Fakakomipiutá Pē
Ngāue Fakaetauhi ʻi he Fanga Kiʻi Founga Iikí
ʻI he taimi ʻe niʻihi ʻe lava ke fakahoko ʻe ha kiʻi meʻa siʻisiʻi ha liliu lahi.
“ʻOkú ke fēfē hake?”
ʻOku ou tui kuo ʻosi fai ʻe he tangata faifakataú ʻa e fehuʻi ko ʻení ki ha kakai tokolahi he ʻaho ko iá. Ko ha kiʻi pausa siʻisiʻi pē ia, pea naʻá ku feinga fakavavevave pē ke fakatau ha hina vai pea foki ki heʻeku kaá. Ka naʻe kehe ʻa e fehuʻi angamaheni ia ko ʻení—he taimi ko ʻení. Naʻe ʻikai ke ne ʻilo ʻa e lahi ʻo ʻeku fie fanongo ki he ngaahi lea faingofua ko iá.
Naʻe ʻikai ke ne ʻilo naʻá ku afe ki he pausa ko ʻení koeʻuhí naʻe ʻikai ke u lava ʻo sio ki he halá ʻi heʻeku loʻimataʻiá.
Naʻe ʻikai ke ne ʻilo e lahi ʻo e mamahi naʻá ku tofanga aí pe ko e faingataʻa ke u maʻu ʻa e mālohi ʻi hoku lotó.
Naʻe ʻikai ke ne ʻiloʻi ʻa ʻeku mamahi ʻi he feinga e tokotaha kotoa pē ʻi he pausá ke hangakehe meiate au mo hoku fofonga loʻimataʻiá.
Naʻá ne fehuʻi mai mo e tokanga moʻoni ʻi hono fofongá mo hono leʻó, “ʻOkú ke fēfē hake?” Naʻá ku feinga ke u malimali houngaʻia kiate ia ʻi heʻeku pukepuke hoku loʻimatá—ko ha ngaahi loʻimata ʻeni ʻo e houngaʻia.
Naʻá ku tali moʻoni ange, “ʻOku ou sai pē.” Koeʻuhí kuó u ʻilo ʻeni naʻe angaʻofa feʻunga ha taha ke ne fakatokangaʻi au mo hoku faingataʻaʻiá, naʻá ku ongoʻi sai pē.
Mahuʻinga
ʻE lava ke ongoʻi lōmekina ʻa e talanoa fekauʻaki mo e ngāue tokoní. ʻOku ou fanongo ki he ngaahi talanoa ʻo ha ngaahi ngāue tokoni ʻofa fakaetangata fakamāfana ʻi he funga ʻo e māmaní mo e ngaahi talanoa kau ki he kakai kuo līʻoa ʻenau moʻuí ki he ngaahi taumuʻa mahuʻingá. Pea neongo ʻoku ou houngaʻia ʻi heʻenau ngaahi feilaulaú, ka ʻoku faʻa ʻalu fakataha e ngaahi talanoa ko iá mo ha ongoʻi loto-halaia lahi. ʻOku ou ʻilo ʻa hono mahuʻinga ke ngāue fakaetauhí. Pea mahulu hake aí—ʻoku ou ʻilo ʻeku fiefiá ʻi heʻeku ngāue tokoni ki he niʻihi kehé. Ko ia ko e hā ʻoku ʻikai ke u fakahoko lahi ange aí?
ʻOku ou faʻa lotofoʻi ʻi heʻeku fakakaukau ki he ngaahi meʻa kotoa pē te u lava ʻo faí, pea faʻa fakahehema ke ngalo e ngaahi meʻa ʻoku ou faí. Naʻe lea ʻa Sini B. Pingihami, ko e Palesiteni Lahi ʻo e Fineʻofá fekauʻaki mo e ngaahi ola fungani ʻo e ngaahi ngāue tokoni faingofuá. Naʻá ne fakamatalaʻi ko Sīsū Kalaisi ʻa e sīpinga haohaoa ʻo e ngāue fakaetauhí ʻi he founga naʻá Ne “fofonga malimali foki, talanoa, lue, fanongo, tuku taimi, fakalotolahi, akoʻi, fafangaʻi, mo faʻa fakamolemole.” (“Ngāue Fakaetauhi ʻo Hangē ko e Fakamoʻuí,” Liahona, Mē 2018, 104).
ʻI heʻeku faʻa fakakaukau ki he ngāue tokoni ʻaonga kuó u maʻú, ʻoku ou faʻa fakakaukau lahi taha ki he ngaahi meʻa īkí: Ko hono maʻu ha pōpoaki telefoni langaki moʻui mei hoku kaungā-lokí, ʻa ia naʻá ne fakatokangaʻi ha ʻaho naʻá ku faingataʻaʻia ai. Pe ko e fakaafeʻi au ʻe hoku tokouá ke ma kaungā lelé, ʻo ʻikai ke ne ʻiloʻi naʻá ku fuʻu fie maʻu ke u talanoa mo ha taha. Pe ko hono ui au ʻe heʻeku pīsopé ke ma talanoa koeʻuhí naʻá ne pehē hangē ne ʻikai ke u fiefia. Pe ko haʻaku fetaulaki mo ha kaungāmeʻa fuoloa naʻe ʻikai ngata pē ʻi heʻene manatuʻi hoku hingoá ka naʻá ne tokanga moʻoni ke tuʻu pea ʻeke mai pe naʻe fēfē ʻeku moʻuí. Naʻe ngāue fakaetauhi mai e kakai ko ʻení ʻi heʻenau fakatokangaʻi au mo fakahaaʻi mai nau tokangá. Naʻe hoko moʻoni ai ha liliu.
‘I heʻeku manatuʻi e fanga kiʻi ngāue tokoni iiki kae mahuʻingamālie ko iá, ʻoku ou manatuʻi ai ʻoku ou lava foki ʻo fakahoko ha liliu ʻi he moʻui ʻa ha taha kehe. Pea ʻikai ngata pē ʻi heʻeku malavá—ka ʻoku ou fakahoko ia. Fakahoko fakakongokonga, ʻo ʻai tahataha he ʻaho takitaha.
Mahalo te u hoko ʻi ha ʻaho ko ha konga ʻo ha ngāue tokoni ʻofa fakaetangata lahi ʻokú ne fakaʻatā ke u ngāue fakaetauhi ai ki he kakai ʻi he funga ʻo e māmaní. Ka ʻi he taimi ní, ʻoku ʻikai ke u ongoʻi halaia ʻi he ʻikai ke u lava ʻo fakatokangaʻi e tokotaha kotoa pē, ʻoku ou fili ke fakatokangaʻi ha tokotaha. ʻOku ʻikai ke ke teitei ʻilo ʻa e ola te ke lava fakahokó ʻi he ngāue fakaetauhi ʻi he fanga kiʻi founga īkí.