Ti Temanna Ngkami i nanon Kristo
Iroun Unimwaane Ulisses Soares
Man te Kooram n Abotoro n te Tengaun ma Uoman
Raou aika a tangiraki n ana mwakuri te Uea, I kakoaua bwa ti kona ni karaoa riki ae tamaroa ao n riai ni karaoa ae raoiroi ni butimwaaia raoraora aika a boou nakon te Ekaretia.
Mauri n te tawanou, tariu ao mwaaneu aika kam tangiraki. Ngkai ti taekinna n au taetae n Brazilian ni Portuquese, “Boa tarde!” I namakina te kakabwaiaki ni kaai ni bootaki n te maungatabu ni kabuta ae kakukurei aei n Ana Ekaretia Iesu Kristo ibukiia Aika Itiaki ni Boong aika Kaitira iaan ana kairiiri ara burabeti ae tangiraki, Beretitenti Russell M. Nelson. I miimi n reken tibwangara ngaira n tatabemaniira n ongora ni bwanaan te Uea rinanoia Ana toro iaon te aba ni boong aika kaitira ae ti maeka inanona ngkai.
Abau ae Brazil e korakora kaubwaina nako. Teuana mai ibuakona bon te Karanga ae Amazon ae kinaaki, ae ngaia te kabanea ni bubura ao n ananau ni karanga n te aonaaba. Man te karanga ae Amazon a riki ma iai uoua karanga aika maenako, te Solimões ao Negro. Kamimina, bwa a kaai ni buti ao a uaia n raanganako n te maaire ae abwabwaki imwain ae a bootaki raniia, ni kaeti ma rikiia aika a kakaokoro, butiia, kabuebueia, ao aron renganakia n ranin tabo aikanne. Imwin manangaia tabeua te maaire, a bootaki raan, n riki bwa te karanga ae kaokoro nakon mwakorokorona n tatabeua. Tii mai imwin rikin mwakorokoro aikai n tii teuana, te Karanga ae Amazon e rikirake ni korakora are ngkana e karoko n te Marawa ae Atlantic, e kaoka rikaaki ranin taari bwa e aonga n teimatoa ni kuneaki te ran ae boou inanon maaire i marawa.
N te kawai ae ti te arona bwa Karanga aika Solimões ao Negro a uaia n raanganako ni karika te Karanga ae korakora ae Amazon, natin te Atua a bane n roko n ana Ekaretia Iesu Kristo man tabo aika kakaokoro, taneiai ao katei, ni karikia bwa te tabo ae kakukurei ibukiia Aomata aika Itiaki i nanon Kristo. N te kabane, ngkai ti kaunganano, ni boutoka, ao n itangitangiri imarenara, ti bootaki ni karika te anainano ae korakora ae tamaroa inanon te aonaaba. Ao ngkai taan iriira Iesu Kristo, ara anganano n ae ti teuana inanon te karanga ae te raoiroi, ti na kona ni katauraoa te “ran ae boou” man te euangkerio nakon te aonaaba ae bora n taka.
Te Uea e kaungaia Ana burabeti n reireiniira bwa ti na kanga ni boutokaira ao n tangiriira imarenara bwa ti aonga ni katiteuanaaki inanon te onimaki ao te kantaninga n iriiran Iesu Kristo. Bauro, te Abotoro n te Nu Tetemanti, e taku bwa naake a “karina Kristo ngkami akana kam bwabetitoaki nako nanoni Kristo …: bwa ti temanna ngkami ni kabaneingkami i nanon Kristo Iesu.”1
Ngkana ti berita n te bwabetito bwa ti na iriira te Tia Kamaiu, ti kakoaua imatan te Tama bwa ti tauraoi ni katoka iaora aran Kristo.2 Ngkai ti kataia ni karekea Anuana inanon maiura, ti ko na n riki ni kaokoro nakon are arora ngkoa, rinanon Ana Mwakuri ni Kamaiu Kristo te Uea, ao ara tangira ibukiia aomata ni kabane e rikirake ni koaua.3 Ti namakina te mwamwannano ae koaua ibukin mweeraoia ma kukureia aomata. Ti noorira n aron ae tarira ao mwaanera, ngkai natin te Atua ma rikira ae tabu, anuara, ao ara konabwai. Ti tangiria n tararuaira imarenara ao ni uota rawawatan temanna.4
Anne are e kabwarabwaraa Bauro bwa te tangira ae kororaoi.5 Moomon, te burabeti n ana Boki Moomon, e kabwarabwaraa bwa ana tangira Kristo ae itiaki,6 are bon te kabanea ni kakukurei, ni kakannato, ao ni korakora n tangira. Ara burabeti ae ngkai, Beretitenti Russell M. Nelson, e kabwarabwaraa te kaotioti n ae nako ibukin ana tangira Iesu Kristo bwa te mwakuri n ibuobuoki, are bon te waaki ae ti na katurui ara iango iaona ao n tangiriia ao n tabeakiniia tabeman aomata n aron are e karaoia te Tia Kamaiu.7
Ti na iangoa te reirei aei n te tangira ao te mwamwannano, n aron ae e karaoia te Tia Kamaiu, n te taeka ni kaunganano, n ibuobuoki, ao ni boutokaia naake a tibwa rairaki ao naake a moanna n iai nanoia ni kan iriira ara bootaki n taromauri n te Ekaretia.
