Ko Ha Talaʻofa ke ʻAhiʻahiʻi
ʻOku nofo e tokotaha naʻá ne fai e talanoá ʻi ʻIutā, USA.
“Ke toe papitaiso ʻo hangē ko Sīsuú … Ko e meʻa pē ia ʻoku ou loto ke faí” (Tohi Hiva ʻa e Fānaú, 104).
Naʻe fāngailupe e laʻaá lolotonga e ʻaka pasikala mai ʻa Tatisuki ki ʻapí. Naʻá ne saiʻia ʻaupito ke ʻaka oma hifo he kiʻi tafunga hono veʻe ʻapí, ka naʻá ne fie maʻu ke foki kimuʻa pea poʻulí.
ʻI he fakaaʻuaʻu atu ʻa Tatisuki ke tuʻú, naʻá ne sio ki heʻene faiako Palaimelí, Sisitā Iamatā ʻokú ne lue hake ki honau fale nofoʻangá.
Naʻe lea fiefia mai ʻa Sisitā Iamatā, “Mālō e lelei Tatisuki. ʻOku ou ʻi heni ke u talanoa atu fekauʻaki mo hoʻo papitaisó.”
Ne toki kamata ʻalu pē eni ʻa e fāmili ʻo Tatisukí ki he lotú. Naʻá ne saiʻia ke kau fakataha mo hono ngaahi kaungāmeʻá ʻi he Palaimelí, pea tautautefito ʻene fiefiá heʻene teu papitaisó! Naʻe heka fakataha leva ʻa Sisitā Iamatā mo Tatisuki he lifí peá nau kau fakataha mo ʻene Fineʻeikí ʻi he fale nofoʻangá.
Naʻe talaange ʻe Sisitā Iamatā, “Tatisuki, ʻoku ou fiefia ʻaupito hoʻo fili ke ke muimui kia Sīsū Kalaisi ʻaki hoʻo papitaisó.” “ʻI he taimi ʻoku tau papitaiso aí, ʻoku tau fai ha fuakava mo e Tamai Hēvaní. ʻOkú ke ʻilo ko e hā ʻa e fuakava?”
Naʻe ʻikai ke ʻilo ʻe Tatisuki ʻe fai ange ʻe Sisitā Iamatā ha ngaahi fehuʻi. Naʻe kamata ke ne kiʻi ongoʻi tailiili. Ka naʻe malimali pē e Fineʻeikí ke fakalotolahi.
Naʻá ne fehuʻi lotomā ange, “Ngaahi talaʻofa?”
“Ko ia!” Ko Sisitā Iamatā ange ia. “ʻOku talaʻofa mai ʻe he Tamai Hēvaní kiate kitautolu te tau lava ʻo maʻu maʻu ai pē ʻa e Laumālie Māʻoniʻoní ʻiate kitautolu. ʻOkú ke ʻilo ko e hā ʻetau palōmesi ki he Tamai Hēvaní?”
Naʻe kalokalo pē e ʻulu ʻo Tatisukí. “ʻOku ʻikai ke u ʻilo.”
Naʻe pehē ʻe Sisitā Iamatā, “Te u ʻoatu ha kiʻi tokoni kia koe—ʻoku maʻu ʻa e ngaahi talaʻofá ʻi he lotu ko ia ʻoku tau fanongo ki ai kimuʻa pea tau toʻo e sākalamēnití.” ʻOku tau palōmesi ki he Tamai Hēvaní ʻoku tau loto fiemālie ke toʻo kiate kitautolu ʻa e huafa ʻo Sīsū Kalaisí pea manatu maʻu ai pē kiate Ia mo tauhi ʻEne ngaahi fekaú. ʻOku ʻilo nai e ʻuhinga ke toʻo kiate kitautolu ʻa e huafa ʻo Sīsū Kalaisí?”
Naʻe kalokalo pē e ʻulu ʻo Tatisukí. Naʻe tokoniʻi ia ʻe he Fineʻeikí. Naʻá ne pehē ange, “ʻOku ʻuhinga ia ʻoku tau fiefia ke tala ko e kāingalotu kitautolu ʻo e Siasi ʻo Sīsū Kalaisi ʻo e Kau Máʻoniʻoni ʻi he Ngaahi ʻAho Kimuí Ní.” “ʻOku ʻuhinga ia te tau fai ʻa e meʻa naʻe mei fai ʻe Sīsuú ʻo kapau naʻá Ne ʻi heni.”
“Ko e hā ʻa e ngaahi meʻa naʻe mei fai ʻe Sīsuú?” Ko e fehuʻi ange ia ʻa Tatisukí.
[Naʻe tali ange ʻe Sisitā Iamatā], “ʻE angaʻofa ʻa Sīsū ki he kakaí. Te ne tokoni ki he kakai ʻoku lotomamahi mo puké. Pea te Ne akoʻi e kakaí ki he founga ke muimui ai ki he ngaahi fekaú.”
Naʻe tō hifo e loto ʻo Tatisukí. Naʻe kamata ke ne lotosiʻi ʻo ne pehē ange, “ʻOku ʻikai ke u tui te u lava ʻo papitaiso.”
Ko e hā nai hono ʻuhingá? ko e fehuʻi ange ia ʻa e fineʻeikí.
“ʻOku fuʻu lahi e ngaahi palōmesí! ʻOku ʻikai ke u tui te u lava ʻo hangē ko Sīsuú he ʻaho kotoa pē!”
Naʻe fāʻofua ange ʻene Fineʻeikí kia Tatisuki. “Manatuʻi hoʻo tokoni kia ʻIuna ʻi heʻene tangi ʻaneafí?”
Naʻe kamokamo ʻa Tatisuki. Naʻe faʻa lotomamahi hono kiʻi tuofefiné, pea naʻá ne ʻai ha ngaahi mata fakaoli mo vaʻinga mo ia kae ʻoua kuó ne toe fiefia.
“Pea manatuʻi hoʻo tokoniʻi ho ngaahi tokouá he uike kuoʻosí ke nau moʻui vahevahe mo angalelei ki he taha kotoa pē? ʻI hoʻo fai iá, naʻá ke muimui ai kia Sīsū.”
Naʻe ʻikai ke ʻilo ʻe Tatisuki ko e ʻuhinga ia ʻo e muimui kia Sīsuú. Naʻe kamata ke ne kiʻi ongoʻi lelei ange. Te ne lava ʻo fai e ngaahi meʻa ko iá!
Naʻe talaange ʻe Sisitā Iamatā, “Pea ʻi heʻetau fai ha fehālaakí, te tau lava ʻo fakatomala. ʻOku ʻuhinga ia te tau lava ʻo kole fakamolemole mo feinga ke fai lelei ange. ʻI he taimi ʻoku tau fakatomala aí, ʻoku fakamolemoleʻi kitautolu ʻe he Tamai Hēvaní. ʻOku tau lava ʻo feinga maʻu pē!”
Naʻe ʻikai ke toe hohaʻa ʻa Tatisuki. Naʻá ne ongoʻi fiefia.
Naʻá ne pehē, “ʻOku ou fie papitaiso!”
Naʻe malimali e Fineʻeikí mo Sisitā Iamatā. Naʻe foaki ange ʻe Sisitā Iamatā ha Tohi Molomona kia Tatisuki kuo ʻosi tohi ai hono hingoá. Naʻe ongoʻi fiefia ʻa Tatisuki koeʻuhí te ne lava ʻo feinga ʻi he ʻaho kotoa pē ke hangē ko Sīsuú. Naʻe ʻikai ke ne faʻa tatali ke papitaiso ia. ●