Taben ana Boki Moomon bwa e na Rairiia aomata

Unimwaane Shayne M. Bowen

Man te Itingaun

Ti a ikotiia Iteraera ibukin te kabanea n tai ao ni kaairia ma Ana Boki Moomon, are teuana naba te bwai ni mwakuri ae mwakaroiroi ibukin te rairaki.

A mwaiti aomata n te bong aei aika miimi n taekan koauan te Atua ao irekerekera Nakoina. Angiia akea aia atatai n taekan Ana Babaire ni kakukurei ae korakora. E riaon 30 te ririki n nako, Beretitenti Ezra Taft Benson e taraia bwa “mwaitin te … aonaaba n te bong aei a totokoa te Tia Kamaiu n arona mai karawa. A nanououa ni kamiimin Bungiakina, Maiuna ae nakoraoi, ao koauan Mimitongin utina.”¹

Inanon ara bong, taian titiraki a katuruaki tiaki tii iaon ara Tia Kamaiu ma naba iaon Ana Ekaretia—Ana Ekaretia Iesu Kristo ibukiia Aika Itiaki ni Boong aika Kaitira—are E kaokia te Burabeti Iotebwa Timiti. Titiraki aikai aki toki n katuraki iaon rongorongo ngkoa, taian reirei, ke mwakuri n ana Ekaretia te Tia Kamaiu.

Ana Boki Moomon e Buokiira n Rikirake inanon te Koaua

Man te boki ae Preach My Gospel, ti warekia: “Uringnga bwa ara atatai [iroun Tamara are i Karawa ao Ana Babaire ni kakukurei] a roko mairouia burabeti ngkai—Iotebwa Timiti ao taan ririmwina—ake a karekei kaotioti mairoun te Atua. Ngaia are, te moan titiraki are temanna e na kaeka bon Iotebwa Timiti bon te burabeti, ao teuane ke neienne a kona ni kaekaa te titiraki aio man warekan ao tataroan taekan ana Boki Moomon.”²

Au koaua ni wetean te Burabeti Iotebwa Timiti ae mairoun te Atua e a tia ni karekea kakorakoraana man kamatebwaian ana Boki Moomon: Teuana Kakoauan Iesu Kristo. I a tia ni mwakuri iaon ana kakao Moronaai ni “butiia te Atua, te Tama akea tokina, n aran Kristo,” n ata koauan raoi Ana Boki Moomon.³ I kaota au koaua bwa e bon koaua. Bwa te atatai e tia n roko irou, are e kona naba n roko nakoim “man mwaakan te Tamnei ae Raoiroi.”⁴

Te kabwarabwara nakon Ana Boki Moomon e koreaki: “Koraki ake a karekea te kakoaua ae mairoun te Atua aei [n Ana Boki Moomon] mairoun te Tamnei ae Raoiroi e na roko naba n ataakina man te mwaaka ae tii te arona bwa Iesu Kristo bon te Tia Kamaiu n te aonaaba, are Iotebwa Timiti bon Ana tia karekei kaotioti ao te burabeti ni boong aikai, ao bwa Ana Ekaretia Iesu Kristo ibukiia Aika Itiaki ni Boong aika Kaitira bon abanuean te Uea are e na manga kateaki iaon te aba, ni katauraoaki nakon Kauaokin Rokon te Mesia.”⁵

Ngke I kairake ni mitinare bwa N na nako Chile, I reiakina mwaakan te reirei n taekan te bitaki-ni maiu man Ana Boki Moomono. Ten Gonzalez e beku n nakoana ae kinaaki n ana ekaretia n ririki aika mwaiti. E karekei ana kataneiai n taekan te aro, e karekea ana tikurii n te rabakau n taekan te Atua. E rangi ni kamoamoa n rabakauna n te Baibara. E bon teretere nakoira bwa e bon reiakina taekan te aro.

