Ara Kaembwaea n te Onimaki

Iroun Unimwane Gerrit W. Gong

Man te Kooram n Abotoro n te Tengaun ma Uoman

Ibukiia naake a ukoukora, kariaia, maiuakina, moan wakin te onimaki, n tabetai e na tabe ni karaurau, n roko ke ni kona ni manga oki.

Tariu ao mwaaneu aika kam tangiraki, e rangin tamaroa bwa ti na reitinako ni karekei kaotioti mai karawa rinanon te Burabeti Russell M. Nelson ao ara taan kairiiri n te Ekaretia ake a kaoira bwa ti na maiuakina te maiu ae boou ao te kawai ae mimitong riki,¹ ni mweengara ao n te ekaretia, ma nanora ni kabane, ara iango ao korakorara?

E a tia n reke am tai ni karaoa te bwai teuana ae ko namakinna iai bwa ko aki tauraoi ke ko aki tau ma ko kakabwaiaaki ibukin katiaana?

Ngai I a tia. Aio te katooto teuana.

Tabeua te ririki n nako, Unimwaane Richard G. Scott, te membwa n te Kooram n Abotoro n te Tengaun ma Uomana, e kaoai ma te nano n akoi, “Gerrit, ko kukurei n raonai ni korotamnei n te kara ae renganaki ma te ran?”

Unimwaane Scott e taku bwa te korotamnei n te kara e buokia ni karekei iangoi ao ni kariki bwaai. E a tia ni koreia: “Kataia ni kamwakura te iango, riki ngkana mwiin am mwakuri aki rangi n nakoraoi. … Te kakau iango e kona ni kaunga namakinan te kakaitau ibukin te maiu ao bwaai ake e a tia ni kakabwaiako iai te Uea n te maiu. … Ngkana ko rinerine ma te iangoraoi, e na bon aki anaa te tai ae mwaiti.”²

Beretitenti Henry B. Eyring e kabwarabwara ana iango n ana korotamnei bwa namakinan te tangira” n raonaki ma “ana tangira te Tia Karikibwai are e kantaningaia Natina bwa a na riki n ai Arona—ni karikibwai ao ni kateitei.”³ Ana mwakuri ni kakau iango Beretitenti Eyring e karika te bwai ae e “onoti, e karekea te iango n tamnei iaon te koaua ao te onimaki.”⁴

Ana korotamnei Beretitenti Boyd K. Packer e kabwarabwara te rongorongo ae aan te euangkerio: “Te Atua E karika karawa, ao te aonaaba ma bwaina nako ake iaona, bwa bwaai ni kabane a na kakoaua te karikibwai mai karawa anne, ao bwa e na iai te katiteuanaaki n te karikibwai, rabakau n te tiaienti, ao ana euangkerio Iesu Kristo.”⁵

Aramwa e kakoaua, “Bwaai ni kabane a kaotia bwa iai te Atua.”⁶ Ara ataei n te Moanrinan a anenea, “N te tai are I ongo iai tangin te mannikiba ke n taraa karawa ae buruu, … I kukurei bwa I maeka n te aonaaba ae tamaroa aei are karikia Tamau are i Karawa ibukiu.”⁷ Te tia korokaraki ae Victor Hugo e kamoamoa te “reitaki ae kamiimi imarenaia maan ao aomata ma bwaain te aonaaba ae korakora aei, man taai nakon te man ae bingiingii. … Manikiba nako ake a kona ni kiba iai mwakoron te Atua irouia. … Naang ao kaeti ke bubu n te eea bon ngaoia itoi.”⁸

Ao anne are e uotiira rikaaki nakon ana kakao Unimwaane Scott.

“Unimwaane Scott,” I kaeka, “I tangiria bwa N na noonori riki bwaai ao ni kona ni kariki bwaai. I kukurei ngke I iangoa ana tamnei Tamara are i Karawa ma bwariko n nang ao karan nako karawa ao te ran. “Ma”—ikai I a kainabwaabu—“Unimwaane Scott,” I taku, “Akea rabakau ni kabongana te kara ae renganaki ma te ran. I raraoma ngkana kona un ngkai ko kataia n reireinai.”

Unimwaane Scott e moangare ao e bairea au tai are N na kaitibo iai ma ngaia. N te bong are e rineia, e katauraoa te beebwa, been, ao taian burati. E korei tabeua tamnei ao e buokai ni kamwaimwai beebwa ibukiu.

