Unimwaane Brook P. Hales

Mataniwi ni Kabuta n te Itingaun

Ngke waniua ke ruaiwa ana ririki Unimwaane Brook P.Hales, e mena n te bootaki n taromauri n aki mamatam are e mataniwi iai tamana bwa te Bitiobi. Tamana E kaoiia kain te taromauri bwa a na kaotii aia koaua, ao e kuri bane aomata ake a roko ni kaotii aia koaua. “Tao bon te moan tai are I namakina iai te Tamnei ni kakoaua nakoiu koauan te euangkerio,” E uringnga Unimwaane Hales.

E a tia n namakina te kakoaua anne n te tai ae mwaiti, riki n ana tai ni beku bwa te tia koroboki nakon te Moan Beretitentii man 2008. Ngke e kamatoaaki Beretitenti Thomas S. Monson bwa te burabeti ao te Beretitenti n te Ekaretia, ao imwina ngke e a manga kamatoaaki Beretitenti Nelson, e kakoauaa “rabunan te burabeti ni bwaka nako aoia ao I ataia n akea au nanokokoraki bwa a tia n rineaki man weteaki bwa a na riki bwa Beretitenti n te Ekaretia n aia tai.”

Unimwaane Hales e weteaki bwa te Mataniwi ni Kabuta n te Itingaun ni Meei 17, 2018, ao e kamatoaaki n Okitobwa 6, 2018. E na reitinako bwa te tia koroboki nakon te Moan Beretitentii.

E bungiaki i Ogden, Utah, USA, n Eberi 7, 1956, nakoia Klea ao Glenn Phillip Hales, Unimwaane Hales e karekea a na tikuri n te bangke ao te mwane man te Weber State College (ngkai Weber State University) n te 1980. Imwin te angabeba, e mwakuri n te bangke ao n ana bootaki ni Mwane ao n Rekooti te Ekaretia. E mare ma Denise Imlay Hales n te 1981, ao iai aman natiia. Unimwaane Hales E a tia ni beku bwa te mitinare ae bwanin ana tai i Buranti Paris Mition, te kauntira n te bitiobiriki, te tia kairiiri irouia unimwaane aika rietaata, bitiobi, titeiki beretitenti, te tia aokan n te kainimwaane, tia reirei n te Reirei n Taabati, ao te tia kabaebae n te tembora.

N te bong arei ngke bon te ataeinimwaane ngaia, Unimwaane Hales E aki kaota ana koaua. Ma e a tia n rikirake n rangi ni matoatoa imwin te tai anne. “E a tia ni kaokaki ana euangkerio Iesu Kristo rinanon te Burabeti Iotebwa Timiti, e koaua ana Boki Moomon, E kororaoi ana tangira te Atua ibukira ao e tangiria ni kakabwaiaira, Iesu bon ara Tia Kamaiu, ao ti kakabwaiaki ngkai iai iroura ana iraorao te Tamnei ae Raoiroi n te tai are ti tau nako iai,” e taku.