Aoao Mai i Savali o Konafesi Aoao (2018 ma le 2019)

O aoaoga a perofeta soifua, tagatavaai, ma talifaaaliga e mafai ona tuuina mai le taitaiga musuia mo le galuega a le korama a toeaina ma Aualofa. Mo vaiaso o le a suesueina ai savali o konafesi, o le a filifili e au peresitene o korama a toeaina ma le Aualofa se savali o le konafesi e faaaoga, e faalagolago lea i manaoga o tagata o le au paia. I nisi taimi, e mafai foi e le epikopo po o le peresitene o le siteki ona fautua atu se savali. E tatau i taitai ona tuu atu le faamamafa i savali mai i sui o le Au Peresitene Sili ma le Korama a Aposetolo e Toasefululua. Ae peitai, e mafai e sui o le au peresitene ona filifili soo se savali mai le konafesi sili ona lata mai, e faatatau i manaoga o Au Paia i le lotoifale ma le uunaiga mai le Agaga.

E tatau i taitai ma faiaoga ona saili ni auala e uunaia ai tagata o le au paia e muai faitau savali ia ua filifilia. E tatau ona latou uunaia tagata ina ia o mai saunia i sauniga e faasoa atu upumoni o le talalelei na latou aoaoina faapea ma o latou manatu e uiga i le auala e galulue ai i luga o na upumoni. O gaoioiga mo le aoaoina ua fautuaina atu i lalo, lea e faatatau i mataupu faavae ua aoaoina i le Aoao Atu i le Ala a le Faaola e mafai ona fesoasoani i tagata o le au paia ia aoao mai i savali o le konafesi aoao.

Quentin L. Cook, “Liuaina Loloto ma Tumau i le Tama Faalelagi ma le Alii o Iesu Keriso”

Atonu e fia faalogologo tagata o le ekalesia mai le tasi ma le isi po o a ni o latou uluai lagona ina ua latou faalogo e uiga i suiga na faamatalaina i le savali a Elder Cook. Afai e fesili atu se uo o se isi faatuatuaga ia i latou pe aisea ua faia ai e le Ekalesia nei fetuunaiga, o le a se latou tala e fai atu? Uunaia i latou e vaavaai mo ni tali talafeagai i le savali a Elder Cook. O a mea e mafai ona tatou faia o ni tagata taitoatasi ma aiga, ma o se korama po o le Aualofa, ina ia mautinoa ai ua ausia e suiga ia faamoemoega a le Alii? I le avea ai ma se vaega o lenei talanoaga, e mafai foi ona e faasoa maia ni malamalamaaga mai le malelega amata a Peresitene Nelson lea e uunaia ai tagata o le ekalesia e “taliaina ma le naunautai” ia suiga nei.

Ronald A. Rasband, “Aua Le Atuatuvale”

O le savali a Elder Rasband o loo faamamafa mai ai ni nai mau lea e mafai ona fesoasoani ia i tatou e aveese soo se fefe atonu o ia i tatou e uiga i taimi faigata o tatou ola ai. Fai atu i tagata e suesue i mau nei mo ni fautuaga e mafai ona latou faasoa atua i se tasi o loo fefe e uiga i le lumanai. O le a seisi mea e mafai ona latou faasoa atua mai le savali a Elder Rasband? E mafai faapefea e le fefe ona “[faatapulaaina] le vaai a fanau a le Atua”? Valaaulia tagata e faasoa mai le auala ua latou aoao ai e faatoilalo o latou fefefe ma ola ai i le faatuatua.

David A. Bednar, “Faapotopoto Faatasi Mea Uma ia Tasi ia Keriso”

Mafaufau e aumai se maea ma se lisi o mea e fai e faaali atu. Valaaulia tagata e talanoaina le eseesega i le va o upumoni o le talalelei ma polokalama o le Ekalesia o se maea ma vaavaai atu ia i latou o se lisi o mea e fai o autu taitoatasi ma galuega. Uunaia tagata e vaavaai mo ni malamalamaaga i faataitaiga o le savali a Elder Bednar. O le a le uiga ia “faaopoopoina [mea uma] ia Keriso”? (tagai i le Efeso 1:10). O a mea e mafai ona tatou faia ina ia maua ai le folafolaga i le faaiuga o le savali a Elder Bednar?

