Feinga Ke ʻIlo Ho Fāmilí

Fai ʻe Dallin H. Oaks

Tokoni ʻUluaki ʻi he Kau Palesitenisī ʻUluakí

Ne toʻo mei ha lea ne fakahoko ʻi he ʻAho Fakafeʻiloaki ʻo e Fāmilí ʻa e RootsTech 2018

ʻOku kamata ʻa e hisitōlia fakafāmilí ʻi he taimi ʻokú ke ako ai fekauʻaki mo hoʻo ngaahi tamaí. Ko ha kakai moʻoni kinautolu kuo nau moʻui kimuʻa ʻiate koé mo hoko ko e konga ʻo ha fāmili. ʻOku fie maʻu ke tau sila ki heʻetau ngaahi tamaí kae lava ke tau nofo fakataha mo kinautolu ʻi he moʻui kahaʻú.

ʻI hoʻo ako fekauʻaki mo hoʻo ngaahi tamaí, te ke:

Ongoʻi fiefia mo loto falala ange ai.
ʻIkai ongoʻi tuenoa.
ʻIlo ʻoku mahuʻinga ʻa e tokotaha kotoa pē ʻi he ʻafio mai ʻa e Tamai Hēvaní.

Ko ʻeni ʻa e ngaahi founga ʻe tolu ʻe lava ai ke ke maʻu ʻa e ngaahi tāpuakí ni:

ʻIloʻi kohai hoʻo ngaahi tamaí.
Tātānaki ha ngaahi talanoa fekauʻaki mo kinautolu pea toutou vahevahe ia!
Fakafehokotaki kinautolu ki ho fāmilí ʻaki hoʻo ʻave honau ngaahi hingoá ki he temipalé. ʻE lava ke papitaiso kinautolu mo fakahoko e ngaahi ouau kehé maʻanautolu, ʻo hangē ko hono silaʻi ki ho fāmilí ke taʻengata.

Naʻe pekia ʻeku fineʻeikí, Sitela ʻOake kimuʻa pea toki fāʻeleʻi ha taha homau ngaahi makapuná. Ko ia ne u fakahoko ai mo Sisitā ʻOake ha “paati ʻa Sitela” ke tokoniʻi kinautolu ke nau ʻilo kiate ia. Ne toe faʻu foki ʻe he mēmipa ʻo e Fāmilí ha tohi fekauʻaki mo ia pea mo ʻeku tamaí. Te ke lava ʻo ako lahi ange fekauʻaki mo hoʻo ngaahi tamaí foki. ʻE ʻoatu heni ha mālohi mo e tākiekina ki hoʻo moʻuí. ●