O Le Matafaioi a le Tusi a Mamona i le Liuaina

Saunia e Elder Shayne M. Bowen

O Le Fitugafulu

O loo tatou faapotopotoina Isaraelu mo le taimi mulimuli ma o loo faia e ala i le Tusi a Mamona, o se tasi o meafaigaluega sili ona mamana o le liuaina.

O le toatele o tagata i aso nei o loo mafaufau e uiga i le tulaga moni o le Atua ma lo tatou sootaga ma Ia. O le toatele e itiiti lava pe leai foi se silafia e uiga i Lana fuafuaga sili o le fiafia. I le silia ma le 30 tausaga ua tea, na matauina ai e Peresitene Ezra Taft Benson faapea ua “teena e le toatele o le lalolagi … o ona po nei le paia o le Faaola. Ua latou fesiligia Lona soifua mai faavavega, le atoatoa o Lona soifuaga, ma le moni o Lona toetu mamalu.”¹

I o tatou aso, o fesili ua taulai atu e le gata i lo tatou Faaola ae faapea foi i Lana Ekalesia—O Le Ekalesia a Iesu Keriso o le Au Paia o Aso e Gata Ai—lea na Ia toefuataiina e ala mai i le Perofeta o Iosefa Samita. O nei fesili e tele ina taulai atu i le talafaasolopito, aoaoga, po o faiga masani o le Ekalesia a le Faaola.

O Le Tusi a Mamona ua Fesoasoani ia i Tatou ia Tuputupu Ae i le Molimau

Mai le Tala’i La’u Talalelei, ua tatou faitau ai: “Ia manatua o lo tatou malamalamaaga [i le Tama Faalelagi ma Lana fuafuaga o le fiafia] e sau mai perofeta o ona po nei—o Iosefa Samita ma i latou na suitulaga atu ia te ia—o e na maua ia faaaliga tuusao mai le Atua. O lea la, o le fesili muamua lava e tali e se tagata sailiili, pe o Iosefa Samita o se perofeta a le Atua, ma e mafai e ia ona tali lenei fesili e ala lea i le faitau ma tatalo e uiga i le Tusi a Mamona.”²

O la’u molimau i le valaauga paia o le Perofeta o Iosefa Samita na faamalosia i le suesue ma le agaga tatalo o le Tusi a Mamona: O Se Tasi Molimau ia Iesu Kersio. Na ou faatinoina le valaaulia a Moronae ina ia “ole atu i le Atua, le Tama Faavavau, i le suafa o Iesu Keriso,” ina ia iloa le moni o le Tusi a Mamona.³ Ou te molimau atu ua ou iloa e moni. Ua oo mai lena malamalama ia te a’u, e pei ona oo atu ia te outou, “e ala i le mana o le Agaga Paia.”⁴

Ua ta’ua i le faatomuaga o le Tusi a Mamona: “O i latou o e e mauaina lenei molimau paia mai le Agaga Paia o le a latou iloa foi e ala i lea lava mana o Iesu Keriso o le Faaola o le lalolagi, o Iosefa Samita o lana talifaaaliga ma lana perofeta i aso nei e gata ai, ma O Le Ekalesia a Iesu Keriso o le Au Paia o Aso e Gata Ai o le malo o le Alii ua toefaatuina i luga o le lalolagi, e saunia ai mo le Afio Mai Faalua o le Mesia.”⁵

I le avea ai ma se faifeautalai talavou e alu i Chile, sa ou aoaoina se lesona malosi e uiga i le mana faaliliu o le Tusi a Mamona. Na auauna atu Mr. Gonzalez i se tofiga faamamaluina i lana ekalesia mo le tele o tausaga. Sa tele ana aoaoga faalelotu, e aofia ai se tikeri faalelotu. Sa matua mitamita o ia i lona atamai faaletusipaia. Na manino ia i matou o ia o se tagata atamai faalelotu.

