Ina Filifili ia o Outou i le Aso Nei

Saunia e Elder Dale G. Renlund

O Le Korama a Aposetolo e Toasefululua

O le taunuuga sili o lo tatou fiafia e faavavau e faalagolago lea i le filifiliina o le Atua soifua ma auai faatasi ma Ia i Lana galuega.

O le tagata fatu o Mary Poppins o se tausitama masani i Egelani—e fai maneta.¹ Na lele mai o ia mai le matagi i sasae e fesoasoani i ie aiga atuatuvale o le au Banks lea na nonofo i le Numera 17, Auala o Cherry Tree, i Edwardian Lonetona. Sa tuu atu ia te ia le vaaiga o tamaiti, o Jane ma Michael. I se tulaga malosi ae agalelei, sa amata ona ia aoao atu ia i la’ua ni lesona taua i se auala tulagaese ma faamaneta.

Na tele le alualu i luma o Jane ma Michael, ae ua filifili Mary ua oo i le taimi e aluese ai. I le faatinoga o le tala, na taumafai ai le uo a Mary, o Bert, lea e salua ālaāsu e taofi o ia mai le alu. Sa ia finau atu, “Ae o ni tamaiti lelei i la’ua, Mary.”

Na tali mai Mary, “Mata ou te popole ia i la’ua pe ana faapea la te le lelei? Ae e le mafai ona ou fesoasoani ia i la’ua pe afai la te le faatagaina a’u, ma e leai se tasi e sili ona aoao gatā nai lo se tamaitiiti na te iloa mea uma.”

Na fesili Bert, “Ia e ā la?”

Na tali Mary, “E tatau lava ona la faia le isi mea e i la’ua lava.”²

Uso e ma tuafafine, e pei o Jane ma Michael Banks, o i tatou o ni “fanau lelei” o ē taua ona popole i ai. E finagalo lo tatou Tama Faalelagi e fesoasoani mai ma faamanuia i tatou, ae tatou te le faatagaina o Ia i le tele o taimi. O nisi taimi, tatou te amio ai e pei ua tatou iloa mea uma. Ma e tatau foi ona tatou faia “le isi vaega” e i tatou lava. O le mafuaaga lena na tatou o mai ai i le lalolagi mai se aiga faalelagi i le muai olaga. O la tatou “vaega” e aofia ai le faia o filifiliga.

O le sini a lo tatou Tama Faalelagi i tulaga faamatua, o le le tuu atu lea i Ana fanau ia faia le mea sa’o; ae o le tuu atu lea i Lana fanau e filifili e fai le mea sa’o ma mulimuli ane avea e faapei o Ia. Afai e na’o Lona finagalo lava ia tatou usiusitai atu, o le a Ia faaaogaina taui ma faasalaga vave e uunaia ai a tatou amioga.

Ae e le naunau le Atua i Lana fanau e avea ma ni “fagafao” aoaoina ma usiusitai o e e le ūina Ona seevae i le potu malolo selesitila.³ Leai, e finagalo le Atua i Lana fanau ia tuputupu ae faaleagaga ma auai faatasi ma Ia i le pisinisi faaleaiga.

Na faavaeina e le Atua se fuafuaga lea e mafai ona tatou avea ai ma suli i Lona malo, o se ala o le feagaiga lea e taitai atua i tatou ia avea e faapei o Ia, maua le ituaiga olaga ua Ia maua, ma nonofo e faavavau o ni aiga i Lona afioaga.⁴ O le filifiliga a le tagata lava ia sa—ma e—taua i lenei fuafuaga, lea na tatou aoaoina i lo tatou muai olaga. Na tatou taliaina le fuafuaga ma filifili e o mai i le lalolagi.

Ina ia mautinoa o le a tatou faatinoina le faatuatua ma aoao e faaaoga ma le tatau lo tatou faitalia, na tosoina ai se veli o le galo o mea i o tatou mafaufau ina ia tatou le manatuaina le fuafuaga a le Atua. A aunoa ma lena veli, o le a le mafai ona ausia faamoemoega a le Atua aua e le mafai ona tatou alualu i luma ma avea ma suli faatuatuaina ua finagalo o Ia e avea ai i tatou.

