Akoʻi ʻo e Toʻu Tupú mo e Fānau Kei Iiki Angé

Ngaahi Tokoni ʻe 10 ki hono Akoʻi ʻo e Fakatomalá

ʻOku faʻa ongo fakailifia pe puputuʻu ʻa e fakatomalá ki he fānaú mo e toʻu tupú. Ko ʻeni ha ngaahi tokoni ki hono akoʻi ʻo e fakatomalá ʻi he founga ʻofa, mo fakaivia.

1. ʻAi ke faingofua. Te ke lava ʻo akoʻi ki hoʻo fānaú, “ʻi he taimi ʻoku tau fai angahala aí, ʻoku tau mavahe mei he ʻOtuá,” ka “ʻi he taimi ʻoku tau fakatomala aí, ʻoku tau tafoki ki he ʻOtuá.”¹ Te tau lava ʻo tafoki ki he ʻOtuá ʻaki ʻetau fakatokangaʻi ʻetau ngaahi fehālaakí, fakatonutonu kinautolu, pea feinga mālohi ke toe lelei ange.

2. Tokanga taha pē ki he ngaahi meʻa ʻoku leleí. ʻE tatau ai pē pe ko e hā, “ʻoku lelei maʻu ai pē ʻa e fakatomalá.”² ʻOku ʻikai ko ha tautea ki he anga koví; ko ha faingamālie ke toe feinga pē mo ʻunu ke toe ofi ange ki he ʻOtuá. Fakalotolahiʻi hoʻo fānaú ke nau fakakaukau ki he meʻa ʻoku nau fakahoko totonú mo e founga te nau lava ai ʻo toe fakahoko lahi ange iá.

3. Fakamamafaʻi ʻa e ngaahi meʻa te nau lava ʻo fai fakaʻahó. ʻOku tatau pē ʻa e fakatomalá ki he fanga kiʻi angahala iikí mo e ngaahi angahala lalahí. ʻOku ʻuhinga ʻa e fakatomala fakaʻahó ki he toutou fakatonutonu, ʻo hangē ko hono tauhi ʻe ha vaka hono halafolaú. Tokoniʻi hoʻo fanaú ke nau fakatokangaʻi ʻa e fanga kiʻi founga iiki te nau lava ai ʻo fakalakalaka he ʻaho takitaha.

4. Maʻu ha mahino ki he ngaahi fehalākí. Tokoni ke mahino ki hoʻo fānaú ʻoku lava ke hoko ʻa e ngaahi fehālaakí ko ha konga ʻo e akó. Tuku ange kinautolu ke nau fehangahangai mo e ngaahi nunuʻa ʻo ʻenau ngaahi filí pea tokoniʻi kinautolu ke nau fakakaukauʻi ʻa e founga ke toe fakatonutonu aí. Akoʻi kinautolu ke nau tafoki ki he ʻOtuá ki ha tokoni.

5. Hoko ko ha faʻifaʻitakiʻanga. Fakahā ʻi he taimi ʻokú ke fai ai ha ngaahi fehālaaki. Loto fakatōkilalo feʻunga ke kole fakamolemole ki hoʻo fānaú pea ʻi muʻa ʻiate kinautolu. Tuku ke nau sio ki he founga ʻokú ke faifeinga ai ke toe lelei angé, pea vahevahe hoʻo fakamoʻoní ki he founga kuo tokonia ai koe ʻe he Fakamoʻuí ke ke liliú.

6. Fakatatau ia kiate koe. ʻI hoʻo akoʻi e tefitoʻi moʻoni ʻo e fakatomalá ki hoʻo fānaú,³ fakatokangaʻi ange ʻe ʻikai ke tatau ʻa e founga ʻo e fakatomalá ki he taha kotoa pē ʻi he taimi kotoa pē. ʻOku ʻikai ko ha lisi ia ʻo ha ngaahi meʻa ke fakaʻilongaʻi hono fakahokó; ko hono ngāueʻi taʻetuku ia ʻo e tupulakí. ʻOku fekauʻaki ia mo e ngaahi holi ʻa hotau lotó mo e founga ʻoku tau faifeinga ai ke fakatonutonu kitautolu ki he Fakamoʻuí. ʻOku tau ʻilo kuo tau fakatomala kakato ʻi he taimi ʻoku tau ongoʻi ai ʻa e nonga, fiefia, mo e fakamolemole.

7. Sio lōloa. ʻOku faingofua ke ongoʻi lotosiʻi ʻi he taimi ʻokú ke fakahoko tā tuʻo lahi ai ha ngaahi fili hala tatau. Akoʻi ki hoʻo fānaú, ʻe toutou fakamolemoleʻi kinautolu ʻe he ʻOtuá kaekehe pē ke nau toutou fakatomala (vakai Molonai 6:8). Fakamatalaʻi ange ko e meʻa ʻoku mahuʻingá ʻa e feingá. ʻI heʻetau faifeingá mo tekeʻi ʻa e tangata fakakakanó (vakai Mōsaia 3:19) ʻoku tau hoko ange ai ʻo hangē ko e ʻOtuá.

