O Mai, Faalogo i le Siufofoga o le Perofeta

Saunia e Bishop Dean M. Davies

Fesoasoani Muamua i le Au Epikopo Pulefaamalumalu

Ao tatou faamautuina i o tatou olaga faiga masani o le faalogologo ma le usitaia o le siufofoga o perofeta soifua, o le a tatou selesele i faamanuiaga e faavavau.

I le talanoa ai e uiga i le Peresitene o Le Ekalesia a Iesu Keriso o le Au Paia o Aso e Gata Ai, na fetalai mai le Alii:

“O lenei foi, o le tiute o le Peresitene o le tofi o le Perisitua Maualuga o le pulefaamalumalu i le ekalesia atoa, ma ia avea e pei o Mose—

“… Ioe, ia avea o se tagatavāai, o se talifaaaliga, o se faaliliu-upu, ma se perofeta, ua i ai meaalofa uma a le Atua e faaee mai e ia i luga o le ulu o le ekalesia” (Mataupu Faavae ma Feagaiga 107:91–92; faaopoopo le faamamafa).

Ua faamanuiaina a’u e molimauina nisi o meaalofa a le Atua ua tuuina atu i luga o Ana perofeta. E mafai ona ou faasoa atu se tasi o na aafiaga ma outou? A o lei oo i lo’u valaauga i le taimi nei, sa ou fesoasoani i le faailoaina ma le fautuaina atu o nofoaga o malumalu i le lumanai. I le mavae ai o le aso 11 o Setema, 2001, o le sopoiaina o tuaoi o le I.S. ua amata ona sili atu ona puleaina. O se taunuuga, e lua i le tolu itula e faigamalaga mai ai tagata o le Ekalesia mai Vancouver, Kanata, ao malaga atu i le Malumalu o Seattle Uosigitone. O Peresitene Gordon B. Hinckley, le Peresitene o le Ekalesia i lena vaitaimi, sa fautuaina mai o se malumalu i Vancouver o le a faamanuiaina ai tagata o le Ekalesia. Sa faatagaina le suesueina o se nofoaga, ma i le maea ai ona matou suesueina le tele o fanua o ni meatotino a le Ekalesia, sa suesueina foi isi nofoaga e le ni meatotino a le Ekalesia.

Sa maua se nofoaga matagofie mo tapuaiga faalelotu i autafa o le Aualatele i Setete o Kanata. Sa faigofie le mauaina o le fanua, sa faatumulia i laau paina matagofie o Kanata, ma sa fiafia i se nofoaga e iloa gofie lea o le a mafai ona iloaina e le faitau afe o tagata femalagaai i taavale.

Sa matou tuuina atu lenei nofoaga faatasi ai ma ata ma faafanua i le fonotaga faalemasina o le Komiti o Nofoaga o Malumalu. Sa faatagaina e Peresitene Hinckley le matou faia o se konakarate ma faamaea ia sailiiliga manaomia. Ia Tesema o lena tausaga, sa matou toe lipoti atu i le komiti ua maea sailiiliga, ma sa matou sailia le faatagana e faaauau ai le faatauina. Ina ua maea ona faafofoga i la matou lipoti, sa saunoa mai Peresitene Hinckley, “Ou te lagona e tatau ona ou vaai i lenei nofoaga.”

Mulimuli ane i lena masina, lua aso ina ua mavae le Kerisimasi, sa matou malaga ai i Vancouver ma Peresitene Hinckley; Peresitene Thomas S. Monson ma Bill Williams, o le tusi ata o malumalu. Sa faafeiloai i matou e Paul Christensen, le peresitene o le siteki i le lotoifale, lea na aveina i matou i le nofoaga. Sa fai sina susu ma puaoa lena aso, ae sa oso i fafo Peresitene Hinckley mai le taavale ma amata ona savalia le nofoaga atoa.

Ina ua mavae le faaaluina o se taimi i le nofoaga, sa ou fesili ia Peresitene Hinckley pe finagalo e maimoa i isi nofoaga na mafaufauina. Na fai mai o ia ioe, e finagalo i ai. E te iloa, i le tilotilo atu i isi nofoaga, sa mafai ai ona matou faia se faatusatusaga i o latou tulaga lelei.

Sa matou faia se taamiloga tele e faataamilo i Vancouver e matamata i isi fanua, ma iu ai ona toe taunuu mai i le muai nofoaga. Na saunoa mai Peresitene Hinckley, “O se nofoaga matagofie lenei.” Ona ia fesili mai lea, “E mafai ona tatou o i le falelotu a le Ekalesia pe a ma le tasi le kuata maila [0.4 km] le mamao?”

“Ioe, Peresitene,” sa matou tali atu.

Sa matou toe tulioso i taavale ma malaga atu i le falelotu e lata ane. Ao matou taunuu atu i le falelotu, na saunoa mai Peresitene Hinckley, “Agavale ii.” Sa matou liliu ma mulimuli i le magaala e pei ona faatonuina. Sa amata ona a’ea’e lemu le auala.

