Sauniga o Aso Sa Lona Fa (Oketopa–Tesema 2018)

Suesueina o Tusitusiga Paia Faaletagata Lava Ia ma Faaleaiga

I Aso Sa lona fa i le 2018, o le a talanoaina ai e korama a toeaina ma le Aualofa le suesueina o tusitusiga paia faaletagata lava ia ma faaleaiga. E mafai e taitai po o faiaoga ona filifili e taitai ni talanoaga i soo se mataupu faavae nei:

Suesuega o Tusitusiga Paia Faaletagata Lava Ia

Ina ia fesoasoani e musuia tagata e suesue e le aunoa tusitusiga paia, mafaufau e valaaulia tagata taitoatasi e filifili se tasi o fuaitau nei e faitau: Iosua 1:8; 2 Timoteo 3:15–17; 1 Nifae 15:23–25; 2 Nifae 32:3; Mataupu Faavae ma Feagaiga 11:22–23; 33:16–18. A maea le taimi na latou faitau ma mafaufau loloto ai, e mafai ona latou fefaasoaai ma se isi tagata i le potu i mea o loo aoao mai e a latou fuaitau ia i latou e uiga i le suesueina o tusitusiga paia.

E mafai foi ona e valaauliaina nisi tagata e faasoa mai a latou molimau e uiga i faamanuiaga ua latou maua ao latou suesueina tusitusiga paia. E mafai foi ona manuia tagata mai le faalogologo atu o faasoa mai le tasi ma le isi i mea latou te faia e anoa ai le suesueina o tusitusiga paia faaletagata lava ia (tagai i nisi o faataitaiga i le “Manatu e Faaleleia ai Lau Suesuega o Tusitusiga Paia Faaletagata Lava Ia” i le Sau Mulimuli Mai ia te Au—Mo Tagata Taitoatasi ma Aiga). E mafai ona e faasoa atu i tagata le mea na aoao mai e Elder Quentin L. Cook e uiga i “faamoemoega ma faamanuiaga e fesootai ma [le fetuunaiga i le faasologa o le Aso Sa] ma isi suiga talu ai nei” (tagai i le “Liuaina Loloto ma Tumau i le Tama Faalelagi ma le Alii o Iesu Keriso,” Ensign po o le Liahona, Nov. 2018). E mafai e tagata ona talanoaina pe faapefea e a tatou taumafaiga e faaleleia la tatou suesueina o tusitusiga paia ona mafai ona fesoasoani e ausia ai faamoemoega nei. O vitio nei i le LDS.org e mafai foi ona musuia ai tagata: “Words with Friends,” “The Blessings of Scripture,” “Daily Bread: Pattern,” ma le “What Scriptures Mean to Me.”

Ia Fai e le Aunoa le Suesueina o le Talalelei

Sa faatusatusa e Elder David A. Bednar le suesueina e le aunoa o tusitusiga paia ma isi mausa amiotonu i tosi laiti o le pulumu lea e faia ai se atavali matagofie. Ina ia fesoasoani i tagata ia malamalama i le mea na aoao mai e Elder Bednar, atonu e mafai ona e faaali atu se atavali lea e iloa gofie ai tosi o le pulumu a le tagata faatufugaga. Ona faitau lea e tagata le tala faatusa a Elder Bednar, o loo maua i le “Ia Matua Melega ma Mafaufau i le Aiga” (Ensign po o le Liahona, Nov. 2009, 19–20), ma talanoa pe faapefea e tosi o le pulumu i lenei atavali ona faapei o le suesueina o tusitusiga paia. O a mea na fesoasoani ia i tatou e faatoilalo ai faalavefau i le suesueina e le aunoa o le talalelei, pe o tatou suesueina o ni tagata taitoatasi pe faatasi ai ma o tatou aiga? O le a le mea na folafola mai e Peresitene Russell M. Nelson ia i latou o e “galue filiga e toe faafou [o latou aiga] e avea ma se nofoaga autu e aoaoina ai le talalelei”? (tagai i le “Avea ma Faataitaiga Lelei o le Au Paia o Aso e Gata Ai,” Ensign po o le Liahona, Nov. 2018). Tuu atu le taimi mo tagata e mafaufau ai ma faasoa mai mea na musuia i latou e faia ona o mea na latou aoaoina i le aso lenei.

Talanoaina o le Talalelei i le Aiga ma i le Ekalesia

O se tasi o auala e fesoasoani ai i tagata ia malamalama i le taua o talanoaga o le talalelei i le aiga ma le ekalesia, e mafai ona valaaulia se tamaitiiti ma se matua e usu le “A’oa’o Mai ia Ou Ui i le Malamalama” (Viiga, nu. 187). O le a se mea o aoao mai e upu o lenei pese i le fegalegaleaiga i le va o le tamaitiiti ma le matua ia i tatou e uiga i le aoaoina o le talalelei? Masalo o le a naunau nisi o tagata e faasoa mai a latou manatu i le auala e faia ai talanoaga o le talalelei o se vaega masani o le olaga faaleaiga. O mau nei e mafai ona maua ai malamalamaaga: Teuteronome 11:18–20; 1 Peteru 3:15; Mosaea 18:9; Moronae 6:4–5, 9; Mataupu Faavae ma Feagaiga 88:122. E mafai faapefea e a tatou talanoaga i le fale ma le ekalesia ona aumaia latalata atili i tatou i le Tama Faalelagi ma Iesu Keriso?

Manatu mo le Lagolagoina o le Suesueina o Tusitusiga Paia i le Aiga i le 2019

I le aluga o le 2019, o le a aoaoina e tagata uma o le uarota le Feagaiga Fou—i le aiga ma i le Aoga Sa ma le Peraimeri. I sauniga o le korama ma le Aualofa, e tatau i taitai ma faiaoga ona faamanatu atu i tagata e uiga i le faasologa o mau mo le vaiaso e sosoo ai i le Sau, Mulimuli Mai ia te Au—Mo Tagata Taitoatasi ma Aiga lea e mafai ona latou suesueina i le aiga. O lenei faamanatu faigofie e mafai ona faasoa atu i se faamanatu tusitusia, pe tuugutu, ia po o auala uma e lua.

E mafai e taitai o le korama a toeaina ma le Aualofa ma faiaoga ona uunaia lenei suesueina o tusitusiga paia e ala i le sailia o avanoa e aumaia ai malamalamaaga o le Feagaiga Fou i totonu o sauniga o le korama a toeaina ma le Aualofa. Mo se faataitaiga, e mafai e taitai o le korama a toeaina ma le Aualofa ma faiaoga ona:

Manatu mo le Lagolagoina o le Suesueina o Tusitusiga Paia i le Aiga i le 2019

• Matauina le auala e faatatau ai tala po o le aoaoga faavae mai la latou suesueina o tusitusiga paia i se lesona o le korama a toeaina po o le Aualofa. Atonu e faasoa atu e taitai ma faiaoga lenei malamalamaaga i se sauniga o le Aso Sa.

• Faasoa atu i tagata le auala e faatatau ai tagata po o aoaoga faavae mai le Feagaiga Fou i o latou tiutetauave i le korama a toeaina ma le Aualofa.

• Fefaasoaai faatasi ma tagata ni aafiaga lelei na latou mauaina i le suesueina o le Feagaiga Fou i le aiga ma uunaia ai tagata e faasoa atu foi aafiaga nei.