8. Fakafaikehekeheʻi ʻa e ongoʻi halaiá mei he ongoʻi maá. ʻOku fie maʻu ʻa e “mamahi ʻoku taau mo e ʻOtuá” ki he fakatomalá (vakai 2 Kolinitō 7:9–10). Ka ʻo kapau ʻoku ʻikai ongoʻi taau pe taumuʻa valea hoʻo tamá neongo ʻene ʻosi fakatomalá, mahalo ko e ongoʻi maá ʻokú ne fakatupungá.⁴ Fakamanatu kiate kinautolu ʻoku ʻofa maʻu ai pē ʻa e Tamai Hēvaní ʻiate kinautolu pea ʻo “kapau te tau faiangahala, ʻoku tau taʻetaau, ka ʻoku ʻikai ʻaupito ke tau taʻemahuʻinga!”⁵ Kapau ʻoku fie maʻu, fakakaukau ke ke sio ki hoʻo pīsopé pe ko ha tokotaha fai faleʻi fakapalofesinale.

9. Mahino ki he Fakalelei ʻa e Fakamoʻuí Akoʻi ki hoʻo fānaú naʻe ʻikai pekia ʻa Sīsū Kalaisi maʻa ʻetau ngaahi angahalá pē kae maʻa ʻetau ngaahi faingataʻaʻiá kotoa (vakai ʻAlamā 7:11–12). Fakapapauʻi ki hoʻo fānaú ke “ʻoua naʻa nau pehē ko honau foʻui pē ʻa e hoko atu ʻa e ngaahi anga kovi ʻa e niʻihi kehé kiate kinautolú.”⁶ ʻOku tonuhia kakato ʻa e kau mamahi ʻoku ngaohikoviá; tokoniʻi kinautolu ke nau tafoki ki he Fakamoʻuí ki ha nonga mo e fakafiemālie.

10. Hanga maʻu ai pē ki he Fakamoʻuí. Akoʻi ki hoʻo fānaú ʻoku mahino ki he Fakamoʻuí ʻa e meʻa ʻoku nau fefaʻuhi mo iá mo lava ke tokoniʻi kinautolu ke nau ikunaʻi ia. Toutou fakamoʻoni kiate Ia ʻi ho ʻapí. Fakalotolahiʻi hoʻo fānaú ke nau lotu, tokoni, ako e folofolá, pea fai ha ngaahi meʻa kehe ʻe tokoni kiate kinautolu ke nau ʻilo lahi ange kiate Ia kae lava ke nau fekumi maʻu pē ki Heʻene tokoní ʻi hono ikunaʻi honau ngaahi vaivaiʻangá. ◼

Ngaahi Fakamatalá

1. Neil L. Andersen, “Fakatomala … Koeʻuhí Ke u Fakamoʻui ʻa Kimoutolu,” Liahona, Nōvema 2009, 40.

2. Stephen W. Owen, “ʻOku Lelei Maʻu pē ʻa e Fakatomalá,” Liahona, Nōvema 2017, 48.

3. Vakai “Vahe 19: Fakatomalá,” Ngaahi Tefitoʻi Moʻoni ʻo e Ongoongoleleí (2009), 107–13.

4. Vakai Wendy Ulrich, “ʻOku ʻIkai ko ha Angahala ʻa e Vaivaí,” Liahona, ʻEpeleli 2015, 20–25.

5. Joy D. Jones, Palesiteni Lahi ʻo e Palaimelí, “Mahuʻinga Taʻe-Hano-Tatau,” Liahona, Nōvema 2017, 14.

6. Tuʻu Maʻu ʻi he Tuí: Ko ha Huluhulu Ki he Ongoongoleleí (2004), 7.

Maʻá e Fānaú

ʻI he Kaungāmeʻa ʻo e māhiná ní:

• “Ko ha Talaʻofa ke ʻAhiʻahiʻi” (peesi F4)

• “Toe Kiʻi Lelei Ange he ʻAho Kotoa Pē” (peesi F6)

• “Fakakaukau Lelei” (peesi F7)

• “Ko e Fili ki he Yo-Yo” (peesi F16)

Ki he ngaahi maʻuʻanga tokoni kehé, ʻalu ki he lessonhelps.lds.org pea lomi ʻa e “Lesson Helps by Topic.”

Maʻá e Toʻu Tupú

ʻI he makasini ko ʻení:

• Ngaahi Fehuʻi mo e Talí: “ʻOku ou toutou tō maʻu pē he ngaahi ʻahiʻahi tatau. Te u mavahe fēfē mei he ngaahi angahala ko iá?” (peesi 62)

• “ʻOku ou kei manatuʻi pē ʻa e ngaahi angahala kuó u fakatomala mei aí, pea ʻoku ou ongoʻi halaia. Ko e hā ʻoku ʻikai ke u lava ai ʻo fakangaloki ʻeku ngaahi angahalá?” (peesi 63)

Ke maʻu ha ngaahi maʻuʻanga tokoni lahi ange, ʻalu ki he youth.lds.org.