Tasi ia Keriso
Saunia e Elder Ulisses Soares
O Le Korama a Aposetolo e Toasefululua
A’u soa pele i le galuega a le Alii, ou te talitonu e tele ni mea lelei atu e mafai ona tatou faia ma tatau ona faia ia lelei atu i le talileleia o uo fou i le Ekalesia.
Talofa, uso e ma tuafafine pele. E pei ona matou faatalofa ai i la’u gagana Pasila Potukale, “Boa tarde!” Ou te lagonaina le faamanuiaina i le potopoto faatasi ai i lenei konafesi aoao matagofie a Le Ekalesia a Iesu Keriso o le Au Paia o Aso e Gata Ai i lalo o le taitaiga a lo tatou perofeta pele, o Peresitene Russell M. Nelson. Ou te maofa i avanoa maoae ua maua e i tatou taitoatasi e faalogo ai i le siufofoga o le Alii e ala i Ana auauna i aso nei e gata ai ua tatou ola ai.
O le matou atunuu moni o Pasila e matua tamaoaiga i punaoa faalenatura. O se tasi o na mea o le Vaitafe lauiloa o le Amasone, o se tasi o vaitafe telē ma umī i le lalolagi. E āfua mai i ni vaitafe eseese se lua, o le Solimões ma le Negro. O le mea mata’ina, la te tatafe faatasi atu mo le tele o maila a o le’i fesootai ia vai, ona o vaitafe nei e matuā eseese lava tupu’aga, saoasaoa, vevela, ma le fatufatuga o vailaau. I le mavae ai o ni maila se tele, ona fesootai faatasi loa lea o vai, ma avea ai ma se vaitafe e ese mai nai lo ona vaega taitasi. I le mavae ai o le fesootai faatasi o vaega nei, faatoa oo loa lea o le Vaitafe o le Amasone i se malosi na’ua lea e oo atu i le Vasa Atelani, na te tuleia i fafo atu le suāsami ina ia mafai ona maua pea le suavai fou mo le tele o maila i totonu atu o le vasa.
I se ala talitutusa lava o loo tafe faatasi ai Vaitafe o le Solimões ma le Negro e fatu ai le Vaitafe tele o le Amasone, ua faapena foi fanau a le Atua ua o mai faatasi i le Ekalesia a Iesu Keriso mai talaaga faaagafesootai eseese, tu ma aganuu, ua fatuina ai lenei nuu matagofie o le Au Paia ia Keriso. Mulimuli ane, a o tatou uunaia, lagolago, ma fealofaa’i le tasi i le isi, ua tatou tuufaatasi ai ina ia fatu se malosiaga malosi mo le lelei i le lalolagi. I le avea ai ma soo o Iesu Keriso, o le tafe faatasi ai i lenei vaitafe o le lelei, o le a mafai ai ona tatou tuu atua le “suavai fou” o le talalelei i se lalolagi o galala.
Ua musuia e le Alii Ana perofeta e aoao i tatou i le auala e mafai ai ona tatou lagolagoina ma alolofa i le tasi ma le isi ina ia mafai ona tatou lotogatasi i le faatuatua ma le faamoemoe i le mulimuli ia Iesu Keriso. E pei ona fai mai Paulo, o i latou o ē “na papatisoina ia Keriso ua oofu ia Keriso … : aua [o outou uma ua] tasi ia Keriso Iesu.”1
Ina ua tatou folafola atu i le papatisoga e mulimuli i le Faaola, ua tatou molimau atu i luma o le Tama ua tatou loto e ave i o tatou luga le suafa o Keriso.2 A o tatou tauivi ia maua Ona uiga paia i o tatou olaga, e oo ina ese i tatou nai lo tagata na tatou i ai, e ala i le Togiola a Keriso le Alii, ma e meafua lava le faateleina o lo tatou alofa mo tagata uma.3 Tatou te lagonaina se popole faamaoni mo le tulaga manuia ma le fiafia o tagata uma. Tatou te vaai atu i le tasi ma le isi o ni uso ma ni tuafafine, o ni fanau a le Atua o loo i ai le tupuaga, o uiga, ma gafatia paia. Tatou te mananao e tausi le tasi ma le isi ma tauave avega a le tasi ma le isi.4
O le mea lea na faamatalaina e Paulo o le alofa mama.5 Na faamatalaina foi e Mamona, o se perofeta o le Tusi a Mamona, “o le alofa le pona o Keriso,”6 o le ituaiga sili lea ona ofoofogia, malualii, ma sili ona malosi o le alofa. Na faamatalaina talu ai nei e lo tatou perofeta o i ai nei, Peresitene Russell M. Nelson se faailoaga o lenei alofa le pona o Keriso o le auauna atu, o se auala ua sili atu ona taulai ma paia atu e alolofa ma popole ai mo isi e pei ona faia e le Faaola.7
Ia tatou iloiloina lenei mataupu faavae o le alofa ma le popole, e pei ona faia e le Faaola, i totonu o le aano o le faamalosiauga, fesoasoani atu, ma le lagolagoina o isi o ē faatoa liliu mai ma i latou ua amata ona faaali le fiafia e auai i a tatou sauniga Faale-Ekalesia.
