Talitonu, Alofa, Faia
Saunia e Elder Dieter F. Uchtdorf
O Le Korama a Aposetolo e Toasefululua
Tatou te ausia le ola atili e ala i le avea ma soo moni o Iesu Keriso—e ala i le mulimuli atu i Ona ala ma auai i Lana galuega.
O’u uso e ma tuafafine, o se taimi matagofie tele le faatasi ai ma outou i lenei sauniga ofoofogia o le konafesi aoao i le asō: o le faalogo atu i savali musuia; faalogo i lenei aufaipese mataina ma matagofie o faifeautalai o loo fai ma sui o le fia afe o faifeautalai i le lalolagi atoa—o o tatou afafine, o o tatou atalii—ma aemaise lava le faatasia ai i lo tatou faatuatuaga i lenei aso, i le toe lagolagoina o lo tatou Peresitene ma perofeta pele, o Peresitene Russell M. Nelson, o le Au Peresitene Sili, ma Taitai Aoao o le Ekalesia. O se aso fiafia le faatasi ai ma outou i le asō.
O le Tupu o Solomona anamua o se tasi o tagata soifua sa matuā sili ona faamanuiaina i le talafaasolopito.1 Sa foliga mai na ia te ia mea uma—tupe, pule, faaaloalo, mamalu. Ae i le mavae ai o le tele o tausaga o le faamalieina o ona lava manao ma le tamaoaiga, na faapefea ona aoteleina e le Tupu o Solomona lona olaga?
“E faatauvaa mea uma lava,”2 sa ia fai mai ai.
O lenei tagata, na ia te ia mea uma, na i’u i le faanoanoa, masalosalo, ma le le fiafia, e ui i mea uma sa ia te ia.3
E i ai se upu i le FaaSiamani, Weltschmerz. E faauigaina gofie, o lona uiga o se faanoanoaga e sau mai le mafaufau tele ma le le fiafia i le auala ua leaga tele ai le lalolagi nai lo le mea tatou te manatu e tatau ona i ai.
Masalo o loo i ai sina Weltschmerz (faanoanoaga) ia i tatou uma.
Pe a tolotolo malie mai faanoanoaga i o tatou olaga e aunoa ma le iloaina. Pe a lofituina i tatou e faanoanoaga matuitui i le ao atoa ma le po. Pe a oo ia i tatou ni faalavelave ma faiga le tonu a nisi, e aofia ai ma olaga o i latou tatou te alolofa i ai. Pe a tatou lagonaina e tele atu mea le lelei ma luitau e tutupu i o tatou lava olaga i lo isi, ma tatou le fiafia ai lava ae tatau ona tatou maua le filemu—e ono faaosoosoina ai i tatou e ioe faatasi ma Solomona e leai se aoga ma se uiga o le olaga.
O Le Faamoemoe Sili
O le tala fiafia, o loo i ai se faamoemoe. O loo i ai se vaifofo i le leai o se uiga, le aoga, ma le Weltschmerz o le olaga. O loo i ai se vaifofo i le matuā leai o ni lagona o le faamoemoe ma le lotovaivai e te ono lagonaina.
O lenei faamoemoe o loo maua i le mana liua o le talalelei a Iesu Keriso ma i le mana togiola o le Faaola e faamalolo ai i tatou mai i o tatou ma’i o le agaga.
“Ua ou sau,” sa tautino mai e Iesu, “ina ia latou maua le ola, ia maua atili ai lava.”4
Tatou te ausia lena ola atili e lē ona o le taulai atu i o tatou lava manaoga po o a tatou lava ausiaga ae e ala i le avea ma soo moni o Iesu Keriso—e ala i le mulimuli atu i Ona ala ma auai i Lana galuega. Tatou te maua le ola atili e ala i le faagaloina o i tatou lava ia ma auai i le galuega tele a Keriso.
Ma o le a le galuega a Keriso? O le talitonu lea ia te Ia, alofa atu e pei ona Ia alofa, ma faia e pei ona Ia faia.
Sa “femaliuai Iesu ma agalelei.”5 Sa Ia savavali faatasi ma ē matitiva, o ē ua faaāunu’ua, o ē mama’i, ma ē maasiasi. Sa Ia auauna atu i ē faatauvaa, o ē vaivai, ma ē ua leai ni uo. Sa Ia faaalu le taimi ma i latou; sa Ia talanoa ma i latou. “Ona faamalolo ai lea e ia o i latou uma.”6
Soo se mea na Ia feāfioa’i ai, sa aoao atu lava e le Faaola le “tala fiafia”7 o le talalelei. Sa Ia faasoa atu upumoni e faavavau na faasaoloto ai faaleagaga tagata faapea foi ma le faaletino.