Dallin H. Oaks, “Upumoni ma le Fuafuaga”

E faapefea e le malamalama i “upumoni o le talalelei toefuataiina” ona fesoasoani ia i tatou pe a tatou fetaiai ma mea faafeagai i a tatou talitonuga ma faatinoga? Ina ia tali lenei fesili, e mafai e tagata ona toe iloilo faataitaiga o upumoni faavae i le vaega II o le savali a Peresitene Oaks. E mafai foi ona latou toe iloiloina faataitaiga o le auala e faaaogaina ai nei upumoni (tagai i le vaega III). Atonu e fesoasoani mo tagata le faatino o se tala pe faapefea ona latou faaaogaina nisi o nei upumoni faavae e tali atu ai i faitioga e uiga i se aoaoga po o se faatinoga a le Ekalesia.

D. Todd Christofferson, “Tumau ma Mausali i le Faatuatua o Keriso”

E mafai ona e amataina se talanoaga o lenei savali e ala i le tusia o se laina i luga o le laupapa i le Uunaia e Agafesootai i le tasi itu ma le Tuuto FaaKeriso i le isi itu. Valaaulia tagata e faitau le parakalafa lea e amata i le “O le toatele o i tatou e iloa i lenei taimi o loo i ai i se mea i le va o le auai i le talalelei …” ma mafaufau po o fea o latou i ai i luga o lenei va. O le a se mea ua tatou aoao mai i faataitaiga i le savali a Elder Christofferson lea e uunaia i tatou ina ia tumau ma mausali i puapuaga? (tagai foi i le Alema 36:27–28). Uunaia tagata e faasoa atu faataitaiga o tagata latou te iloaina o e na faaalia le tuuto faaKeriso i le talalelei, e tusa pe na feagai ma puapuaga.

Ulisses Soares, “Tasi ia Keriso”

E tusa ai ma Elder Soares, e faapefea ona avea le Vaitafe o Amasone ma sui o tagata o le Ekalesia toefuataiina a Iesu Keriso? O le a le mea o loo aoao mai e lenei faatusatusaga ia i tatou e uiga i faatosinaga o mafai ona maua e tagata fou e uiga i le Ekalesia? E mafai faapefea e i tatou o se korama po o le Aualofa ona mulimuli i le fautuaga a Elder Soares e faamalosiau, lagolago, ma alolofa i tagata fou liliu mai? (tagai i le Moronae 6:4–5). Atonu e mafai e nai tagata ona faasoa mai nisi o luitau latou te fetaiai o ni tagata fou o le Ekalesia ma pe faapefea e isi tagata ona fesoasoani ia i latou. E mafai foi ona e talanoaina auala na faamalosia ai e tagata fou o la outou uarota po o le paranesi.

Gerrit W. Gong, “O La Tatou Afi o le Tolauapiga o le Faatuatua”

Mafaufau e faaali atu se ata o le afi o le tolauapiga ma valaaulia se tasi e faasoa mai se aafiaga sa ia faafetai ai i le mauaina o se afi o le tolauapiga. Fai atu i tagata e talanoa i le uiga [o le saunoaga] a Elder Gong ina ua ia saunoa mai e uiga i se “afi o le tolauapiga o le faatuatua.” Ona mafai lea ona e vaevaeina tagata i ni vaega ma valaaulia vaega taitasi e toe iloilo ma faasoa mai se tasi o auala e lima na fautuaina mai e Elder Gong e mafai ai e se “afi o le tolauapiga” ona uunaia i tatou. Tuu atu i tagata le taimi e mafaufau loloto ai i le auala latou te mafai ai ona faamalosia lo latou lava faatuatua po o le faatuatua o se tasi latou te silafia.