A ō ese mai nei uo fou i fafo ma le lalolagi ma taliaina le talalelei a Iesu Keriso, ma auai i Lana Ekalesia, e avea i latou ma Ona soo, ua toe fanaufouina e ala ia te Ia.8 Latou te tuua se lalolagi na latou iloaina lelei ma filifili e mulimuli ia Iesu Keriso, faatasi ma le faamoemoe atoa o le loto, ma auai i se “vaitafe” fou e pei o le Vaitafe malosi o le Amasone—o se vaitafe e i ai se malosiaga lototoa o le lelei ma le amiotonu e tafe agai atu i le afioaga o le Atua. Ua faamatalaina e le Aposetolo o Peteru o se “tupulaga ua filifilia, o tupu ma ositaulaga, o le nuu paia, ma le nuu na faatauina mai.”9 A o tuufaatasia ai nei uo fou i lenei vaitafe fou, atonu latou te lagonaina sina sē teisi i le taimi muamua i se siosiomaga e le masani ai. E iloa e nei uo fou lo latou fefiloi faatasi ai i totonu o se vaitafe i ona lava āfuaga, vevela, ma fatufatuga o vailaau—o se vaitafe e i ai ona lava tu masani, aganuu, ma le vaogagana. O lenei olaga fou ia Keriso atonu e foliga lofituina mo i latou. Mafaufau mo sina taimi e uiga i ni o latou lagona a o latou faalogo mo le taimi muamua i faaupuga e pei o le “Afiafi Faaleaiga,” “BYC”, “Aso Sa anapogi,” “papatisoga mo ē ua maliliu,” “fusitolu,” ma isi mea faapena.
E faigofie lava ona iloa le mafuaaga latou te ono lagona ai le le fia auai. I ni tulaga faapea, atonu latou te fesili ifo ia i latou lava, “O i ai se nofoaga mo a’u iinei? E fetaui ea a’u i Le Ekalesia a Iesu Keriso o le Au Paia o Aso e Gata Ai? E manaomia ea e le Ekalesia a’u? Pe o le a ou maua ea ni uo fou e naunau e fesoasoani mai ma lagolagoina a’u?”
A’u uo pele, i ni taimi faapena, o i tatou o loo i ai i vaega eseese i le malaga umi o le avea ma soo e tatau ona faaloaloa atu se lima mafanafana o le faaaumea i a tatou uo fou, talia i latou i mea o loo latou i ai, ma fesoasoani atu, alofa, ma faaaofia i latou i o tatou olaga. O nei uo fou uma o ni atalii ma afafine faapelepele o le Atua.10 E le mafai ona tatou ma’umauina e oo lava i se toatasi o i latou ona, e pei o le Vaitafe o le Amasone e faalagolago i tama’i vaitafe o loo fafagaina, tatou te manaomia i latou e pei foi ona latou matua manaomiaina i tatou, ina ia avea ma ‘au malosi mo le lelei i le lalolagi.
E aumai e a tatou uo fou ni taleni mai le Atua, fiafiaga, ma le lelei i totonu o i latou. O lo latou naunautai mo le talalelei e mafai ona pipisi solo, lea e fesoasoani ai ia i tatou e toe faaolaola a tatou lava molimau. Latou te aumaia foi ni vaaiga fou i lo tatou malamalamaaga i le olaga ma le talalelei.