E rangi n ataiia mitinare n Ana Ekaretia Iesu Kristo ibukiia Aika Itiaki ni Boong aika Kaitira ake a ririaki ni mwakuri n ana kaawa ae bubura i abana, i Peru. E aki toki n tangiria ni kaaitibo ma ngaiia n te aro are e namakinna bwa ana atatai n te Baibara e bubura riki nakoia mitinare.

Te bong teuana, bon te kamimi ae roko kanga ai aron te bwaintangira mai karawa, ae e a kaman iangoia, uoman mitinare a kateia n te kawai ao a butiia ngkana a kona n roko ni mweengana ao n tibwauai koroboki aika tabu ma ngaia. N te tai aio ao e a koro bukin miina! E kaekaki ana tataro. Ngkanne, e nang kona ni kaota te kairi ae kaairua nakoia ataeinimwaane buren aia reirei. E tuangiia bwa e kukurei ni butimwaiia n roko ni mweengana ni marooroakin koroboki aika tabu.

E rangi ni ingainga n rokoia n ana auti. E tauraoi ni kabongana te Baibara ni kakewei aia koaua. E rangi ni kakoaua raoi bwa te Baibara e na kamataata ao ni kaota buren aia kawai. E a roko te tairiki are a na roko iai, ao mitinare a karebwerebwe n ana mataroa. E bon rangi ni kukurei. Akea bwa a roko.

E kauka te mataroa ao ni kariniia mitinare inanon ana auti. Temanna te mitinare e anganna te boki ae buru ao ni kaota ana kakoaua are e ataia bwa kanoan te boki ao n ana taeka te Atua. Te kauoman ni mitinare e reita ana koaua ae mwaaka n te boki, ni kakoaua bwa e a tia n rairaki iroun ana burabeti te Atua arana Iotebwa Timiti ao are e reireia taekan Kristo. Mitinare aikai ngke a tia ao a bubutia ngkana a kona ni kitana mweengana.

Mr. Gonzalez e rangi n aki kukurei irouia. Ma e kauka te boki, ao ni moanna n rairaira baana. E wareka te moan itera ni baa. E wareki te baana imwin te baana e reitinako baana ni warekii ni karokoa e a bakanako te tai n bwakantaai n te bong are imwina. E wareka te boki ni kabanea ao e ataia ae e koaua. E ataia bwa tera ae riai ni karaoia. E tareboniia mitinare, bwa e kan ongora aia reirei, ao ikanne are e a reke irouna te maiu are e a kan n riki bwa ngaia te membwa n Ana Ekaretia Iesu Kristo ibukiia Aika Itiaki ni Boong aika Kaitira.

Te mwaane ae tamaroa aei bon au tia reirei n te MTC i Provo, Utah. Karakinan rairakin te Tari Gonzalez man mwaakan ana Boki Moomon e anganai korakoran te namakin nakoiu.

Ngke I roko i Chile, au mition beretitenti, Beretitenti Royden J. Glade, e kaoiira bwa ti na wareka ana kakoaua te Burabeti Iotebwa Timiti are koreaki iroun Iotebwa Tiimiti—Rongorongona ni katoa wiiki. E reireiniira bwa te kakoaua n te Moan Mii ni burabeti e na karekea te kairoro ae kaeineti iaon oin ara kakoaua n te euangkerio ao Ana Boki Moomon.

I kariaia ana kakao ma nanou raoi. I a tia ni wareka taekan te Moan Mii ni burabeti; I a tia ni wareka ana Boki Moomon. I a tia n tataro n aron are e taekinaki iroun Moronaai ao butiia “te Atua, te Tama ae Akea tokina, n aran Kristo”⁶ ngkana e koaua Ana Boki Moomon. I kaota au koaua n te bong aei bwa I ataia bwa Ana Boki Moomon, n aron are e taku te Burabeti ae Iotebwa Timiti, “bon te boki ae te kabanea n eti mai buakon booki nako iaon te aonaaba, ao boni ngaia kiingin ara ekaretia, ao [e na] kaania riki te Atua te aomata ngkana e iri nanon reirei ake a taekinaki inanona, nakon taian boki riki tabeua.”⁷ Te Burabeti Iotebwa e katanoata naba: “Ni kararoaan ana Boki Moomon ao taian kaotioti, ao e nga ara aro? A akea iroura.”⁸

