2018
O Le Igoa Sa’o o le Ekalesia
Novema 2018

O Le Igoa Sa’o o le Ekalesia

Saunia e Peresitene Russell M. Nelson

Nelson, Russell M.

Sa faatonuina i tatou e Iesu Keriso e faaigoa le Ekalesia i Lona suafa ona o Lana Ekalesia, ua faatumulia i Lona mana.

O’u uso e ma tuafafine pele, i lenei aso Sapati matagofie ua tatou olioli ai faatasi i o tatou faamanuiaga e tele mai le Alii. Matou te faafetai atu mo a outou molimau e uiga i le talalelei toefuataiina a Iesu Keriso, mo osigataulaga ua outou faia ia tumau ai pe toe foi atu ai i luga o Lana ala o feagaiga, atoa ai ma la outou auaunaga faapaiaina i Lana Ekalesia.

O le asō ou te lagona le uunaiga malosi e talanoa atu ia te outou i se mataupu e matua taua tele. I nai vaiaso talu ai, sa ou faalauiloa atu ai se faamatalaga e faatatau i le faasa’oga o le igoa o le Ekalesia.1 Sa ou faia lenei mea ona sa uunaia ai e le Alii i lo’u mafaufau le taua o le igoa na Ia folafolaina mo Lana ekalesia, Le Ekalesia a Iesu Keriso o le Au Paia o Aso e Gata Ai.2

E pei ona outou faamoemoeina, o tali i lenei faamatalaga ma i le taiala i le sitaili toeiloiloina3 sa fefiloi lava le lelei ma le faalelelei. E toatele tagata o le ekalesia sa faasa’oina vave lava le igoa o le Ekalesia i a latou poloka ma itulau o ala faasalalau faaagafesootai. O isi sa tuufesili pe aisea, faatasi ai ma mea uma o loo tutupu i le lalolagi, sa tatau ai ona faamamafa se “mea faatauvaa tele.” Ma sa fai mai nisi e le mafai ona faia, aisea la e taumafai ai fua? Se’i o’u faamalamalama atua le mafuaaga tatou te popole tele ai i lenei faafitauli. Ae muamua lava se’i o’u faamamafa atua o lenei taumafaiga e le o se:

  • E le o se suiga o le igoa.

  • E le o se toe mamanuina.

  • E leo se toe faamatagofieina.

  • E leo se suiga faafuasei ma faapa’ole.

  • Ma e leo se mea faatauvaa.

Ae, o se faasa’oga. O se poloaiga a le Alii. Sa le’i faaigoaina e Iosefa Samita le Ekalesia toefuataiina ia te ia; po o Mamona. O le Faaola lava Ia na fetalai, “Aua e faapea lava ona ta’ua la’u ekalesia i aso e gata ai, O Le Ekalesia a Iesu Keriso o le Au Paia o Aso e Gata Ai.”4

E oo lava i le taimi anamua, i le TA 34, sa tuu atu ai e le Alii toetu le faatonuga lava e tasi i tagata o Lana Ekalesia ina ua Ia asiasi atu ia i latou i Amerika. I lena taimi sa Ia fetalai ai:

“Ia outou faaigoa ai le ekalesia i lo’u igoa. …

“Pe faapefea ona fai ma’u ekalesia, sei iloga ua faaigoaina i lo’u igoa? Aua afai e faaigoaina se ekalesia i le igoa o Mose o lona uiga o le ekalesia lea a Mose; pe afai e faaigoaina i le igoa o se tagata o lona uiga o le ekalesia lea a le tagata; ae afai e faaigoaina i lo’u igoa o lona uiga o la’u ekalesia lea.”5

O lea la, e le fetuunaia ai le igoa o le Ekalesia. Ina ua ta’ua ma le manino e le Faaola le igoa e tatau ona faaigoa ai Lana Ekalesia, lea na muamua lava i Lana ta’utinoga, “E faapea lava ona ta’ua o la’u ekalesia,” e mamafa ia te Ia. Ma afai tatou te faatagaina ni igoa valaau e faaaoga ma vaetamaina pe lagolagoina na igoa valaau e i tatou lava ia, e tiga o Ia.

