Kakai Lalahi Kei Talavoú
Ko e Kakai Mohu Tākiekina Lahi Tahá
Kuó ke ʻosi lau nai ha ngaahi fakamatala mo hano kaveinga hangē ko e “Kakai Mohu Tākiekina ʻe 30 ʻOku Nau Taʻu Siʻi Hifo he 30” peá ke fakakaukau, “ʻE founga fēfē nai haʻaku kau ʻi he lisi ko iá?” Kuó u ʻosi fifili ki he founga te u lava ai ʻo kaunga lahi ange, tokoni lahi ange, mo toe mahuʻinga ange foki (ʻa ia ʻoku ala ʻuhinga ʻoku fie maʻu foki ke u toe loto fakatōkilalo ange). Lolotonga e hoko ʻetau ngaahi foakí ko ha meʻa ʻe ala fakatokangaʻi ʻe he māmaní, ʻoku nau hoko he taimi ʻe niʻihi ko hano fakakakato fakapulipuli ʻo ʻetau ngaahi fuakava mo e ʻOtuá.
ʻOku ʻikai fie maʻu ia ki heʻetau tākiekiná ke tau folau ki tuʻapuleʻanga ke tokoniʻi ha taha nofo mamaʻo. ʻOku kamata tonu pē ia hotau ʻapí, ʻi hotau ngaahi fāmilí pe kaungā lokí, mo hotau ngaahi kaungāʻapí. ʻOku kamata ia ʻi hotau tūkuikoló. ʻI heʻetau kamata ke liliu mo fakahoko iá, ʻoku ʻomai ʻe he “Taimi ke Tokoní” (peesi 44) ha ngaahi ngāue ke fakahoko ke tokoniʻi ʻaki hotau koló. ʻOku malava ke ʻuhinga ʻa e Vaheʻi ha taimi ke tokoniʻi e niʻihi kehé ki he fie maʻu ke tau fai ha ngaahi liliu—ʻo malava pē ko ha liliu ʻo e lotó pe ko ha liliu ʻi he meʻa ʻoku fakamoleki ki ai hotau taimí mo e iví.
ʻI he “Ko Ha Fuʻu Ivi Kaukaua ki he Leleí” (peesi 46), ʻoku vahevahe ai ʻe ha kakai lalahi kei talavou ʻe niʻihi ʻenau aʻusia ki hono fakatupulaki ʻa e ʻofa faka-Kalaisí maʻá e niʻihi kehé. ʻOku fakahaaʻi ʻe he ngaahi talanoá ni ʻa e founga ʻoku lava ai ke tataki ʻe he ueʻi fakalaumālié mo e tuí ʻa e kakai lalahi kei talavoú ke nau hoko ko ha tākiekina lelei.
ʻOku fakamanatu mai ʻe ʻEletā Kavāletí kiate kitautolu ʻoku tau ʻosi hoko kitautolu ko e kau moʻungaʻi tangata mo e kau moʻungaʻi fefine (vakai ki he peesi 49). ʻI he moʻui ʻi he maama fakalaumālié, naʻa tau fili ke tau haʻu ki he māmaní, pea ʻi he taimí ni ʻoku tau lava ke fili ʻa e faʻahinga lelei ʻoku tau fie fakahokó. ʻE tataki kitautolu ʻe heʻetau ʻilo hotau misiona fakatāutahá ʻi heʻetau tauhi ki heʻetau Tamaí mo Hono ʻAlo, ko Sīsū Kalaisí.
ʻI heʻeku aʻusiá, ʻoku hulu atu ʻi he “kakai mohu tākiekina ʻe toko 30 ʻoku nau taʻu siʻi hifo he 30” ʻi he kakai lalahi kei talavou ʻo e Siasí. ʻOku ou ʻilo ko e kakai mohu tākiekina tahá ʻa kinautolu ʻoku nau hoko ko e “[kau fakahoko ʻo e folofolá] pea ʻoua naʻa ngata ʻi he fanongó” (Sēmisi 1:22). Ko kinautolu ia ʻa e kau tauhi fuakavá. ʻE malava ko kimoutolu kotoa ia.
ʻAmanaki lelei atu ki he ngaahi lelei te mou fakahokó.
Lisa Siteti