Veika vakasakiti mai nai ka 188 ni Koniferedi Raraba Vakayabaki

Sa baci yaco tale, me kaburaki yani na veisau lelevu ena koniferedi raraba. Dina ga ni duidui na itukutuku ena gauna oqo, na kedra inaki sa tautauvata tikoga: Sa vakasama maqusa nei parofita ni Kalou meda sa vakarautaki ki na iKarua ni Lako Mai ni Turaga ka sa sureti keda meda vaqaqacotaka noda vakabauti Tamada Vakalomalagi kei na Luvena, o Jisu Karisito.

Oqo e vica sara na veisureti bibi kei na yalayala a vakamatatataka o Peresitedi Russell M. Nelson ena koniferedi.

Cakava Me Vakalou Cake na iTikotiko

Ena nona idolavosa, a vakatakila kina o Peresitedi Nelson na kena gadrevi meda veisautaka na noda bula me yaco noda itikotiko me kena usutu na vulici ni kosipeli. “Sa gauna oqo na Lotu me kena usutu na vuvale, tokoni ena ka e yaco ena noda tabana, tabanalevu, kei na iteki.”

Wilika na veisau sa vakaturi tiko me yaco ena itikotiko kei na veisau ena lotu e veitokoni kina (raica na tabana 8).
Raica na ikuri ni itukutuku e “Na Veisau e Vukea na Vakatauvatataki na Veituberi ni Kosipeli ena iTikotiko vakakina ena Lotu” (tabana 117).

“Mo Biuti Vuravura”

A sureti ira na marama o Peresitedi Nelson ena soqoni raraba ni marama mera vakaitavi ena “inaki cecere … e vuravura nikua.” A yalataka, “Eda rawa ni cakava vata na veika kece e gadreva na Tamada Vakalomalagi me vakarautaki ko vuravura ki na iKarua ni Lako Mai i [Jisu Karisito].”

Wilika na va na veisureti nei Peresitedi Nelson vei ira na marama (raica na tabana 68).

“Vakalesuya na Yaca Donu ni Lotu ni Turaga”

Sa kacivi ira na lewenilotu o Peresitedi Nelson mera cavuta na yaca ni Lotu ni iVakabula ena yaca sa solia mai na iVakabula. “Au yalataka vei kemuni kevaka eda solia noda igu me da vakalesuya na yaca donu ni Nona Lotu na Turaga, o Koya e Nona na Lotu oqo ena sovaraka mai Nona mana kei na veivakalougatataki e uluda na Yalododonu Edaidai, me vaka eda se bera vakadua ni bau raica.”

Wilika na ivakasala nei Peresitedi Nelson baleta na yaca ni Lotu (raica na tabana 87).

“Mo Tiko ena Nona Valetabu”

A mai tinia o Peresitedi Nelson na koniferedi ena nona vakaraitaka raraba e 12 na valetabu vou ka veisureti meda “lako vakawasoma … ki na Nona valetabu.” A kaya, “Au yalataka ni Turaga ena kauta mai na mana e kila o Koya ni ko gadreva ni ko solibula mo veiqaravi ka sokalou ena Nona valetabu.”

Raica na veivanua era na tara kina na valetabu sa mai vakaraitaki oqo (ena tabana 113, 116).