E Tatau i Tagata Uma ona Ave i ō Latou luga le Suafa ua Tuuina Mai e le Tamā

Saunia e Elder Paul B. Pieper

O Le Fitugafulu

O le suafa o le Faaola e tulaga ese ma e i ai le mana taua. Ua na o le pau lea o le suafa e mafai ai ona faaolaina.

I ni nai vaiaso talu ai, sa ou auai i le papatisoga a ni nai fanau e tai valu tausaga le matutua. Sa amata ona latou aoaoina le talalelei a Iesu Keriso mai i ō latou matua ma faiaoga. O le fatu o lo latou faatuatua ia te Ia sa amata ona tuputupu a’e. Ma ua latou mananao nei e mulimuli ia te Ia i totonu o le vai o le papatisoga e avea ma tagata o Lana Ekalesia toefuataiina. Ao ou matamata atu i lo latou naunau, sa ou mafaufau i le tele o lo latou malamalama e uiga i se tasi o vaega taua o le latou feagaiga o le papatisoga: o le latou tautinoga ina ia ave i ō latou luga le suafa o Iesu Keriso.

Mai lava i le amataga, sa tautino mai e le Atua le silisiliese o le suafa o Iesu Keriso i Lana fuafuaga mo i tatou. Sa aoao e se agelu lo tatou ulua’i tama, o Atamu, “Ia e faia mea uma e te faia i le suafa o le Alo, ma ia e salamo ma valaau atu i le Atua i le suafa o le Alo e faavavau.”¹

Sa aoao atu e le perofeta o le Tusi a Mamona o le Tupu o Peniamina lona nuu, “O le a lē i ai se isi igoa e tuuina mai po o se isi lava ala po o ni auala e mafai ona oo mai ai le olataga i le fanauga a tagata.”²

Na toe ta’ua e le Alii lenei upumoni i le Perofeta o Iosefa Samita: “Faauta, o Iesu Keriso o le suafa lea ua tuu mai e le Tamā, ma ua leai se isi igoa ua tuu mai e mafai ona faaolaina ai le tagata.”³

I ō tatou aso, na aoao mai e Peresitene Dallin H. Oaks e faapea “o i latou e faaaoga le faatuatua i le suafa paia o Iesu Keriso … ma ulu atu i lana feagaiga … e mafai ona maua le taulaga togiola a Iesu Keriso.”⁴

E finagalo lo tatou Tama Faalelagi ina ia malamalama atoatoa o le suafa o Lona Alo, o Iesu Keriso, e lē na o se suafa e tasi mai le toatele. O le suafa o le Faaola e tulaga ese ma e i ai le mana taua. Ua na o le pau lea o le suafa e mafai ai ona faaolaina. E ala i le faamamafaina o lenei upumoni i tupulaga uma, ua faamautinoa mai e lo tatou Tama agaalofa i Lana fanau uma o loo i ai se ala e toe foi atu ai ia te Ia. Ae o le i ai o se ala mautinoa e lē faapea ai la e otometi le mautinoa o lo tatou toe foi atu. Ua ta’u mai e le Atua e manaomia le tatou faatinoga: “O le mea lea, e ao i tagata uma [ma tamaitai] ona latou ave i o latou luga le suafa ua tuu mai e le Tamā.”⁵

Ina ia mafai ona maua le mana faaola lea e na o le suafa o Iesu Keriso e oo mai ai, e ao ona “faalotomaualaloina i [tatou lava] i luma o le Atua … ma o mai i luma ma loto momomo ma agaga salamo … ma [ia] loto e ave i o [tatou] luga le suafa o Iesu Keriso” ona agavaa ai lea, e pei o a’u uo laitiiti e valu tausaga, ina “ia talia i totonu o lana ekalesia e ala i le papatisoga.”⁶

O i latou uma o ē e mananao ma le faamaoni e ave i ō latou luga le suafa o le Faaola e tatau ona agavaa mo le ma talia le sauniga o le papatisoga o se molimau faaletino i le Atua mo lo latou faaiuga.⁷ Peitai, o le papatisoga ua na o se amataga.

O le upu ave e lē o le taliaina. O se upu faatino e i ai faauigaga e tele.⁸ E faapena foi, ona manaomia e lo tatou tautinoga e ave i o tatou luga le suafa o Iesu Keriso le faatinoga ma le tele o vaega.