I le taimi lava na taunuu ai le taavale i le tumutumu o le aega, sa saunoa mai Peresitene Hinckley, “Tu le taavale, tu le taavale.” Ona ia faasino lea i le taumatau i se fasi laufanua ma faapea mai, “Ae a le fanau lea? O i e fai ai le malumalu. O i e finagalo i ai le Alii mo le malumalu. E mafai ona e mauaina? E mafai ona e mauaina?”

Matou te lei vaai i le fanau lenei. Sa mamao i tua ma mamao ese mai le auala autu, ma e lei lisia e faatau. I le taimi na matou tali atu ai matou te lei iloa, sa toe faasino Peresitene Hinckley i le fanua ma toe faapea mai, “O i e fai ai le malumalu. Sa matou nonofo mo ni nai minute, ona malaga lea mo le malaevaalele e toe foi i le aiga.

O le aso na sosoo ai, sa valaauina ai i ma’ua ma Brother Williams i le ofisa o Peresitene Hinckley. Ua uma ona ia tusia mea uma i luga o se fasi pepa: o auala, le falesa, afe i le agavale ii, o le X e maka ai le nofoaga mo le malumalu. Sa ia fesili mai po o le a se mea ua ma mauaina. Sa ma tau atu ia te ia ua ia filifilia se fanua sili ona faigata. Sa umia e ni tagata taitoatasi e toatolu: e toatasi mai Kanata, tasi mai Initia, ma le tasi mai Saina! Ma e lei mauaina ni tulaga manaomia faalelotu.

“Ia, fai le mea sili lua te mafaia,” o lana tala lea.

Ona tutupu lea o ni vavega. I totonu o ni nai masina ua tatou umiaina le fanua, ma mulimuli ane aumai e le aai o Langley, British Columbia le faatagaga e fausia ai le malumalu.

I le tomanatu ai i lenei aafiaga, ua faamaualaloina a’u i le iloaina e ui sa ma’ua umia uma ma Brother Williams ni aoaoga aloaia ma tausaga o le potomasani i mea tau fanua ma le mamanu o malumalu, e leai sea ituaiga o aoaoga aloaia a Peresitene Hinckley; ae sa ia mauaina se mea sili atu—o le meaalofa o le vaaiga faaperofeta. Sa mafai ona ia vaai faalemafaufau atu i le mea e tatau ona tu ai le malumalu a le Atua.

Ina ua poloaiina e le Alii ia le Au Paia anamua i lenei tisipenisione e fausia se malumalu, sa Ia folafola atu:

“Ae ia tuu atu ia fausia se fale i loʼu igoa e tusa ma le ata o le a Ou faaali atu ia te i latou.

“Ma afai e lē fausia e loʼu nuu e tusa ma le ata o le a Ou faailoa atu … o le a Ou lē taliaina mai o latou lima.” (Mataupu Faavae ma Feagaiga 115:14–15).

Na faapena i le Au Paia anamua, ma e faapena foi ia i tatou i aso nei: ua faaali mai e le Alii ma faaauau ona faaali mai i le Peresitene o le Ekalesia ia mamanu lea e taitaiina ai le malo o le Atua i o tatou aso. Ma, i se tulaga patino, ua ia tuuina mai le taitaiga i le ala e tatau ai ona tatou taitaia o tatou olaga, ina ia taliaina a tatou amioga i le Alii.

Ia Aperila 2013 sa ou talanoa atu ai i taumafaiga na aofia i le sauniaina o faavae uma o le malumalu ina ia mautinoa e mafai ona tatalia afa ma mala lea o le a aafia ai. Peitai o le faavae e na o le amataga lea. O se malumalu e aofia ai le tele o poloka faufale, faapipii faatasi e tusa ma mamanu na muai faatulagaina. Afai o tatou olaga e tatau ona avea ma malumalu o loo tatou tauivi taitasi e fausia e pei ona aoao mai e le Alii (tagai 1 Korinito 3:16–17), e mafai ona tatou fesili ifo ia i tatou lava, “O a poloka faufale e tatau ona tatou faatulagaina ia faamatagofie ai, mamalu, ma tetee atu ai o tatou olaga i afa o le lalolagi?”

E mafai ona tatou maua le tali i lenei fesili i le Tusi a Mamona. Na saunoa mai le Perofeta o Iosefa Samita e uiga i le Tusi a Mamona, “Na ou tauina atu i le usoga o le Tusi a Mamona o se tusi silisili ona sa’o i tusi uma lava o i le lalolagi, ma o le maa auau o la tatou ekalesia, ma e sili atu ona latalata le tagata i le Atua e ala i le usitaia o mataupu o le Tusi a Mamona, nai lo se isi lava tusi” (faatomuaga i le Tusi a Mamona). I le faatomuaga i le Tusi a Mamona, ua aoaoina i tatou o i “latou o ē e mauaina [le] molimau paia mai le Agaga Paia [o le Tusi a Mamona o le afioga a le Atua] o le a iloa foi e ala i le mana lava lea e tasi o Iesu Keriso o le Faaola o le lalolagi, o Iosefa Samita o Lana talifaaaliga ma o le perofeta o le Toefuataiga, ma o Le Ekalesia a Iesu Keriso o le Au Paia o Aso e Gata Ai o le malo a le Alii ua toe faatuina i le lalolagi.”