Dieter F. Uchtdorf, “Talitonu, Alofa, Faia”

E mafai ona e amataina se talanoaga o lenei savali e ala i le tusi i luga o le laupapa o le Leai o se Faamoemoe ma le Fiafia. Valaaulia tagata ina ia saili i le savali mo ni uiga ma talitonuga lea e taitai atu ai i le leai o se faamoemoe ma le fiafia ma lisi i luga o le laupapa. Valaaulia tagata e faasoa mai auala sa latou maua ai le fiafia lea e sau mai le talitonu, alofa, ma le faia, e pei ona aoao mai e Elder Uchtdorf. Uunaia tagata e saili se upusii faamalosiau mai le savali e faaali atu i totonu o le latou aiga pe faasoa atu i se uo.

Joy D. Jones, “Mo Ia”

Mafaufau e faasoa atu le tala o i le amataga o le savali a Sister Jones ma fai atu i tagata e mafaufau e uiga i taimi sa foliga “sa le amanaia pe … sa le talisapaia pe sa le manaomia foi” a laua taumafaiga o le auauna atu ma le auaunaga. A maea ona talanoaina le tala, mafaufau e tusi i luga o le laupapa Aisea e tatau ai ona tatou auauna atu? Valaaulia tagata e tali mai i lenei fesili e ala i le iloiloina o le vaega o totoe o le savali a Sister Jones, ma vaavaai mo ni malamalamaaga (tagai foi Mataupu Faavae ma Feagaiga 59:5). E mafai faapefea e le fautuaga a Sister Jones ona suia le auala tatou te tausia ai mo ma auauna atu i le tasi ma le isi?

Michelle D. Craig, “Lē Faamalieina Faaleagaga”

Ua saunoa mai Sister Craig e uiga i “se va i le tulaga o tatou i ai ma tagata o tatou i ai, ma le tulaga ma tagata tatou te mananao e avea ai.” O le a le mea ua finagalo le Atua ia tatou lagona e uiga i lenei va? O le a le mea ua manao Satani ia tatou lagona e uiga i ai? E mafai e tagata ona saili i se tasi o vaega e tolu o le savali a Sister Craig e maua ai tali i nei fesili. O a mea e mafai ona tatou faia ia mautinoa ai o lo tatou “le faamalieina faaleagaga” e le avea ma “faavaivailoto”?

Cristina B. Franco, “O Le Olioli o Auaunaga Lē Manatu Faapito”

Ina ia aoao atu o le “alofa e faapaiaina e ala i le ositaulaga,” ua faasoa mai e Sister Franco ni tala se lua—e tasi e uiga ia Victoria ma le tasi e uiga i se tina ua oti lana tane. Atonu e te valaaulia ni tagata se toalua e o mai saunia e faasoa mai mea sa la aoaoina e uiga i le alofa ma le ositaulaga mai i nei tala. O a isi aafiaga e mafai ona tatou faasoa atu lea e aoao mai ai le mataupu faavae e tasi? O le faaali atu o se vitio lea e faaalia ai le Faaola o loo auauna atu i isi (e pei o le “Light the World—Follow the Example of Jesus Christ” i le LDS.org) e mafai ona taitai atu ai i se talanoaga e uiga i le mafai faapefea ona tatou mulimuli i Ana faataitaiga o le “auaunaga e vaavaalua ma le alofa ma le ositaulaga.”

Henry B. Eyring, “O Tamaitai ma le Aoaoina o le Talalelei”

O fuaitau ma upusii o mau mai le “O Le Aiga: O Se Folafolaga i le Lalolagi” lea na faaaoga e Peresitene Eyring i lana savali e aumaia ai le malamalamaaga e uiga i le taua o faatosinaga a tamaitai i le aiga. E mafai e tagata ona galulue faatasi e saili ai fuaitau nei ma upusii ma talanoa i mea ua latou aoaoina. O a ni valaaulia na tuuina mai e Peresitene Eyring? O a ni folafolaga na ia faia? Mafaufau pe faapefea e le lagiina po o le faitauina o se viiga e uiga i le aiga, e pei o le “O Se Lagi se Aiga” (Viiga, nu. 179), ona mafai ona faaleleia le talanoaga.

