E Te Fia Malolo Ea?
Saunia e Elder Matthew L. Carpenter
O Le Fitugafulu
Ona o le Togiola a Iesu Keriso, afai tatou te filifili e salamo ma liliu atoa atu o tatou loto i le Faaola, o le a Ia faamaloloina i tatou faaleagaga.
I ni nai masina i totonu o lana misiona, sa faamaea ai e lo ma atalii laitiiti ma lana soa faifeautalai a laua suesuega ina ua lagona e lo ma atalii se tama’i tiga i lona ulu. Na ia lagona se mea e ‘ese tele; i le taimi muamua na ia lē toe lagonaina se mea i lona lima agavale, sosoo ai ma le gase o lona laulaufaiva. Na amata ona faanounou ifo le itu agavale o ona foliga. Na faigata ia te ia ona tautala. Na ia iloaina sa i ai se mea sa faaletonu. O le mea na te lei iloaina sa ia i ai i le ogatotonu o se pepē o le tino matautia i vaega e tolu o lona faiai. Sa amata oo mai le fefe ao amata ona le mafai ona gaoioi [se vaega o lona tino]. O le vave e maua ai e se tagata e pepē le tino le tausiga e mafai ona i ai se aafiaga maoae i le tele o lona faamalologa. Sa galue ma le naunautai lana soa faifeautalai faamaoni. I le mavae ai o le valaau atu o le 911, sa ia tuuina atu ia te ia se faamanuiaga. O se vavega lava, sa na o le lima minute le mamao o le taavale falema’i.
I le mavae ai ona faananati atu lo ma atalii i le falemai, sa vave iloiloina e tagata faigaluega o le falemai le tulaga ma iloa ai e ao ona latou tuuina atu se vailaau i lo ma atalii lea e faamoemoe e mafai ona toe suia ai aafiaga o le pepē o le tino i le aluga o taimi.1 Ae peitai, afai e le o maua le ma atalii i se pepē o le tino, e mafai ona i ai taunuuga matautia o le vailaau, e pei o le piliki i le faiai. Sa tatau ai la ona filifili lo ma atalii. Sa ia filifili e taliaina le vailaau. Ao manaomia ai isi taotoga ma le tele o masina e faamaloloina atoatoa ai, sa iu lava ina toe foi atu le ma atalii ma faamaeaina lana misiona i le mavae ai o suiga tele o aafiaga o le pepē o le tino.
O lo tatou Tama Faalelagi e mamana ma e silafia mea uma. E silafia e Ia o tatou tauiviga faaletino. E silafia e Ia o tatou tiga faaletino ona o le ma’i, faama’i, matua, faalavelave faafuase’i, po o le lē atoatoa i le fanau mai. E silafia e Ia tauiviga faalelagona e fesootai ma le atuatuvale, tuuatoatasi, faanoanoa, po o gasegase faalemafaufau. E silafia e Ia tagata taitoatasi o ē ua mafatia i faamasinoga lē tonu po o e na sauaina. E silafia e Ia o tatou vaivaiga ma amioga ma faaosoosoga o tatou tauivi ai.
I le olaga nei e suesueina i tatou e vaai ai pe tatou te filifili le lelei mai le leaga. Mo i latou o e tausi Ana poloaiga, o le a latou mau faatasi ma Ia “i se tulaga o le fiafia e lē gata.”2 Ina ia fesoasoani i la tatou agai i luma e avea e faapei o Ia, ua tuuina mai e le Tama Faalelagi mana uma ma le malamalama i Lona Alo, o Iesu Keriso, le Foma’i Sili. E leai se gasegase faaletino, faalelagona, pe faaleagaga e lē mafai e Keriso ona faamalolo.3
I le taimi o le galuega faaletino a le Faaola, ua faamatala ai e tusitusiga paia le tele o mea na tutupu faavavega lea na faaaoga ai e Iesu Keriso Lona mana paia e faamalolo ai i latou na mafatia faaletino.
O le Evagelia a Ioane na toe faamatala ai le tala i se tagata na onosaia se gasegase mo le 38 tausaga.
“Ua silasila atu Iesu ia te ia o taoto, ua silafia foi ua loa ona ia te ia o le ma’i, ua fetalai atu ia te ia, E te fia malolo ea?”
Ua tali atu le tagata vaivai, e leai se tasi e fesoasoani ia te ia pe a sili ona ia manaomiaina.
“Ua fetalai atu Iesu ia te ia, Ina tu ia i luga, ma ave lou moega, ma ia e savali.
“Ona malolo loa lea o le tagata; ua ave lona moega, ma ua savali.”4
Faamolemole matau le faatusatusaga o le umi na mafatia ai lenei tagata na o ia—38 tausaga—ma le vave ona oo mai o le faamalologa ina ua faaaofia ai le Faaola. Sa “vave” le faamaloloina.
