?Yu Yu Lavem Mi?

I Kam long Elda Glen Burgess

Taem olgeta disaepol oli bin travel wetem Sevya i go long ol kos blong solwota blong Sisaria Filipae, Jisas i bin askem olgeta: “?Be yufala, yufala i stap tokbaot mi, se mi hu?”¹ Pita i ansa, i talem: “Yu yu Mesaea ya. Yu yu Pikinini blong God ya we i laef, i stap we i stap.”² Nao long Lagun blong Taebirias, Kraes we i laef bakegen long ded i askem long Pita: “?Yu yu lavem mi moa, i winim we ol narafala ya oli lavem mi?”³ Pita i ansa wetem strong tingting: “Yes Masta, yu save we mi mi lavem yu.”⁴

Pita i bin save, tru long Tabu Spirit, se Jisas, Hem nao i Kraes. Hem i bin kasem wan revelesen blong Hemwan, mo hemia i kam olsem witnes mo testemoni blong hem. Sevya i bin save hemia, nao Hem i talem: “Saemon, pikinini blong Jon, yu yu save harem gud, from we i no man we i soemaot samting ya long yu. Papa blong mi long heven, hem nomo i soemaot long yu.”⁵ Afta we Pita i bin talemaot bakegen lav we hem i gat long Sevya, Jisas i ansa, i givim oda long hem: “Ale, yu lukaot gud long ol sipsip blong mi.”⁶ Blong givim seves long Sevya blong yumi, hem i minim blong lavem Hem; mo blong lavem Hem, hem i minim blong save Hem.

Las yia, long Jeneral Konfrens blong manis Epril, Presiden Russell M. Nelson i bin anaonsem wan niu mo moa tabu wei blong yumi kea moa givhan long ol narawan. Hem i talem: “Lod i mekem ol impoten jenis long fasin we yumi stap kea long wanwan long yumi.”⁷ Afta, long Jeneral Konfrens blong manis Oktoba, Presiden Nelson i anaonsem stat blong “wan hom senta, Jos sapot plan, blong lanem doktrin, blong mekem fet i kam strong moa, mo blong wanwan i gat moa fasin blong wosip.”⁸

Taem Pita i stap gohed blong developem fet blong hem, Sevya i talem long hem: “Mo taem yu tanem tingting blong yu, yu kambak long mi bakegen, yu mas mekem tingting blong ol brata blong yu i strong.”⁹ Ol anaonsmen blong Presiden Nelson abaot wan hom we i lukluk nomo blong lanem doktrin, mo niufala moa tabu wei blong kea mo givhan long ol narawan, i letem yumi mekem tufala samting ia we Kraes i bin askem long Pita.

Faswan, yumi mas kam antap blong jenisim laef blong yumiwan i go long Sevya, Jisas Kraes. I nomata se taemtebol blong miting blong Jos long Sandei i bin tri aoa, mo naoia, bae i jenis i go long tu aoa; hem i insaed long ol wol blong hom blong yumi nao we bambae yumi jenisim fasin mo laef blong yumi, mo bae yumi gat moa strong tingting.

Presiden James E. Faust (1920–2007) i talem: “Sapos yumi rili wantem se hom blong yumi i wan ples we i tabu, bambae yumi traehad moa blong mekem olgeta samting we oli invaetem Spirit blong Lod.”¹⁰ Risos we Jos i sapotem, “Kam Folem Mi—Blong Wanwan Man, Woman mo Famli,” hem i stap blong helpem yumi blong lanem gospel i gud moa, yumiwan nomo, o wetem famli blong yumi.

Taem oli stap presentem ol niu jenis long wan taemtebol blong yuwan o blong famli, maet i gat samfala jalenj we i kam wetem. From se hem i andastanem hemia, Presiden Nelson i givim gudfala toktok ia we i putum pis long hat blong yumi: “Mi promes se taem yu stap wok strong blong jenisim hom blong yu i kam wan senta blong lanem gospel, wetem taem, bae ol Sabat dei blong yufala i rili kam wan glad. Ol pikinini blong yufala bambae oli wantem tumas blong lanem samting, mo blong laef folem ol tijing blong Sevya, mo paoa blong enemi insaed long laef blong yufala, mo insaed long hom blong yufala, bae i kamdaon. Ol jenis insaed long famli blong yufala bae i bigwan mo i sapotem yufala.”¹¹

Nambatu saed blong oda we i go long Pita, i blong hem i mekem ol brata blong hem oli kam strong. Plante taem, yumi talem se hemia nao “wok blong givhan.” Elda D. Todd Christofferson i talem se givhan, “hem i fasin nomo blong stap wan disaepol, we yumi stap folem Sevya, yumi stap traem blong mekem wanem Gudfala Man blong Lukaot long Sipsip i bin mekem, mo blong folem eksampol we Hem i putum i stap, mo doktrin blong yumi, hem i blong folem Kraes mo stap ol disaepol blong Hem long evri wei.”¹² Taem yumi stap developem insaed long yumi, ol kwaliti olsem hemia blong Kraes, responsabiliti ia blong stap givhan, bae i nomo wan hevi wok, be, bae i wan samting we yumi wantem tumas, mo i givim praes long yumi mo i mekem yumi fil gud.

Wanem we Kraes i stap tokbaot taem Hem i stap tokbaot “olgeta samting ia,” taem Hem i askem Pita: “?Yu yu lavem mi i bitim olgeta ia?”¹³ Hemia i tokbaot hamas yumi bisi mo ol plante samting we i stap lidim ol tingting blong yumi long laef blong yumi, we i stap kompit blong karemaot taem mo tingting blong yumi.

Elda Christofferson i talem: “Blong gogohed blong stap strong gud mo stanap strong long fet long Kraes, i nidim blong gospel blong Jisas Kraes i go insaed long hat mo sol blong wan; i minim se gospel i no jes kam wan long ol plante paoa long laef blong wan, be hemia nao i lidim hem long laef mo fasin blong hem.”¹⁴ Taem yumi stap developem wan testemoni abaot Kraes, fasin blong stap jenisim laef bae i kam strong long tingting blong yumi. Afta, yumi save ansa olsem we Pita i bin mekem, mo stap strong mo talem: “Yes Lod, Yu Yu save se mi mi lavem Yu, from se Yu Yu Kraes, Yu Mesaea, Pikinini blong God ia we i stap laef.”