Kakaongoraan te ka 188 ni Maungatabu ni Kabuta te Kauatai n te Ririki

N aron are mai mwaina, a katanoataaki bitaki aika korakora n te maungatabu ni kabuta. E ngae ngke katanoata aikai a kaokoro n te tai aei, te kaantaninga ibukin karaoaia bon ti te arona: Ana Burabeti te Atua e namakina te kairoro ni katauraoira nakon Kauaokin te Uea ao ni kaoira bwa ti na kakorakora ara onimaki iroun Tamara are i Karawa ao Natina, Iesu Kristo.

Aikai tabeua boton kakao ao berita ake a kabwarabwaraaki iroun Beretitenti Russell M. Nelson n tain te maungatabu.

Katabua Riki te Mweenga

N ana taeka ni kaukuki, Beretitenti Nelson e kabwarabwara bwa e riai karaoan bitaki inanon maiura ake e na karika mweengara bwa te tienta ni kamatebwaian te euangkerio. “Ngkai bon te Ekaretia ae boboto iaon te mweenga, e boutokai baike a karaoaki inanon ara mwaanga, ara uoote, ao n autin te titeiki.”

Warekii rongorongon bitaki ake a kaungaaki n te mweenga ao bitaki ake n te ekaretia ake a boutokaii (taraa iteraniba 8).
Kakaaea riki rongorongona n “Bitaki a buoka Kabaerantan Reiakinan te Euangkerio n te Mweenga ao n te Ekaretia” (iteraniba 117).

“Katinanikua te Aonaaba”

Beretitenti Nelson e kaoia aine n aia tetere te bootaki n aine bwa a na ira ngkai buakon te “mwakuri are korakora n te aonaaba.” E berita, “Ngkana ti katiteuanaaki ao ti kona ni karaoi bwaai ake e kainnanoira te Tama are i Karawa bwa ti na karaoi ni katauraoa te aonaaba ibukin Kauaokin [Iesu Kristo] .”

Wareka aua ana kakao Beretitenti Nelson nakoia aine (taraa iteraniba 68).

“Kaokan Aran ana Ekaretia te Uea nakon ae Eti”

Beretitenti Nelson e kairoroia membwa n te Ekaretia bwa a na wetea ana Ekaretia te Tia Kamaiu n te ara are E anga te Tia Kamaiu. “I berita nakoimi bwa ngkana ti karaoa ara kabanea n tamaroa ni kaeta aran ana Ekaretia te Uea, Ngaia are bon ana Ekaretia aei E na kanakoa Mwaakana ao ana kakabwaia nakoia Aika Itiaki, n te aro ae ti tuai n nooria mai mwaina.”

Wareka ana kabwarabwara Beretitenti Nelson iaon aran te Ekaretia (taraa iteraniba 87).

“Riin n Ana Auti ae Tabu”

Beretitenti Nelson e kaina te maungatabu ma katanoataan 12 tembora aika boou ao te kakao nakon te “kakaonimaki … n rin n Ana auti ae tabu .” E taku, “I berita nakoimi bwa te Uea e na karokoi kakai ake E atai bwa kam kainnanoi n te tai are kam karaoi iai anga nano ni mwakuri ao n taromauri inanon Ana tembora.”

Noori taabo ake a na kateaki iai tembora aika a boou (taraa iteraniba 113, 116).