I se isi tulaga, o se fafine sa ia te ia le puna toto mo le 12 tausaga, “ua uma atu ana mea i fomai, … ua alu ane ia i ona tua, ma pa’i ane i le tuupao o lona ofu: ona utu loa lea o lona puna toto na [muta] ai lona puna toto. …
“Ona fetalai ane lea o Iesu, Na pa’i mai lava se tasi ia te a’u: aua ua ou iloa ua alu atu le mana nai ia te a’u.
“Ua iloa e le fafine ua le lilo o ia, ona alu atu lea o ia … ma faamatala mai ia te ia i luma o le nuu uma … le faamaloloina loa o ia.”5
E ala i Lana galuega, sa aoao atu e Keriso o loo ia te Ia le mana i le tino faaletino. E le mafai ona tatou puleaina pe o afea e tupu ai le taimi o le faamalologa a Keriso i o tatou ma’i faaletino. E tupu le faamalologa e tusa ai ma Lona finagalo ma le atamai. I tusitusiga paia, sa mafatia nisi mo le tele o tausaga; o isi, o ō latou olaga faaletino atoa. O gasegase faaletino, e mafai ona faamamaina ai tatou ma faamalosia ai lo tatou faalagolago atu i le Atua. Ae a tatou faatagaina Keriso ina ia faaaofia ai, e Na te faamalosia pea i tatou faaleagaga ina ia tatou maua le gafatia silisili e onosaia ai o tatou avega.
I le iuga, tatou te iloa o ma’i faaletino uma, gasegase, po o ni lē atoatoa o le a faamaloloina i le Toetu. O se meaalofa lena i tagata uma e ala i le Togiola a Iesu Keriso.6
E mafai e Iesu Keriso ona faamalolo isi [vaega] i lo na o ō tatou tino faaletino. E mafai ona Ia faamalolo foi o tatou agaga. I tusitusiga paia tatou te aoao ai le ala na fesoasoani ai Keriso ia i latou na vaivai o latou agaga ma faamaloloina i latou.7 Ao tatou mafaufau loloto i nei mea na tutupu, e faateleina lo tatou faamoemoe ma le faatuatua i le mana o le Faaola e faamanuia ai o tatou olaga. E mafai e Iesu Keriso ona suia o tatou loto, faamalolo i tatou mai i aafiaga o le faamasinoga le tonu po o le sauaina tatou te ono aafia ai, ma faamalosia lo tatou gafatia e gafataulimaina ai le toesea ma le loto tiga, aumaia ia i tatou le filemu e fesoasoani ia i tatou e onosaia tofotofoga o ō tatou olaga, ma faamaloloina i tatou faalelagona.
E mafai foi e Keriso ona faamalolo i tatou pe a tatou agasala. Tatou te agasala pe a tatou solia ma le iloa se tasi o tulafono a le Atua.8 A tatou agasala, e lē mamā o tatou agaga. E leai se mea e lē mama e mafai ona nofo i le afioaga o le Atua.9 “O le faamamaina mai le agasala [o le] faamaloloina lea faaleagaga.”10
Ua silafia e le Atua le Tama o le a tatou agasala, ae ua Ia saunia le ala mo i tatou ina ia togiolaina. Na aoao mai Elder Lynn G. Robbins: “O le salamo e le o [se] fuafuaga faaleoleo [a le Atua] lea pe a te’i ua tatou toilalo. O le salamo o Lana fuafuaga lea, ma le silafiaina o le a tatou toilalo lava.”11 A tatou agasala, tatou te maua le avanoa e filifili ai le lelei mai le leaga. Tatou te filifili le lelei pe a tatou salamo i le mavae ai ona tatou agasala. E ala atu ia Iesu Keriso ma Lana taulaga togiola, ua mafai ai ona togiolaina i tatou mai a tatou agasala ma toe aumaia i le afioaga o le Atua le Tama pe afai tatou te salamo. O le faamalologa faaleagaga e le tasi se itu—e manaomia ai le mana togiola a le Faaola ma le salamo faamaoni o le vaega a le tagata agasala. Mo i latou o ē filifili ina ia lē salamo, ua latou teenaina le faamalologa e ofa mai e Keriso. Mo i latou, ua pei lava e leai se togiola na faia.12
Ao ou fefautuaai ma isi o loo saili ina ia salamo, sa ou maofa i tagata sa ola i le agasala sa faigata ona [latou] faia ni faaiuga sa’o. E tuua i latou e le Agaga Paia, ma e masani lava ona latou tauivi e faia filifiliga lea e atili ona latalata ai i le Atua. Latou te tauivi mo le tele o masina e oo lava i le tele o tausaga, māasiasi pe fefefe i taunuuga o a latou agasala. E masani lava ona latou lagonaina e le mafai lava ona latou sui pe faamagaloina. E masani ona ou faalogo o latou faasoaina lo latou fefefe pe afai e silafia e tagata e pele ia i latou mea sa latou faia, o le a latou lē toe alolofa ia i latou pe tuua i latou. Pe a latou maua i na mafaufauga, e tonu ia i latou ina ia fifilemu ma tolopo lo latou salamo. Latou te maua le lagona sese e sili atu ona lelei le lē salamo i le taimi nei ia latou lē toe faatiga ai i latou e alolofa i ai. Latou te mafaufau e sili atu ona pagatia pe a mavae lenei olaga i lo le faia o le faagasologa o le salamo i le taimi nei. Uso e ma tuafafine, e le o se manatu lelei lava le tolopoina o lou salamo. E masani ona faaaogaina e le fili le fefe e taofia ai i tatou mai le vave faatino i luga o lo tatou faatuatua ia Iesu Keriso.
