ʻOku Ou Fiefia Ne U Fanongo
B. Sanderson
ʻIutā, USA
Tā fakatātā ʻa Allen Garns
Lolotonga ha ʻaho femouʻekina ʻi heʻeku kilīniki ki he ʻutó, naʻá ku ngāue tōmui mei he taimi totonú. Ko e meʻa mālié, naʻe vave pē e ʻosi ha ʻapoinimeni ʻe taha. Naʻá ku ongoʻi fiemālie ʻi heʻeku tuʻu hake ke u mavahé, ka naʻe kamata ke fakamatala mai ʻe he tokotaha mahakí ha meʻa naʻe ʻikai felāveʻi mo ʻema ʻapoinimení. Neongo ne siʻi ʻeku kātakí, ka naʻá ku ongoʻi ʻoku totonu ke u toe tangutu pē ki lalo ʻo fanongo.
Naʻá ne talamai naʻe kamata ke ongoʻi puke hono uaifí kimuí ni mai. Naʻá ne pehē, “Naʻe ʻosi ʻiloʻi pē [ʻe hoku uaifí] ʻa e meʻa naʻe hokó, ka naʻe ʻikai ke ne talamai kiate au he naʻá ne ilifia ke ʻalu ki falemahaki.”
ʻI ha ngaahi ʻaho siʻi mei ai, ne ʻikai ke ne toe fai ha meʻa ka ko e tokoto pē ʻi hono mohengá. Naʻe kamata ke ne puputuʻu pea naʻe ʻikai mahino ʻene talanoá. Naʻe mahamahaki mo ʻeku tokotaha mahakí, pea naʻe ʻikai fuoloa mei ai kuo fakaʻau ke kovi ange hona tūkungá. Naʻe ʻikai ke na toe lava ʻo tauhi kinaua. Ko e taimi naʻe ʻaʻahi mai ai e tuofefine ʻi he fono ʻo ʻeku tokotaha mahakí, naʻá ne manavahē. Naʻá ne fetuʻutaki ki ha ongo meʻalele falemahaki ʻe ua ke ʻave ai kinaua ki falemahaki. Naʻe ʻilo ʻe he kau toketaá kuo tōtuʻa hono maʻu ʻa hono uaifí ʻi he kanisā huhú.
Naʻe pehē ʻe he tangatá, “Naʻe ʻikai pē ke u toe feleaʻaki mo hoku uaifí, talu mei ai.”
Naʻe mahaki mafu ʻa hono uaifí, pea naʻe huka leva ki ha mīsini ke ne kei moʻui pē. Naʻe fakamatalaʻi heʻeku tokotaha mahakí ʻa hono teke saliote mai ia mei hono loki ʻi he falemahakí ki he loki tokangaekina makehé ke ne sio fakaʻosi ki hono uaifí. Hili iá, naʻá ne talaange leva ki he kau toketaá ke toʻo ʻa e mīsiní.
Naʻe ʻikai leva ke toe lea ʻa e tangatá. Ne mahino naʻá ne lea ʻaki e meʻa kotoa pē naʻá ne fie lea ʻakí. Naʻá ku talaange ʻeku ongoʻi fakaʻofaʻiá. Naʻá ne lulululu mo au peá ne ʻalu. ʻOku ou fiefia naʻá ku tangutu ki lalo ʻo fakafanongó. ʻOku ou fiefia naʻe ʻikai ke u mavahe ʻi he taimi ne u fakakaukau ai ke u mavahé. Naʻá ne mei ongoʻi fēfē nai kapau ne u fakatovave ki tuʻa mei he lokí ʻi he taimi naʻá ne fie vahevahe ai ʻene faingataʻaʻiá?
ʻOku ʻikai ke u ʻilo pe ko e hā naʻe vahevahe mai ai ʻe he tokotaha mahakí ʻa ʻene talanoá kiate au he ʻaho ko iá, ka ʻoku ou ʻiloʻi e ʻuhinga ne u fakafanongo aí. Naʻe akoʻi ʻe ʻAlamā ko kinautolu ʻoku loto ke papitaiso mo muimui kia Sīsū Kalaisí ʻoku totonu ke nau “loto ke fefuaʻaki ʻa hoʻomou ngaahi kavengá, … tangi fakataha mo kinautolu ʻoku tangí; ʻio, pea fakafiemālieʻi ʻa kinautolu ʻoku ʻaonga ki ai ʻa e fakafiemālié” (Mōsaia 18:8–9).
Naʻe fua heʻeku tangata mahakí ha kavenga, pea ʻi ha founga maʻamaʻa, naʻá ku tokoni ki hono fua iá. Naʻá ne tangi, pea ne u tangi fakataha mo ia. Naʻá ne fie maʻu ha fakafiemālie, pea ne u fakafiemālieʻi ia. ʻI he founga faingofua ko ʻení, naʻá ku feinga ke tauhi ʻeku palōmesi ke u hoko ʻo hangē ko ʻeku Fakamoʻuí.