Ko e Tokoni kia Kení
ʻOku nofo ʻa e tokotaha naʻá ne faʻú ʻi Taiuani.
Naʻe tataki ʻe he toʻukupu ʻo e ʻEikí ʻeku ngaahi ngāue fakaetauhí.
Tā fakatātaaʻi ʻe Lisk Feng
ʻI hoku taʻu 16, naʻá ku hiki ai ki ha uooti lea faka-Taiuani. Kuo toki papitaiso ʻeni ʻa Keni, taʻu 13. Ka ʻi he hili pē ʻene papitaisó, ne ʻikai ke toe meimei maʻulotu ʻa Keni ia. Ne u maʻu ha holi lahi ke u tokoni kia Keni ke foki mai ki he lotú. Naʻá ku fakaafeʻi ia ke haʻu ki ha ngaahi ʻekitivitī lahi ʻa e Siasí. Naʻe vaʻinga pasiketipolo ʻa Keni ʻi he Mutualé mo kau ʻi he kuaea ʻa e toʻu tupú. Naʻe kamata ke kau ʻa Keni mo hono tuofefine ko Linitaá ʻi he kalasi lea faka-Pilitānia taʻetotongi ne akoʻi ʻe hoku fāmilí mo e kau faifekaú. Ne kau mai leva mo Linitā ki he ngaahi ʻekitivitī ʻa e toʻu tupú. Naʻe lava ke u sio ki hono tokoniʻi kimautolu ʻe he toʻukupu ʻo e ʻEikí.
Naʻe fifili e fāmili ʻo Kení pe ko e hā e ʻuhinga e feinga hoku fāmilí ke tokoniʻi ʻa Keni mo Linitaá. Naʻa mau talaange kiate kinautolu kuo ʻomi ʻe he ongoongoleleí ha fiefia lahi kiate kimautolu, pea naʻa mau loto moʻoni ke maʻu ʻe he niʻihi kehé ʻa e fiefia mo e nonga tatau mei he Fakamoʻuí. Hili iá, ne tali ʻe Linitā mo Keni ʻemau fakaafe ki he lotú. Naʻe haʻu ʻa Linitā pea naʻá ne maʻu ha aʻusia fakaʻofoʻofa. Ka neongo iá, naʻe puke ʻa Keni, pea ʻi heʻeku lotua ko e hā e meʻa te u lava ʻo fai ke u tokoni kiate iá, naʻe ueʻi au ʻoku totonu ke mau ʻave ki ai ʻa e sākalamenití. ʻI he fakangofua ʻa e pīsopé, naʻe ʻalu ai hoku fāmilí ki hono ʻapí, pea naʻe tokoni mai hoku tokouá kiate au ʻi hono tāpuakiʻi mo ʻoange ki ai ʻa e sākalamenití. Naʻa mau talanoa foki mo hono fāmilí. Naʻá ku ongoʻi nonga.
Kuo lotua ʻe homau fāmilí ʻa Keni, pea mau ongoʻi ʻa e ʻofa kia Keni mo hono fāmilí. Naʻe hokohoko atu e fakafeohi ʻa e toʻu tupú mo e kakai lalahi ʻi he uōtí mo e siteikí kia Keni mo Linitā. ʻOku tokoni ʻa e ngāue fakatauhi ʻa e kāingalotú kia Keni mo Linitā ke na ongoʻi ai ʻa e ʻofa ʻa e Fakamoʻuí. Kuo ʻomi ʻe he aʻusia ko eni ʻo e feinga ke ngāue fakaetauhi ʻo hangē ko e Fakamoʻuí ʻa e fiefia lahi ki heʻeku moʻuí. Ko e ngāue fakaetauhí ko e ngāue ia ʻa e ʻEikí, pea koeʻuhí ko ʻEne ngāue ia, ʻe tataki ʻe Hono toʻukupú ʻa ʻetau ngāue fakaetauhí.