ʻOku ou kei manatuʻi pē ʻa e ngaahi angahala kuó u fakatomala mei aí, pea ʻoku ou ongoʻi halaia. Ko e hā ʻoku ʻikai ke u lava ai ʻo fakangaloki ʻeku ngaahi angahalá?
Ketisemani, tā ʻe MichaelT. Malm
ʻOku lava ʻe he Fakalelei ʻa Sīsū Kalaisí ʻo fakaʻatā ʻa e fakamolemolé kapau te tau fakatomala. ʻOku kau ʻi he fakatomala moʻoní ʻa e loto fakatōkilalo, vete, fakangaloki e ngaahi fai angahalá, mo ha tukupā ke tauhi e ngaahi fekaú.
Kuo folofola ʻa e ʻEikí: “Ko ia ia kuó ne fakatomala mei heʻene ngaahi angahalá, ʻoku fakamolemoleʻi ia, pea ko au ko e ʻEikí, ʻoku ʻikai te u toe manatu ki ai” (Tokāteline mo e Ngaahi Fuakavá 58:42). Kae fēfē kapau ʻoku kei fakahohaʻasi kitautolu ʻe heʻetau manatu ki heʻetau ngaahi angahalá? Kuo akoʻi mai ʻe ʻEletā Tieta F. ʻUkitofa ʻO e Kōlomu ʻo e Kau ʻAposetolo ʻe Toko Hongofulu Mā Uá: “Naʻe ʻikai palōmesi mai ʻe he ʻEikí he ʻikai ke tau toe manatuʻi ʻetau ngaahi angahalá. ʻE tokoni ʻetau manatuʻí ke tau fakaʻehiʻehi ai mei haʻatau toe fai ha ngaahi fehalaaki tatau. Ka ʻo kapau te tau tuʻu maʻu mo faivelenga, ʻe mōlia atu pē ʻetau manatu ki heʻetau ngaahi angahalá ʻi he fakalau atu ʻa e taimí. ʻE hoko ʻeni ko ha konga ʻo e fakamoʻui ʻoku fie maʻú mo e founga ʻo e fakamāʻoniʻoniʻí” (“Point of Safe Return,” Liahona, May 2007, 101).
ʻI heʻetau fakatomala moʻoni mo tokanga taha ke muimui ʻi he Fakamoʻuí, ʻe hoko ʻa e Laumālie Māʻoniʻoní ko hotau takaua pea ʻe ueʻi kitautolu ke tau ʻofa mo tokoni ki he niʻihi kehé. ʻE fetongi ʻa e mamahi ʻo e maá ʻaki ʻa e houngaʻia mo e ʻamanaki lelei. Pea te tau fakalāngilangiʻi e ʻOtuá koeʻuhí ko ʻEne angaʻofá, ʻofá mo e ʻaloʻofá.