Na iTavi ni iVola i Momani ena Saumaki

Mai vei Elder Shayne M. Bowen

Ena Vitusagavulu

Eda sa sokumuni Isireli tiko ena iotioti ni gauna ka da cakava tiko oqo vata kei na iVola i Momani, edua na iyaya kaukauwa duadua ni saumaki.

E vuqa na tamata nikua e vakananuma baleta na itovo dina ni Kalou kei na keda isema Vua. E vuqa era kila vakalailai se sega saraga baleta na Nona ituvatuva cecere ni veivakabulai. Sivia na 30 na yabaki sa oti, a dikeva rawa o Peresitedi Ezra Taft Benson ni “e vuqa sara … e vuravura era cakitaka na nona vakalou na iVakabula. Era taroga na Nona sucu veivakurabuitaki, na savasava ni Nona bula, kei na dina ni lagilagi ni Nona Tucaketale.”¹

Ena noda siga, na taro eso e sega ni vakanamata walega ki na noda iVakabula ia ki na Nona Lotu talega—Na Lotu i Jisu Karisito ni Yalododonu Edaidai—ka a vakalesuya mai o Koya vua na Parofita o Josefa Simici. Na vei taro oqo vakavuqa e vakanamata ki na isitori, ivakavuvuli, se na veiqaravi ni Lotu ni iVakabula.

Na iVola i Momani e Vukei Keda me Tubu ena iVakadinadina

Eda wilika mai na Vunautaka Noqu Kosipeli: “Nanuma ni noda kila [i Tamada Vakalomalagi kei na Nona ituvatuva ni marau] e lako mai vei ira na parofita ni gauna edaidai—o Josefa Simici kei ira era muri vei koya—ka ra ciqoma vakadodonu na ivakatakila mai vua na Kalou. Koya gona, na imatai ni taro e dodonu me sauma e dua oya se a parofita o Josefa Simici, ka na rawa ni sauma o koya na taro oqo ena nona wilika ka masulaka na iVola i Momani.”²

Na noqu ivakadinadina ni veikacivi vakalou ni Parofita o Josefa Simici e sa vakaukauwataki ena kena vulici ena masumasu na iVola i Momani: Edua Tale na iVakadinadina i Jisu Karisito. Au a sa cakacakataka na veisureti i Moronai ka “kerea vua na Kalou, na Tamada Tawamudu, ena yaca i Karisito,” me kila na dina ni iVola i Momani.³ Au vakadinadinataka ni’u kila ni dina. Na kila oqori e lako mai vei au, me vaka e rawa ni lako vei iko, “ena kaukauwa ni Yalo Tabu.”⁴

Na ivakamacala taumada ki na iVola i Momani e kaya: “O ira era rawata na ivakadinadina vakalou oqo [ni iVola i Momani] mai vua na Yalo Tabu era na kila talega ena kaukauwa vata oqori ni sa iVakabula kei vuravura ko Jisu Karisito, ni sa Nona dauvakatakila ka parofita ena veisiga e muri oqo ko Josefa Simici, kei na Lotu i Jisu Karisito Ni Yalododonu Edaidai sai koya na nona matanitu na Turaga ka sa tauyavutaki tale e vuravura, me vakarautaka na iKarua ni nona Lako Mai na Mesaia.”⁵

Ena i lakolako vakadaukaulotu gone ki Chile, au a vulica e dua na lesoni bibi baleta na kaukauwa ni veivakasaumakitaki ni iVola i Momani. A veiqaravi ena vicavata na yabaki o Mr. Gonzalez ena dua na itutu rokovi ena nona valenilotu. O koya e a vuli vinaka sara, oka kina e dua na koroi ni vulika vakalotu. O koya e a bau daucibitaka nona kilaka vaka‑ivolatabu. E a matata vei keimami ni o koya e dua na tamata vuku vakalotu.

