Tai Tabeaianga
Iroun Unimwaane Ronald A. Rasband
Man te Kooram n Abotoro n te Tengaun ma Uoman
Kaungai nanomi, tariu ao mwaaneu. Eng, ti maeka n taai aika a kakamaaku, ma ngkai ti tiku iaon kawain te berita, ti riai n aki maaku.
I reita au kakoaua nakon ana rongorongo Beretitenti Russell M. Nelson ao Unimwaane Quentin L. Cook are a anga tabeua te tai n nako n taekan te rau ao te boraraoi n te Kauntira n te Moan Beretitenti ao te Koorom n Abotoro n te Tengaun ma Uoman. I ataia bwa katanoata aika a tia n reke man te kaotioti bon ana iango ao nanon te Uea ao e na kakabwaiaia ao ni kakorakoraia aomata nako, utu, ao Ana Ekaretia Iesu Kristo ibukiia Aika Itiaki ni Boong aika Kaitira n roro nako aika a na roko.
Tabeua te ririki n nako, temanna natira te aine ae e a tibwa mare ma buuna a titirakinai ma Titita Rasband te titiraki ae rangi ni kakaawaki, te titiraki ae bita te maiu: “E bon mano naba ao e iangoraoi bwa ti na uotiia ataei nakon te aonaaba ae taraa ni buakaka man kakamaku ae ti maiu inanona?”
Ngkai, anne te titiraki ae kakaawaki ibukiia tiina ao karo bwa a na iangoia ma natiia aika a tangiraki aika a tia ni mare. Ti kona n ongo te maaku ni bwanaaia ao n namakina te maaku i nanoia. Ara kaeka nakoia bon “Eng, ae matoa ao e raka riki nakon are e Butimwaeaki,” ngkai ti tibwauai aan reirein te euangkerio ao te bwai are ti rinanona ni maiura are ti namakinna mai inanora.
Te maaku e aki boou. Ana reirei Iesu Kristo, ngke a mena i Taari i Kariraia, a maaka te “ang, ma nao” inanon rotongitongin te bong.1 Ngkai ti riki bwa Ana reirei n te bong aei, ngaira naba iai te maaku iroura. Ara kairake n ikawai ake a tuai iein a maaka te kabaeaki n aron te mare. Kairake ake a tibwa mare, n aroia natira, a maaka karikaia ataei nakon te aonaaba ae rikirake te buakaka iai. Mitinare a maakui bwaai aika a mwaiti, riki te taetae nakoia aomata aika aki kinaia. Aine ake a mate buuia a maaku ni maiu n akea buuia. Kairake ake tebwi tabun aia ririki a maaku ngkana a aki butimwaeaki; ataein te reirei aika ra maaka moan bongin te reirei, ataein te reirei are rietaata riki a maaka mwiin aia ukeuke. Ti maaka te kabwaka, te aki butimwaeaki, te un, ao te bwai ae aki ataaki. Ti maakui angibuaka, mwaiei, ao te urarake iaon te aba ao inanon maiura. Ti maaku bwa ti na bae n aki anganaki tibwanga aika a onoti, ao ni bwaai riki tabeua, ti maaku iai n rineaki. Ti maaku ngkana ti aki tau; ti maaku bwa te Uea akea ana kakabwaia ibukira. Ti maaka te bitaki, ao maakura e kona ni karika te nako n nano. Iai iroumi maaku n aron aikai?
Man taai ake rimoa, te maaku e a tia n kakerikaaka aia taratara natin te Atua. I a kaman tatangira rongorongon Eritai n te ka 2 n Uea. Uean Tiiria e kanakoia aoti nako iai, ma ka-ni-buaka, ma te tanga ae ababaki: ao a roko “e bong ao a otabwaniniia te kawa arei.”2 Aia iango bwa a na kamwanea man tiringa te burabeti ae Eritai. Ti warekia:
“Ao ngke e utimwaka ana tia mwakuri ana aomata te Atua, ma n oti nako ao noria a mena te tanga ma aoti ma kani buaka i rarikin te kawa n otabwaninia. Ao e taku ana aomata nako ina, Akea ngai, au toka! Tera arora ae ti na karaoia?”3
Te toro e kaotia ni bwanaana bwa e maaku.