Ti kabongana bwa te katooto ana tamnei ae moan te tamaroa ae atunaki Te Kaembwaea i etan te ai ni Bungintaai. Ngke ti tabe ni been, ti maroroakina taekan te onimaki—aron are ti a tia n namakina iai te rau ao te karaunano man te kaembwaea, e toki raraomara n te roo ao te nanououa i akuura—ao aron taai aika a maan, maroa inanon te roo, ara kaembwaea n te onimaki e kona n anganiira te kantaninga ao te raunnano. Ao e roko te tai are ti na bwaibwai iai. Ara kaembwaea n te onimaki—ara ururing, namakin, ao rikiara n onimakina ana nanoanga te Uea inanon maiura—e a tia ni kakorakoraira rinanon ara tai n rinanon te kaangaanga.

Au kaangaanga, Ibukiia naake a ukoukora, kariaia, maiuakina, moan wakin te onimaki ni moan otintaai, n tabetai e na tabe ni karaurau, n roko ke ni kona n oki. Te oota e na roko ngkana ti tangiria ao n ukoukoria, ngkana ti tataonaki n nano ao n ongotaeka nakon ana tua te Atua, ngkana ti butimwaea ana nanoanga te Atua, ana kamaiu ao ana berita.

Ngke ti waaki ni been, Unimwaane Scott e kaungai, “Gerrit, te reirei naba ae ti teuana ko na kona ni beenia te bwai teuana ae ko tangiria ni kawakinna ao n ururingnga.” E bon eti Unimwaane Scott. I rangi ni kawakina tamnein te kaembwaea n te onimaki are e buokai iai Unimwaane Scott. Bwaatiu ni korotamnei e tiku n arona, ma uringan te kaembwaea n te onimaki e kona ni kaungaira ni kawai aika nimaua.

Te moan, te kaembwaea n te onimaki e kaungaira bwa ti na kunea te kimwareirei n te karikibwai ae tamaroa.

Iai te kukurei inanon te kario iango, kamatebwaian, karaoan bwaai aika a kakaawaki aika a boou. E koaua riki aei ngkai ti kanenea ara onimaki ao onimakinan Tamara are i Karawa ao Natina, Iesu Kristo. Ti aki kona n tangiriira n ae tau bwa ti na kona ni kamaiuira. Ma Tamara are i Karawa e tangiriira riki nakon are ti bon tangiriira ke ni kinaira i bon iroura. Kam na onimakina te Uea ao tai mwiokoa oin am ataibwai.⁹

Ko a tia n aki kaoaki nakon te bukamaru n ana rekenibong temanna?

Ko a tia n rineaki n te kabanea, ke n aki rineaki ngkana a rineaki kain te tiim?

Ko a tia ni katauraoi nakon te ukeuke n te reirei, te intawiu n te mwakuri, te tibwanga ae ko rangi n tangiria—ao ko namakinna bwa ko kabwaka?

Ko a tia n tataro ibukin te reitaki are, ko aki ataia bwa tera bukina, e aki koro bukina?

Ko a tia n rinanon te aoraki ae aki ewewe, ko kiitanaki iroun buum, rainanoanga ibukiia am utu?

Ara Tia Kamaiu e atai arora. Ngkai ti kamwakura ara rinerine are e anganiira te Atua ni kabonganai n nanorinano ao n onimaki, ara Tia Kamaiu, Iesu Kristo, e kona ni buokiira ni kaaitarai kaangaanga ao kakukurei. Te onimaki n raonaki ma te nano ao te rinerine ni kakoaua. Te onimaki e roko naba man te ongeaba nakon ana tua te Atua, are e anga bwa e na kakabwaiaira, ngkai ti iriira kawain Ana berita aika tabu.

Ngkana ti tia n namakinna, ke ni kanamakinna, nanououa, maroa, kua, un, kabwaka, aki kukurei, ke ni mwaawa mairoun te Atua ao Ana Ekaretia are e kaokaki, e kona ni kainnanoa te mwakuri ae abwabwaki ao te onimaki ni manga rin ni kawain Ana berita aika tabu. Ma e boongana! Taiaoka nakomai, ke manga oki, nakon te Uea Iesu Kristo! Ana tangira te Atua e korakora riki nakon kaon te mate—n rabwata ao n tamnei.¹⁰ Ana Mwakuri ni Kamaiu te Tia Kamaiu akea tiana ma tokina. Ngaira n tatabemaniira ti mwaninganako ao ni kabwaka. Ti kona, n tabetai, ni bua ni kawaira. Ana tangira te Atua e kakoaua nakoira, n aki taraia bwa ti mena ia ke tera ae ti a tia ni karaoia, ti kona n oki nakoina. E tataninga ao e tauraoi ni butimwaira.¹¹

Te kauoua, te kaembwaea n te onimaki e kona ni kaungaira bwa ti na ibuobuoki n te kawai ae boou, rietaata riki, ao n tabu riki ni kaonaki n ana kawai te Tamnei.