Sa ia malamalama lelei e uiga i faifeautalai O Le Ekalesia a Iesu Keriso o le Au Paia o Aso e Gata Ai ao latou galulue i lona nuu o Lima, Peru. Sa ia manao lava e feiloai ia i latou ina ia mafai ona ia aoaoina i latou i le Tusi Paia.

I se tasi aso, toetoe lava a pei o se meaalofa mai le lagi, o lona manatu lea, na taofi o ia e ni faifeautalai se toalua i le auala ma fesili pe mafai ona la o atu i lona fale ma faasoa atu ni mau ia te ia. O lana miti lea ua taunuu! Na tali mai ana tatalo. O le a iu lava, ina mafai ona ia faasa’oina nei tama talavou ua taitai seseina. Sa ia ta’u atu ia i la’ua na te fiafia la te o mai i lona fale e talanoa i tusitusiga paia.

Sa tau le mafai ona ia faatali mo lona taimi faatulagaina. Sa ia saunia e faaaoga le Tusi Paia e faamaonia ai le sese o a la talitonuga. Sa ia mautinoa o le a faamanino ma faailoa moni atu e le Tusi Paia mea sese o a la’ua aoaoga. Na oo mai le po tuupoina, ma sa tuitui mai faifeautalai i lona faitotoa. Sa tau le ma nofo o ia. Na iu lava ina oo mai lona taimi.

Sa ia tatalaina le faitotoa ma valaaulia faifeautalai i totonu o lona fale. Sa tuuina atu ia te ia e se tasi o faifeautalai se tusi lanumoana ma tuuina atu se molimau faamaoni lea na iloa lelei ai e le faafeautalai o loo i ai i le tusi le afioga a le Atua. Na faaopoopo atu e le faifeautalai lona lua lana molimau malosi e uiga i le tusi, molimau atu na faaliliuina e se perofeta a le Atua i nei ona po, e suafa ia Iosefa Samita, ma e aoao atu e uiga ia Keriso. Na faamavae faifeautalai ma la tuua ai lona fale.

Sa matuai le fiafia Mr. Gonzalez. Peitai sa ia tatalaina le tusi ma amata ona susue ona itulau. Sa ia faitauina le itulau muamua. Sa ia faitauina lea itulau ma lea itulau ma e lei taofi seia oo i le aoauli o le aso na sosoo ai. Sa ia faitauina le tusi atoa ma iloaina ai e moni. Na ia iloa le mea e tatau ona ia faia. Sa ia valaau atu i faifeautalai, mauaina lesona, ma lafoai le olaga sa ia iloaina ma avea ai ma se tagata O Le Ekalesia a Iesu Keriso o le Au Paia o Aso e Gata Ai.

O lena tamalii lelei sa avea ma a’u faiaoga o le NAF i Provo, Iuta. O le tala o le liuga o Brother Gonzales ma le mana o le Tusi a Mamona sa tele se aafiaga ia te a’u.

Ina ua ou taunuu i Chile, sa valaauliaina i matou e lo matou peresitene o le misiona, o Peresitene Ryoden J. Glade, e faitau le molimau a le Perofeta o Iosefa Samita na tusia i le Iosefa Samita—Talafaasolopito i vaiaso taitasi. Na ia aoao mai ia i matou o se molimau o le Uluai Faaaliga o le a maua ai se faasa’oga sa’o ia tatou lava molimau e uiga i le talalelei ma le Tusi a Mamona.

Sa ou matuai faatauaina lana valaaulia. Sa ou faitauina tala o le Uluai Faaaliga; sa ou faitauina le Tusi a Mamona. Sa ou tatalo e pei ona faatonuina e Moronae ma aioi atu i le “Atua, le Tama Faavavau, i le suafa o Iesu Keriso”⁶ pe moni le Tusi a Mamona. Ou te molimau atu ia te outou i le asō ou te iloa o le Tusi a Mamona, e pei ona saunoa mai le Perofeta o Iosefa Samita, o se “tusi aupito sili ona saʼo i soo se isi lava tusi i luga o le lalolagi, o le maaʼauʼau foi lea o la tatou tapuaiga, e sili foi ona latalata atili atu o le tagata i le Atua i lona ola ai i ona mataupu, nai lo se isi lava tusi.”⁷ Na tautino mai foi e le Perofeta o Iosefa e faaapea “A aveese la le Tusi a Mamona ma faaaliga, o fea la le tatou lotu? Ua leai se mea.”⁸