Ua leva ona aoaoina i tatou i auala e mafai ona tatou fesoasoani atu ai i a tatou uo fou ia lagonaina le talileleia ma le alofaina i le Ekalesia toefuataiina a Iesu Keriso. Latou te manaomiaina ni mea se tolu e tumau ai le malosi ma le faatuatua i o latou olaga atoa:
Muamua, latou te manaomia ni uso ma ni tuafafine i le Ekalesia o ē naunau atu ma le faamaoni ia i latou, o ni uo moni ma faamaoni o ē mafai ona latou liliu atu pea i ai, o ē o le a savavali i o latou autafa, ma o ē o le a taliina a latou fesili. I le avea ai ma tagata o le ekalesia, e tatau i taimi uma ona tatou mataala ma vaavaai mo ni foliga fou pe a auai i gaoioiga ma sauniga o le Ekalesia, e tusa lava poo a tiutetauave, tofiga, poo popolega o ia i tatou. E mafai ona tatou faia ni mea faigofie e fesoasoani ai i nei uo fou ia lagona le taliaina ma le talileleia i le Ekalesia, e pei o le tuuina atu o se faafeiloaiga mafanafana, ‘ata’ata ma le faamaoni ia i latou, nonofo faatasi e vivii ma tapuai, faailoa atu i latou i isi tagata o le au paia, ma isi mea faapena. A o tatala o tatou loto i a tatou uo fou i nisi o auala nei, ua tatou galulue i le agaga o le auaunaga. A tatou auauna atu ia i latou e pei ona faia e le Faaola, o le a latou lē lagonaina e pei “o ni tagata ese i le Ekalesia.” O le a latou lagona le faaaofia ai ma faia ni uo fou, ma e sili ona taua, o le a latou lagona le alofa o le Faaola e ala i lo tatou tausiga faamaoni.
Lua, e manaomia e uo fou se tofiga—o se avanoa e auauna atu ai i isi. O le auaunaga o se tasi lea o atamai sili o Le Ekalesia a Iesu Keriso o le Au Paia o Aso e Gata Ai. O se faagasologa e mafai ai e lo tatou faatuatua ona tuputupu a’e malosi atili. E moomia e uo fou uma lena avanoa. E ui ua i ai i le epikopo ma le aufono a le uarota le tiutetauave tuusao e tuu atu ai ni valaauga i le taimi lava lea e maea ai le latou papatisoga, ae e leai ma se mea e taofia i tatou, o ni tagata o le au paia, mai le valaauliaina o a tatou uo fou e fesoasoani ia i tatou e auauna atu faasamasamanoa i isi pe ala foi i galuega fesoasoani.
Tolu, o uo fou e tatau ona “tausia i le afioga lelei a le Atua.”11 E mafai ona tatou fesoasoani ia te i latou ia fiafia ma faamasani i tusitusiga paia a o tatou faitauina ma talanoaina aoaoga faatasi ma i latou, tuuina atu anotusi i tala ma faamalamalama atu i ai upu faigata. E mafai foi ona tatou aoaoina i latou pe faapefea ona maua le taitaiga patino e ala i le suesueina soo o tusitusiga paia. Ma le isi, e mafai ona tatou aapa atu i a tatou uo fou i o latou lava fale ma valaaulia i latou i o tatou fale i taimi e ese mai ia tatou sauniga ma gaoioiga faisoo a le Ekalesia ua faatulagaina, ma fesoasoani ia i latou ia tuufaatasia i le vaitafe malosi o le nuu o le Au Paia.
O le iloaina o fetuunaiga ma luitau e faia e a tatou uo fou i le avea ai ma tagata o le aiga o le Atua, i le avea ai ma o tatou uso ma tuafafine, e mafai ona tatou faasoa atu i ai le auala o loo tatou faatoilaloina ai luitau talitutusa i o tatou olaga. O le a fesoasoani lenei mea ia i latou e iloa ai e le o tuua na o i latou ma o le a faamanuiaina e le Atua i latou pe a latou faatino le faatuatua i Ana folafolaga.12
A fesootai faatasi Vaitafe o Solimões ma Negro, e matua aave lava ma malosi le Vaitafe o Amasone. I se tulaga talitutusa, a oo ina tuufaatasia moni i tatou ma a tatou uo fou, e matua malosi ma mausali atu le Ekalesia toefuataiina a Iesu Keriso. Ma te matuai faafetai tele ma la’u manamea, o Rosana, mo i latou uma sa fesoasoani ia i ma’ua ia auai faatasi i lenei vaitafe fou i le tele o tausaga ua mavae, ina ua ma taliaina le talalelei a Iesu Keriso i lo ma atunuu moni o Pasila. I le aluga o tausaga, sa auauna ai ma le faamaoni nei tagata lelei tele ia i ma’ua ma fesoasoani ia i ma’ua ia faaauau pea ona tafe i le amiotonu. Ma te matuai faafetai tele ia i latou.