“Ao [Eritai] e taku, Tai maku: ba a mwaiti riki aika mena i roura nakoia ake a mena i rouia.”4
Ma e aki toki ikanne.
“E tataro Eritai, ao e kangai, Iehova, I butiko, bwa ko na kaurei matana bwa e na noraba. Ao te Uea e kaurei matan te rorobuaka: ao, e noraba, ao noria, e on te maunga arei irouia aoti ao ka-ni buaka aika kanga ai, aika a otabwaniniia Eritai.”5
E kona n iai ke n akea ara kani-ni-buaka ae te ai bwa e na kabeebetea makura ao ana kariiri te riaboro, ma te reirei e mataata. Te Uea e tabe ibukira, e atai arora ao e kakabwaiaira n aro nako are bon ti ngaia ae e kona ni karaoi. Te tataro e kona ni karuoa te korakora are ti kainnanoia ni kabotoa ara iango iaon Iesu Kristo ao Ana anganano n Ana mwakuri ni kamaiu. Te Uea e ataia bwa iai taai aika ti na namakina iai te maaku. I a tia n namakina te maaku ao ngkoe naba, are anne bukina bwa koroboki aika a tabu a kaonaki n ana reirei te Uea:
“Mangaia are, tai maaku.”6
“Tanimai nakoiu n ami iango n taai nako; tai nanououa, tai maaku.”7
“Tai maaku, ngkami te nanai ae e uarereke.”8 I tangira aroia ni memeri “te nanai ae e uarereke.” N te Ekaretia aei e kona ni uarereke mwaitira man te kawai are e nooria te aonaaba, ma ngkana ti kaurei matara n tamnei, “ba a mwaiti riki aika mena i roura nakoia ake a mena i rouia.”9 Ara tia Kawakin Tiibu ae tatangira, Iesu Kristo, ngkanne e reitinako, “Ma ngaia are, tai maaku te nanai ae uarereke, kariaia te aonaaba ao mone ni ikotaki ni kaaitaraingkami, bwa ngkana ko kateitei i aon au bwaa, a aki kona n tokanikai.”10
E kanga ni kanakoaki te maaku? Iroun te toro, e bon tei irarikin Eritai, ana burabeti te Atua. Iai naba iroura te berita anne. Ngkana ti kakauongo nakon Beretitenti Russell M. Nelson, ngkana ti karaoi ana reirei, ti na tei ma ana burabeti te Atua. Uringa ana taeka Iotebwa Timiti: “Ao ngkai, i mwin taian kakoaua aika mwaiti ake a kaotaki ibukina, aio te kabanea ni kakoaua ngkai, ae ti kaotia ibukina: Bwa e maiu!”11 E maiu Iesu Kristo. Ara tangira Nakoina ao Ana Euangkerio a kanakoa te maaku.
Nanora “bwa e aonga ni memena tamneina n tainako”12 ma ngaira e na kanakoa te maaku ibukin te taratara ae raka riki ae akea tokina iaon maiura n rabwata. Beretitenti Nelson e a tia ni kauring, “Ma inanon boong aika imwaira, e na bon aki kona ni kamaiuaki te tamnei n akean te kairi, te kaetieti, ao ana kairoro ni karaunano ae reitinako te Tamnei ae Raoiroi.”13
E taku te Uea, ni kaineti ma te karawawataaki ae taonako iaon te aba ibukin matoatoan nanoia aika a mwaiti: “Ma au taan reirei a na tei n taabo aika tabu, ao n aki kona ni kamwaingaki.”14
Ao ngkanne man te reirei mai karawa aei: “Tai tabeaianga, bwa, ngkana a koro bukin bwaai ni kabane aikai, kam na ataia bwa berita ake a tia ni karaoaki ma ngkami a na bon koro bukiia.”15
Teei n taabo aika a tabu—tai tabeaianga—ao berita a na bane ni kakoroaki bukiia. Ti na tarai kaka teuana mai ibuakon aikai ni kaineti ma maakura.