N aron aikai e uotii kakai ao kakabwaia ni mweengaraoi ni bwaibwai iroun te Atua—are ti namakina iai ana tangira ao n ukoukoria ni buokiia tabeman n te tamnei anne.

N te tai ae aki maan n nako, Ngai ma Titita Gong ti irekereke ma te karo ao te utu are e kakabwaiaaki iroun te tari ae kakaonimaki n te nakoanibonga are e roko nakon aia bitiobi ni bubuti ngkana e (te tari n te nakoanibonga) kona ni katoatoa ma te karo. Te karo e aki kakaonimaki ao e aki nano n te kakawari n te mweenga. Ma ngkai e a bitaki nanon te karo, ngaia ma tarina n te nakoanibonga ae tangira e waaki ni kawariia “aia” utu. Imwiin te roko anne, kainnabana—neiere e aki ira te taromauri—e titirakina buuna a kanga ni karaoaki bwaai. Te karo e kaotia, “Tao I a tia n namakinna”—imwiina e nakon te umwa ni kuuka n anaa te biia.¹²

Ma te bwai teuana are e rinanona e rimwiiaki n are imwiina: namakin n tangira, mwakuri n ibuobuoki, bitaki n nano, kiraati ni katauraoi nakon te tembora, roroko n taromauri, te kabaeaki bwa utu n te tembora ae tabu. Iangoa kukureia nati ao tibu irouia aia karo ao tinaia ao iroun te tari n ibuobuoki are e raoniia are e roko bwa te rao ao te tia katoatoa ma tamaia n tangira ao ni buokiia tabeman.

Te kateniua ni kaembwaea n te onimaki ni kaunganano: karikibwai n te kimwareirei n te euangkerio ao kakabwaia a roko ngkana ti ukoukoria n tangira te Uea ao tabeman ma nanora ni kabane ao tamneira.

Koroboki aika a tabu a kaoira nakon taabo nako ake ti mena iai n riki bwa te baonikarea n te tangira ao te ibuobuoki. N te O Tetemanti, te Tua Kaua e tuangiira bwa ti na “tangira te Uea Atuara” ma nanora ni kabane, tamneira, ao korakorara.¹³ Iotua e kaungaira, “Tangira te Uea ae Atuam, … nakonako ni kawaina ni kabane, … ma ni kawakin ana tua nako, … man nimtia, ao … man toro irouna n nanomi ni kabane ao n tamneimi ni kabane.”¹⁴

N te Nu Tetemanti, ara Tia Kamaiu e kabwarabwarai tuua ake uoua: “Ko na tangira Iehova ae Atuam n nanom ni kabane, ao n tamneim ni kabane, ao ni wanawanam ni kabanea” … ao “Ko na tangira raom n ai aron tangiram i bon i roum”¹⁵

N ana Boki Moomon: Kakoauan taekan Iesu Kristo, te Uea Beniamina e beku “ma korakoran rabwatana ni kabane ma ana konabwai ni kabane tamneina,” ao e katea te rau iaon te aba.¹⁶ N Reirei ao Berita aika a Tabu, are a bane n ataia mitinare, te Uea e tuangiira bwa ti na beku Ibukina ma “nanora, marurungira, ara iango, ao korakorara ni kabane.”¹⁷ Ngke a rin Aomata aika a Itiaki i Jackson County, te Uea e tuangiia bwa a na kawakina te Tabati n tabuia ao n tangira “te Uea ae Atuam ma nanom ni kabanea,ma marurungim, am iango, ao korakoram ni kabane; ao ko na beku ibukina n aran Iesu Kristo.”¹⁸

Ti kimwareirei n te kakao ni kabanei nanora ma tamneira ni ukoukora ao n tangira te Atua n te kawai ae rietaata ao ni mimitong riki ao n tangiriia naake irarikira ao ni kakorakorai ara onimaki iroun Tamara are i Karawa ao Iesu Kristo inanora inanon mweengara ao n te ekaretia.

Te kaua, te kaembwaea n te onimaki e kaungaira bwa ti na katea te baeten n te maiu ae raoiroi are e kakorakora te onimaki ao te tamnei.

