Duabau vei Karisito
Mai vei Elder Ulisses Soares
Ena Kuoramu ni iApositolo Le Tinikarua
Kemuni na noqu itokani lomani ena cakacaka ni Turaga, au vakabauta ni rawa ka dodonu me vinaka cake na noda kidavaki ira mai na itokani vovou ki na Lotu.
Ni bula vinaka, kemuni na taciqu kei na ganequ. Keimami dau kaya ena vosa vaka Potukali ni Brazil, “Boa tarde!” Au vakila na veivakalougatataki ni da soqoni vata ena koniferedi raraba vakasakiti ni Lotu i Jisu Karisito ni Yalododonu Edaidai ena nona veidusimaki na noda parofita lomani, o Peresitedi Russell M. Nelson. Au qoroya na madigi cecere e donumaki keda yadua me da rogoca na domona na Turaga mai vei ira na Nona italai e vuravura ena veisiga e muri oqo eda bula donuya.
Na noqu vanua o Brazil sa rui vutuniyau ena ivurevure ni yaubula. E dua vei ira na Uciwai na Amazon, e dua vei ira na uciwai levu ka balavu duadua e vuravura. Erau cokovata kina e rua na uciwai, na Solimões kei na Negro. E talei, ni rau drodro vata ena vica na maile ni se bera ni qai veisola na wai, me vaka ni duidui na vanua erau sucu mai kina, duidui na kedrau totolo, katakata, kei na veika mai lomaniqele era tu kina. Ni oti e vicavata na maile, sa qai veisola na wai, ka yaco me dua na uciwai duidui mai na kedrau ivuvu. Ni rau sa sota na tikina e rua oqo, sa yaco me dua na Uciwai kaukauwa sara na Amazon, ni gauna e yacova yani kina na Wasa Atalanitika, e biliga lesu na waitui ka rawa ni kune na waidroka ena loma ni vicavata na maile ki loma ni wasaliwa.
Ena dua na ivakarau vata oqo ena nodrau drodro vata na Uciwai e rua na Solimões kei na Negro me rau vakavuna na Uciwai levu na Amazon, era lako vata mai na luve ni Kalou ena Lotu i Jisu Karisito vakalesui mai na ituvaki duidui ni bula, na itovo vakavanua, kei na itovonibula, me ra tauyavutaka na ilawalawa Yalododonu i Karisito oqo. Kena ilutua, ni da veivakayaloqaqataki, veitokoni, ka veilomani, eda cokovata me bulia e dua na kaukauwa levu ni vinaka e vuravura. Ni da dau muri Jisu Karisito, drodro vata ena uciwai ni vinaka oqo, ena rawa ni da vakarautaka na “wai bulabula” ni kosipeli ki na dua na vuravura karamaca.
Sa vakauqeti ira tiko Nona parofita na Turaga me ra vakavulica vei keda na ivakarau e rawa ni da veitokoni ka veilomani kina vakai keda me rawa ni da duavata ena vakabauta kei na inaki ni muri Jisu Karisito. E vakavulica o Paula, na iApositolo ni Veiyalayalati Vou, “ni sai Karisito ga dou sa vakasulumi kemudou kina … : ni dou sa duabau ga koi kemudou kecega, ena vukui Karisito Jisu.1
Ni da yalataka ena gauna ni papitaiso me da muria na iVakabula, eda sa vakadinadinataka kina e matai Tamada ni sa lomada me da taura na yaca i Karisito.2 Ni da segata me da taura na Nona itovo vakalou ena noda bula, eda sa duatani kina mai na keda ituvaki e liu, ena Veisorovaki i Karisito na Turaga, ka na tubu cake ga na noda lomani ira na tamata kecega.3 Eda na kauwaitaka dina sara na nodra tiko vinaka kei na bula marau na tamata kecega. Eda na veiraici ni da veitacini ka veiganeni, ni da luve ni Kalou ka tu na keda ivuvu vakalou, na itovo ni bula, ka da rawa ni yacova. Eda na gadreva me da veikauwaitaki ka veivuketaka na noda icolacola.4
Sai koya oqo na ka e vakamacalataka o Paula me loloma cecere.5 E dua na parofita ena iVola i Momani, o Momani, e vakamacalataka ni loloma savasava i Karisito,6 sai koya na ivakarau ni loloma cecere, vakaturaga, ka kaukauwa duadua. Na noda parofita ena gauna oqo, o Peresitedi Russell M. Nelson, a vakamacalataka e dua na ivakaraitaki ni loloma savasava oqo me veiqaravi, e dua na iwalewale vakanamata ka savasava cake ni nodra lomani ka kauwaitaki na tamata kecega me vaka a vakayacora na iVakabula.7
Vakasamataka mada na ivakavuvuli oqo ni loloma kei na veikauwaitaki, me vaka na iVakabula, ena nodra vakayaloqaqataki, vukei, ka tokoni o ira era se qai saumaki mai kei ira sa tekivu vakaraitaka nodra taleitaka na Lotu.
