Ko e Lea Fakaʻosí
ʻOku Feinga Maʻu Pē Ha Mēmipa ʻo e Siasi ʻo Sīsū Kalaisí
Fai ʻe ʻEletā Dale G. Renlund
ʻO e Kōlomu ʻo e Kau ʻAposetolo ʻe Toko Hongofulu Mā Uá
Mei ha lea ʻi he konifelenisi lahi ʻo ʻEpeleli 2015.
ʻOku talaʻofa mai ʻa e ʻOtuá ʻi Heʻene ʻaloʻofá te ne fakamolemoleʻi he taimi ʻoku tau fakatomala aí mo tafoki mei he faikoví—ʻo aʻu ki ha tuʻunga he ʻikai ke toe lau mai ʻetau koví kiate kitautolu. Koeʻuhí ko e Fakalelei ʻa Kalaisí mo ʻetau fakatomalá, te tau lava ʻo sio ai ki heʻetau ngaahi tōʻonga he kuo hilí mo pehē, “’Ko hoku kuohilí ia. Ka ʻoku ʻikai ko au ia ʻa e tokotaha angakovi ʻo e kuohilí.”
“Naʻe akoʻi ʻe Palesiteni Tōmasi S. Monisoni (1927–2018) ʻo pehē, ‘Ko e taha e meʻaʻofa maʻongoʻonga taha ʻa e ʻOtuá maʻatautolú ko e fiefia ʻi he feingá, he ʻoku ʻikai totonu ke hoko ko ha aofangatuku e meʻa ʻoku taʻemalavá.”1 Neongo kapau naʻa tau ʻiloʻi lelei mo taumuʻa pē ke hoko ko ha taha faiangahala pe toutou fehangahangai mo e ʻikai malavá mo e loto-mamahí, ka ko e taimi pē ʻoku tau loto ai ke toe feingá, ʻe lava ke tokoniʻi kitautolu ʻe he Fakalelei ʻa Kalaisí. Pea ʻoku fie maʻu ke tau manatuʻi ʻoku ʻikai ko e Laumālie Māʻoniʻoní ʻokú ne talamai kuo tau fuʻu tōmui pea ʻe sai ange ke ʻoua te tau toe feinga.
ʻOku finangalo ʻa e ʻOtuá ke kei hokohoko atu pē e feinga ʻa e Kāingalotú ʻo mahulu hake ʻi he ikunaʻi pē ʻo e angahalá. Neongo pe ko e hā hotau faingataʻaʻiá, ko ha vā ʻoku palopalemaʻia, faingataʻaʻia fakaʻekonōmika, pe mahamahaki pe ko e nunuʻa ʻo ha faiangahala ʻa ha taha kehe, ka ʻe kei lava pē ʻe he Fakalelei taʻe fakangatangata ʻa e Fakamoʻuí ʻo fakamoʻui—pea mahalo ʻe tautautefito—kiate kinautolu ne faingataʻaʻia taʻe ʻi ai haʻanau koví. ʻOku mahino lelei kiate Ia ʻa e mamahiʻia taʻe ʻi ai ha hia ko ha nunuʻa ʻo ha maumaufono ʻa ha taha kehé. Hangē ko hono kikiteʻí, ʻe hanga ʻe he Fakamoʻuí ʻo “nonoʻo ʻa e loto mafesí, … ʻatu kiate kinautolu ʻa e hoihoifua ko e fetongi ʻo e efuefu, ʻa e lolo ʻo e fiefiá ko e fetongi ʻo e mamahi, [mo e] kofu ʻo e fakamāló ko e fetongi ʻo e laumālie kuo mafesi” (ʻĪsaia 61:1–3; vakai foki ki he Luke 4:16–21). ʻE tatau ai pē pe ko e hā e meʻa ʻoku hokó, ʻoku ʻamanaki mai e ʻOtuá, ʻi Heʻene tokoní, ke kei feinga pē ʻa e Kāingalotú.
Ko ʻeku fakaafé kiate kitautolu kātoa ke tau toe vakaiʻi ʻa ʻetau moʻuí, fakatomala, pea ʻoua ʻe tuku e feingá. Kapau he ʻikai ke tau feinga, ʻoku tau hoko ko ha kāingalotu faiangahala; kapau ʻoku ʻikai ke tau kātaki, ʻoku tau hoko ko ha kāingalotu foʻi ʻi he ngaahi ʻaho kimui ní; pea kapau he ʻikai ke tau fakaʻatā e niʻihi kehé ke nau feinga, ta ko ha kāingalotu mālualoi kitautolu. ʻOku tau hoko moʻoni ko e Kau Māʻoniʻoni ʻi he Ngaahi ʻAho Kimui Ní ʻi heʻetau feinga, vilitaki, mo tokoniʻi e niʻihi kehé ke nau fai mo e meʻa tatau. ʻI heʻetau liliú, te tau ʻiloʻi ai ʻoku tokanga lahi ange ʻa e ʻOtuá ki he tuʻunga ʻoku tau ʻi aí mo ia ʻoku tau feinga ke aʻusiá, kae ʻikai ko hotau tuʻunga kimuʻá.