Ngkai raoraora aika a boou aikai a otinako man te aonaaba ao ni butimwaea ana euangkerio Iesu Kristo, ni kaina Ana Ekaretia, a na riki bwa Ana reirei, a na manga bungiaki riki kaua mai Irouna.8 A katinanikua te aonaaba are a rangin kinaa ao n rineia n iriira Iesu Kristo, ma te nano ae koaua, ni kaaina te “karanga” ae bou n aron te Karanga ae korakora ae Amazon—te karanga ae ninikoria n te anainano ibukin te tamaroa ao te raoiroi are e raanga nakon mweengan te Atua. Te Abotoro ae Betero e kabwarabwaraa bwa “te roro ae rineaki, are koraki n ibonga n uea, ae te botanaomata ae itiaki, ao ae a tamaroa.”9 Ngkai raoraora aika a boou a roko nakon te aro ae boou ae aki kinaaki, a na bae ni maroa moa teutana bwa a aki ataia bwa a mena iaa n te moantai. Raoraora aika a boou aikai a moanna n rena ma katein te aro n rikina ae onoti, kabuebuena, ao aron karikana—te aro ma oin ana taneiai, te karenta n te aro, te katei, ao te wokaburari. Te maiu ae boou aei inanon Kristo e taraa ni katabeainga ibukiia. Iangoia n te tai aei bwa a na tera aia namakin ngkai a ongo taeka aikai n te moantai n aron “Bootaki n Utu n te Tairiki,” “BYC”, “Tabati n aki mamatam,” “bwabetito ibukiia maate,” “Bootaki n Aine,” “Nakoanibonga ae te Merekitereka,” “ikotan boki aika teniua,” ao a mwaiti riki.
E bebete taraakina bwa bukin tera a namakinna bwa tiaki kaina. N aroaro aikai, a bae ni bon titirakiniia, “Iai nneu ikai? I tau ni kaina Ana Ekaretia Iesu Kristo ibukiia Aika Itiaki ni Boong aika Kaitira? E kainnanoai te Ekaretia? N na kona ni kuneia raoraou aika a boou ae a tauraoi ni buokai ao ni boutokaai?”
Raoraou aika a tangiraki, n aron taai aikai, naake ibuakora ake a kakaokoro aia iango n te mwananga ae abwabwaki n riki bwa ana reirei ti riai ni kanauii baira n iraorao nakoia raoraora aika a boou, ni butimwaiia ae ngaiia, ao ni buokiia, n tangiriia, ao ni kairiia inanon maiura. Ni kabane raoraora aika a boou aikai bon natin te Atua mwaane ao aine aika a kakawaki.10 Ti aki kona ni kabua e ngae ngke tii temanna mai ibuakoia ibukina, bwa n aron te Karanga ae Amazon are e katine iaan karanga aika a uarereke ke raan aika a raanga, ti rangin kainnanoiia ngkai a kainnanoira naba, n riki bwa te anainano ae korakora ibukin te tamaroa n te aonaaba.
Raoraora aika a boou a uoti tarena aika a karekei mairoun te Atua, te kukurei, ao te tamaroa iriaia. Ingaingan nanoia ibukin te euangkerio e kona n rotia, ngaia are e na kona ni buokiira ni kakorakorai ara koaua. A uoti naba bwai aika nonoori aika a boou nakon ara atatai n te maiu ao te euangkerio.