O nisi nei o poloka faufale taua o lo tatou faatuatua ma molimau taitoatasi.

1. O Iesu Keriso o le Faaola o le lalolagi.

2. O le Tusi a Mamona o le afioga a le Atua.

3. O Le Ekalesia a Iesu Keriso o le Au Paia o Aso e Gata Ai o le malo lea o le Atua i le lalolagi.

4. O Iosefa Samita o se perofeta, ma o loo i ai o tatou perofeta soifua i luga o le fogaeleele i aso nei.

I masina talu ai nei, sa ou faalogo ai i saunoaga uma o le konafesi aoao lea na fofogaina mai e Peresitene Nelson talu ona muai valaauina o ia o se Aposetolo. O lenei gaoioiga ua suia ai lo’u olaga. Ao o’u suesue ma mafaufau loloto i le 34 tausaga o le atamai na mauaina e Peresitene Nelson, o mataupu manino ma le tumau na afua mai i ana aoaoga. E fesootai nei mataupu taitasi i na poloka faufale faatoa ta’ua pe o se isi poloka faufale autu mo o tatou lava malumalu. Latou te aofia ai le faatuatua i le Alii o Iesu Keriso, salamo, papatisoga mo le faamagaloga o agasala; le meaalofa o le Agaga Paia, togiolaina o ē ua maliliu ma le galuega o le malumalu, tausia ia paia le aso Sapati, amata ma le faaiuga i le mafaufau; tumau i luga o le ala o le feagaiga. Na saunoa Peresitene Nelson e uiga ia i latou uma ma le alofa ma le tuuto.

O le maatulimanu autu ma le poloka faufale o le Ekalesia ma mo o tatou olaga o Iesu Keriso. O Lana Ekalesia lenei. O Peresitene Nelson o Lana perofeta. O aoaoga a Peresitene Nelson ua molimauina ma faaali mai mo lo tatou manuia le soifuaga ma uiga o Iesu Keriso. Na ia saunoa ma le alofa ma le silafia lelei e uiga i le natura a le Faaola ma Lana misiona. Na ia tuuina mai foi le molimau faifaipea ma le naunautai e uiga i le valaauga paia a perofeta soifua—o Peresitene o le Ekalesia—ia sa ia auauna i ai.

I le taimi nei, o se faamanuiaga le lagolagoina o ia o se perofeta soifua a le Alii i luga o le fogaeleele. Ua tatou masani i le lagolagoina o taitai o le Ekalesia e ala i le mamanu paia o le siiina o ō tatou lima i le sikuea e faaalia ai lo tatou taliaina ma le lagolagoina. Sa tatou faia lenei mea i ni nai minute ua tea. Peitai o le lagolagoina moni e oo i tua atu o lenei faailoga faaletino. E pei ona ta’ua i le MF&F 107:22, e ao i le Au Peresitene Sili ona ‘lagolagoina i le talitonuga, faatuatua, ma le tatalo a le ekalesia.” Tatou te lagolagoina ma le atoatoa ma le faamaoni le perofeta soifua ao tatou atiina a’e le mamanu o le fesootai atu i ana upu, maua le faatuatua e faatino ai, ona tatalo lea mo faamanuiaga faifaipea a le Alii i ona luga.

Pe a ou mafaufau ia Peresitene Russell M. Nelson, ou te maua le toafimalie i le fetalaiga a le Faaola ina ua Ia fetalai mai, “Afai e faalogo mai lo’u nuu i lo’u leo, ma le leo o a’u auauna o e ua Ou tofia e taitaia lo’u nuu, faauta, e moni Ou te fai atu ia te outou, o le a lē aveesea i latou i fafo mai lo latou nofoaga” (MF&F 124:45).

O le faalogo atu i perofeta soifua o le a i ai ni aafiaga loloto e oo lava i le suia ai o o tatou olaga. Ua faamalosia i tatou. Ua sili atu lo tatou mautinoa ma le talitonuga i le Alii. Ua tatou faalogo i le afioga a le Alii. Ua tatou lagona le Alofa o le Atua. O le a tatou iloa le ala e faatautaia ai o tatou olaga ma le faamoemoe.

Ou te alofa ma lagolagoina Peresitene Russell M. Nelson ma isi o ē ua valaauina o ni perofeta, tagatavaai, ma talifaaaliga. Ou te molimau atu ua ia te ia meaalofa ua faaee mai e le Alii i luga o lona ao, ma ou te molimau atu a tatou faamautuina o tatou olaga i faiga masani o le faalogo atu ma usitai i le siufofoga o perofeta soifua, o le a fausia o tatou olaga e tusa ma le mamanu paia a le Alii mo i tatou, ma o le a tatou selesele i faamanuiaga e faavavau. Ua tuuina mai le valaaulia ia i tatou uma. O mai, faalogo i le siufofoga o le perofeta, o mai ia Keriso ma ola ai. I le suafa, o Iesu Keriso, amene.