Te Moan: teei n taabo aika a tabu. Ngkana ti tei n taabo aika a tabu–mweengara aika a raraoi, ara tabo n taromauri aika a katabuaki, tembora aika a tabu—ti namakina Tamnein te Uea irarikira. Ti karekei kaekaan titiraki ake a kamwenga buaka ke te rau n ti kamwawai. Anne te Tamnei inanon te mwakuri. Taabo aika a tabu aikai n abanuean te Atua iaon te aba a wewete ibukin ara karinerine, ara karinerine ibukiia tabeman, arora ae tamaroa ni maiuakina te euangkerio, ao ara kantaninga ni katikui maakura ao ni ukora mwaakan Iesu Kristo ni kamaiu rinanon Ana mwakuri ni kamaiu Iesu Kristo.
Akea nnen te maku inanon taabo aika a tabu aika ana tabo te Atua ke inanoia Natina. Bukin tera? Ibukin ana tangira. Te Atua e tangiriira—n tainako—ao ti tangiria. Ara tangira ibukin te Atua e kanakoi maaku ni kabane, ao Ana tangira e tiku n taabo aika a tabu. Iangoa taekana. Ngkana ti aki koaua ni kabaeakira nakon te Uea, ngkana ti tionako man Ana kawai are e na kairiira nakon te maiu ae akea tokina, ngkana ti titiraki ke n nanououa ibukin kakawakira n Ana baire mai karawa, ngkana ti kariaia te maaku bwa e na anganiira namakinan te—bwarannano, te un, te aki raunnano—te Tamnei e na kitaniira, ao ti na tiku n akea te Uea irarikira. Ngkana ti ataia bwa aekakira anne, ko na ataia bwa tiaki te tabo ae raoiroi ae kona mena iai. Ni kaitaraana, ngkana ti tei n taabo aika a tabu, ti na kona n namakina ana tangira te Atua, ao “bwa te tangira are e kororaoi e kakioa nako te maaku ni kabane.”16
Te berita are imwiina “Tai tabeaianga.”17 N aki taraa mwaitin te buakaka ao kamangaongao are a kaona te aonaaba, ti tuangaki n te berita man ara kakaonimaki ni katoa bong inanon Iesu Kristo “Ao te rau are mairoun te Atua, are te rau are aki konaki n ataki teutana.”18 Ao ngkana e roko Iesu inanon mwaaka ni kabane inanon te mimitong ae korakora, te buakaka, te kakaitara, ao te aki momotiraoi a na toki.
Taai aika a maan n nako te Abotoro are Bauro e tatae ni burabeti ibukin tai aikai, e taku nakon Timoteo are te kairake:
“Ma kona ata aei, ba ane a na roko tai aika kamamate ni bong aika kaitira.
“Ba ane a na riki aomata ba taan tangiria i bon irouia, tani kani manemane, tani kamoamoaia, tani kainikatonga, tan taetaebuaka te Atua, tan aki iri nanoia aia karo, tan aki itiaki. …
“… tan tangira riki te maie nakon te Atua.”19
Uringnga, “naake a raoniira” n itera te roki aika uoua, bon naake a tangira te Uea ma nanoia ni kabane, korakoraia, aia iango, ao marurungiia, “a mwaiti riki aika mena i roura nakoia ake a mena i rouia.”20 Ngkana ti rangin onimakina te uea ao Ana kawai, ngkana ti kabaeaki n Ana mwakuri, ti na aki maaka te bitaki n te aonaaba ke n tabeaianga irouia. I bubuti ngkami bwa kam na aki rootaki n ana kairoro te aonaaba ma tabeaianga ao ukoukori maiun tamneimi inanon maiumi ni katoa bong. Tangiri bwaai ake e tangiri te Uea—ake e airi ma Ana tua, Ana auti ae mimitong, ara berita aika a tabu ma Ngaia, te toa ni katoa Tabati, ara reitaki rinanon te tataro—ao ko na aki tabeaianga iai.
Te kabanea n iango: onimakina te Uea ma Ana berita nako. I ataia bwa ana berita ni kabane a na bon koro bukiia. I ataia n ae matoatoa n aron ae I tei ikai i matami n te bootaki ae tabu aei.