Te Rairaki Ibon Iroum

Ngkana a tamaroa ara atatai ti na ataia bwa antai ngaira ao bukin bonganan Ana Boki Moomon, rairakira e na korakora ao e na rikirake ni matoa. Ti na kakorakoraaki inanon ara motinnano ni kawakini berita aika tabu ake ti karaoi ma te Atua.

Oin bukin Ana Boki Moomon bon ikotakiia Iteraera ake a uamaenako. Ikotakiia aio e na anganiia natin Tamara are i Karawa aia tai n rin inanon kawain te berita ao, man karinei berita aika tabu, n okirikaaki nako matan te Tama. N aron ae ti reirei te rairannano ao te bwabetito n rairaki, ti ikotiia Iteraera ake a maenako.

Ana Boki Moomon bon 108 rongorongon te bata are Iteraera. Ni moanakin Ana Boki Moomon, Nibwaai e reirei, “Bwa oin bukin au kantaninga bon anaan nanoia aomata bwa a na nakon Atuan Aberaam, ma Atuan Itaaka, ma Atuan Iakobwa, bwa a aonga ni kamaiuaki.”⁹ Atuan Aberaam, Itaaka, ao Iakoba bon Iesu Kristo, te Atua n te O Tetetamenti. Ti na kamaiuaki ngkana ti nakon Kristo rinanon maiuakinan Ana euangkerio.

Imwiina, Nibwaai e koreia:

Eng, e taetae naba tamau ni kaineti ma taekaia Tientaire, ao ni kaineti naba ma taekan te bata are Iteraera, bwa a na riai ni kabootauaki ma te kai ae te oriwa, aika a na oteaki mwaangana ao a na riki ni kamaenakoaki nako ni kabuta aon te aonaaba. …

“Ao imwiin kamaenakoan te bata are Iteraera ao e na manga ikotaki riki; ke, n riaina, ngkana a tia Tientaire ni karekea bwaninin te euangkerio, oin mwaangan te kai ae te oriwa, ke nikiraia kaain te bata are Iteraera, a na manga kanimwaki, ke a na karekea ataan rongorongon koauan te Mesia, aia Uea ao aia Tia Kabooia.”¹⁰

Ai aron, kabanean Ana Boki Moomon, te burabeti Moronaai e kauringiira n taekan ara berita, e kangai, “Bwa ko aonga n aki manga kamangaoaki, bwa ana berita aika a tabu te Tama ae Akea Tokina ake e a tia ni karaoia ma ngkami, O te bata are Iteraera, e na kakoroaki bukina.”¹¹

Ana Berita aika Tabu te Tama ae Akea Tokina

Tera “ana berita aika tabu te Tama Akea Tokina” are e taekinaki iroun Moronaai? TI warekia inanon ana boki Aberaam:

“Arau bon Iehova, ao I ata tokina man te moan tai; ngaia are e na mena baiu i aom.

“Ao Nna karika mairoun te botan aomata ae korakora, ao Nna kakabwaiako n akea tiana, ao Nna karika aram bwa ena korakora ibuakoia te botan aomata nako, ao ko na riki bwa te kakabwaia nakoia kanoam ake imwiim, bwa inanon baia ao ana uota te mwakuri aei ao te Nakoanibonga nakoia botan aomata ni kabane.”¹²

Beretitenti Russell M. Nelson e anga a na reirei inanon n te kanakobwana nakon te aonaaba bwa “koauana bwa bon boong ni kaitira aikai, ao te Uea e a kabaikoa Ana mwakuri ni ikotakiia Iteraera. Ikotakiia aei bon te bwai ae moan te kakawaki ae e a karaoaki ngkai iaon te aba. Akea riki kabotauana n abwabwakina, akea riki kabotauana n kakawakina, akea riki kabotauana n mimitongina. Ao ngkana ko kan rineia, ngkana ko tangiria, ko kona n riki bwa mwakorona ngkoe. Ko kona n riki bwa buburan mwakoron te bwai ae bubura, te bwai ae tamaroa, te bwai ae mimitong!