Dallin H. Oaks, “Matua ma Fanau”

Ao e sauni e aoao atu, mafaufau pe o le fea o vaega o le savali a Peresitene Oaks e sili ona talafeagai i tagata o i lau korama po o le Aualofa. O fesili talafeagai nei e mafai ona e faia e uunaia ai le talanoaga e uiga i lana savali: E faapefea e sitaili faaona po nei o loo ta’ua i le savali a Peresitene Oaks i le vaega I ona aoga e faasaga i le fuafuaga a le Tama Faalelagi? O a faataitaiga o tamaitai faatuatua e mafai ona tatou faasoa i ai lea e faataitaia faamatalaga e uiga i tamaitai i le vaega II? E mafai faapefea ona tatou uunaia tamaitai talavou tatou te iloaina e mulimuli i le fautuaga a Peresitene Oaks e faapitoa mo i latou i le vaega III?

Russell M. Nelson, “Auai o Tuafafine i le Faapotopotoina o Isaraelu”

Afai e te faiaoga i le Aualofa, mafaufau e vaevae tuafafine i ni vaega se fa ma talosagaina vaega taitasi e faitau se tasi o valaaulia e fa i le savali a Peresitene Nelson. E mafai e vaega ona talanoaina mea e faagaeetia ai i latou e uiga i le valaaulia, o aafiaga na latou maua i le faatinoina, ma manatu e uiga i le auala e faatino ai i le lumanai. Ona mafai lea e vaega taitasi ona faasoa ma tagata uma mea sa latou talanoaina. Afai e te faiaoga i e umia le perisitua, atonu e te fai atu ia i latou e saili faamatalaga i le savali a Peresitene Nelson lea e faailoa mai ai pe faapefea lagona o le Tama Faalelagi e uiga i Ona afafine. O le a le mea e mafai ona tatou faia ina ia lagolago ma uunaia ai le auai o tuafafine i le faapotopotoina o Isaraelu?

M. Russell Ballard, “O Le Faaaliga o le Togiolaina o Ē ua Maliliu”

E mafai ona e valaaulia tagata e talia le valaaulia a Peresitene Ballard ma faitau le Mataupu Faavae ma Feagaiga 138 ao lei faia la outou talanoaga. Fai atu i tagata e faasoa mai a latou aafiaga ma malamalamaaga mai le vaega lenei i le taimi o le sauniga. O fesili e pei o fesili nei e mafai ona fesoasoani i tagata ina ia malamalama i le taua o lenei faaaliga: E faapefea ona aumaia e lenei faaaliga le lagolelei ia i tatou? ma le O a upumoni o loo i ai i lenei faaaliga lea e mafai ona aafia ai ‘le auala o loo tatou ola ai i o tatou olaga i aso taitasi?

Bonnie H. Cordon, “Avea ma se Leoleo Mamoe”

Ina ia fesoasoani i tagata e mafaufau i auala e mafai ona latou faaleleia ai a latou taumafaiga faaleauaunaga, e mafai ona e vaevaeina i latou i ni vaega se tolu ma fai i vaega taitasi e faitau se tasi o vaega ua faaulutalaina i le savali a Sister Cordon. Valaaulia i latou e faasoa mai mataupu faavae o le auaunaga na latou aoaoina. E mafai faapefea e le tauivi e mulimuli i nei mataupu faavae ona fesoasoani ia i tatou e “avea ma leoleo mamoe lea e manaomia e le Alii ona tatou avea ai”? Valaaulia tagata e faasoa mai aafiaga i le taimi na fesoasoani ai se auaunaga a se isi tagata ia i latou e lagona ai le iloaina ma alofagia e le Faaola.

Jeffrey R. Holland, “O Le Galuega o le Faaleleiga”

E mafai ona e amatalia se talanoaga e uiga i le savali a Elder Holland i le valaaulia o tagata e mafaufau i se sootaga i o latou olaga lea e manaomia le faamalologa po o le faaleleiga. Ona mafai lea ona latou saili le savali a Elder Holland, ma vaavaai mo le auala na mafai ai e Brad ma Pam Bowen ona fesoasoani i lo laua tama ina ia faamalolo. O a ni faamanuiaga na maua mai i lenei taumafaiga? O a malamalamaaga e maua e tagata lea e mafai ona fesoasoani ia i latou ina ia faamalolo a latou lava sootaga?