O le a se taua o se igoa, po o i lenei tulaga, o se igoa valaau? A oo mai i igoa valaau o le Ekalesia, e pei o le “LDS Church,” le “Ekalesia Mamona,” po o le “Ekalesia a le Au Paia o Aso e Gata Ai,” o le aveesega sili ona manino o le aveesea o le suafa o le Faaola. O le aveesega o le suafa o le Alii mai le Ekalesia a le Alii o se manumalo tele lea mo Satani. A tatou aveesea le suafa o le Faaola, ua tatou lafoaiese lemu mea uma na faia e Iesu Keriso mo i tatou—e oo lava i Lana Togiola.

Mafaufau i le mea lenei mai Lana silafaga: O Ia o Ieova, o le Atua o le Feagaiga Tuai. I lalo o le taitaiga a Lona Tama, o Ia o le Foafoa o lenei lalolagi ma isi lalolagi.6 Sa Ia filifili e usitai i le finagalo o Lona Tama ma faia se mea mo fanau uma a le Atua lea e leai ma se tasi e mafai ona faia! I le tuua ai o Lona mamalu ma afio mai i le lalolagi o le Alo e Toatasi na Fanaua e le Tama i la le tino, sa inosia, tauemuina, tuufeanu i ai, ma sasaina ma le le alofa o Ia. I le Faatoaga i Ketesemane, sa ave ai e lo tatou Faaola i Ona lava luga tiga uma agasala uma ma mafatiaga ma puapuaga uma ua outou oo ma ou oo i ai faapea ai ma tagata uma ua soifua ma o le a soifua mai. I lalo o le mamafa o lena avega tiga matuitui, na maligi ai Lona toto mai pu ninii uma.7 O nei mafatiaga uma sa matua faateteleina a o faasatauroina ma le le alofa o Ia i luga o le satauro i Kalevario.

E ala i nei aafiaga matuitui tiga ma Lona Toetu na sosoo ai—Lana Togiola Lē I’u—sa Ia aumaia ai le tino ola pea i tagata uma ma togiolaina ai tatou uma taitoatasi mai aafiaga o le agasala i tuutuuga o lo tatou salamo.

Na sosoo ai ma le Toetu o le Faaola ma le maliliu o Ana Aposetolo, sa oo ai le lalolagi i seneturi o le liliuese tele. Ona oo lea i le tausaga 1820, na faaali mai ai le Atua le Tama ma Lona Alo, o Iesu Keriso, i le Perofeta o Iosefa Samita e amatalia le Toefuataiga o le Ekalesia a le Alii.

I le mavae ai o mea uma na Ia onosaia—i le mavae ai o mea uma na Ia faia mo tagata soifua—ua ou iloa ai ma le maasiasi tele o loo tatou taliaina e aunoa ma le iloaina o le mea ua faia i le Ekalesia toefuataiina a le Alii le valaauina i isi igoa, ia ua aveesea uma ai le suafa paia o Iesu Keriso!

O Aso Sa uma a o tatou aai ma feinu ma le agavaa i le faamanatuga, tatou te faafouina la tatou folafolaga paia i lo tatou Tama Faalelagi o loo tatou loto e ave i o tatou luga le suafa o Lona Alo, o Iesu Keriso.8 Ua tatou folafola atu e mulimuli ia te Ia, salamo, tausi i Ana poloaiga, ma manatua pea o Ia.

A tatou aveesea Lona suafa mai Lana Ekalesia, ua tatou aveesea o Ia o le taulaiga tutotonu o o tatou olaga e aunoa ma le manatu i ai.

O le aveina o le suafa o le Faaola i o tatou luga e aofia ai le tautino atu ma le molimau atu i isi—e ala i a tatou amioga ma a tatou upu—o Iesu o le Keriso. Pe sa tatou fefefe tele ne’i faatiga i se tasi na valaauina tatou o “Mamona” na ala ai ona tatou le puipuia le Faaola lava Ia, e tu atu ai mo Ia i le igoa ua faaigoaina ai Lana Ekalesia?

