Avea ma Faataitaiga Lelei o le Au Paia o Aso e Gata Ai
Saunia e Peresitene Russell M. Nelson
Ou te tuua lo’u alofa ma la’u faamanuiaga i o outou luga, ina ia outou taumamafa i le afioga a le Alii ma faaaoga Ana aoaoga i o outou olaga patino.
O se konafesi musuia ma faasolopito lenei. Tatou te vaai atu i le lumanai ma le naunautai. Ua faaosofia i tatou ia faia le mea sili atu ma ia lelei atu. O savali ofoofogia ua tuuina atu mai lenei pulelaa e le Au Pulega Aoao ma Taitai Aoao atoa ai ma musika ua matua musuia! Ou te matua uunaia outou ina ia suesue i nei savali, e amata atu i lenei vaiaso.1 O loo faailoa mai ai le mafaufau ma le finagalo o le Alii mo Lona nuu, i le asō.
O le mataupu aoaoina fou ua tuufaatasia e faatotonugalemu-i-le-aiga, ma lagolagoina-e-le-Ekalesia ua i ai le gafatia e tatala mai ai le mana o aiga, pe a mulimulitaia e aiga taitasi ma le toto’a ma le faaeteete ina ia liua o latou fale i se malutaga o le faatuatua. Ou te folafola atu pe a e galue filiga e toe faafou lou fale e avea ma se nofoaga autu e aoaoina ai le talalelei, i le gasologa o taimi o le a avea au aso Sapati ma aso fiafia. O le a fiafia lau fanau e aoao ma ola i aoaoga a le Faaola, ma o le a faaitiitia le faatosinga a le fili i lou olaga ma i lou aiga. O suiga i lou aiga o le a iloga ma tumau.
I lenei konafesi ua tatou faamalosia ai lo tatou naunautaiga e faatino le taumafaiga taua e faamamalu le Alii o Iesu Keriso i taimi uma tatou te faasino atu ai i Lana Ekalesia. Ou te folafola atu o lo tatou gauai atu ma le maelega e faaaoga le igoa sa’o o le Ekalesia a le Faaola ma ona tagata, o le a taitai atu ai i se faatuatua faateleina ma le mauaina o le mana sili atu faaleagaga mo tagata o Lana Ekalesia.
Ia se’i o tatou liliu atu nei i le autu o malumalu. Ua tatou iloa o o tatou taimi i totonu o malumalu e taua tele i lo tatou faaolataga ma le faaeaga faapea ai ma o tatou aiga.
A mavae ona tatou maua o o tatou lava sauniga o le malumalu ma osia ni feagaiga paia ma le Atua, e manaomia e i tatou taitoatasi le faamalosiauga ma le aoaoina faifai pea faaleagaga lea e na o le maota o le Alii e mafai ai. Ma e manaomia e o tatou tuaa i tatou e auauna atu e fai ma sui mo i latou.
Mafaufau i le alofa mutimutivale tele ma le sa’olele o le Atua o lē, a o le’i faavaeina le lalolagi, na saunia se ala e avatu ai faamanuiaga o le malumalu ia i latou o ē na maliliu e aunoa ma se malamalama o le talalelei. O nei sauniga paia o le malumalu na i ai anamua. Ia te a’u o lena tulaga faaanamua e faagaeetiaina ma o se isi lea molimau o lo latou moni a’ia’i.2
O’u uso e ma tuafafine pele, o sauaga a le fili ua matuā faateteleina le saoasaoa, i le malolosi ma le eseese na’ua.3 O le manaomia ona tatou i ai soo i le malumalu e le aunoa ua matuā sili ona manaomia i le taimi nei. Ou te aioi atu ia te outou ia tagai ma le agaga tatalo pe faapefea ona faaalu lou taimi. Ia saofagā lou taimi i lou lumanai ma i lou aiga. Afai e te latalata i se malumalu, ou te uunaia oe ia saili se auala e fai ai sou taimi faatulagaina ma le Alii—ia i ai i totonu o Lona maota paia—ona tausia lea o lena taimi faatulagaina ma le sa’olele atoatoa ma le olioli. Ou te folafola atu ia te outou o le a aumai e le Alii ni vavega ua Ia silafia tou te manaomiaina a o outou faia ni osigataulaga e auauna atu ma tapuai atu i totonu o Ona malumalu.
O le taimi nei e 159 a tatou malumalu ua faapaiaina. O le tausiga lelei ma le faaleleia tumau o na malumalu e matua taua ia i tatou. Faatasi ai ma le aluga o taimi ma aso, ua matua manaomia ai e malumalu le faaleleiga ma le faafouga. I lena tulaga, ua faia ai nei ni fuafuaga e toe faafou le Malumalu o Sate Leki ma isi malumalu o augatupulaga o paionia. O le a faasoa atu auiliiliga o nei galuega faatino a o atiaeina.
O le asō matou te fiafia lava e faasilasila atu le fausiaina o isi malumalu e 12. O na malumalu o le a fausiaina i nofoaga nei: Mendoza, Atenitina; Salvador, Pasila; Aai o Iupa, Kalefonia; Phnom Penh, Cambodia; Praia, Cape Verde; Yigo, Guam; Puebla, Mekisiko; Aukilani, Niu Sila; Lagos, Nigeria; Davao, Filipaina; San Juan, Puerto Rico; ma le Itumalo o Uosigitone, Iuta.
O le fauina ma le tausiga o nei malumalu atonu e lē suia ai lou olaga, ae o le faaaluina o lou taimi i totonu o le malumalu o le a mautinoa lava [le suia ai o lou olaga]. Mo i latou ua matuā leva lava e lei toe alu i se malumalu, ou te uunaia oe ia saunia nei ma toe foi atu i le vave e mafai ai. Ona ou valaaulia lea o oe e te tapuai atu i totonu o le malumalu ma tatalo ia matuā lagona le alofa lēmafuatia o le Faaola mo oe, ina ia tofu maua e outou taitoatasi sau oe lava ia molimau o loo faaauau pea ona Ia taitai lenei galuega paia e faavavau.4
Ou uso e ma tuafafine, ou te faafetai atu mo lo outou faatuatua ma taumafaiga tumau. Ou te tuua lo’u alofa ma la’u faamanuiaga i o outou luga, ina ia outou taumamafa i le afioga a le Alii ma faaaoga Ana aoaoga i o outou olaga patino. Ou te faamautinoa atu ia te outou o loo faaauau pea faaaliga i totonu o le Ekalesia ma o le a faaauau pea seia oo ina “faataunuu faamoemoega o le Atua, ma fetalai ai le Ieova Silisili ua maea le galuega.”5
Ou te faamanuia ia te outou i se faatuatua faateleina ia te Ia ma Lana galuega paia, faatasi ai ma le faatuatua ma le onosai e onosaia ai ou lava luitau patino i le olaga. Ou te faamanuia ia te outou ina ia avea ma ni faataitaiga lelei o le Au Paia o Aso e Gata Ai. Ou te faamanuia ai ia te outou ma ou te molimau atu ai o loo soifua le Atua! O Iesu o le Keriso! O Lana Ekalesia lenei. O i tatou o Lona nuu, i le suafa o Iesu Keriso, amene.