Ni ra lako tani mai vuravura na itokani vou oqo ka ciqoma na kosipeli i Jisu Karisito, lewena Nona Lotu, sa yaco me ra Nona tisaipeli, era sa sucu vou tale ena Vukuna.8 Era vakanadakuya e dua na vuravura era kila vinaka ka digia me ra muri Jisu Karisito, ena vu ni yalodra, ka curuma e dua na “uciwai” me vaka na Uciwai kaukauwa na Amazon—e dua na uciwai ka ivakaraitaki qaqa ni vinaka kei na dodonu ka drodrova yani na iserau ni Kalou. E vakamacalataka na iApositolo o Pita me “itabatamata digitaki, a matabete vakaturaga, a matanitu yalataki, a tamata sa taukena na Kalou.”9 Ni ra curma yani na uciwai vou oqo o ira na itokani vou, taumada era na vakila beka ni ra lakosese. Era kunei ira na itokani vou oqo ni ra muloni ena dua na uciwai e duatani na kena ivuvu, na kena ivakarau ni katakata, kei na kena wainimate—na uciwai e tu ga na kena ivakarau ni bula, na itovo tudei, kei na ivosavosa. Ena vakadrukai ira beka na bula vou vei Karisito oqo. Vakasamataka mada vakalailai na ivakarau ni lomadra ni ra qai rogoca vakadua na vosa “FHE,” “BYC”, “Sigatabu ni lolo,” “papitaiso ena vukudra na mate,” “toluenadua,” kei na so tale.
E rawarawa sara na kila na vuna era na nanuma kina ni sega ni nodra tikina oqo. Ena veigauna vakaqori, era na taroga beka, “E dua beka noqu tikina eke? E rauti au beka na Lotu i Jisu Karisito ni Yalododonu Edaidai. E gadrevi au beka na Lotu? Au na kunea beka na itokani vou era tuvakarau me ra veivuke ka tokoni au?”
Kemuni noqu itokani lomani, ena gauna vakaqori, o keda eda tu ena veivanua duidui ni ilakolako balavu vakatisaipeli oqo sa dodonu me da dodoka na liga loloma ni veitokani vua na noda itokani vou, ciqomi ira ena vanua era tu kina, ka vukei ira, lomana ka okati ira ki na noda bula. O ira kece na itokani vou oqo era luvena tagane kei na yalewa vakamareqeti na Kalou.10 E sega ni rawa ni da vakayalia e dua mada ga vei ira baleta, me vaka na Uciwai na Amazon ka dau vakararavi ki na kena veitabana lalai ka vakani koya mai, eda gadrevi ira me vaka ga na levu ni nodra gadrevi keda, meda rawa ni yaco me dua na igu kaukauwa ni vinaka ena vuravura.
O ira na noda itokani vou era kauta vata mai kei ira na taledi va-Kalou, na yalo nanamaki, kei na vinaka ki na Lotu. Na nodra nanamaki ki na kosipeli e rawa ni veidewavi, ka na vukei keda me da vakabulabulataka noda dui ivakadinadina. Era kauta talega mai na ivakarau ni rai bulabula ki na noda kilaka baleta na bula kei na kosipeli.