Afai e ao ia i tatou o se nuu ma o ni tagata taitoatasi ona mauaina le mana o le Togiola a Iesu Keriso—e faamama ma faamalolo ai tatou, e faamalosia ma faalauteleina ai tatou, ma mulimuli ane faaeaina ai i tatou—e tatau ona tatou faamamaluina ma le manino o Ia o le puna o lena mana. E mafai ona tatou amata i le valaauina o Lana Ekalesia i le igoa na Ia folafola mai.

Mo le toatele o le lalolagi, o loo latou iloaina sese le Ekalesia a le Alii i le taimi nei o le “Ekalesia Mamona.” Ae o i tatou i le avea ai ma tagata o le Ekalesia a le Alii, ua iloaina le o loo tu i le ulu: o Iesu Keriso lava Ia. Ae paga lea, o le toatele e faalogo i le upu Mormon e ono manatu o loo tatou tapuai ia Mamona. E leai! Tatou te faamamaluina ma faaaloalogiaina lena perofeta Amerika maoae anamua.9 Ae e leo tatou o ni soo o Mamona. O i tatou o soo o le Alii.

I le popofou o le Ekalesia toefuataiina, o upu e pei o le Ekalesia Mamona ma le Au Mamona10 sa tele ina faaaoga o ni igoa valaau—o ni faaupuga lē lelei, upu saua—na mamanuina e nana ai faatosinaga a le Atua i le toefuataiina o le Ekalesia a Iesu Keriso i nei aso e gata ai.11

Uso e ma tuafafine, e tele lava finauga faalelalolagi e faasaga i le toefuataiina o le igoa sa’o o le Ekalesia. Ona o le lalolagi faaonapo nei ua tatou ola ai, faatasi ai ma sailiga i masini faamoemoeina ua fesoasoani ia i tatou uma ia maua faamatalaga tatou te manaomia vave—e aofia ai ma faamatalaga e uiga i le Ekalesia a le Alii—fai mai le au faitio o se faasa’oga i lenei lava taimi ua le atamai. E lagona e isi ona ua tatou lauiloa tele o ni “Mamona” ma le “Ekalesia Mamona,” e tatau ona tatou taliaina ma ola ai.

Afai o se talanoaga lenei e uiga i le mamanuina o se faalapotopotoga e fai e tagata, e ono manumalo la na finauga. Ae i lenei mataupu taua tele, tatou te vaai atu ai ia te Ia e ana le Ekalesia lenei ma faamamaluina, o ala a le Alii, e lē, ma o le a lē avea lava ma ala o tagata. Afai o le a tatou onosai ma faia la tatou vaega ia lelei, o le a taitai e le Alii i tatou e ala i lenei galuega taua. I le mavae o mea uma, ua tatou iloa lava e fesoasoani mai le Alii ia i latou e saili e fai Lona finagalo, e pei lava ona Ia fesoasoani ia Nifae e faataunuu le galuega o le fauina o se vaa e asa ai le vasa.12

O le a tatou mananao ina ia faaaloalo ma onosai i a tatou taumafaiga e faasa’o nei mea sese. O ala o faasalalauga fitoitonu o le a malamalama i le tali mai i la tatou talosaga.

I se konafesi aoao talu ai, sa saunoa ai Elder Benjamín De Hoyos e uiga i mea faapena na tupu. Sa Ia saunoa:

“I ni nai tausaga ua mavae, a o ou galue ai i le ofisa o le va i fafo o le Ekalesia i Mekisiko, sa valaaulia [maua ma se soa] e auai i se polokalama o le talanoa i luga o le leitio. [Sa fesili mai se tasi o faatonu o le polokalama] ia i [ma’ua], ‘Aisea ua matuai umī ai le igoa o le Ekalesia? …

“Sa ma ataata atu ma la’u soa i le maoae o le fesili ona ma faamatala atu lea e faapea, o le igoa o le Ekalesia sa le’i filifilia e se tagata. Sa tuuina mai e le Faaola. … Na vave ona tali mai ma le faaaloalo le faatonu o le polokalama, ‘O le a matou toe ta’ua ma le agaga fiafia tele.’”13

O lena lipoti na aumai ai se mamanu. E taitoatasi lava, o a tatou taumafaiga o ni tagata taitoatasi o le a manaomia e faasa’o ai mea sese ia na taliaina i le gasologa o tausaga.14 Atonu o le a mulimuli pe leai foi le lalolagi i la tatou ta’imua i le valaauina o i tatou i le igoa sa’o. Ae o se le faamaoni mo i tatou le le fiafia pe afai e valaau e le toatele o le lalolagi le Ekalesia ma ona tagata i igoa sese ae o loo tatou faia foi lea mea e tasi.

