Elder Brook P. Hales

Fitugafulu o le Pulega Aoao

Ao valu pe iva tausaga o Elder Brook P. Hales, sa i ai o ia i se sauniga o le anapogi ma molimau lea sa pulefaamalumalu ai lona tama o se epikopo. Sa valaauliaina e lona tama le au paia e tuuina atu ni molimau, ma e toetoe lava o tagata uma sa auai na tuuina atu se molimau. “Masalo o le taimi muamua lea na ou lagona ai le molimau mai o le Agaga ia te a’u e uiga i le moni o le talalelei,” na toe manatuaina e Elder Hales.

Na ia lagonaina lena molimau i le tele o taimi talu mai lena taimi, aemaise lava ao ia auauna atu o se failautusi i le Au Peresitene Sili talu mai le 2008. Ina ua lagolagoina Peresitene Thomas S. Monson o se perofeta ma le Peresitene o le Ekalesia, ma ina ua lagolagoina Peresitene Russell M. Nelson, na ia molimauina “le ofutalaloa o le perofeta o pau atu i luga o nei tamalii taitoatasi, ma sa ou iloaina e aunoa ma se masalosalo na filifilia ma valaauina i la’ua e avea ma Peresitene o le Ekalesia mo lo la’ua lava taimi faapitoa.”

Sa valaauina Elder Hales e avea o se Fitugafulu o le Pulega Aoao i le aso 17 o Me, 2018, ma lagolagoina i le aso 6 o Oketopa, 2018. O le a faaauau pea ona ia avea ma failautusi i le Au Peresitene Sili.

Sa soifua mai i Ogden, Iuta, ISA, i le aso 7 o Aperila, 1956, ia Klea ma Glenn Phillip Hales, sa maua e Elder Hales se tikeri i mea tau tupe ma teugatupe i le faletupe mai le Kolisi a le Setete a Uepa (ua ta’ua nei o le Weber State University) i le 1980. Ina ua uma ona faauu, sa ia galue i le matagaluega o faletupe ma i le Matagaluega o Tupe ma Faamaumauga a le Ekalesia. Sa ia faaipoipo atu ia Denise Imlay Hales i le 1981, ma o i la’ua o ni matua o se fanau e toafa. Na auauna atu Elder Hales o se faifeautalai faamisiona i le Misiona a Farani Pale, fesoasoani i se au epikopo, taitai vaega o faitaulaga sili, epikopo, peresitene o se siteki, ta okeni mo le au perisitua, faiaoga o le Aoga Sa, ma se fai faamauga o le malumalu.

I lena aso ao avea o ia ma se tamaitiiti, e lei tuuina atu e Elder Hales lana molimau. Peitai ua tuputupu ae talu mai lena taimi. “Ua toefuatai mai le talalelei a Iesu Keriso e ala mai i le Perofeta o Iosefa Samita, e moni le Tusi a Mamona, e alofa le Atua ia i tatou ma le atoatoa ma e naunau e faamanuia mai ia i tatou, o Iesu o lo tatou Faaola, ma ua faamanuiaina i tatou ina ia maua le mafutaga faifaipea o le Agaga Paia pe a tatou agavaa i ai,” na ia saunoa mai ai.