Ti a kaman tia n reireinaki bwa ti na kanga ni buokiia raoraora aika a boou n namakina te butimwaeaki ao n tangiraki n ana Ekaretia Iesu Kristo. A kainnanoi teniua bwaai bwa aonga n teimatoa ni korakora ao ni kakaonimaki rinanon maiuia:
Te moan, a kainnanoia tariia ao mwaneia inanon te Ekaretia ake iai nanoia ni koaua irouia, raao aika koaua ao ni kakaonimaki ake a na rairaki nakoia, ao ni buokiia ao ni boutokaiia, ao man kaekai aia titiraki ngkana iai. Ngkai kaain te aro, ti riai ni kai ongo ao n tarai ubu aika a boou ngkana ti nako ni kaei ana waaki ni kukurei ao ana bootaki te Ekaretia, n aki tabe ma katabeaki, mwioko, ke tabeaianga ake ti karekei. Ti kona ni karaoi bwaai aika a bebete ni buokiia raoraora aika a boou n namakina te mwaneaki ao te butimwaeaki inanon te Ekaretia, n aron ae ko kamauriia, moangare nakoia, n tekateka irarikiia n anene ao n taromauri, ni kabwarabwaraiia nakoia tabeman membwa, ao a mwaiti riki. Ngkai ti kauki nanora nakoia raoraora aika a boou inanon tabeua kawai aikai, ti mwakuri inanon tamnein te ibuobuoki. Ngkana ti buokiia n aron are e karaoia te Tia Kamaiu, a na aki namakinna ae “iruwa ngaiia inanon te Ekaretia.” A na namakinna bwa a tau ao ni karekeia raoraoia aika a boou, ao ae rangin kakawaki riki, a na namakina ana tangira te Tia Kamaiu rinanon ara tararua ae koaua.
Te kauoua, raoraora aika a boou a kainnanoa te katabeaki—te tibwanga ni beku ibukiia tabeman. Te mwakuri n ibuobuoki bon teuana mai buakon ana konabwai ae korakora Ana Ekaretia Iesu Kristo ibukiia Aika Itiaki ni Boong aika Kaitira. Bon te waaki are e a kakorakoraaki ara onimaki mai iai. Raoraora nako aika a boou a tangira te tibwanga anne. Ngkai te bitiobi ao te kauntira n te uoote iai katabeaia ae kaeineti ni karaoi nakoa, akea te bwai ae e kona n tukiira man kaoakiia raoraora aika a boou ni buokiira ni beku ibukiia tabeman n ae aki ataaki ke rinanon te ibuobuoki ibukin taian mwakuri ni karikirake.
Te kateniua, raoraora aika a boou a riai ni “kamwarakeaki n ana taeka te Atua ae raoiroi.”11 Ti kona ni buokiia bwa a na tangiri ao ni kinai koroboki aika tabu ngkana ti wareware ao ni maroroakin reirei ma ngaiia, ni katauraoi kanoan taian rongorongo ao ni kamatatai taeka aika a kaangaanga. Ti kona naba n reireiniia bwa a na kanga ni karekei kairi aika a onoti rinanon te reitinako ni kamatebwai koroboki aika tabu. N raonaki ma anne, ti kona ni karoko irouia raoraora aika a boou inanon mweengaia ao ni kaoiia nakon mweengara n tabetai itinanikun tain ana bootaki n taromauri te Ekaretia ao waaki ni kakukurei, ni buokiia n riki n ti teuana inanon te karanga ae korakora ae aia kaomuniti aika Itiaki.
Kinaakin bitaki ao kakaewenako ake a karaoi raoraora aika a boou ti na karikia bwa kain ana utu te Atua, bwa tarira ao mwaanera, ti kona n tibwauaia bwa ti kanga n tokanikai iaon kakaewenako aika ti te arona inanon maiura. Aio e na buokiia ao n ataia bwa aki maroaa ao e na kakabwaiaia te Atua ngkana a kamwakura aia onimaki inanon Ana berita.12
Ngke a bootaki Karanga aika Solimões ao Negro, te Karanga ae Amazon e riki ni korakora ao ni matoatoa. N te aro ae ti te arona, ngkana ngaira ma raoraora aika a boou ti riki n ti teuana, ana Ekaretia Iesu Kristo ae kaokaki e riki ni korakora ao ni matoatoa. Ngai ma Neiere raou, ae Rosana, ti kakaitauiia ni kabane ake a buokiira ni bootiira nakon te aro n ririki aika a mwaiti n nako, ngke ti mwanea ana euangkerio Iesu Kristo inanon mweengara. Ni kabuta te ririki, aomata aika tamaroa aikai a tia n ibuobuoki raoi nakoira ao n tia ni buokiira n reitinako n raanga inanon te raoiroi. Ti rangi ni kakaitau ibukiia.