O i latou e tuuto atu i latou lava i lenei lava galuega e tasi e mauaina le upumoni o le folafolaga a le Faaola: “A o le faamaumau lona ola ona o a’u e maua ai e ia.”8
O Solomona na sese, ou uso e ma tuafafine pele—o le olaga e lē “faatauvaa.” I se isi itu, e mafai ona faatumulia i le faamoemoega, uiga, ma le filemu.
O le aao faamalolo a Iesu Keriso o loo aapa atu mo tagata uma e saili ia te Ia. Ua ou iloa e aunoa ma le masalosalo o le talitonu ma le alofa i le Atua ma taumafai e mulimuli ia Keriso e mafai ona suia ai o tatou loto,9 faamaluluina ai o tatou tiga, ma faatumulia ai o tatou agaga i le “olioli tele.”10
Talitonu, Alofa, Faia
Ioe, e tatau ona tatou faia nisi mea nai lo le na ona i ai o se malamalamaaga faalemafaufau o le talalelei ina ia maua ai lenei aafiaga faamalolo i o tatou olaga. E tatau ona tatou faaaogaina i o tatou olaga—ia avea o se vaega o ō tatou tagata ma mea tatou te faia.
Sei ou fautua atu o le avea ma soo e amata i upu faigofie e tolu:
Talitonu, alofa, ma faia.
O le talitonu i le Atua e taitai atu i le faatuatua ia te Ia ma le atiina ae o le faalagolago i Lana afioga. O le faatuatua e afua ai ona faateleina i o tatou loto lo tatou alolofa mo le Atua ma isi. A o faateleina lena alofa, e musuia i tatou e mulimuli i le Faaola ao tatou faaauau pea la tatou lava ia malaga i luga o le ala o le avea ma soo.
“Ae,” e te fai mai, “ua e soona faafaigofieina lena mea. O faafitauli o le olaga, e mautinoa lava o o’u faafitauli, e matuā faigata lava mo se faamatalaga faigofie. E le mafai ona e foiaina le Weltschmerz i ni upu faigofie se tolu: Talitonu, alofa, faia.”
E le o le tamai fasi fuaitau e aveesea ai le faanoanoa. O le alofa o le Atua e laveai ai, toe faafou ai, ma toe faaola ai.
E silafia e le Atua oe. O oe o Lana pele. E alofa o Ia ia te oe.
E tusa pe e te mafaufau e lē alofagia oe, e aapa mai o Ia ia te oe.
O le aso lenei—o aso uma—Na te aapa mai ia te oe, e finagalo e faamalolo oe, ia siitia oe i luga, ma suitulaga le gaogao i lou loto i se olioli tumau. E finagalo o Ia e tafiesea le pogisa mai lou olaga ma faatumu lou agaga i le malamalama susulu faatupulaia ma paia o Lona mamalu.
Ua ou iloa lenei mea mo a’u lava ia.
Ma o la’u molimau o se Aposetolo a le Alii o Iesu Keriso o tagata uma e o mai i le Atua—tagata uma e talitonu, alofa ma faia moni—ia mafai ona lagonaina lea mea e tasi.
Matou te Talitonu
Ua aoao i tatou e tusitusiga paia e faapea “a leai se faatuatua e le mafai ona fiafia mai [le Atua]; aua e tatau i lē alu atu i le Atua ona talitonu.”11
Mo nisi, o le faatinoga o le talitonu e faigata. O nisi taimi e faalavelave ai lo tatou faamaualuga. Masalo tatou te mafaufau faapena ona ua tatou atamamai, aoaoina, pe ua i ai se potomasani, ua faigofie ai ona le talitonu i le Atua. Ma ua amata ai ona tatou tilotilo i tapuaiga o se tumasani faavalevalea.12
I lo’u aafiaga, o le talitonuga e le o se atavali faagaeetia tatou te matamata i ai ma faamemelo i ai ma tatou talanoaina ma faaaliali manatu i ai. E foliga o se palau tatou te ave i le fanua ma, e ala i le afu o o tatou mata, e galueaiina ai atulaina o palapala e toto ai fatu ma fua mai ai ni fua lelei.13
Faalatalata atu i le Atua, ona faalatalata mai lea o Ia ia te outou.14 O le folafolaga lenei ia i latou uma o ē saili ia talitonu.