Te Uea e a tia ni kaotia: “Bwa naake a wanawana ao n tia ni karekea te koaua, ao n tia n anaa te Tamnei ae Tabu ibukin kairaia, ao n tuai ni mwamwanaaki—e koaua ae I tuangkami, a na bon aki koreaki ao n teweaki nako nanon te ai, ma a na maiu n te bong anne.”21
Aei bukina ae ti riai n aki tabeaianga man te kamangaongao ni boong aikai, irouia naake a mena n te kateitei ae moan te korakora man buubura irouia naake a kakanikoi mwakuri aika a koaua ao mwakuri aika babane nakon te Uea Iesu Kristo. Nooran te tamaroa, te ninikoria, riki te tangira ae koroaoi e roko man te nano n aki karawawata man kaangaanga ke kamangaongao. Beretitenti Nelson, are “e tarai bwaai aika a raraoi n taai aika a na roko,” e a tia ni kauringiira, “Ngkana ti na karekea te kantaninga ni ukoukora te bwai ae kakawaki ma iango aika mwaiti ao aia ataibwai aomata ake a buakan koaua, ti riai n reirei aron karekean te kaotioti.”22
Ni karekean te kaotioti i bon ibukira, ti riai ni moanibwaia ni maiuakina te euangkerio ao kaungaan te kakaonimaki ao te maiu n tamnei irouia tabeman n ai arora naba.
Spencer W. Kimball bon temanna te burabeti are e tei ngke I kairake. Tabeua ririki aika a nako, imwiin weteakiu bwa te Abotoro, I a tia ni kunea te rau n ana moan rongorongo n te maungatabu ni kabuta n Okitobwa 1943. E taonaki n te kukurei ni weteana; I ataa aron te namakin anne. Unimwaane Kimball e taku: “I iango n ae bati ao n tataro, man aki mamatam ao n tataro. Iai iango ni kakauntaba ake a roko n au iango—te bwanaa ae e taraa ni kangai: ‘Ko aki kona ni karaoa te mwakuri. Ko aki tau. Akea am konabwai’— ma n tokina N na bon karekea te iango n tokaninkai: ‘Ko riai ni karaoa te mwakuri are ko anganaki—ko riai ni konabwai, n tau ao ko kamatoaaki.’ Ao e na bon teimatoa n reitinako.”23
I kaungaaki man te kakoaua ae e nako man te nano ae itiaki mairoun te Abotoro aei are e riki bwa te ka 12 ni Beretitenti n te Ekaretia ae korakora aei. E ataia bwa e na aki rootaki man maaku ni “karaoi mwakuri ake e anganaki” ao e riai ni katan iaon te Uea ibukin te korakora ni karikia bwa e “konabwai, e tau, ma ni kamatoaaki.” Ti kona naba. Te buaka e na reitinako, ma ti na kaaitaraia ma Tamnein te Uea. Ti na bon “aki tabeaianga” ibukina bwa ngkana ti tei ma te Uea ao n tei ibukin Ana reirei ao Ana baire ae akea tokina, ti tei n taabo aika a tabu.
Ngkanne, ao tera aron te nati te aine ao ai te nati te mwane ake a titiraki te titiraki ae nako man te nano ae bwarabwara raoi, te titiraki ni maaku n ririki aika a nako? A taua ma nanoia n iangoi ara maroro n te tairiki anne; a tataro ao a aki mamatam ao e reke te kaeka i bon irouia. Ma te kukurei ao te kimwareirei nakoia ao nakoira, tiibu, a tia ni kakabwaiaki ma itiman natiia aika a boboto ngkai a waaki nako inanon te onimaki ao te tangira.
Kaungai nanomi, tariu ao mwaaneu. Eng, ti maeka n taai aika a kakamaaku, ma ngkai ti tiku iaon kawain te berita, ti riai n aki maaku. I kakabwaiako bwa kona karaoia, kona bon aki tabeiaianga n te taina ngkai kam maiu ke te kangaanga are kona kaaitarai. I kakabwaiako bwa kona rineia n tei n taabo aika a tabu ao n aki kamwaingaki. I kakabwaiako bwa kona kakoaua n ana berita Iesu Kristo, bwa E maiu, E tarataraira, e tabeakiniira ao e tei irarikira. N aran ara Uea ao ara Tia Kamaiu, Iesu Kristo, amen.