Eda sa vakavulici mai ena dua na gauna balavu ena ivakarau me da vukei ira kina noda itokani vou me ra kidavaki ka lomani ena Lotu vakalesui mai nei Jisu Karisito. Era gadreva e tolu na ka me ra kaukauwa ka yalodina tiko kina ena nodra bula taucoko.
Taumada, era gadreva na tacidra kei na ganedra ena Lotu era kauwaitaki ira dina, na itokani dina ka yalodina e rawa ni ra dau gole kina ena veigauna, ka ra lako vata, ka sauma nodra taro. Ni da lewenilotu sa dodonu me da dau yadra tiko ka vaqara na mata vou ni da lotu tiko se tiko ena itaviqaravi, se cava ga na noda itavi, ilesilesi se kauwai. E rawarawa na veika eda rawa ni cakava me ra vukei na itokani vou oqo me ra vakila ni ra vakamareqeti ka taleitaki ena Lotu, me vaka nodra kidavaki vakavinaka, matadredredre vei ira, dabe vata ena sokalou kei na lagasere, vakamacalataki ira vei ira na vo ni lewenilotu, kei na so tale. Ni da dolava na yaloda vei ira noda itokani vou ena sala eso oqo, eda sa cakacaka tiko ena yalo ni veiqaravi. Ni da qaravi ira me vaka na iVakabula, era na sega ni “vulagi tiko ena noda lomanibai.” Era na vakila ni ra na rawa ni vakaitokani, ka bibi sara, ni ra na vakila na loloma ni iVakabula mai na noda veikauwaitaki yalodina.
iKarua, na itokani vou e gadreva e dua na itavi—dua na madigi me qaravi ira na tani. Na veiqaravi e dua na duru cecere ni Lotu i Jisu Karisito ni Yalododonu Edaidai. Sa ikoya na sala me vaqaqacotaki kina noda vakabauta. Na itokani vou kece e ganiti koya na madigi oya. E dina ni nodra itavi ga na bisopi kei na matabose ni tabanalevu me kacivi ira ni oti ga nodra papitaiso, ia e sega ni dua na ka e rawa ni tarovi keda ena noda sureta noda itokani vou me da veiqaravi vei ira tale eso.
iKatolu, na itokani vou me “vakani ena vosa vinaka ni Kalou.”11 E rawa ni da vukei ira me ra taleitaka ka matau ena ivolanikalou ni da wilika ka veitalanoa vata kei ira ena kena ivakavuvuli, vakaibalebaletaka na italanoa ka vakamacalataka na veivosa e dredre. E rawa talega ni da vakavulici ira ena ivakarau me ra dusimaki yadudua kina ena vuli ivolanikalou. Me kena ikuri, e rawa ni da tarai ira yani na noda itokani vou ena nodra veivale ka sureti ira mai ki na noda, ena taudaku ni veisoqoni tuvai ni Lotu kei na itaviqaravi, ka vukea me ra sobu yani ki na uciwai kaukauwa ni veitokani ni Yalododonu.
Ni da vakadinadinataka na veisau kei na dredre era cakava na noda itokani vovou ena nodra mai lewena na matavuvale ni Kalou, me vaka ni ra tacida ka ganeda, e rawa ni da wasea na ivakarau eda ulabaleta kina na bolebole eso vakaoqori ena noda bula. Oqo ena vukea me ra kila ni ra sega ni tu duadua ka na vakalougatataki ira na Kalou ni ra cakacakataka nodra vakabauta Nona yalayala.12
Ni rau sa veisola na Uciwai na Solimões kei na Negro sa yaco me kaukauwa na Uciwai na Amazon. Ena iwalewale vata, ni da veisola dina kei ira noda itokani vou, sa na kaukauwa ka tudei cake na Lotu i Jisu Karisito ni Yalododonu Edaidai vakalesui mai. Keirau sa vakavinavinaka vakalevu kei na noqu daulomani o Rosana, vei ira kece era a vukei keirau me keirau veisola ena uciwai vou oqo ena vuqa na yabaki sa oti, ni keirau ciqoma na kosipeli i Jisu Karisito ena neirau vanua ko Brazil. Ena loma ni veiyabaki, era sa veiqaravi vakaidina vei keirau o ira na tamata vakasakiti oqo ka ra vukei keirau me keirau drodro tikoga yani ena buladodonu. Keirau sa vakavinavinaka vakalevu vei ira.