E kilai ira vinaka o koya, na daukaulotu ni Yalododonu Edaidai ni ra qarava voli nodra cakacaka ena nona siti e Lima, Peru. E dau gadreva tu me sotavi ira me rawa ni vakavulici ira o koya ena iVola Tabu.

Ena dua na siga, a nanuma o koya ni vaka ga e dua na isolisoli mai lomalagi, ni rua na daukaulotu e a sotavi koya e gaunisala ka taroga ke rawa ni rau sikovi koya ka wasea na ivolanikalou vei koya. Sa yaco me dina nona tatadra! Na nona masu e sa saumi. Ia oqo, sa na qai rawa vua me vakadodonutaki rau na gone tagane vakacalai oqo. E tukuna o koya vei rau ni na taleitaka me rau lako yani ki nona vale ka veivosakitaka na ivolanikalou.

E a waraka dredre o koya na nona veibuku. E a tuvakarau o koya me vakayagataka na iVola Tabu me vakacala nodrau vakabauta. E a yalodei o koya ni vakamatataka ena vosa kilai na iVola Tabu ka dusia tiko na nodrau cala. A yaco mai na bogi ni veibuku, ka rau tukituki na daukaulotu ena nona katuba. E a malaude o koya. E sa qai yaco dina mai na nona gauna.

E a dolava o koya na katuba ka sureti rau na daukaulotu ki loma ni nona vale. Dua vei rau na daukaulotu a solia vua e dua na ivola karakarawa ka wasea e dua na ivakadinadina yalodina ni kila o koya ni ivola oya e tu kina na vosa ni Kalou. Na ikarua ni daukaulotu e a vakuria nona ivakadinadina kaukauwa ni ivola, ka vakadinata ni a vakadewataki mai vua e dua na parofita ni Kalou ena gauna oqo ka yacana o Josefa Simici ka ni vakavuvulitaki Karisito. Erau a kere vakacegu na daukaulotu ka biuta nona vale.

E a lomabibi sara o Mr. Gonzalez. Ia a dolava na ivola o koya, ka tekivu vakacereka yani na veitabana. E a wilika o koya na imatai ni tabana. A wilika o koya na tabana veitaravi ka sega ni cegu yacova ni sa lai yakavi sobu ni siga tarava. A wilika o koya na ivola taucoko ka kila ni sa dina. A kila o koya na ka e dodonu me cakava. A kacivi rau na daukaulotu o koya, ciqoma na lesoni, ka buita tani na bula e a kila tu eliu ka yaco me lewe ni Lotu i Jisu Karisito ni Yalododonu Edaidai.

Na tagane vinaka oqori e a noqu qasenivuli e MTC e Provo, Utah. Na italanoa ni saumaki nei Brother Gonzalez kei na kaukauwa ni iVola i Momani e a lauti au vakalevu sara.

Ni’u a yaco yani ki Chile, o noqu peresitedi ni tabana ni kaulotu, Peresitedi Royden J. Glade, a sureti keimami me wilika e veimacawa na ivakadinadina ni Parofita o Josefa Simici ka volai ena Josefa Simici—Ai Tukutuku. A vakavulici keimami o koya ni ivakadinadina ni iMatai ni Raivotu ena vakaduavatataki ki na noda ivakadinadina vakai keda ni kosipeli kei na noda ivakadinadina ni iVola i Momani.

Au a taura vakabibi sara na nona veisureti. Au sa wilika na italanoa ni iMatai ni Raivotu; au sa wilika na iVola i Momani. Au sa masulaka me vaka na veisureti i Moronai ka kerea “na Kalou, na Tamada Tawamudu, ena yaca i Karisito”⁶ ke dina na iVola i Momani. Au vakadinadinataka nikua ni’u kila na iVola i Momani, me vaka a kaya na Parofita o Josefa Simici, e “ivola dodonu duadua e vuravura, ka vatu ivakadei ni noda lotu, ka na toro voleka cake vua na Kalou edua na tamata ena nona muria na kena ivakavuvuli, mai na duatale na ivola.”⁷ A kaya talega na Parofita o Josefa: “Ni kau laivi na iVola i Momani kei na ivakatakila kece, sa qai evei beka na noda Lotu? Sa qai sega.”⁸

Na Saumaki ni Tamata Yadua

Ni da kila vinaka cake o cei o keda kei na inaki ni iVola i Momani, e vakatitobutaka ka vakadeitaka cake na noda saumaki. Eda sa vakaukauwataki ena noda yalodina me maroroya na veiyalayalati eda sa cakava kei na Kalou.