Na ta’ua e le perofeta o Liae: “O le mea lea, na tuuina mai ai e le Alii le Atua i le tagata ia tatau ona ia fai mo ia lava. O le mea lea, e lē mafai e le tagata ona ia fai mo ia lava vagana ai ua faatosina o ia e le tasi po o le isi.”⁵ I se tulaga faafaavae, o le tasi o filifiliga o loo suitulaga ai Iesu Keriso, o le Ulumatua a le Tama. O le isi filifiliga o loo suitulaga ai Satani, o Lusifelo, o le na manao e faaumatia le faitalia ma fāoa le mana.⁶

Ia Iesu Keriso, “o ia te i tatou le fautua i luma o le Tama.”⁷ Ina ua maea Lana taulaga togiola, na “toe afio atu [Iesu] i le lagi … e maua mai i le Tama ana aia o le alofa mutimutivale lea ua ia te ia mo le fanauga a tagata.” Ma i le mauaina ai o aia tatau o le alofa mutimutivale, “ua fautuaina ai e ia le faamoemoe o le fanauga a tagata.”⁸

O le fautua ai o Keriso i le Tama mo tatou e le o tetee atu [i le fuafuaga]. O Iesu Keriso, o le na faatagaina Lona finagalo ia tofatumoanaina i le finagalo o le Tama,⁹ e le lagolagoina soo se mea nai lo le finagalo o le Tama talu mai le amataga. E tapuā’ia ma patipatia ma le le masalosalo e le Tama Faalelagi o tatou tulaga manuia.

O le fautua ai o Keriso, i ni vaega, o le faamanatu mai lea ia i tatou ua Ia totogia a tatou agasala ma e leai se tasi e le aofia i le alofa mutimutivale o le Atua.¹⁰ Mo i latou e talitonu ia Iesu Keriso, salamo, ma ua papatisoina, ma tumau e oo i le iuga—o se faagasologa e tau atu i le faaleleiga¹¹—e faamagalo e le Faaola, faamalolo, ma fautua atu. O Ia o lo tatou fesoasoani, faamafanafana, ma le puluvaga—e faailoa atu ma faamaonia atu lo tatou faaleleiga ma le Atua.¹²

I se eseesega tonu lava, o Lusifelo o se tagata fai moliaga pe faasagatau mai. Na faamatala e Ioane le Talifaaaliga le toilalo faaiu o Lusifelo: “Ma sa ou faalogo i se leo tele ua faapea mai i le lagi, O lenei ua oo mai le faaolataga, ma le malosi, ma le malo o lo tatou Atua, ma le mana o lona Keriso.” Aisea? Aua ua lafo ifo i lalo “lē na molia o tatou uso, o lē na molia i latou i luma o lo tatou Atua i le ao ma le po. Aua ua latou manumālō ia te ia e ala i le toto o le Tamai Mamoe, ma i le upu a la latou molimau.”¹³

O Lusifelo o le tagata fai moliaga. Na ia tautala faasagatau mai ia i tatou i le muai olaga, ma e faaauau pea ona ia ta’usalaina i tatou i lenei olaga. Na te saili e toso ifo i tatou i lalo. Na te manao ia tatou oo i le malaia e le gata. O ia lea na ta’u maia ia i tatou lo tatou le atoatoa, na ta’u mai ia i tatou e le lava lo tatou lelei, na ta’u mai e le mafai ona toe faaleleia mai se mea sese. O ia o se tagata sili ona saua, o le na te faatiga ia i tatou i taimi o tatou mafatiaga.

Afai o Lusifelo lea o loo aoaoina se tamaitiiti e savali ae pa’ū le tamaitiiti, na te faataio atu i le tamaitiiti, faasala o ia, ma fai atu i ai e aua le toe taumafai. O auala a Lusifelo e aumaia ai le lotovaivai ma le faanoanoa—i se taimi mulimuli ma taimi uma. O lenei tamā o pepelo o le tagata e sili ona faasalalaua mea sese¹⁴ ma e galue i togafiti e faasese ma faalavelave ia i tatou, “ona ua saili o ia ia pagatia tagata uma e pei o ia lava.”¹⁵

Afai o Keriso lea o loo aoaoina se tamaitiiti e savali ae pa’ū le tamaitiiti, Na te fesoasoani e faatu le tamaitiiti i luga ma faamalosiau o ia i laasaga e sosoo ai.¹⁶ O Keriso o le fesoasoani ma le faamafanafana. O Ona ala e aumaia ai le olioli ma le faamoemoe—i se taimi mulimuli ma taimi uma.