Liua Patino

Ao atili ona tatou malamalama po o ai i tatou ma faamoemoega o le Tusi a Mamona, e faalolotoina lo tatou liua ma faamautinoaina atili. E faamalosia i tatou i la tatou tautinoga e tausia feagaiga sa tatou osia ma le Atua.

O le faamoemoega autu o le Tusi a Mamona o le faapotopotoina lea o Isaraelu ua faataapeapeina. O lenei faapotopotoina e aumaia i fanau uma a le Atua le avanoa e ulu atu ai i ala o feagaiga ma, i le faamamaluina o na feagaiga, toe foi atu i le afioaga a le Tama. Ao tatou aoao atu le salamo ma papatiso ia tagata liliu mai, ua tatou faapotopotoina Isaraelu ua faataapeapeina.

O le Tusi a Mamona e 108 mau faasino i le aiga o Isaraelu. I le amataga o le Tusi a Mamona, na aoao mai ai Nifae, “Ona o le atoatoa o loʼu faamoemoe ia mafai ona ou faatauanauina tagata ia o mai i le Atua o Aperaamo, ma le Atua o Isaako, ma le Atua o Iakopo, ma faaolaina.”⁹ O le Atua o Aperaamo, Isaako, ma Iakopo o Iesu Keriso lea, o le Atua o le Feagaiga Tuai. Ua laveaiina i tatou pe a tatou o mai ia Keriso e ala i le ola ai i Lana talalelei.

Mulimuli ane, na tusia e Nifae:

Ioe, sa tele mea sa tautala mai ai loʼu tamā e uiga i Nuuese, ma e uiga foi i le aiga o Isaraelu, e faatusaina i latou i se laau olive, o le a faʼi ese ona lala ma o le a faataapeapeina i luga o le lalolagi atoa. …

“Ma a mavae ona faataapeape o le aiga o Isaraelu o le a toe faapotopoto faatasi i latou; po o lona uiga, a mavae ona maua e Nuuese le atoatoaga o le Talalelei, o lala moni o le laau olive, po o le toe vaega o le aiga o Isaraelu, o le a sulu i totonu, pe o le a o mai i le malamalama o le Mesia moni, lo latou Alii ma lo latou Togiola.”¹⁰

E faapena foi, i le faaiuga o le Tusi a Mamona, ua toe faamanatu maia ia i tatou e le perofeta o Moronae, “Ina ia le toe faafelilonaiina oe, ina ia mafai ona faataunuuina o feagaiga a le Tamā Faavavau na faia e ia ia te oe, le aiga e o Isaraelu.”¹¹

O Feagaiga a le Tama Faavavau

O a “feagaiga a le Tama Faavavau” o loo faatatau i ai Moronae? Tatou te faitau i le tusi a Aperaamo:

“O loʼu igoa o Ieova, ma ua Ou iloa le iuga mai le amataga; o lea o le a i ai loʼu lima i luga o oe.

“Ma o le a Ou faia mai ia te oe se atunuu tele, ma o le a Ou faamanuiaina oe e lē mafuaina, ma faasilisili lou igoa i totonu o atunuu uma, ma o le a avea oe ma se faamanuiaga i au fanau e mulimuli mai pe a mavae atu oe, ina ia latou tauaveina i o latou lima lenei auaunaga ma le Perisitua i atunuu uma.”¹²

Sa aoao mai e Peresitene Russell M. Nelson i se faasalalauga i le lalolagi atoa lata mai faapea “o aso nei e gata ai, ma ua faanatinati e le Alii Lana galuega e faapotopoto Isaraelu. O lena faapotopotoina o le mea aupito sili lea ona taua o loo tupu i le lalolagi i le taimi nei. E leai se isi mea e faatusalia i lona maoae, e leai se isi mea e faatusalia i le taua, e leai se isi mea e faatusalia i le malualii. Ma afai e te filifili e, pe afai e te manao ai, e mafai ona avea oe o se vaega taua o lena mea. E mafai ona avea oe o se vaega tele o se mea tele, se mea maoae, se mea e malualii!