Tatou te Alolofa
Ua faaali mai e tusitusiga paia o le tele o lo tatou alolofa atu i le Atua ma Lana fanau, o le tele foi lena o lo tatou fiafia e i ai.15 Peitai, o le alofa na fetalai i ai Iesu, e le o se kata faameaalofa mo na’o le taimi e tatau ai, e lafoai ese pe a uma le aoga, po o se alofa e me’i atu i isi mea pe a pasiā. E le o se alofa e tautalagiaina ona faagalo lea. E le o se alofa foi na le “ta’u mai pe a i ai se mea e mafai ona ou faia”.
O le alofa lea e fetalai i ai le Atua o le ituaiga lea e ulufia ia o tatou loto pe a tatou ala a’e i le taeao, tumau ia i tatou i le aso atoa, ma maena i totonu o o tatou loto a o tatou faaleo atua a tatou tatalo o le agaga faafetai i le faaiuga o le aso.
O le alofa le mafaamatalaina lena o loo i ai i lo tatou Tama Faalelagi mo i tatou.
O le agaalofa le muta lea e faatagaina i tatou e vaai manino atili i isi mo tagata o i ai i latou. E ala i le alofa mamā, tatou te vaai ai i tagata faitino o gafatia ma le taua lemafuatia ma o ni atalii ma afafine faapelepele o le Atua Silisili Ese.
A tatou vaai atu i lena manino, e le mafai ona tatou manatu faatauvaa, faatauagavale, pe faailogalanu i soo se tasi.
Tatou te Faia
I le galuega a le Faaola, e tele lava o mea laiti ma faatauvaa e “faataunuu ai mea tetele.”16
Ua tatou iloa e manaomia ai le faia pea o faataitaiga ina ia lelei i soo se mea. Pe o le iliina o se pu, kikiina o se polo i se neti, lipeaina o se taavale, pe oo lava i le aveina o se vaalele, e ala lava i faataitaiga e mafai ai ona tatou saga lelei atili.17
O le faalapotopotoga na faatuina e lo tatou Faaola i le lalolagi—O Le Ekalesia a Iesu Keriso o le Au Paia o Aso e Gata Ai—ua fesoasoani ia i tatou ia faia tonu lena mea. Na te ofo maia se nofoaga e faataitai ai ona ola i le ala na Ia aoao mai ma faamanuiaina ai isi i le ala na Ia faia.
I le avea ai ma tagata o le Ekalesia, ua tatou maua ai valaauga, tiutetauave, ma avanoa e aapa atu ai i le agaalofa ma auaunaga i isi.
Talu ai nei, na tuu ai e le Ekalesia se faamamafa faafouina i le auaunaga, po o le auauna atu, po o le alolofa atu i isi. Sa tele ni mafaufauga sa faia e fuafua ai po o le a se igoa e tatau ona tatou ta’u ai lenei faamamafa faapitoa.
O se tasi o igoa sa iloiloina o le leoleo mamoe, o se faasinoga talafeagai i le valaaulia a Keriso: “Fafaga a’u mamoe.”18 Peitai, e tasi lava si ona lave: o le faaaogaina o lena upu o le a avea ai a’u (ma isi e pei o a’u) ma se leoleo mamoe Siamani. O le mea lea, ua faamalieina a’u i le upu auaunaga.
O Lenei Galuega e mo Tagata Uma
Ioe, o lenei faamamafa e le fou. Ua ia aumaia se avanoa faafouina ma faaleleia mo i tatou e faataitai ai le poloaiga a le Faaola ia “fealofani.”19 o se auala toe faaleleia e faatino ai ma faataitai le faamoemoega o le Ekalesia.
Mafaufau e uiga i le galuega faafaifeautalai; o le lototele, lotomaualalo, ma le mautinoa i le faasoaina atu o le talalelei o se faataitaiga matagofie o le auaunaga i manaoga faaleagaga o isi, po o ai lava i latou.
Po o le faia o galuega faalemalumalu—sailiga o igoa o o tatou tuaa ma ofo atu ia i latou faamanuiaga o le faavavau. E maeu lea auala paia o auaunaga.
Mafaufau i le faatinoga o le sailiga o ē matitiva ma lē tagolima, sii a’e o lima ua tautau i lalo, po o le faamanuiaina o ē mama’i ma puapuagatia. Pe le o faatinoga tonu ea nei o le auaunaga na faataitai mai e le Alii a o Ia savalia ai le lalolagi?
Afai e le o oe o se tagata o le Ekalesia, ou te valaaulia oe ia sau ma matamata.”20 O mai ma auai ma i matou. Afai o oe o se tagata o le Ekalesia ae e te le o toe toaga i le taimi nei, ou te valaaulia oe: faamolemole foi mai. Matou te manaomia outou!