Sa iloa lelei e perofeta i le Itulagi i Sisifo le auala e faatumauina ai le tafe faatasi ma le faamaoni o uo fou i lenei vaitafe fou o le lelei e agai atu i le ola e faavavau. Mo se faataitaiga, i le vaai ai i o tatou aso ma le iloaina o le a tatou feagai ma luitau talitutusa,13 sa faaaofia ai e Moronae nisi o na laasaga taua i ana tusitusiga i le Tusi a Mamona:
“Ma ina ua uma ona taliaina o i latou i le papatisoga, ma galueaiina ma faamamaina e le mana o le Agaga Paia, sa faitauina i latou i totonu o tagata o le ekalesia a Keriso; ma sa ave o latou igoa ina ia manatua i latou ma tausia i le afioga lelei a le Atua, e faatutumau ai i latou i le ala sao, e faatutumau ai i latou ia mataala e le aunoa i le tatalo, ua nao galuega a Keriso, o le pogai ma le iuga o lo latou faatuatua, ua faalagolago i ai.
“Ma sa potopoto soo faatasi le ekalesia, e anapopogi ma tatalo, ma talatalanoa o le tasi i le tasi, e uiga i le uelefea o o latou agaga.”14
A’u soa pele i le galuega a le Alii, ou te talitonu e tele ni mea lelei atu e mafai ona tatou faia ma tatau ona faia ia lelei atu i le talileleia o uo fou i le Ekalesia. Ou te valaaulia outou ia iloiloina mea e mafai ona tatou faia ia opomau ma taliaina atili ai, ma aoga ia i latou, e amata atu i le Aso Sa a sau nei. Ia faaeteete ia le faalavelave ou tofiga Faale-Ekalesia i le faafeiloai atu i uo fou i sauniga ma gaoioiga a le Ekalesia. Po o a lava mea uma, e pele nei agaga i fofoga o le Atua ma e matua taua atu nai lo polokalama ma gaoioiga. Afai tatou te auauna atu i a tatou uo fou ma o tatou loto e tumu i le alofa le pona e pei ona faia e le Faaola, ou te folafola atu ia te outou, i Lona suafa, o le a Ia fesoasoani ia i tatou i a tatou taumafaiga. A tatou galulue o ni auauna faamaoni, e pei ona faia e le Faaola, o le a maua e a tatou uo fou le fesoasoaniga latou te manaomia e tumau ai le malolosi, tuuto, ma le faamaoni e oo i le iuga. O le a latou auai ma i tatou a o avea i tatou ma se nuu malosi o le Atua ma o le a fesoasoani ia i tatou e aumai le suavai fou i se lalolagi ua matua manaomiaina lava faamanuiaga o le talalelei a Iesu Keriso. O le a lagona e nei fanau a le Atua ua “le toe tagata ese [i latou] po o ē ua aumau, ae ua nuu faatasi ma le au paia.”15 Ou te folafola atu ia te outou o le a latou iloaina le afio ai o lo tatou Faaola, o Iesu Keriso, i Lana lava Ekalesia. O le a faaauau ona latou tafe atu faatasi ma i tatou o se vaitafe i le punavai o le lelei uma seia oo ina taliaina i latou i aao o lo tatou Alii, o Iesu Keriso, ma latou faalogo atu i le Tama o fetalai mai, “O le a outou maua le ola e faavavau.”16
Ou te valaaulia outou ina ia saili le fesoasoani a le Alii i le alolofa atu i isi e pei ona Ia alofa mai ia te outou. Sei o tatou mulimuli uma i le apoapoaiga na tuuina mai e Mamona, “O le mea lea, ou uso e [ma tuafafine] pele, ia outou tatalo atu i le Tama ma le malosi atoa o le loto, ina ia faatumulia outou i lenei alofa, lea ua ia faaee mai i luga o i latou uma o e o soo moni o lona Alo o Iesu Keriso.”17 O nei upumoni, ou te molimau atu ma faia ai i le suafa o Iesu Keriso, amene.