Ne ʻOmi ʻe he Tamai Hēvaní ha kiʻi Pōpoaki

Carol Whitaker

ʻOlikoni, USA

Hili ha fefaʻuhi hoku husepānití mo e loto ngalongaló ʻi ha taʻu ʻe 11, naʻá ne pekia. Naʻe fakamamahi pea toe fakafiemālie kiate au ʻa ʻene pekiá. Ne u hoko ko hono tauhi, kaungāmeʻa mo e ʻofaʻanga, pea neongo ne u fiefia ʻi he ʻikai ke ne toe faingataʻaʻiá, ka naʻá ku ʻofa lahi kiate ia. Ne u pehē ne mahino kiate au ʻa e loto-mamahí, ka naʻe hanga ʻe he mamahí mo e ngaahi ongo ʻo e molé ʻo tataki au ʻi ha hala fononga ne ʻikai te u ʻamanaki ki ai.

Ne u ofo mo loto-hohaʻa pea naʻe haʻu māmālie ʻa e loto fakafisingaʻí ki heʻeku moʻuí. Ne u ongoʻi liʻekina, taʻeʻaonga pea naʻe tukunoaʻi au ʻe he fāmilí, ngaahi kaungāmeʻá mo e kāingalotu ʻo e uōtí. Ne u tuku ke u ongoʻi fakaʻofaʻia pē ʻiate au mo loto-ʻita ki he niʻihi kehe.

ʻI ha Sāpate ʻe taha, ne u tangutu ai ʻi mui ʻi he falelotú. Naʻá ku siofi ha fefine anga fakakaumeʻa naʻá ne feʻiloaki mo e kāingalotu kehe ʻo e uōtí. Naʻá ne angaʻofa mo angalelei ki he tokotaha kotoa pē.

Naʻá ku fakakaukau ʻo pehē, “Ka ʻoku teʻeki ke ne ʻeke mai pe ʻoku ou fēfē, kuo teʻeki ke ne fakahā mai ʻene fie kaungāmamahí, kuo teʻeki ke ne fakapapauʻi mai e faingataʻa kiate au e mole hoku husepānití!”

Ne hoko atu ʻeku maʻu e ngaahi fakakaukau hala ko ʻení ʻi he kamata ʻa e himi sākalamēnití. Ne u ongoʻi he ʻikai ke u lava ʻo maʻu ʻa e sākalamēnití koeʻuhí ko e ngaahi ongoʻi ʻita ko ʻeni ʻi hoku lotó.

“Kuo pau ke ke kolea ha tokoni ke toʻo ʻaupito e ngaahi ongo ko ʻení he taimí ni!” Ko ʻeku fakakaukaú ia.

Ne u lotu ke toʻo atu e ngaahi fakakaukau hala ko ʻení. Naʻe ʻikai teitei taau ke u loto-ʻita ki he fefine ko ʻení. Naʻá ku lotua ha fakamolemole mo ha tokoni ke tuku ʻeku loto-ʻitá. ʻI he taimi ne tuʻu ai ha tīkoni ʻi muʻa ʻiate au mo e laulau sākalamēnití, naʻá ku ongoʻi te u lava ʻo maʻu ʻa e sākalamēnití. Ne u hoko atu ke lotua ha fakahinohino ʻi he uike hono hokó.

ʻI he Sāpate hono hokó, ne u hū atu he hūʻangá peá u sio ki he fefine ne nofo ai ʻeku tokangá he uike kimuʻá.

Naʻá ne pehē mai, “Hauē, Kalo! Naʻá ku fakakaukau lahi atu kiate koe! ʻOku ou fakakaukauloto atu pē ki he faingataʻa ʻokú ke fekuki mo iá. Naʻá ke tauhi ho husepānití ʻi ha fuʻu taimi lōloa. Pau pē ko ha liliu faingataʻa ʻeni kiate koe. ʻOkú ke fēfē hake?”

Naʻá ma talanoa ʻi ha kiʻi momeniti siʻi, peá ne fāʻofua mai kiate au. Naʻá ku fuʻu ʻohovale ʻaupito! Naʻá ku tangutu hifo mo malimali fiefia ʻi hoku sea angamaheni ʻi he falelotú. Naʻá ku fakamālō ki heʻeku Tamai ʻi Hēvaní he taimi pē ko iá. Kuó Ne ʻomi ha kiʻi pōpoaki ki he fefine lelei ko ʻení ke ne lea ʻaki e meʻa ne u fie fanongo ki aí. Talu mei he taimi ko iá, kuó u ongoʻi leva ʻoku ʻafioʻi au ʻe he Tamai Hēvaní. Kuó Ne ʻomi ʻa e ivi ke u lava ʻo fehangahangai mo e “meʻa angamaheni foʻou” kuo kamata ʻi heʻeku moʻuí.