Sau, faaopoopo mai lou malosi i lo matou malosi.
Ona o au taleni tulagaese, tomai, ma uiga tausaafia, o le a e fesoasoani ai ia i matou ia lelei atili ma fiafia atili. A e faia lenei mea, o le a matou fesoasoani atu ia te oe ia lelei atili ma fiafia atili foi.
Sau, fesoasoani ia i matou e fausia ma faamalosia se aganuu o le faamalologa, agalelei, ma le alofa mutimutivale i fanau uma a le Atua. Aua o loo tatou tauivi uma ina ia avea ma tagata fou lea “ua mavae mea tuai” ma “ua faafouina … mea uma.”21 Ua faaali mai e le Faaola ia i tatou le itu e agai i ai—i luma ma luga. Ua fetalai o Ia, “Afai tou te alofa mai ia te au, ia outou tausi mai i a’u poloaiga.”22 Ia tatou galulue faatasi uma ia avea ma tagata ua faamoemoe le Atua mo i tatou e avea ai.
O le ituaiga lenei o aganuu faaletalalelei tatou te mananao e atiae i le Ekalesia atoa a Iesu Keriso. Tatou te saili ina ia faamalosia le Ekalesia o se nofoaga lea tatou te faamagalo ai i le tasi ma le isi. O le nofoaga tatou te tetee atu ai i le faaosoosoga o le sailiili masei, faitatala, ma le faalumaina o isi. O le nofoaga, nai lo le tusitusilima i measese, tatou te siitia i luga ma fesoasoani i le tasi ma le isi ia avea ma tagata sili e mafai ona tatou avea ai.
Se’i o’u toe valaauliaina outou. Sau ma vaai. Auai faatasi ma i matou. Matou te manaomia outou.
Tagata e Lē Atoatoa
O le a e mauaina o lenei Ekalesia ua faatumulia i nisi o tagata sili ona lelei e te maua i lenei lalolagi. Latou te tausaafia, agaalofa, agalelei, ma faamaoni. Latou te galulue malolosi, naunau e ositaulaga, ma lotototoa i le tele o taimi.
Latou te le atoatoa foi ma le tiga.
Latou te faia ni mea sese.
I nisi o taimi latou te faaleo atu ni mea e lē tatau ona latou faia. Latou te faia ni mea latou te moomoo latou te le’i faia.
Ae latou te tutusa uma i le mea lenei—latou te mananao ia faaleleia ma faalatalata atili atu i le Alii, lo tatou Faaola, o Iesu Keriso.
O loo latou taumafai ina ia faia ia sa’o.
Latou te talitonu. Latou te alolofa. Latou te faia.
Latou te mananao ia faaitiitia le manatu faapito, faatele le agaalofa, faaleleia atili, ma avea atili e pei o Iesu.
O Le Mamanu mo le Fiafia
Ioe, e i ai taimi e faigata ai le olaga. E mautinoa lava e tofu i tatou ma ni taimi o faanoanoaga ma le lotovaivai.
Ae ua ofo mai e le talalelei a Iesu Keriso le faamoemoe. Ma, i le Ekalesia a Iesu Keriso, tatou te auai faatasi ai ma isi o ē o loo saili i se nofoaga o le aiga ma le faauooga—o se nofoaga o le tuputupu a’e lea e mafai ai ona tatou talitonu, alofa, ma faia.
Po o a lava o tatou eseesega, tatou te saili ina ia taliaina le tasi ma le isi o ni atalii ma afafine a lo tatou Tama Faalelagi pele.
E matua le mafuatia lo’u lotofaafetai i le avea ai ma se tagata O Le Ekalesia a Iesu Keriso o le Au Paia o Aso e Gata Ai ma iloa ua lava le alofa o le Atua i Lana fanau e avatu ai ia i latou se mamanu mo le fiafia ma le uiga i lenei olaga ma se auala e lagona ai le olioli e faavavau i maota o le mamalu i le olaga a sau.
Ou te faafetai ua tuuina mai e le Atua ia i tatou se ala e faamalolo ai ma’i o le agaga ma le Weltschmerz (faanoanoaga) o le olaga.
Ou te molimau atu ma tuuina atu la’u faamanuiaga pe a tatou talitonu i le Atua, pe a tatou alolofa ia te Ia ma alolofa i Lana fanau ma o tatou loto atoa, ma ao tatou tauivi e faia e pei ona faatonuina ai i tatou e le Atua, o le a tatou maua le faamalologa ma le filemu, fiafia ma le uiga [o le olaga]. I le suafa paia o Iesu Keriso, amene.