Ko ha Tohi meí he Palōfitá
Kelly Santos Figueiredo Ribeiro
Koiasi, Palāsila
Tā fakatātaaʻi ʻe Chris Lyons
Naʻá ku veiveiua ke u kau ki he Siasí ʻi he taimi ne fakafeʻiloaki ai ʻe hoku husepānití kiate aú. Naʻá ne ʻomi haʻaku Tohi ʻa Molomoná, pea ʻi he hili ha ngaahi lēsoni lahi mo e meimei taʻu ʻe ua ʻeku ngāue mo e kau faifekaú, ne papitaiso au ʻi he 2007. Hili ʻeku hoko ko ha mēmipa ʻo e Siasí, naʻá ku faingataʻaʻia ʻi ha kiʻi taimi. Naʻe ʻikai mahino kiate au ʻa e mahuʻinga ʻo e kau palōfita ʻo e ngaahi ʻaho ní. ʻI heʻeku fakakaukaú, kuo pau ke tatau e palōfitá mo ha taha hangē ko Mōsesé mo hono tokotokó.
“ʻOku lea nai e palōfitá ki he ʻOtuá?” Ne u ʻeke ange ki hoku husepānití.
Naʻá ne tali mai, “ʻIo.”
“Ko hoʻo moʻoni?”
“ʻIo, ʻoku lea e palōfitá ki he ʻOtuá.”
“Pea te u kole leva ki he ʻEikí ke ne tala ki he palōfitá ke ne mai ha tohi ʻoku pehē ai ko e Siasi ʻeni ʻo Sīsū Kalaisí.”
Naʻe pehē mai ʻe hoku husepānití, “ʻOiauē ʻikai! ʻOku ʻikai ke pehē ia!”
Naʻe pau hoku lotó.
“Kapau ʻoku lea ʻa e palōfita ki he ʻEikí, pea ʻe folofola leva ʻa e ʻEikí ki he palōfitá, pea te ne mai leva ha tohi kiate au.”
ʻI ha Sāpate ʻe taha, naʻe mono mai ʻe ha faifekau ha DVD kiate au ʻi he lotú peá ne kole mai ke u sio ai mo hoku fāmilí. Naʻe ʻi ai ha fakamoʻoni ʻa e palōfitá mo e kau ʻaposetoló. Ko e fuofua tokotaha ke leá ko Palesiteni Kōtoni B. Hingikelī (1910–2008). Naʻe ongo kiate au. Naʻe hangē naʻá ne fakamātoató, pea naʻá ku ongoʻi naʻá ne lea ʻaki ʻa e moʻoní.
Naʻe pehē mai ʻe hoku husepānití, “Sio ki hē, ko hoʻo fakamoʻoni ʻeni ki he palōfitá.”
Naʻá ku tali ange, “ʻIkai, ʻoku ou kei fie maʻu pē ha tohi meiate ia.”
ʻI ha pō ʻe taha, naʻe aʻu mai e kau faifekaú ki homau ʻapí ʻo mono mai ha makasini.
Naʻá na pehē mai, “ʻOku ʻikai ke ma ʻilo pe ko e hā, ka ʻokú ma ongoʻi ʻoku totonu ke ma ʻomi ʻeni kiate koe.” Ko ha tatau ʻo e Liahona, ʻo ʻOkatopa 2006 naʻe kei milemilaʻi pē.
Naʻá ku fakaava hake ʻo lau ha lea meia Palesiteni Hingikelī naʻe fakataumuʻa ki he kau mēmipa foʻou ʻo e Siasí. Naʻá ne pehē, “ʻOku ou tuku ʻa e fakamoʻoni ko ʻení, ʻa ʻeku tāpuakí, mo ʻeku ʻofá kiate kimoutolu takitaha mo haʻaku fakaafe ke mou hoko atu ko ha konga ʻo e ngāue maʻongoʻonga ko ʻeni ʻo e mana he ngaahi ʻaho fakaʻosí ʻa ia ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.”1
Naʻá ku ongoʻi naʻá ne lea fakahangatonu mai pē kiate au. Naʻe teʻeki ke u hoko ko ha mēmipa ʻo e Siasí ʻi he taimi naʻe pulusi ai ʻení, ka naʻe fakahaofi pē ia maʻaku. ʻOku ou ʻiloʻi ʻoku fanongo mai ʻa e ʻEikí ki heʻetau lotú pea ʻokú Ne fefolofolai mo ha palōfita moʻui he ʻahó ni.