Ua aoga la tatou taiala o le sitaili ua toe iloiloina. Ua ta’ua: “I le maufaasino muamua, o le igoa atoa o le Ekalesia ua filifilia: ‘O Le Ekalesia a Iesu Keriso o le Au Paia o Aso e Gata Ai.’ Afai e manaomia se maufaasino puupuu [lona lua], o faaupuga ‘o le Ekalesia’ po o le “Ekalesia a Iesu Keriso” e uunaia [e faaaoga]. O le ‘Ekalesia toefuataiina a Iesu Keriso’ e sa’olele foi ma e uunaia [e faaaoga].”15

Afai e fesili mai se tasi, “O oe o se Mamona?” e mafai ona e tali atu i ai, “Afai o loo e fesili mai pe o a’u o se tagata o Le Ekalesia a Iesu Keriso o le Au Paia o Aso e Gata Ai, ioe, o lea lava!”

Afai e fesili mai se tasi, “O oe o se Au Paia o Aso e Gata Ai?”16 e mafai ona e tali atu, “Ioe, o lea lava. Ou te talitonu ia Iesu Keriso ma o a’u o se tagata o Lana Ekalesia toefuataiina.”

O’u uso e ma tuafafine, ou te folafola atu afai o le a tatou faia le mea sili tatou te mafaia e toefuatai ai le igoa sa’o o le Ekalesia a le Alii, o le a liligi mai e Ia o le e ana le Ekalesia Lona mana i lalo ma faamanuiaga i luga o ulu o le Au Paia o Aso e Gata Ai,17 i auala tatou te lei vaaia lava. O le a tatou maua le poto ma le mana o le Atua e fesoasoani ai ia i tatou e avatu faamanuiaga o le talalelei toefuataiina a Iesu Keriso i malo uma, ituaiga, gagana, ma nuu ma ia saunia le lalolagi mo le Afio Faalua Mai o le Alii.

O lea la, o le a le taua o se Igoa? A oo mai i le igoa o le Ekalesia a le Alii, o le tali o “Mea Uma!” Sa faatonuina i tatou e Iesu Keriso e faaigoa le Ekalesia i Lona suafa ona o Lana Ekalesia, ua faatumulia i Lona mana.

Ou te iloa o loo soifua le Atua. O Iesu o le Keriso. O loo Ia taitaia Lana Ekalesia i aso nei. Ou te molimau atu ai i le suafa o Iesu Keriso, amene.

Faamatalaga

  1. “Sa uunaia ai e le Alii i lo’u mafaufau le taua o le igoa na Ia faaalia mo Lana Ekalesia, Le Ekalesia a Iesu Keriso o le Au Paia o Aso e Gata Ai. E i ai sa tatou galuega i o tatou luma ia ogatusa ai i tatou lava ma Lona finagalo. I vaiaso talu ai nei, sa amatalia ai e taitai ma matagaluega eseese o le Ekalesia ona faia laasaga talafeagai e faia ai lea mea. O faamatalaga faaopoopo e uiga i lenei mataupu taua o le a maua i masina a sau” (Russell M. Nelson, “O Le Igoa o le Ekalesia” [malelega aloaia, 16 Aok., 2018], mormonnewsroom.org).

  2. Sa faia foi e Peresitene o le Ekalesia na muamua atu lea lava talosaga e tasi. Mo se faataitaiga, sa saunoa Peresitene Siaosi Alapati Samita: “Aua le tuuina i lalo le Alii e ala i le valaauina o lenei ekalesia o le Ekalesia Mamona. Na te le’i faaigoaina i le Ekalesia Mamona” (i le Conference Report, Apr. 1948, 160).