Burabeti n Iteran te Aonaaba are i Maeao a ataia raoi bwa a na kanga ni kawakiniia raoraoia bwa aonga ni uaia n raanga nako inanon te karanga ae boou aei n te raoiroi nakon te maiu ae akea tokina. N aron te katooto, ti a tia n noori ara bong ao n ataia bwa ti na kaitara ma kakaewenako aika ti te arona,13 Moronaai e karin tabeua mwaneka aika a kakawaki inanon ana koroboki n ana Boki Moomon:
“Ao imwiin are a tia ni butimwaeaki nakon te bwabetito, ma n rotaki ma ni kaitiakaki ni mwaakan te Tamnei are e Raoiroi, a bon warekaki ibuakoia aomatan ana Ekaretia Kristo; ao a tauaki araia, bwa aonga n uringaki ma ni kamwarakeaki n ana taeka te Atua ae raoiroi, bwa a na waaki n te kawai ae eti, bwa a na aki toki n teimatoa n tataro, n ti onimakina ana mwakuri aika a raraoi Kristo are bon te tia karika ao te tia karokoa n te toki aia onimaki.
“Ao te ekaretia e bon aki toki ni bootaki, n aki mamatam man tataro, man taetae imarenaia ni kaineti ma maiuraoin tamneia.”14
Raou aika a tangiraki n ana mwakuri te Uea, I kakoaua bwa ti kona ni karaoa riki ae tamaroa ao n riai ni karaoa ae raoiroi ni butimwaaia raoraora aika a boou nakon te Ekaretia. I kaoi ngkami bwa kam na iangoia bwa tera ae ti kona ni karaoia ni mwaneia riki, ni butimwaaia, ao n ibuobuoki, ni moanna raoi n te Tabati are imwina. Taratara raoi n aki karika mwiokoam n te Ekaretia bwa e na tuuka butimwaeakiia raoraora aika boou ni bootakin te Ekaretia ao waaki ni kakukurei. Imwin anne, aomata aikai a kakawaki imatan te Atua ao a rangin kakawaki riki nakon taian burokuraem ao waaki ni kakukurei. Ngkana ti ibuobuoki nakoia raoraora aika a boou ma nanora aika kaonaki n te tangira ae itiaki n aron are e karaoia te Tia Kamaiu, I berita nakoimi, inanon arana, E na buokiira inanon ara konabwai. Ngkana ti mwakuri bwa taan ibuobuoki aika a kakaonimaki, n aron are e karaoia te Tia Kamaiu, raoraora aika a boou a na karekea buokaia are a kainnanoia n teimatoa ni korakora, n anganano, ao ni kakaonimaki ni karokoa te toki. A na raoniira ngkai ti riki bwa ana aomata te Atua aika a korakora ao ni buokiira ni uota te ran ae boou nakon te aonaaba ae kainnanoi kakabwaia man ana euangkerio Iesu Kristo. Natin te Atua a na namakinna bwa “tiaki aomata ianena ngkami ngkai, ao tiaki naba aomata aika kam maeka n iruwa ma kam kan ibuoka-aba ma ake a itiaki.”15 I berita nakoimi bwa a na ataa rokon te Tia Kamaiu n oin Ana Ekaretia. A reitinako n raanga ma ngaira kanga te karanga ae bwarobwaron ranna ae te raoiroi ni karokoa a butimwaeaki man bain te Uea Iesu Kristo aika a tangaina, ao a ongo ana taeka te Tama ae kangai, “E na reke iroumi te maiu ae akea tokina.”16
I kaoingkami bwa kam na ukora ana ibuobuoki te Uea n tangiriia tabeman ngkai E tangiriko. E reirei Moomon, “Ngaia are, tariu [ao mwaaneu] aika a tangiraki, tataro nakon te Tama ma korakoran nanomi ni kabane, bwa kam na kaonaki n te tangira iai, are e a tia ni katoka iaoia ni kabane ake taan iriira Natina, Iesu Kristo.”17 Man koaua aikai, I kakoaua n aran Iesu Kristo, amen.