lekaleka, ena yaco mai na ivakataotioti.”²² E rawarawa ga ni sega na marau gugumatua ena taudaku ni kosipeli i Jisu Karisito.

Ena soqoni oya au a vakananumi ira na tamata vinaka e vuqa kau kila ka ra colata na icolacola bibi eso kei na ivunau ka vuturitaki vei ira ena gauna vinaka duadua. Au tarogi au, “Na cava tale beka e rawa ni tukuna vei ira na iVakabula?²³ Au vakabauta ni rawa ni tarogi ira O Koya, “Ko vakabauti au li?”²⁴ Vua na marama turidrabalavu sa kaya Ko Koya, “Sa vakabulai iko na nomu vakabauta; mo lako ena vakacegu.”²⁵

E dua na noqu tiki taleitaki ena ivolanikalou na Joni 4:4, ka tukuna, “A sa koto na nona sala e loma ni vanua ko Samaria.”

Au taleitaka vakacava na tiki ni ivolanikalou oya? Baleta ni sega ni gadreva o Jisu me lako ki Samaria. Ko ira na Jiu ni Nona gauna era cati ira na kai Samaria ka lako ena sala wavokiti Samaria. Ia ko Jisu e digia me lako ki kea me vakatakila e matadra kece na tamata ni sai koya na Mesaia yalataki. E na itukutuku oqo, e sega ga ni digitaka O Koya e dua na ilawalawa biliraki, ia e dua talega na yalewa—e sega ni dua ga na yalewa ia e dua ka bula ivalavalaca tu—e dau ka nanumi ena gauna oya ni lolovira taudua. Au vakabauta ni kitaka oqo ko Jisu me rawa ni da dau kila yadudua ni Nona loloma e uasivi cake mai na noda rere, noda vakatotogani, noda vakatitiqa, noda vakatovolei, noda ivalavalaca, noda vuvale kavoro, noda lomabibi kei na lomaleqa, noda sega-na-vale, noda gagano vakayago vata, noda tauvimate wasoma, noda dravudravua, noda vakacacani, kei na noda galili.²⁶ E vinakati keda kece meda kila ni sega ni rawa ni dua na ka ka dua na tamata e sega ni rawa ni vakabula Ko Koya ka laveta ki na marau gugumatua.²⁷

Na Nona loloma soliwale sa talavo.²⁸ O Koya duadua ga e sa siro ki na ruku ni ka kecega. Na kaukauwa ni Nona Veisorovaki sa ikoya na kaukauwa me rawata na icolacola cava ga ni bula.²⁹ Na itukutuku ni yalewa ena ikeli-wai sa ikoya ni kila O Koya na noda ituvaki ni bula³⁰ ka rawa ni da lako vata kei Koya veitalia ga na vanua eda tucake tu kina. Vei koya na yalewa kei keda yadudua, e kaya Ko Koya, “Ia ko koya sa gunuva na wai kau na solia vua ena sega sara ni viagunu ka tawa mudu; ia na wai kau na solia vua, ena tu e lomana me mata-ni-wai sa tovure ki na bula tawamudu.”³¹

Ena dua ga na ilakolako ni bula na cava sara beka ko na via vuki tani kina mai na iVakabula duadua e tu vua na kaukauwa me vakabulai ka sereki iko? Na cava ga na isau ka dodonu mo sauma mo vakabauti Koya kina ena yaga. Oi kemuni na taciqu kei na ganequ, meda digia meda vakatubura noda vakabauta na Tamada Vakalomalagi kei na noda iVakabula, ko Jisu Karisito.

Mai na yaloqu taucoko e loma, au vakadinadinataka ni Lotu i Jisu Karisito ni Yalododonu Edaidai e Lotu ni Vakabula; dusimaki mai vua na Karisito bula mai vua e dua na parofita bula. Sa noqu masu ni da na taura vei keda na Yaca i Jisu Karisito—ni da na rai me vaka sa rai O Koya, ni da na veiqaravi me vaka sa veiqaravi O Koya, ka meda vakabauta ni Nona loloma soliwale sa talavo me talaci keda ki vale kei na marau gugumatua. Ena yaca i Jisu Karisito, emeni.