O le fuafuaga a le Atua e aofia ai faatonuga mo i tatou, o loo faatatau i ai tusitusiga paia o ni poloaiga. O nei poloaiga e le o ni tulafono e faafiafia ai pe o se faaputuga o faasalaga o tulafono ua faamalosia mai ia ua faamoemoe e na o le aoaoina ai o i tatou ia usiusitai. Latou te fesootai ma lo tatou atiinaeina o uiga paia faaleatua, toe foi atu i le Tama Faalelagi, ma le mauaina o le olioli tumau. E le tauaso lo tatou usiusitai i Ana poloaiga; tatou te filifili ma le iloa le Atua ma Lana ala i le aiga. O le mamanu mo i tatou e tutusa lelei ma Atamu ma Eva, lea “na tuu mai ai e le Atua poloaiga ia te i latou, ina ua uma ona ia faaali mai ia te i latou le fuafuaga o le togiolaina.”¹⁷ E ui e finagalo le Atua ia tatou i ai i luga o le ala o feagaiga, ae Na te tuu mai ia i tatou le mamalu o le filifiliga.

O le mea moni, e finagalo le Atua, faamoemoe, ma faatonu mai ina ia filifili Ana fanau taitasi mo i latou lava. O le a Ia le fosia i tatou. E ala atu i le meaalofa o le faitalia, ua faatagaina ai e le Atua Lana fanau e “fai mo i latou lava ae le faamalosia.”¹⁸ O le faitalia e faatagaina i tatou e filifili ia i ai i luga o le ala, pe leai. E faatagaina i tatou e o ese, pe leai. E pei lava ona le mafai ona faamalosia i tatou ia usiusitai, e le mafai foi ona faamalosia i tatou ia lē usiusitai. E leai se tasi e mafai, e aunoa ma lo tatou maliega, ona aveesea i tatou mai le ala. (E le tatau ona fenumia’ia le mea lenei ma i latou ua solia lo latou faitalia. E le o ō ese i latou i le ala; o i latou ua aafia ai. Latou te mauaina le malamalamaaga, alofa ma le agaalofa o le Atua.)

Pe a tatou o ese mai le ala, ua faanoanoa le Atua aua Na te silafia o lenei mea e mulimuli ane, ae masani ai, ona oo atu i le faaitiitia o le fiafia ma aveesea ai faamanuiaga. I tusitusiga paia, o le aluese mai le ala ua ta’ua o le agasala, o le faaitiitia o le fiafia ma le aveesea o faamanuiaga ua ta’ua o le faasalaga. I lenei tulaga, e le o faasalaina i tatou e le Atua; o le faasalaga o se taunuuga lea o a tatou filifiliga, ae le o Ia.

Pe a tatou iloa ua tatou o ese mai le ala, e mafai ona tatou tumau ai iina, a le o lena, ona o le Togiola a Iesu Keriso, e mafai ai ona tatou filifili ina ia toe liliu o tatou laa ma toe foi mai i luga [o le ala]. I tusitusiga paia, o le faagasologa o le filifili ia suia ma toe foi mai i le ala e faasino atu lea i le salamo. O le le mafai ona salamo o lona uiga ua tatou filifili e faalēagavaaina i tatou lava mai faamanuiaga ua finagalo le Atua e tuuina mai. Afai tatou te “le loto e olioli i mea semanu [tatou] te maua,” o le a tatou “toe foi atu … i lo [tatou] lava nofoaga, e olioli i mea ua [tatou] loto e talia”¹⁹—o la tatou lava filifiliga, e le o le [finagalo] o le Atua.