Neil L. Andersen, “Manu’a”

Ina ia faailoa atu le savali a Elder Andersen, e mafai ona outou faitau faatasi le Luka 10:30–35 pe matamata le vitio “Parable of the Good Samaritan” (LDS.org). E faapefea ona pei i tatou o le alii sa maua e tagata fao mea? E tusa ai ma Elder Andersen, o le a le uiga o Iesu Keriso o “lo tatou Samaria Agalelei”? E mafai faapefea ona tatou taliaina Lana faamalologa? Atonu e mafai ona e valaaulia tagata e faasoa mai auala lea na faamalolo ai e le Faaola o latou manu’a po o manu’a o e pele ia i latou. E mafai foi ona latou saili upu a Elder Andersen e maua ai se savali faamalosiau e mafai ona latou faasoa i se tasi o loo manu’a.

Russell M. Nelson, “O Le Igoa Sa’o o le Ekalesia”

Ua poloai mai Iesu Keriso ina ia faaigoa le Ekalesia i Lona suafa. E mafai ona e fesoasoani i tagata e faateleina lo latou manao ina ia mulimuli i lenei faatonuga e ala i le valaaulia o i latou e saili le savali a Peresitene Nelson, ma vaavaai mo mafuaaga o le aisea e “le fetuunaia ai le igoa o le Ekalesia.” Ona, valaaulia lea o i latou e saili i le faaiuga o le savali a Peresitene Nelson mo folafolaga na ia saunoa mai o le a oo mai ao tatou galulue e “toefuatai ai le igoa sa’o o le Ekalesia a le Alii.” O le a se mea e mafai ona tatou faia e fesoasoani ai i lenei taumafaiga?

Henry B. Eyring, “Taumafai”

Ua tuuina mai e Peresitene Eyring “fesili taua e lua”: “O le a le mea e tatau ona ou faia e ave ai i o’u luga le suafa [o le Faaola]?” ma le “E faapefea ona ou iloa pe o ou alualu i luma?” Atonu e mafai ona e tusia fesili nei i luga o le laupapa ma valaaulia tagata e faasoa mai malamalamaaga latou te maua e uiga i fesili nei mai le savali a Peresitene Eyring ma le faataitaiga a Sister Eyring. Ua faasino foi Peresitene Eyring i le pese “O Loo Ou Taumafai e Avea e Pei o Iesu” (Tusipese a Tamaiti, 40-41). O le a se mea o faaopoopo e upu o lenei pese i le talanoaga?

Dale G. Renlund, “Ina Filifili ia o Outou i le Aso Nei”

E mafai e tagata ona mafaufau i se tasi latou te mananao e faamalosiau e mulimuli i le fuafuaga a le Tama Faalelagi, e pei o se tagata o le aiga po o se tasi latou te auauna atu i ai. Ona latou faitau lea o le savali a Elder Renlund e iloa ai pe faapeī lagona o le Tama Faalelagi ma Iesu Keriso e uiga ia i tatou. E faapefea ona La fesoasoani mai ia i tatou ia filifili le usiusitai? O a mea o fautua mai e a Laua faataitaiga i le ala e mafai ai tatou faaleleia a tatou taumafaiga i totonu o tatou aiga ma i la tatou auaunaga?

Gary E. Stevenson, “Leoleoina o Agaga”

Atonu na fesili i latou e te faiaoga ai i se fesili e pei o le fesili lenei mai le savali a Elder Stevenson: “E faapefea ona tatou iloa o loo tatou auauna atu i le ala a le Alii?” E mafai ona latou manuia mai le talanoaina o tali talafeagai i lenei fesili ua latou mauaina i lenei savali. I le isi itu, e mafai ona e aumaia se ata o le Faaola i le avea ai o se leoleo mamoe (tagai Tusi Ata o le Talalelei [2009], nu. 64) ma valaaulia tagata e faasoa mai se upumoni mai le savali a Elder Stevenson lea e faatusa i ai le ata. E mafai e tagata ona faasoa mai mea na faagaeetia ai i latou e faia o se taunuuga o le talanoaga.