Pe a fetaiai i latou o ē pele ma le mea moni e uiga i se amioga agasala, e ui latou te lagonaina le ootia o le tiga, e masani lava ona latou mananao e fesoasoani atu i le tagata agasala ua salamo ina ia sui ma faaleleia ma le Atua. E moni lava, e faatelevaveina le faamalologa faaleagaga pe a ta’uta’u atu e le tagata agasala ma o loo siomia e i latou e alolofa ia i latou ma fesoasoani ia i latou e lafoai a latou agasala. Faamolemole ia manatua o Iesu Keriso e silisili ese i le ala Na te faamalolo ai tagata le sala ua aafia fua i le agasala o ē liliu atu ia te Ia.13
Na saunoa Elder Boyd K. Packer: “E faatamaia o tatou agaga pe a tatou faia ni mea sese ma faia ni agasala. Ae e le faapei o le tulaga o o tatou tino faaletino, a oo ina maea le faagasologa o le salamo, e le toe i ai ni ma’ila e totoe ona o le Togiola a Iesu Keriso. O le folafolaga o le: ‘Faauta, o le ua salamo i ana agasala e faamagaloina o ia, ma o au le Alii, ou te le toe manatua lava’ [Mataupu Faavae ma Feagaiga 58:42].”14
A tatou salamo “ma le faamoemoe atoa o le loto”15 o le taimi “nei lava o le a faataunuu ai le fuafuaga tele o le togiolaina” i o tatou olaga.16 O le a faamalolo i tatou e le Faaola.
O le soa faifeautalai ma tagata tomai faafomai o e na fesoasoani i lo ma atalii na mafatia i le pepē o le tino i le misiona na vave ona galulue. Sa filifili e lo ma atalii ina ia maua le vailaau e taofia ai le pepē o le tino. O aafiaga pipili o lona tino pepē lea na semanu e aafia ai lona olaga faaletino na totoe na suia. E faapena foi, o le vave ona tatou salamo ma aumaia le Togiola a Iesu Keriso i o tatou olaga, o le vave foi lea ona faamaloloina i tatou mai i aafiaga o le agasala.
Na ofa mai e Peresitene Russell M. Nelson lenei valaaulia: “Afai ua e laa ese mai le ala, … ou te fia valaaulia oe … ia faamolemole toe foi mai. Po o a lava ou atugaluga, po o a lava ou luitau, o loo i ai se faamoemoega mo oe i lenei, le Ekalesia a le Alii. O le a faamanuiaina oe ma augatupulaga e lei faananau mai e ala i au galuega i le taimi nei ina ia toe foi mai i le ala o feagaiga.”17
E manaomia e lo tatou faamalologa faaleagaga lo tatou gauai atu o i tatou lava i tulaga ua faatulaga mai e lo tatou Faaola. E le tatau ona tatou faatuai! E tatau ona tatou galulue i le asō! Galue i le taimi nei ina ia le taofia e le pipili faaleagaga lou alualu i luma e faavavau. Ao ou talanoa atu, afai sa e lagona le manaomia o le talosagaina o le faamagaloga a se tasi ua e sese i ai, ou te valaaulia oe e faatino. Ta’u i ai mea sa e faia. Talosaga atu mo lo latou faamagaloga. Afai ua e solia se agasala lea e aafia ai lou agavaa mo le malumalu, ou te valaaulia oe e fefautuaai ma lou epikopo—i le asō. Aua nei faatuai.
O’u uso e ma tuafafine, o le Atua o lo tatou Tama oi le Lagi agaalofa. Ua Ia tuuina atu mana uma ma le malamalama i Lona Alo Pele, o Iesu Keriso. Ona o Ia, o le a i ai se aso o le a faamalolo ai tagata uma mai ma’i faaletino e faavavau. Ona o le Togiola a Iesu Keriso, afai tatou te filifili e salamo ma liliu atoa atu o tatou loto i le Faaola, o le a Ia faamalolo i tatou faaleagaga. E mafai ona amata loa lena faamalologa. O le filifiliga e a tatou lea. E te fia malolo ea?
Ou te molimau atu na totogi e Iesu Keriso le tau ina ia tatou malolo ai. Ae e tatau ona tatou filifili ai e talia le vailaau faamalolo ua Ia ofa mai. Talia i le aso lenei. Aua nei faatuai. I le suafa, o Iesu Keriso, amene.