E tusa lava pe o le a le umi tatou te lei i ai i le ala pe o le a foi le mamao na tatou oo i ai, o le taimi lava tatou te filifili ai ia suia, e fesoasoani mai le Atua ia tatou toe foi mai.²⁰ Mai le silafaga a le Atua, o le salamo faamaoni ma le fetaomi atu i luma ma le tumau ia Keriso, pe a tatou toe foi mai i luga o le ala, o le a pei lava na tatou le’i o ese.²¹ Na totogi e le Faaola a tatou agasala ma faasaoloto i tatou mai le faaali faaitiitia i le fiafia ma faamanuiaga. O loo faasino atu lenei mea i tusitusiga paia o le faamagaloga. I le mavae o le papatisoga, e see ese uma lava tagata mai le ala—o nisi o i tatou e fepuna ese. O le mea lea, o le faatinoina o le faatuatua ia Iesu Keriso, salamo, mauaina o le fesoasoani mai ia te Ia, ma faamagaloina, e le o ni mea e tutupu i le taimi e tasi ae o ni faagasologa o le olaga, faagasologa lea e fai soo ma faifaipea. O le ala lea tatou te “tumau ai e oo i le iuga.”²²

E tatau ona tatou filifili po o ai tatou te auauna i ai.²³ O le taunuuga sili o lo tatou fiafia e faavavau e faalagolago lea i le filifiliina o le Atua soifua ma auai faatasi ma Ia i Lana galuega. A tatou taumafai e “faia le isi vaega” e i tatou lava, tatou te faataitaia le faaaogaina ma le sa’o o lo tatou faitalia. E pei ona saunoa Peresitene Aoao e toalua ua mavae atu o le Aualofa, e le tatau ona avea i tatou ma ni “pepe e manaomia le gauai atu i ai ma tau faasa’o i taimi uma.”²⁴ Leai, e finagalo le Atua ia avea i tatou ma tagata matutua ma pulea i tatou lava.

O le filifili e mulimuli i le fuafuaga a le Tama ua na o le pau lea o le ala e mafai ai ona tatou mautofi i Lona malo; e na o le pau lea o le mea e mafai ona Ia faatuatuaina i tatou ia aua lava nei fesili atu mo mea e feteenai ma Lona finagalo.²⁵ Ae e tatau ona tatou manatua “e leai se tasi e sili ona aoao gatā nai lo se tamaitiiti ua iloa mea uma.” O lea la e tatau ai ona tatou naunau ia aoaoina i tatou i ala o le Alii e le Alii ma Ana auauna. E mafai ona tatou faatuatuaina o i tatou o ni fanau faapelepele a ni Matua Faalelagi²⁶ ma e tatau ai le “popole i ai” ma ia mautinoa “o le faia e i tatou lava ia” e le faapea ai ua “tuua na o i tatou.”

E pei on saunoa mai le perofeta o le Tusi a Mamona o Iakopo, ou te fai atu faatasi ma ia:

“O le mea lea, ia fiafia o outou loto, ma ia manatua ua outou saoloto e fai mo outou lava—e filifili le ala o le oti tumau-faavavau, po o le ala o le ola e faavavau.

“O le mea lea, oʼu uso [ma tuafafine] pele e, ia outou faaleleia outou lava ma le finagalo o le Atua, ae lē ma le loto o le tiapolo … ; ma ia manatua, pe a uma ona outou faalelei ma le Atua, ua nao i le alofa tunoa ma ala i le alofa tunoa o le Atua, e faaolaina ai outou.”²⁷

O lea, filifili le faatuatua ia Keriso; filifili le salamo; filifili ia papatiso ma talia le Agaga Paia; filifili ia saunia ma le loto i ai ina ia taumamafa ma le agavaa i le faamanatuga; filifili ia osia feagaiga i le malumalu; ma filifili e auauna atu i le Atua soifua ma Lana fanau. O a tatou filifiliga e fuafua ai le tagata tatou te i ai ma tagata o le a tatou avea ai.

Ou te faamae’a atu i le vaega o totoe o le faamanuiaga a Iakopo: “O le mea lea, talosia ia faatutu mai outou e le Atua mai le … oti e faavavau e ala i le mana o le togiola, ina ia mafai ona talia o outou i le malo e faavavau o le Atua.”²⁸ I le suafa, o Iesu Keriso, amene.