Anua aika a tabu aikai, bwaai aika a kakaraoaki aika raraoi, ke baeten aika a tataroakinaki e kona n raonaki ma te tataro, kamatebwaian koroboki aika a tabu; aki mamatam; uringakin ara Tia Kamaiu ao berita rinanon otenanti n toa, tibwakin kakabwaia n te euangkerio rinanoia mitinare, tembora ao rongorongon te utu, ao mwakuri tabeua; ni kawakinan te tienero n ara iango n tamnei; ao a mwaiti riki.

Ngkana te baeten ae raoiroi ao te tamnei a uaia n reitaki, te tai ao ae akea tokina a uaia n roko n ikotaki. Otan te maiu n tamnei ao te maiu e roko ngkana ti roroko n taainako n taromauri e na kaniira riki nakon Tamara are i Karawa ao ara Tia Kamaiu, Iesu Kristo. Ngkana ti tangira te tamnei ao te otenanti ao bwaai ake a kabwarabwaraaki n te tua, bwaai ake akea tokina e kona n tiku inanona n ai aron te aoi mai karawa.¹⁹ Ma te ongotaeka ni katoa bong ao te ran ae maiu, ti na kunei kaeka, onimaki ao korakora ni kaaitarai kaangaanga ao tibwanga n taotaonaki n nano n te euangkerio, iango, ao ni kimwareirei.

Kanimaua, ngkai ti kawakina te kabanea n tamaroa ni baeten ngkai ti ukoukori kawai aika boou aika tabu riki n tangira te Atua ao n ibuobuoki imarenara, te kaembwaea n te onimaki e kona ni kaungaira bwa ti na uringa te kakororaoaki are e mena iroun Kristo, tiaki inanora ke n iangoia bwa te aonaaba bwa e kororaoi.

Ana kakao te Atua a kaonaki n te tangira ao bwaai aika a kona n riki ibukina bwa Iesu Kristo bon “te kawai, te koaua ao te maiu.”²⁰ Nakoia naake a namakina te rawawata, E kaoia, “Nakomai,” ao nakoia naake a Nakoina, E berita, “N na motiki rawami.”²¹ “Nakomai nakon Kristo, ma ni kakororaoaki irouna, … tangira te Atua ma korakorami, ami iango ao marurungimi, ao ngkanne e na tau ana akoi ibukimi, ao man ana akoi ao kam kona ni kororaoi iroun Kristo.”²²

N te kakoaua aei “man ana akoi kam a kakororaoaki i nanon Kristo,” bon man te karaunano naba, te rau, ao ni berita bwa ti a kona n reitinako ma te onimaki ao te mweengaraoi iroun te Uea riki ngkana bwaai aki nakoraoi nakon are ti onimakinna, kantaningaia, ke tao ni kariaria, rinanon buure aika tiaki mai iroura, riki imwiin karaoan ara kabanea n tamaroa.

N taai ao n aro aika a mwaiti, ti bane ni namakina te aki tau, nanououa, ao tao bon te aki tau. Ma inanon ara mwakuri ni kakaonimaki n tangira te Atua ao ni buokiia naake irarikira, ti kona n namakin ana tangira te Atua ao ni kainnanoa te kaunganano ibukin maiuiia ao maiura n te kawai ae boou ae mimitong riki.

Ma te nanoanga, E kaungaira ara Tia Kamaiu ao e berita bwa ti kona ni “waaki nako man teimatoa inanon Kristo, ma te kaantaninga ae tamaroa ma ni kororaoi, ma tangiran te Atua ma aomata ni kabane.”²³ Ana reirei Kristo, ana mwakuri ni kamaiu Ara Tia Kamaiu, ao nanora ni kabane n irira kawain Ana berita e kona ni buokiira n ataa Koauana ao ni kainaomataira.²⁴

I kakoaua bwaninin Ana euangkerio ao Ana babaire ni kakukurei bwa a kaokaki ao a reiakinaki n Ana Ekaretia Iesu Kristo ibukiia Aika Itiaki ni Boong aika Kaitira, ni koroboki aika a tabu, ao irouiia burabeti mairoun Iotebwa Timiti nakon Beretitenti Russell M. Nelson n te bong aei. I kakoaua bwa kawain Ana berita e kairi nakon ana bwai n tituaraoi ae te kabanea ni korakora are e a tia ni berita iai nakoia Tamara are i Karawa: “E na reke iroumi te maiu ae akea tokina.”²⁵

E na mena Ana kakabwaia ao te kimwareirei ae akea tokina iroura ngkai ti kaabuei nanora ao ara kantaninga ao ara motinnano ni kauran ara ai ni kaembwaea n te onimaki, I tataro n aran Iesu Kristo ae tabu man mimitong, amen.