Era kila vinaka na parofita ena Ra kei Vuravura na ivakarau me ra taladrodro tikoga kina ena yalodina ena uciwai vou oqo ni vinaka ki na bula tawamudu o ira na itokani vovou oqo. Kena ivakaraitaki ni sa raica rawa na noda veisiga ka kila ni da na sotava na veibolebole vata,13 a okata eso na ikalawa bibi oqori ena iVola i Momani o Moronai:
“Ni ra sa papitaisotaki oti, ka sa soli vei ira na isolisoli ka ra muria ka vakasavasavataki ena kaukauwa ni Yalo Tabu; era sa wili me lewe ni lotu i Karisito; a sa volai na yacadra, me ra na daunanumi ka vakani ena vosa vinaka ni Kalou, me ra tiko ga kina ena sala dodonu, ka vakauqeti me ra daumasu tiko ga ka vakararavi tabakidua ki na loloma i Karisito, o koya sa vakatekivuna ka sauma tale ga na nodra vakabauta.
“Era sa dausoqoni vata wasoma na lewe ni lotu, me ra lolo ka masu ka veivosakitaka baleta na tiko vinaka ni yalodra.”14.
Kemuni na noqu itokani lomani ena cakacaka ni Turaga, au vakabauta ni rawa ka dodonu me vinaka cake sara na ka eda rawa ni cakava ena noda kidavaki ira mai na itokani vovou ki na Lotu. Au sureti kemuni mo ni vakasamataka na veika eda rawa ni cakava me da veimaroroi, veiciqomi, ka veivuke vei ira me tekivu sara ga ena Sigatabu oqo. Qarauna mo ni kakua ni vakatara me vakalatilati ena nomuni kidavaki ira na itokani vovou ena gauna ni soqoni kei na itaviqaravi ni Lotu na nomuni veikacivi. Ni sa ka talei ena mata ni Kalou o ira oqo, ka ra sa ka bibi cake sara mai na veiparokaramu kei na itaviqaravi. Kevaka eda veiqaravi vei ira na itokani vou ena yalo e vakasinaiti tu ena loloma savasava me vaka na iVakabula, au yalataka vei kemuni, ena Yacana, ni na vukei keda o Koya ena noda sasaga. Ni da veiqaravi ena yalodina, me vaka na iVakabula, era na vukei na noda itokani vou me vaka na nodra gagadre me ra tudei, ka yalodina tiko ki na ivakataotioti. Era na duavata kei keda me yaco me da tamata qaqa ni Kalou ka ra na vukei keda me da kauta mai na wai savasava ki na vuravura sa gadreva tu vakalevu na veivakalougatataki ni kosipeli i Jisu Karisito. Era na vakila na luve ni Kalou oqo ni ra “sega ni vulagi tiko se kai tani, era sa koro vata ga kei ira era sa lotu.”15 Au yalataka vei kemuni ni ra na vakadinadinataka na iserau ni iVakabula ena Nona Lotu. Era na drodro vata yani kei keda me vaka e dua na uciwai ki na tobu ni veika vinaka kecega me yacova ni ra sa ciqomi ena lomaserena na Turaga o Jisu Karisito, ka rogoca na Tamada ni kaya, “Dou na rawata kina na bula tawamudu.”16
Au sureti kemuni mo ni vaqara na veivuke ni Turaga ena nodra lomani na tani me vaka na Nona lomani keda. Me da muria na ivakasala nei Momani, “Oi kemudou na wekaqu lomani, mo dou masuta na Tamada ena yalomudou taucoko mo dou vakasinaiti ena loloma oqo, ka sa solia vei ira era sa muria na Luvena o Jisu Karisito.”17 Au sa vakadinadinataka na veidina oqo ena yaca i Jisu Karisito, emeni.