Mo se faataitaiga, o se faauigaga e tasi o le upu ave o le tagofia po o le taliaina i totonu o le tino o se tasi, e pei o le taimi tatou te tagofia ai se mea inu. E ala i le tauaveina i o tatou luga o le suafa o Keriso, tatou te tautino atu e ave Ana aoaoga, o Ona uiga, ma mulimuli ane o Lona alofa faamaoni i ō tatou olaga ina ia mafai ona avea i latou ma vaega o ō tatou tagata. O le taua o le valaaulia a Peresitene Nelson i talavou matutua ina ia “[saili] ma le agaga tatalo ma le malosi e malamalama ai i le faauigaga patino o faalaniga ma suafa taitasi a [le Faaola] mo i [latou],”⁹ ma ia taumamafa fiafia i afioga a Keriso i tusitusiga paia, aemaise lava o le Tusi a Mamona.¹⁰

O se isi faauigaga o le upu ave o le taliaina o se tagata i se matafaioi faapitoa po o le taliaina o se manatu po o se mataupu faavae. A tatou ave i o tatou luga le suafa o Keriso, tatou te talia o Ia o lo tatou Faaola ma faaauau pea ona mulimuli i Ana aoaoga o se taiala mo o tatou olaga. I faaiuga taua uma tatou te faia, e mafai ona tatou ave Lana talalelei ina ia ola ai ma le faamaoni ma usiusitai i ai ma o tatou loto atoa, mafaufau, manatu, ma le malosi.

O le upu ave e mafai foi ona faauigaina o le faaogatusa o se tasi ma se suafa po o se faamoemoega. O le toatele o i tatou ua i ai le tomai e tauave ai le tiutetauave i le galuega pe tauave ai se faamoemoega po o se faagasologa. A tatou ave i o tatou luga le suafa o Keriso, tatou te ave i o tatou luga tiutetauave o se soo moni, tatou te lagolagoina Lona faamoemoega, ma tatou te “tutu o ni molimau o [Ia] i taimi uma ma i mea uma, ma i nofoaga uma atonu [tatou te] i ai.”¹¹ Ua valaau mai Peresitene Nelson i “tamaitai talavou uma ma alii talavou uma … ia auai i le ‘autau a le autalavou a le Alii e fesoasoani e faapotopoto mai Isaraelu.”¹² Ma ua tatou faafetai uma e tauave le valaau faaperofeta e faaaoga le suafa o Lana Ekalesia toefuataiina e pei ona faaalia mai e le Faaola Lava Ia. O Le Ekalesia a Iesu Keriso o le Au Paia o Aso e Gata Ai.¹³

I le faagasologa o le ave i o tatou luga o le suafa o le Faaola, e tatau ona tatou malamalama o le faamoemoega o Keriso ma Lana Ekalesia e tasi ma e tutusa. E lē mafai ona māvavaeeseina i laua. E faapena foi, o lo tatou avea ma soo patino i le Faaola ma le auai malosi i Lana Talalelei e lē māvavaeeseina foi. Afai tatou te toilalo i la tatou tautinoga i le tasi, o la tatou tautinoga i le isi o le a faaitiitia, e mautinoa lava e pei o le po e mulimuli mai i le ao.

O nisi o tagata ua mumusu e tauave le suafa o Iesu Keriso ma Lana faamoemoega aua latou te manatu i ai e matuā lē talafeagai, e faatapula’aina, ma o se mailei. O le mea moni, o le ave i o tatou luga o le suafa o Keriso e faasaolotoina ma faateleina. E fāgua le mana’o tatou te lagona pe a tatou taliaina le fuafuaga a le Atua e ala i le faatuatua i le Faaola. Faatasi ai ma lenei naunautaiga ola i ō tatou loto, e mafai ona tatou iloa le faamoemoega moni o ā tatou meaalofa faalelagi na tuuina mai ma taleni, aafia ai i Lona alofa faamamanaina, ma tuputupua’e i lo tatou popole mo le manuia o isi tagata. Ao tatou ave i o tatou luga le suafa o le Faaola, tatou te taofimau moni i mea lelei uma ma avea e faapei o Ia.¹⁴

E taua le manatua o le tauaveina o le suafa o le Faaola i o tatou luga o se feagaiga ua tuuto i ai—e amata i le feagaiga sa tatou osia i le papatisoga. Sa aoao mai Peresitene Nelson, “O lo [tatou] tuuto e mulimuli i le Faaola e ala i le osia o feagaiga ma Ia ona tausia lea o na feagaiga, o le a matala ai le faitotoa i faamanuiaga uma faaleagaga ma avanoa e maua.”¹⁵ O se tasi o avanoa faalelagi o le ave i o tatou luga o le suafa o le Faaola e ala i le papatisoga o le gafatia lea e na te tuuina mai i le sauniga e sosoo ai i luga o le ala o le feagaiga, o la tatou faamauga. Ina ua ou fesili i se tasi o a’u uo e valu tausaga i le uiga o le ave o le suafa o Keriso ia te ia, sa ia fai mai, “O lona uiga e mafai ona ou maua le Agaga Paia.” Na sa’o lava o ia.

