Riki bwa Aomata Aika Itiaki ni Boong aika Kaitira
Iroun Beretitenti Russell M. Nelson
I anga au tangira ao au kakabwaia nakoimi, n te aro bwa kam aonga n amwarake n ana taeka te Uea ao ni karaoi Ana reirei inanon maiumi.
Aio te maungatabu ae kairaki n te raoiroi ao n ururingaki. Ti na iangoi taai aika a na roko ma te ingainga n nano. Ti a tia ni kaungaaki bwa ti na karaoa ae tamaroa riki ao n riki n tamaroa. Taian rongorongo aika a kamiimi ake a taekinaki man te tabo n taetae irouia ara Mataniwi ni Kabuta ao Aobitia ni Kabuta ao te anene ae kaunganano! I kaumaki ngkami bwa kam na kamatebwai rongorongo aikai, ni moa man te bong aio.1 A marooroakin iango ao ana kantaninga te Uea ibukiia Ana aomata, ake a maiu n te bong aei.
Bwaai n reirei ake a boboto n te mweenga, ake a boutokaaki n te Ekaretia iai aia konabwai n aki kakerikaaka korakoran te utu, ngkana utu n tatabeua a na keiaki ni mwakuri ni kaota aia mwannano ni bita mweengaia bwa taabo ni kamanoa te onimaki. I berita bwa ngkana kam mwakuri korakora ni karaoa raoi mweengami bwa e na riki bwa te nne ibukin reiakinan te euangkerio, n taai nako bongin Ami Taabati nako a na riki bwa boong ni kakukurei. Natimi a na kukurei n reiakin ao ni maiuakin Ana reirei te Tia Kamaiu, ao korakoran te kakaitara inanon maiumi ao mweengmi e na keerikaki. Taian bitaki inanon am utu a na riki ni kakawaki ao n reitinako.
N tain te maungatabu aio ti a kakorakora ara mwakuri ni karaoia n te aro ae riai ni karinea te Uea ae Iesu Kristo ni katoa te tai are ti taekina Ana Ekaretia. I berita bwa arora ni matoa ni kamanena raoi aran Ana Ekaretia te Tia Kamaiu ao membwa a na kairaki nakon karikirakean te onimaki ao ni karekea korakoran riki mwaakan te tamnei ibukiia membwa n Ana Ekaretia.
N na taekina ngkai aron taian tembora. Ti ataia bwa ara tai ake ti kabanei inanon tembora e bon rangi ni bongana nakon kamaiuara ao karietaatakira ao kamaiuaia naba ao karietaatakiia ara utu.
Imwin karekean ara otenanti n te tembora ao ni karaoan berita aika tabu ma te Atua, ngaira n tatabemaniira ti kainnanoa te kakorakoraaki n te tamnei ao te reireiaki are e tii kona n reke inanon ana auti te Uea. Ao ara bakatibu a kainnanoira ni mwakuri bwa taan tei ibukiia.
Iangoa te akoi ae moan te korakora ao tamaroan te Atua are mai imwain karikan aonaaba, e katauraoa te kawai n anga kakabwaia man te tembora nakoia ake a mate n aki ataa taekan te euangkerio. Taian bootaki n te tembora aika tabu bon man rimoa. Irou maanin taai ngkoa e kakukurei ao te bwai ni kakoaua teuana bwa e boni koaua2
Tariu ao mwaaneu, buakanakin te kaangaanga e bon rikirake ao n rangin waetata, e rangi ni korakora ao ni kakaokoro.3 Kainnanoan nanakora nakon te tembora n taina ao n taainako e bon aki tau. I bubuti ngkami bwa kam tataro mwaaka n iangoia bwa kam na kanga ni kabonganai raoi ami tai. Kabanea ami tai ibukin taai aika a na roko ao inanon ami utu. Ngkana iai bukina ae e riai ngkai kam raroa nako man te tembora, I kaungai ngkami bwa kam na kakaea angan kawaimi ni kabaea ami tai n taainako ma te Uea—n rin n Ana auti ae tabu—ao kawakina raoi te tai anne ma te kimwareirei. I berita nakoimi bwa te Uea e na karokoi kakai ake E atai aika kam kainnanoi ngkai kam anga karea ni mwakuri ao n taromauriia inanon Ana tembora.
N te tai aio iai 159 tembora aika a tia ni katabuaki. Tararuakin ao karaoan bwain te tembora akanne a bon rangi ni kakawaki nakoira. Ni waakin te tai, e bon riai kainnanoan taian tembora ibukin te kaitiakaki ao te kaboouaki. N tokin te tai, a karaoaki taian babaire ibukin onobwaian ao kaboouan te Salt Lake Tembora ao tabeua tembora n aia roro bwaeoniia ake ngkoa. Rongorongo ibukin mwakuri aikai a na tibwauaaki ngkana a karaoaki.
Ti kukurei n te tai aei ni katanoatai babaire ni katei tembora riki tabeua. Tembora akanne a na kateaki n taabo akana imwina: Mendoza, Argentina; Salvador, Brazil; Yuba City, California; Phnom Penh, Cambodia; Praia, Cape Verde; Yigo, Guam; Puebla, Mexico; Auckland, New Zealand; Lagos, Nigeria; Davao, Philippines; San Juan, Puerto Rico; ao Washington County, Utah.
Katean ao onobwaian tembora aikai a na kona n aki bitii maiumi, ma kabanean ami tai n te tembora ni koauana e na bon kona. Ibukiia aomata ake a maan aia tai n aki roko n te tembora, I kaungai ngkami bwa kam n katauraoi ao ni waekoa n oki. Ngkanne I kaoi ngkami bwa kam na taromauri inanon te tembora ao n tataro mwaaka n namakina ana tangira ae akea tiana ibukimi, bwa kam aonga ni karekea oin ami koaua bwa E reitinako ni kaira te mwakuri ae tabu aei ao akea tokina.4
Tariu ao mwaaneu, I kaitau ngkami ibukin ami onimaki ao nanomi ni boutoka. I a kaina au taetae ao n anga au tangira ao au kakabwaia nakoimi, bwa kam na kanuai ngkami n ana taeka te Uea ao ni karaoi Ana reirei inanon maiumi. I berita nakoimi bwa kaotioti a na reitinako inanon te Ekaretia ao a na reitinako ni karokoa “ana mwakuri te Atua a na kakoroaki bukiia, ao Iehova ae Mwaaka e na kangai e a tia te mwakuri.”5
I kakabwaiai ngkami bwa e na rikirake ami onimaki Irouna ao inanon Ana mwakuri ae tabu, ma te onimaki ao te taotaonaki n nano n teimatoa n rinanon kaangaanga inanon maiumi. I kakabwaiai ngkami bwa kam na riki bwa Aomata Aika Itiaki ni Boong aika kaitira. I kakabwaiai ngkami ma bwaai akanne ao ni kaota au kakoaua bwa e maiu te Atua! Iesu bon te Kristo! Aio Ana Ekaretia. Ngaira Ana aomata, N aran Iesu Kristo, amen.