  3. Tagai i le “Taiala o le Sitaili—O Le Igoa o le Ekalesia,” mormonnewsroom.org.

  4. Mataupu Faavae ma Feagaiga 115:4.

  5. 3 Nifae 27:7–8.

  6. Tagai i le Mose 1:33.

  7. Tagai i le Mataupu Faavae ma Feagaiga 19:18.

  8. Tagai i le Moronae 4:3; Mataupu Faavae ma Feagaiga 20:37, 77.

  9. O Mamona o se tasi o tusitala iloga e toafa o le Tusi a Mamona, o isi e i ai Nifae, Iakopo, ma Moronae. O i latou uma o ni molimau na vaaitino i le Alii, faapea ai ma lona faaliliu upu musuia, le Perofeta o Iosefa Samita.

  10. E oo lava i le upu Mormonites sa i ai faatasi i faaupuga faalumaluma ia na faaaogaina (tagai i le Talafaasolopito o le Ekalesia, 2:62–63, 126).

  11. O isi igoa valaau sa foliga mai na i ai i taimi o le Feagaiga Fou. I le taimi o le faamasinoga o le Aposetolo o Paulo i luma o Filiki, sa fai mai ai o Paulo “o le taitai i le itu aiga o le au Nasareta” (Galuega 24:5). E faatatau i le faaaogaina o le fasifuaitau “o le au Nasareta,” sa tusia ai e se tasi o tagata faiupu: “O le igoa lenei sa masani ona ave i Tagata Kerisiano e faailoa ai le le faaaloalo. Sa ta’ua i latou faapena ona o Iesu o se Nasareta” (Albert Barnes, Notes, Explanatory and Practical, on the Acts of the Apostles [1937], 313).

    Sa faapena foi ona ta’ua e se isi tagata faiupu: “A o valaauina ma le le faaaloalo lo tatou Faaola ‘O le Nasareta’ (Mataio 26:71), o lea na faasino ai Iutaia i ona soo o le ‘au Nasareta.’ Sa latou le tautino o i latou o ni Kerisiano, o lona uiga, o soo o le Mesia” (The Pulpit Commentary: The Acts of the Apostlesed. H. D. M. Spence and Joseph S. Exell [1884], 2:231).

    Sa faapena foi ona matauina e Elder Neal A. Maxwell: “E ala i le talafaasolopito faatusitusiga paia, ua tatou vaai ai i taumafaiga faifai pea e faalumaluma perofeta ina ia aveesea i latou—e faailoga i latou ina ia faaitiitia i latou. Peitai, o le tele lava e le amanaiaina i latou e o latou lava augatupulaga ma e ala i talafaasolopito faalelalolagi. I le mavae o mea uma, sa ta’ua lava Kerisiano anamua “o itu aiga o le au Nasareta.’ (Galuega 24:5.)” (“Out of Obscurity,” Ensign, Nov. 1984, 10).

  12. Tagai i le 1 Nifae 18:1–2.

  13. Benjamín De Hoyos, “Valaauina e Avea ma Tagata Paia,” Liahona, Me 2011, 106.

  14. E ui e leai se tatou pule i le igoa e valaau ai i tatou e isi tagata, ae tatou te pule atoa i le auala tatou te faasino ai ia i tatou lava. E faapefea ona tatou faamoemoeina isi e faamamalu le igoa sa’o o le Ekalesia pe afai e le mafai ona faia e i tatou lava o ona tagata?

  15. “Taiala o le Sitaili—O Le Igoa o le Ekalesia,” mormonnewsroom.org.

  16. O le faaupuga au paia e tele ina faaaoga i le Tusi Paia. I le Tusi a Paulo i Efeso, mo se faataitaiga, na ia faaaoga ai le upu au paia e le itiiti ifo ma le faatasi i mataupu uma. O se tagata o le au paia e talitonu ia Iesu Keriso ma taumafai e mulimuli ia te Ia.

  17. Tagai i le Mataupu Faavae ma Feagaiga 121:33.