“Ngkana ti taekina ikotakiia, ti na taekinna buburan te koaua aei: ni kabaneia natin Tamara are i Karawa, n iteran rooki ake uoua, n tauraoi n ongoraea ana euangkerio ae kaokaki iroun Iesu Kristo. A na bon iangoia irouiia ngkana a tangiria ni kan ataia riki.”¹³

Anne te bwai are ti karaoia ngaira membwa n Ana Ekaretia Iesu Kristo ibukiia Aika Itiaki ni Boong aika Kaitira: ti ukeriia ni uota te aonaaba nakon ataakin—ao te rairaki nakon—ana euangkerio Iesu Kristo. Ngaira “taan ikotiia ni boong ni kaitira.”¹⁴ Ara mition e itiaki. Tariu ao mwaaneu, ti a kaotiira ngaira ake ti a tia ni karekea ana berita Moronaai ma nanora ni koaua, tataro ao karekea te kaeka nakon ataakina bwa Ana Boki Moomon e bon koaua, ao ngkane tibwaua te atatai anne ma tabeman n rinanon ara taeka ao, kakawakina riki, n rinanon ara mwakuri.

Taben Ana Boki Moomon inanon te Rairaki

Ana Boki Moomon kanoana bon bwaninin ana euangkerio Iesu Kristo.¹⁵ E kairiira nakon ana berita aika tabu te Atua, are ngkana e kawakinaki e na anganiira Ana bwaintangira ae rietaata—te maiu akea tokina.¹⁶ Ana Boki Moomon bon teuana kakawakin mwakoron rairakiia ni kabane natin Tamara i Karawa mwaane ao aine.

E a manga taekina naba Beretitenti Nelson: Ngkana ko … wareka Ana Boki Moomon ni katoa bong, kona reiakina te reirei n ikotakiia, koauan taekan Iesu Kristo, Ana Mwakuri ni Kamaiu, ao bwaninin Ana euangkerio e aki kuneaki n te Baibara. Ana Boki Moomon bon te nuka nakon ikotakiia Iteraera. N koauana, ngke arona bwa akea Ana Boki Moomon, te berita n ikotakiia Iteraera e na bon aki riki.”¹⁷

N na kainai ma ana taeka te Tia Kamaiu n aron are E reireiniia Nibwaite kakabwaia man te berita: “Ngkami natia burabeti; ao ngkami kain te bata are Iteraera; ao ngkami kain te berita are e tabu are e karaoia te Tama ma ami bakatibu, ni kangai nakon Aberaam: Ao e na kakabwaiaki te aonaaba man am kariki.”¹⁸

I kakoaua bwa ngaira bon naati mwaane ao naati aine iroun te Atua, kanoan Aberaam, te bata are Iteraera. Ti a ikotiia Iteraera ibukin te kabanea n tai ao ti kaairia naba ma Ana Boki Moomon—te boki are, e reitaki ma Tamnein te Uea, bon te bwai ni mwakuri ae mwaakaroiroi n te rairaki. Ti kairaki iroun ana burabeti te Atua Beretitenti Russell M. Nelson, are e kaira ikotakiia Iteraera inanon ara bong. Ana Boki Moomon e koaua. E a tia ni bita maiu. I berita nakoimi, ngkai a tia Moronaai ao burabeti aika mwaiti inanon taai ngkoa, are a na konaa ni bitii ngkami.¹⁹ N aran Iesu Kristo, amen.