E dua na inaki bibi ni iVola i Momani oya me sokumuni Isireli ka a veiseyaki. Na sokumuni oqo e solia vei ira kece na luve ni Kalou na madigi me curu ki na sala ni veiyalayalati ka, ena rokovi ni veiyalayalati oya, lesu tale ki na iserau ni Tamada. Ni da vakatavulica na veivutuni ka papitaisotaki ira na saumaki, eda sa sokumuni Isireli tiko ka a veiseyaki.

Na iVola i Momani e tukuni kina vaka 108 na mataqali i Isireli. Ena itekitekivu ni iVola i Momani, o Nifai e a vakatavulica, “Ni sa inaki taucoko ni lomaqu me’u vakamasuti ira na tamata me ra lako mai vua na Kalou i Eparaama, kei na Kalou i Aisake, kei na Kalou i Jekope, me ra vakabulai.”⁹ Na Kalou i Eparaama, Aisake, kei Jekope o Jisu Karisito, na Kalou ni Veiyalayalati Makawa. Eda sa vakabulai ni da lako mai vei Karisito ena bulataki ni Nona kosipeli.

E muri, a qai vola o Nifai:

“Io, sa vosataka ko tamaqu e vuqa na ka me baleti ira na kai Matanitu Tani, ka baleta talega na mataqali i Isireli, ni’ra na vakatautauvatataki kei na vu ni olive, era sa tamusuki tani na tabana ka veibiuyaki e delai vuravura. …

“Ni oti na nodra veiseyaki na mataqali i Isireli era na qai vakasoqoni vata tale; se, me vakalekaleka ga, ni ra sa ciqoma oti na taucoko ni kosipeli ko ira na kai Matanitu Tani, ena qai semati tale ki na vu ni olive na taba ni olive dina, se ko ira na ivovo ni mataqali i Isireli, e ra sa na qai kila na itukutuku ni Mesaia dina, na nodra Turaga kei na nodra Dauveivueti.”¹⁰

E vakakina, ena icavacava ni iVola i Momani, na parofita o Moronai e vakananumi keda ena noda veiyalayalati, ni kaya, “Mo kakua kina ni vakasesei tale, me vakayacori kina na veiyalayalati ka cakava na Tamada Tawamudu vei kemudou, na mataqali i Isireli.”¹¹

Na Veiyalayalati ni Tamada Tawamudu

Na cava na “veiyalayalati ni Tamada Tawamudu” a vakaibalebaletaka o Moronai? Eda wilika ena ivola i Eparaama:

“Na yacaqu ko Jiova, kau sa kila na icavacava mai na itekitekivu; ia ena vakarurugi iko tiko na ligaqu.

“Kau na cakava mai vei iko e dua na matanitu levu, kau na vakalougatataki iko me sega ni vakarautaki rawa na kena levu, kau na vakarogoya na yacamu ena veimatanitu kecega, ia ko na veivakalougatataki vei ira na nomu kawa era na muri mai vei iko, ia ena ligadra era na kauta kina na nona cakacaka kei na Matabete ki na veivanua kecega.”¹²

O Peresitedi Russell M. Nelson a vakavulica ena dua na kakaburaki e vuravura raraba se qai oti ga ni “oqo na iotioti ni gauna, ka sa maqusataka tiko na Turaga na Nona sokumuni ira na Isireli. Na vasokumuni oqo sa ka bibi duadua e yaco tiko e vuravura nikua. E sega tale ni vakatauvatani rawa na kena cecere, na kena sa rui bibi, ka sega ni vakatauvatani rawa na kena qaqa. Ke o sa digitaka, se o sa vinakata, sa rawa mo tiki ni cakacaka oqo. Sa rawa mo mai tiki ni dua na ka levu, dua na ka cecere, dua na ka vakaturaga!

