“ʻOku ou toutou tō maʻu pē he ngaahi ʻahiʻahi tatau. Te u mavahe fēfē mei he ngaahi angahala ko iá?”

Laʻitā ʻo ha kiʻi tamasiʻi mei he Getty Images

“Neongo pē kapau naʻa tau ʻiloʻi mo faiangahala ʻiloʻi pau pe toutou fehangahangai mo e ʻikai malavá mo e loto-mamahí, ka ko e taimi pē ʻoku tau pehē ai ke toe feingá, ʻe lava ke tokoniʻi kitautolu ʻe he Fakalelei ʻa Kalaisí.”

“… ʻOku tau hoko moʻoni ko e Kāingalotú, ʻi heʻetau feinga, kātaki, mo tokoniʻi e niʻihi kehé ke nau fai mo e meʻa tataú. ʻI heʻetau liliú, te tau ʻiloʻi ai ʻoku tokanga lahi ange ʻa e ʻOtuá ki he tuʻunga ʻoku tau ʻi aí mo ia ʻoku tau feinga ke aʻusiá, kae ʻikai ko hotau tuʻunga kimuʻá.”

ʻEletā Dale G. Renlund ʻo e Kōlomu ʻo e Kau ʻAposetolo ʻe Toko Hongofulu Mā Uá, “Kāingalotu ʻOua Naʻa Tuku e Feingá,” konifelenisi lahi ʻEpeleli 2015.

Mavahe mei he Tupuʻanga ʻo e Ngaahi ʻAhiʻahí

Kapau ko hoʻo telefoní ʻokú ke maʻunimā aí, feinga ke fakamavaheʻi ia pe tukuange ki hoʻo mātuʻá ke na fakangatangata atu. Pe kapau ko ho ngaahi kaungāmeʻá ʻa e niʻihi ʻoku nau ʻahiʻahiʻi koé, kumi ha ngaahi kaungāmeʻa lelei pea feinga ke ʻākilotoa koe ʻe he kakai lelei ʻoku nau tokoniʻi koe ke ke ongoʻi maʻu ai pē ʻa e Laumālié. Kapau ʻoku ʻiate koe ʻa e Laumālié pea ʻoku ʻākilotoa koe ʻe he ngaahi kaungāmeʻa leleí, pea ʻoku faingofua ange ke ke lava pē ʻo matuʻuaki e ngaahi ʻahiʻahí. ʻOku hoko mai ʻa e ʻahiʻahí ki he taha kotoa, kae kehe pē ʻoku tau lava ʻo matuʻuaki kinautolu, pea te tau fiefia pē.

Koliteni B., taʻu 17, ʻAlapeta, Kānata

Faʻa Lotu

Ko ha tokotaha papi ului au, pea naʻe mālohi ʻa e ʻahiʻahí kiate au koeʻuhí naʻe kehe ʻeku ngaahi anga fakafonuá mei he niʻihi ʻo e Siasí. Ne fai atu pē pea kamata ke mahino kiate au naʻe fakamālohia au ʻe heʻeku fetuʻutaki mo ʻeku Tamai Hēvaní mo fakafaingofuaʻi au ke u ikunaʻi ʻa e meʻa hono kotoa.

Pāmela S., taʻu 19, Vahefonua Lianikuihué, Sili

Mapuleʻi Hoʻo Ngaahi Fakakaukaú.

ʻOku hoko ʻetau ngaahi fakakaukaú ko ha matapā ia ki heʻetau ngaahi angafaí. ʻOku malava ke fakahohaʻasi ʻe he ngaahi ʻahiʻahí ʻetau fakakaukaú ʻo hangē tofu pē ko ha afo ʻo ha hiva ʻokú ke manatuʻi. ʻI he taimi ʻoku nau hoko mai ai ki heʻetau fakakaukaú, feinga ke ke mavahe mei he ngaahi fakakaukau ko ení ʻaki hoʻo akoʻi kiate koe ʻa e meʻa ke faí mo fakakaukau ki aí. ʻOkú ke maʻu e mālohi ke fai ia!

Tainala S., taʻu 19, Sā Paulo, Palāsila

Maʻu ha Tokoni mei he Niʻihi Kehé

Nofo maʻu pē mo ha taha ʻokú ke ʻofa aí, ʻo hangē ko ho fāmilí mo ho ngaahi kaungāmeʻa ofí, ʻa ia ʻoku nau moʻui ʻaki e ngaahi tuʻunga moʻui tatau mo koé. ʻE ala tokoni eni kiate koe ke ke mamaʻo ai mei he ʻahiʻahí. Kau ki he ngaahi ʻekitivitī ʻi he fāmilí mo e Siasí, tautautefito ki he ngāue fakafaifekaú mo e hisitōlia fakafāmilí. ʻOua naʻá ke puputuʻu; ʻoku mafao mai maʻu pē e toʻukupu ʻo e ʻEikí kiate kinautolu ʻoku nau maʻu ha holi ke fakatomalá.

ʻEletā Tukai, taʻu 20, Missiona Keipi Kousi Kaná

Maʻu e Nongá ʻi he Lotu

Ko ha meʻa ia te u fokotuʻu atu ke ke fai ko e lotu ki ai. ʻOku ou ʻilo ʻe ʻikai hoko mai leva e ngaahi talí, ka ʻe lava ke ke maʻu e nongá. Te ke lava foki ʻo maʻu e nongá ʻi hoʻo fakatalatala hoʻo fakakaukaú mei he meʻa ʻokú ne fakahohaʻasi koé pea fakakaukau ki he meʻa te ne ngaohi koe ke ke fiefiá. Ko e hā pē ha founga te ke maʻu ai ʻa e nongá, ʻoku ou ʻilo te ke lava ʻo maʻu ia ʻia Sīsū Kalaisi.

ʻAna P., taʻu 12, ʻIutā, USA

ʻOku fakataumuʻa ʻa e ngaahi talí ko ha tokoni mo ha fakakaukau, ka ʻoku ʻikai ko hano fakahaaʻi ʻo ha tokāteline ʻo e Siasí.

Ko e Hā Hoʻo Fakakaukaú?

“ʻE founga fēfē haʻaku fiefia ʻi he lotú ʻi he taimi ʻoku ʻi ai ai haʻaku palopalema mo e kakai ʻi aí?”

ʻOmai hoʻo talí, pea kapau te ke loto ki ai, ʻomi mo ha laʻi tā ʻata lelei kimuʻa he ʻaho 15 ʻo Māʻasi, 2018, ki he liahona.lds.org (lomiʻi ʻa e “Submit an Article or Feedback”).

ʻE lava ke ʻētitaʻi ʻa e ngaahi talí koeʻuhí ke lōloa feʻunga pe mahino.