“Pe a tatou talanoa i le faapotopotoina, ua na ona tatou fai atu lava o lenei upumoni faalefaavae: o tagata uma o fanau a lo tatou Tama Faalelagi, i itu uma o le veli, e tatau ona faalogo i le savali o le talalelei toefuataiina a Iesu Keriso. Latou te filifili mo i latou lava pe latou te mananao e iloa atili.”¹³

O le mea lena o loo tatou faia i le avea ai ma tagata o Le Ekalesia a Iesu Keriso o le Au Paia o Aso e Gata Ai: o loo tatou saili e aumaia le lalolagi i se malamalamaaga o le—ma se liuga i le—talalelei a Iesu Keriso. O i tatou o “tagata faapotopoto o aso e gata ai.”¹⁴ Ua manino la tatou misiona. Uso e ma tuafafine, ia iloga i tatou e pei o i latou o e na faamaoni i le folafolaga a Moronae, tatalo ma mauaina se tali ia iloa ai e moni le Tusi a Mamona, ona faasoa atu lea o lena malamalama i isi i le upu ma le, mea sili ona taua, i galuega.

O Le Matafaioi a le Tusi a Mamona i le Liuaina

Ua maua i le Tusi a Mamona le atoatoaga o le talalelei a Iesu Keriso.¹⁵ E taitaiina atu i tatou i feagaiga ma le Tama, lea afai e tausia e faamautinoa mai ia i tatou Lana meaalofa silisili—o le ola e faavavau.¹⁶ O le Tusi a Mamona o le maa‘au’au i le liuaina o atalii ma afafine uma o le Tama Faalelagi.

O le toe siiina mai o se upusii mai ia Peresitene Nelson: “Ao e … faitau i aso taitasi mai le Tusi a Mamona, o le a e aoao i aoaoga faavae o le faapotopotoina, upumoni e uiga ia Iesu Keriso, Lana Togiola, ma le atoaga o Lana talalelei e le o maua i le Tusi Paia. O le Tusi a Mamona o le totonugalemu lea o le faapotopotoina o Isaraelu. O le mea moni, afai e leai se Tusi a Mamona, o le a le tupu le faapotopotoina folafolaina o Isaraelu.”¹⁷

Sei ou faaiu atu i le fetalaiga a le Faaola ao Ia aoao atu sa Nifae e uiga i faamanuiaga folafolaina: “O outou o fanau a perofeta; ma o outou o lo le aiga o Isaraelu; ma o outou o lo le feagaiga lea na faia e le Tama ma o outou tama, na fetalai atu ai ia Aperaamo: Ma o lau fanau o le a manuia ai aiga uma o le lalolagi.”¹⁸

Ou te molimau atu o i tatou o atalii ma afafine a le Atua, o fanau a Aperaamo, o le aiga o Isaraelu. O loo tatou faapotopotoina Isaraelu mo le taimi mulimuli ma o loo faia e ala i le Tusi a Mamona—o se tusi, pe a tuufaatasia ma le Agaga o le Alii, o se meafaigaluega sili ona mamana o le liuaina. Ua taitaiina i tatou e le perofeta a le Atua, o Peresitene Russell M. Nelson, o le o loo taitaiina le faapotopotoina o Isaraelu i o tatou aso. E moni le Tusi a Mamona. Na suia ai lo’u olaga. Ou te folafola atu, e pei o Moronae ma le tele o perofeta i le aluga o vaitausaga, e mafai ona suia ai foi lou [olaga].¹⁹ I le suafa, o Iesu Keriso, amene.