“Ni da tukuna tiko na sokumuni, eda sa kaya tiko na ka dina oqo: ni luvena yadua na Tamada Vakalomalagi, ena yasa ruarua ni ilati, mera na rogoca na itukutuku ni kosipeli vakalesuimai i Jisu Karisito. Era na lewa ga vakai ira ke ra gadreva me ra kila vakalevu.”¹³

Oqori na ka eda cakava tiko vaka lewe ni Lotu i Jisu Karisito ni Yalododonu Edaidai: eda vakasaqara tiko me kauta mai na vuravura ki na dua na kilaka ni—kei na saumaki ki—na kosipeli i Jisu Karisito. Eda sa “dau‑ni‑sokumuni edaidai.”¹⁴ Na noda ilesilesi e sa matata. Taciqu kei na ganequ, meda sa kilai me o ira era sa taura na yalayala i Moronai ki yaloda, masulaka ka ciqoma na kena isau me kila ni iVola i Momani e dina, ka qai wasea na kila oqori kei ira na tani ena vosa ka, vakabibi duadua, ena cakacaka.

Na iTavi ni iVola i Momani ena Saumaki

Na iVola i Momani e tu kina na taucoko ni kosipeli i Jisu Karisito.¹⁵ Ena liutaki keda ki na veiyalayalati nei Tamada, kevaka ena maroroi ena vakadeitaka vei keda na Nona isolisoli cecere duadua—na bula tawamudu.¹⁶ Na iVola i Momani esa vatu ivakadei ki na nodra saumaki na luvena tagane kei na yalewa kece na Tamada Vakalomalagi.

E a kaya o Peresitedi Nelson: “Ni ko … wiliwili tikoga e veisiga mai na iVola i Momani, ko na vulica na vunau ni sokumuni, na dina me baleti Jisu Karisito, na Nona Veisorovaki, kei na taucoko ni Nona kosipeli era sega ni tiko ena iVola Tabu. Na iVola i Momani sa usutu ni nodra sokumuni na Isireli. E dina, kevaka me sega na iVola i Momani, na sokumuni yalataki i Isireli ena sega ni yaco.”¹⁷

Me’u tinia ena vosa ni iVakabula ni a vakatavulici ira na Nifaiti ena veivakalougatataki yalataki: “Ko ni sa nodra kawa na parofita; ka ko ni sa mataqali i Isireli; ko ni sa tamata ni veiyalayalati ka cakava ko Tamada vei ira na nomuni qase, ni a kaya vei Eparaama: Ena vuku ni nomu kawa ena kalougata kina na veimataqali kecega e vuravura.”¹⁸

Au vakadinadinataka ni da sa luvena tagane kei na luvena yalewa na Kalou, na kawa i Eparaama, na mataqali i Isireli. Eda sa sokumuni Isireli tiko ena iotioti ni gauna ka da cakava tiko oqo kei na iVola i Momani—e dua na ivola ka, ni cakacaka kei na Yalo ni Turaga, e iyaya kaukauwa duadua ni saumaki. Eda sa liutaki mai vua na parofita ni Kalou, o Peresitedi Russell M. Nelson, o koya ka dusimaka tiko na sokumuni i Isireli ena noda siga. Na iVola i Momani e dina. Sa veisautaka na noqu bula. Au yalataka vei iko, me vakai Moronai kei na vuqa na parofita ni vei tabayabaki, ni rawa ni veisautaka na nomu.¹⁹ Ena yaca i Jisu Karisito, emeni.