iTukutuku ni Veiliutaki ni iWasewase
Sa Bola na Mua ki na Veivakalougatataki Tawamudu ni da sa Veiyalayalati kei na Turaga
“Ni sa lomani ira na kai vuravura vakaoqo na Kalou, me solia kina na Luvena e duabau ga sa vakatubura, me kakua ni rusa ko ira yadua era sa vakabauti koya, me ra rawata ga na bula tawamudu” (Joni 3:16).
Au sa vakavinavinaka vakalevu vei Tamada Vakalomalagi ena Nona loloma uasivi ena vukuda kece na Luvena.
E vuqa vei keda eda sotava na veika dredre vakalevu sara ena bula oqo. E dau ka bibi duadua na nona takali e dua na noda daulomani eda sa bula vata tu mai ena vuqa na yabaki. Oqo e rawa ni dau nanumi ni sega toka ni dodonu mai vua na Kalou, ia na ka dina, ni dua na veivakatovolei bibi mai vua na Tamada Vakalomalagi dauloloma ni vinakata me da tubu cake ena vakabauta me rawa ni da yaco me vakataki Koya.
A vakatakila na noda Turaga o Jisu Karisito na Lomana vua na parofita ko Josefa Simici, ni sa yaluma voli na lomana ena nona leqa bibi ni dabe, ka kaivesu tu ena valeniveivesu mai Lipati:
“Ia kevaka ko na biu ki na qara, se era tauri iko na daulaba, se tau vei iko na itotogi mate; kevaka ko sa biu ki na wasaliwa titobu; kevaka era sa nakita na biau lelevu me ra bikai iko; kevaka sa yaco me kemu meca na cagi kaukauwa; kevaka sa kumukumuni vata na o loaloa ni lomalagi, ka ra cokovata na vei vu ni ka me latia na nomu sala; ka me kena ilutua, kevaka ena dalaga na gusui eli me tilomi iko, mo kila tiko na luvequ, ni veika kece oqori ko na yalomatua kina, ka vinaka cake.
“Raica na Luve ni Tamata sa vosota rawa na veika e toro sobu sara mai vei ira kecega. Ko sa vinaka cake li mai vua?
“O koya, mo tudei tikoga kina ena nomu sala, ka na tikoga kina kei iko na matabete; . . . mo kakua kina ni rerevaka na veika e rawa ni vakayacora na tamata, ni na tiko vata kei iko na Kalou me sega ni mudu ka sega ni mudu” (Vunau kei na Veiyalayalati 122:7–9).
Ena dua na veisiko ni veiqaravi walega oqo, keitou a curuma e dua na vale se qai takali walega na tamadratou; sa veiqaravi oti vakailiuliu yalodina ena Lotu. Sa vakatovolei vakalevu na watina lomani me yacova ni sa laki seyavu nona vakabauta kei na gagadre ni lako i Lotu; eratou sa muri tinadratou ki na luluqa vakalotu na gone. Ni keitou soqoni vata kei iratou na matavuvale oqo ena mataka ni neitou veisiko, era tiko na luvena yalewa kei na makubuna, keitou vakaraitaka na nodrau loloma na Tamada Vakalomalagi kei Jisu Karisito ena vukudratou yadua.
Keitou vakananuma vua na marama lomani oqo na veiyalayalati bibi erau sa vakayacora kei na watina ena vica na yabaki sa oti ena valetabu savasava ni Turaga. A vakamalumalumutaka na yalona na neitou malanivosa ni vakacegu, ka veitokoni kina na kamica ni Yalo Tabu kei na neitou loloma dina ena vukuna ni keitou ganena ena kosipeli, ka kauta mai na reki ni vakasinaiti nona vakasama kei na yalona ena vakanananu ni nona vauci ena valetabu.
Sa titobu sara na kedra bibi na noda veicakacaka vakalotu kei na veiyalayalati ni valetabu ka ra sa ivakaraitaki sara ga ni nona loloma na Tamada Vakalomalagi ena vukuda. Na veivakalougatataki lagilagi e yalataki vei keda mai na veiyalayalati tabu oqo ena qai vakavotukana ga ni da sa yalodina tiko ki na ivakataotioti.
Au wasea vei iratou na matavuvale ni se qai takali walega na watiqu, kau sa dau nanumi koya vakalevu e veisiga. Au na dau colata tu me yacova na bula ka tarava na rarawa levu oqo ia au wasea vei iratou na noqu sa tuvakarau meu qarava tikoga na Turaga mai vuniyaloqu me yacova na ivakataotioti, niu kila ena dua na siga, au na sota tale kei na watiqu lomani ka keirau na bula vata ena reki kei na marau me tawamudu.
Ni tomani na veiqaravi ki na matavuvale totoka oqo, keitou vakadinadinataka na ligana loloma na iVakabula sa dodo tu ga, kei na nona veisureti vei iratou me ratou lesu mai ki lotu ka marautaka na veivakalougatataki ni kosipeli. Au vuki vei iratou yadua na lewe ni matavuvale, tekivu vei tinadratou, ka kaya:
“O sa ciqoma beka na nona veisureti oqo na iVakabula? O na dau lakova beka na soqoni ni sakaramede e vei-Sigatabu?”
Eratou a ciqoma yadua na veisureti. A vakasinaiti na yaloi keitou ena reki ena neitou vakadinadinataka ni ratou sa cavuta na yalo sa veivutuni oqo na ikalawa me ratou lako mai vua na iVakabula! Au vakila ni reki vata kei keitou ko Lomalagi ni keitou sa veimaliwai ka veikilai, ena neitou vakatovolei kei na vakabauta.
E sega ni caka veiyalayalati tabu walega, ia na noda talairawarawa tikoga kina, ena vauci keda vei ira noda daulomani. Na revurevu mana ni nona Veisorovaki na noda iVakabula kei na kena dau vakani tikoga na noda vakabauta ena masu, vuli ivolanikalou kei na veiqaravi ena solia vei keda na igu eda gadreva me da sotava kina na bolebole kecega ni bula.
Na noda iVakabula o Jisu Karisito e kilai ira kece era rarawa tu. Sa dau dodoka tu mai e veigauna vei keda na Ligana ni loloma uasivi. Au sureti kemuni kece o ni sotava tu na veibolebole dredre ena nomuni bula, se cava ga, mo lako mai vua na iVakabula ka mai kanamagiti ena Nona teveli ena nomu vakaivotavota ena sakaramede e vei-Sigatabu, cakava ka rokova na veiyalayalati tabu ena Nona valetabu. Ni o kitaka oqo, sa na nomu na yalayala oqo:
“O koya mo dou kakua kina ni oca ena cakacaka vinaka, ni dou sa tura tiko na yavu ni dua na cakacaka cecere. Ia ena tubu mai ena veika lalai na veika cecere.
“Raica, sa gadreva na Turaga na yalo kei na vakasama sa vakarau tu; ia ko ira sa vakarau tu ka talairawarawa era na kania na veta ni vuata ena vanua ko Saioni ena veisiga mai muri” (Vunau kei na Veiyalayalati 64:33–34).
Au vakadinadinataka ni veiyalayalati eda cakava ena papitaiso, ena noda ciqoma na matabete tabu, kei na veicakacaka vakalotu e dau vakayacori ena valetabu, era semati ki na veivakalougatataki cecere duadua sa vakarautaka vei keda na Turaga. Mai na noda talairawarawa ena yalodina ki na veiyalayalati oqori ni da vosota tiko me yacova na ivakataotioti, eda na rawata na nona veivakalougatataki kece sara na Turaga, ena yaca tabu ni noda Turaga o Jisu Karisito, emeni.