E maua le meaalofa o le Agaga Paia e ala i le faamauga pe a mavae ona tatou mauaina sauniga o le papatisoga. O le meaalofa o le aia tatau ma le avanoa e maua ai le Agaga Paia o se soa tumau. Afai tatou te faalogo ma usitai i Lona leo filemu ma le itiiti, o le a Ia tausia i tatou i luga o le ala o feagaiga na tatou ulufia e ala i le papatisoga, lapataia i tatou pe a faaosoosoina i tatou e o ese mai ai, ma uunaia i tatou e salamo ma fetuunai pe a tatau ai. O la tatou taulaiga pe a mavae le papatisoga o le faatumauina o le Agaga Paia ma i tatou i taimi uma ina ia mafai ona tatou faaauau pea ona agai i luma i le ala o feagaiga. E mafai ona faatasi mai le Agaga Paia mai i tatou i le tulaga tatou te tausia ai o tatou olaga ia mamā ma saoloto mai le agasala.

Mo lenei mafuaaga, ua saunia e le Alii se ala mo i tatou e faaauau ai pea ona faafouina le aafiaga mamā o lo tatou papatisoga e ala i se isi sauniga—o le faamanatuga. E mafai i vaiaso taitasi ona tatou “molimau atu … [tatou] te loto ina ia ave i o [tatou] luga le suafa o [le] Alo”¹⁶ ma toe faia foi i le aapa atu ma tagofia faatusa o le tino ma le toto o le Alii i o tatou lima—o le areto ma le vai—ma taumafaina i totonu o tatou lava agaga. A tatou faia la tatou vaega, e faia e le Faaola Lana vavega i le toe faamamāina o i tatou ma faaagavaa i tatou ia maua le uunaiga faifai pea a le Agaga Paia. Pe le o se molimau ea lenei o lona alofa tunoa e lē i’u e na’o le suafa o Iesu Keriso e maua ai? E pei ona ave i ō tatou luga Lona suafa, ua Ia ave ā tatou agasala ma faanoanoa i Ona luga, ae o Lona aao o le alofa tunoa o loo “faaloaloa mai pea”¹⁷ e siosiomia i tatou i aao o Lona alofa.¹⁸

O le faamanatuga o se faamanatu faalevaiaso o le ave i o tatou luga o le suafa o Iesu Keriso o se tautinoga ola ma faaauau pea, e le o se mea e tasi e tupu lea e na o le faatasi ona tupu i le aso o lo tatou papatisoga.¹⁹ E mafai ona tatou faaauau pea ma fiafia so’o i “le taulaga paia; Lē malamalama; Le tino ma toto; magalo ai sala.”²⁰ E lē o se mea e ofo ai pe a malamalama le fanau a le Atua i faamanuiaga mamana, faaleagaga lea e mafai ona oo mai i le ave i ō latou luga o le suafa o Keriso, e olioli pea o latou lagona ma lo latou manao ia ulufale atu pea i totonu o se feagaiga ma lo latou Atua.²¹

Ao tatou mulimuli i lenei ala o le feagaiga ua mamanuina faalelagi, o lo tatou tuuto ma taumafaiga e ave i o tatou luga le suafa o Iesu Keriso o le a aumaia ia i tatou le malosi “ia taofi [Lona] suafa ia tusia pea i o [tatou] loto.”²² O le a tatou alolofa i le Atua ma o tatou tuaoi ma lagona se manao e auauna atu ia i latou. O le a tatou tausia Ana poloaiga ma mananao ia faalatalata atu ia te Ia e ala i le ulu atu i ni feagaiga faaopoopo ma Ia. Ma a tatou maua i tatou lava ua vaivai ma lē gafatia e faatino ā tatou manaoga amiotonu, o le a tatou augani atu mo le malosi e na o Lona suafa e oo mai ai, ma o le a Ia fesoasoani mai. Ao tatou tumau ai i le faamaoni, o le a oo mai le aso tatou te vaai ai ia te Ia ma faatasi ma Ia, ma o le a tatou iloa ua tatou avea e pei o Ia, ma tatou agavaa ai e toe foi atu i le afioaga o le Tamā.

Auā e moni folafolaga a le Faaola: ia i latou o ē “talitonu i le suafa o Iesu Keriso, ma tapuai atu i le Tamā i lona suafa, ma tumau i le faatuatua i lona suafa e oo i le iuga”²³ o le a faasaoina i le malo o le Atua. Faatasi ai ma outou, ou te olioli i le i ai o nei faamanuiaga le mafaatusalia e ala i le tauaveina i o tatou luga o le suafa o Iesu Keriso, o le e ona ma i lona suafa ou te molimau atu ai, amene.