Kau ʻAposetolo ʻi he Funga Māmaní
Ko e Fononga Lōloa ʻa Eletā Hōlaní
ʻOku fononga e Kau ʻAposetoló he funga ʻo e māmaní ke ngāue fakaetauhi ki he kakaí mo akoʻi kinautolu fekauʻaki mo Sīsū Kalaisi.
Naʻe folau fakataha ʻa ʻEletā Sefilī R. Hōlani mo Sisitā Petulisa Hōlani mo Palesiteni mo Sisitā Nalesoni ke ʻaʻahi ki he kāingalotu ʻo e Siasí ʻi he funga ʻo e māmaní. Naʻa nau ʻaʻahi ki ha ngaahi fonua ʻe valu. ʻI he feituʻu kotoa pē ne nau feʻiloaki ai mo ha kakai ʻe lauafe naʻa nau fiefia ʻaupito ke mamata ki ha palōfita mo ha ʻaposetolo!
Ko e meimei kotoa e ngaahi feituʻu ne nau afe aí ne ʻosi ʻi ai ha temipale pe ʻoku teu ke tuʻu ai he kahaʻu vave maí! ●
Naʻa nau fuofua afe ʻi Selusalema, ʻIsileli. Naʻa nau mamata ki he Moʻunga ʻŌlivé, ko ha feituʻu naʻe akoʻi ai ʻe Sīsū ʻEne kau ākongá, mo e Kolo Motuʻa ʻo Selusalemá, ʻa ia naʻe fononga ai ʻa Sīsuú.
Naʻa nau hoko atu leva ki Kēnia, ko ha fonua ʻi ʻAfilika ʻoku teu ke langa ai ha temipale. Naʻe fakalotolahiʻi ʻe ʻEletā Hōlani e kakaí ke nau tānaki ʻenau hisitōlia fakafāmilí pea nau haʻu ki he temipalé ʻi he taimi ʻe ʻosi aí. Naʻá ne pehē, “ʻE ʻikai ha meʻa te ne tāpuekina lahi ange kimoutolu.”
Naʻe fiefia lahi ʻaupito ʻa Palesiteni Nalesoni mo ʻEletā Hōlani ke na ʻaʻahi ki he kāingalotu ʻo e Siasí ʻi ʻInitiá. Naʻá na fakasio ha feituʻu ke langa ai ha temipale. ʻE hoko ia ko e fuofua temipale ʻi he fonua ko iá, ʻa ia ʻoku laka hake e tokolahi hono kakaí he pilioná!
“ʻOku ʻi ai ʻa ʻeku fakamoʻoni ʻe ʻiate kitautolu maʻu ai pē ʻa e ʻOtuá. Kuó ne foaki mai kiate kitautolu ha palōfita ke tataki kitautolu. He ʻikai ʻaupito te Ne teitei liʻaki kitautolu. ʻE ʻikai ʻaupito te tau teitei tuenoa.