E Kaira te Kawai Beretitenti Nelson
E a tia Beretitenti Russell M. Nelson n reireiniira n tatabemaniira bwa ti na akoi riki, n riki n ai aron Kristo, ao n tauraoi n tamneira n ara tai ni buokiia tabeman, ao e a tia ni kaota te banna bwa tera raoi ae nanonaki n anne n arona ni mwakuri n ibuobuoki n te maungatabu ni kabuta ae nako.
E aki maan imwin te maungatabu ni kabuta n Eberi 2018, ao e mwananga Beretitenti Nelson n neweaba are e raonaki iai iroun kainnabana, ae Wendy, ao Unimwaane Jeffrey R. Holland man te Kooram n te Tengaun ma Uoman ma kainnabana ae, Patricia, n nako Engiran, Iteraera, Kenya, Zimbabwe, Inria, Thailand, Tiaina, ao Hawaii, USA.
Ni mwanangana akekei, E kaitibo Beretitenti Nelson ma membwa n te Ekaretia, mitinare, taan kairiiri, ao rao n te Ekaretia i Canada mainiku, nuuka, ao maeao; Seattle, Washington, USA; ao te Dominican Republic—are e anga iai ana marooro ae maan n te taetae n Tibein, te moan tai ae te Beretitenti n te Ekaretia E anga te marooro ae maan n te taetae ae tiaki te taetae ni Imatang.
Ni bootaki ao n taian bwabwaro, E reirei Beretitenti Nelson kaetan aran te Ekaretia; tibwauan te euangkerio ma tabeman; mateakinan ana Boki Moomon; aron te euangkerio ni kanakoraoa te maiu; e kanga ana kawai Kristo n riki bwa te kawai nakon te kimwareirei ao te kukurei, ngkai ao n te maiu ae akea tokina; te tataro; karikan mweenga bwa te tabo ae mano ibukia ataei; kabonganaan te inaomata n rinerine n tokanika iaon kariiri ao iriiran te Tia Kamaiu; tabeakinaia tabeman; ao te katauraoi ibukin ao karekean kakabwaia ake a roko man te tembora.
A taetae naba Beretitenti ao Titita Nelson n aia bootaki n taromauri kairake n kabuta te aonaaba n Tuun 3, 2018, are e taekinna iai Beretitenti Nelson bwa kairake ake kaain ana “taanga ni buaka te Uea” ao ni buoka ikotakiia Iteraera ni karekea aia tai are a riki bwa kaain te “waaki ae bubura, man rianako korakorana, man mimitong!” E kaungaia kairake bwa a na toki man te aki motirawa ni kabonganaan bwain reitaki iaon te intanete, a na anga aia tai nakon te Uea, a na karaoia rinanoan maiuia n ae bwanin ma te Uea, a na tataro bwa ni kabane natin te Atua a na kona ni karekea te euangkerio, ao a na riki bwa te oota nakon te aonaaba.