Ajri ro im Jodikdik ro: Ijjino eo Ekajoor
Bonnie H. Cordon
Būreejtōn eo Eutiej an Doulul eo an Jiron̄ ro
Stephen W. Owen
Būreejtōn eo Eutiej an Doulul eo an Jiron̄ ro
Joy D. Jones
Būreejtōn eo Eutiej an Būraimere
Ritōl ro ilo Kabun̄ in rej kwaļo̧k wāween an ro jinen im jemān im ward ko maron̄ jipan̄ ajri ro erom āinwōt Rilo̧mo̧o̧r.
Men̄e kwoj itok limo ak ikūmkūm jidik kōn jibadbad ko rekāāl an Kabun̄ in—Ajri ro im Jodikdik ro—bōlen ej wōr wōt am̧ kajjitōk: “Ewi wāween an jipan̄ ajri ro nejū?” “Elmen ad kōm̧m̧ane menin?” “Ta eddo eo aō ilo menin?”
Ritōl ro ilo Kabun̄ in rej letok jet uwaak ko.
Etke Kabun̄ in ej kōm̧m̧ane oktak in?
Sister Bonnie H. Cordon: Āinwōt an kar Būreejtōn Russell M. Nelson katakin, jej aolep aikuj kōļapļo̧k maron̄ ko ad n̄an ebbōk revelesōn.1 Būrokūraam an Ajri im Jodikdik ro kar ejaake n̄an kūrtok kajjojo im baam̧le ko n̄an kappukot im̧we jān Jetōb kōn wāween aer eddōkļo̧k im pukot lan̄lōn̄ ilo iaļan bujen in. Ej juon rejtake eaibojooj n̄an ta in rikanaan eo ej lo āinwōt juon visōn n̄an kōj kajjojo.
Brother Stephen W. Owen: Būreejtōn Nelson ej bar katakin kōj bwe Kabun̄ in ej mijōk wōt m̧ōko mōd, jekdoon em̧ rōt ko mōd.2 Kabun̄ in ejjab mijōk wōt būrokūraam ko. Ritōl ro an Kabun̄ in im rūkaki ro remaron̄ jipan̄ ajri ro ekkatak im mour kōn katak ko, ak eddo in ej ijjino ilo mōko, im ej juon eddo aikuj kōm̧m̧an aolep raan.
Āinwōt an rikanaan kar katakin, jej aikuj kappukot revelesōn im ļoor Jetōb, im Ajri ro im Jodikdik ro renaaj jipan̄ kōj kōm̧m̧ane menin—kōnke ej kapidodoik ļo̧k. Jemaanļo̧k, ekar wōr tarrin in bukwi men ko remenin aikuj n̄an ro jinen im jemān n̄an etale im meļeļe ilo Personal Progress, Jerbal eo aō n̄an Anij, im būrokūraam ko jet an Kabun̄ in ilo an ajri ro eddōkļo̧k n̄an iiō in jodikdik ko aer. Būrokūraam in ekāāl ej kūrtok jodikdik im ajri ro n̄an kappukot im̧we ilo aer kōm̧m̧ani kōttōpar ko aer ekkar n̄an aikuj im itok limo ko aer.
Sister Joy D. Jones: Menin ej juon iien em̧m̧an im kaitoktok limo n̄an ajri im jodikdik ro nejid, diktak in epepen in, n̄an kam̧ūlaļļo̧k tōmak ko aer ilo Jisōs Kraist. Ilo aer ekkatak n̄an kappukot im eoro̧n̄ tōl eo an Jetōb Kwojarjar, enaaj em̧m̧anļo̧k aer meļeļe kōn kadkadier make im kōttōpar im wāween aer eddōkļo̧k im en̄jake iakwe eo an Jemedwōj Ilan̄ n̄an er. Kōttōpar eo an Būrokūraam in an Ajri im Jodikdik ro remaron̄ kōjeram̧m̧an im kakajoorļo̧k jodikdik ro nejid im baam̧le ko aer ilo aer ejaake im kōjparok jem̧jerā ko ilo mōko mōer, ilo mōn jar ko, im ippān Jemedwōj Ilan̄.
Ta bun̄tōn ne ko me baam̧le ko remaron̄ kōm̧m̧ane n̄an jino kōjerbal Būrokūraam in an Ajri im Jodikdik?
Sister Jones: Jar ippān doon n̄an bōk tōl eo an Jetōb. Ro jinen im jemen remaron̄ jino kōnono ippān baam̧le ko aer kōn eria ko jilu ilo aer kōjerbal Būrokūraam in an Ajri im Jodikdik ro: ekkatak gospel eo, jerbal in jipan̄ im m̧akūtkūt ko, im eddōkļo̧k eo an juon make. Ta eo rej kōm̧m̧ane kiiō? Ewi wāween aer maron̄ eddōkļo̧k āinwōt kajjojo armej im āinwōt juon baam̧le ilo eria kein jilu? Ewi wāween n̄e jej mije wōt Luk 2:52 jipan̄ tōl karōk ko aer im kōm̧m̧an kōttōpar n̄an keememej im ļoor Rilo̧mo̧o̧r? Ej juon iien em̧m̧an n̄an kōkajoorļo̧k jodikdik ro, mōko, im baam̧le ko ilo wāween ko reļam waan, rejejjet, im ļap meļeļeer.
Sister Cordon: Jej jino jidik kōn jidik. Etetal ilo iaļan bujen eo ej lukkuun ilo m̧ool kōm̧m̧ane bun̄tōn ne ko jidik kōn jidik. Kōm̧m̧an juon kōttōpar. Jino kōn men pidodo. Bok in tōl eo an jodikdik im ajri ro renaaj lewaj juon jon̄ak em̧m̧an n̄an ļoore.
Brother Owen: Jejjab aikuj kapoke. Menin elukkuun pidodo. Riiti Luk 2:52. Jino ijeņ. Juon jinen ak jemen emaron̄ jijjet ippān ajri ro nejier ak jodikdik ro ilo mōko im kōnono kake menin. “Ewi wāween ad nej jipan̄ eok eddōkļo̧k ilo mālōtlōt im ānbwin im utiej ippān Anij im armej?” “Ta eo jemaron̄ ekkatak kake ak kōm̧m̧ane ippān doon?” “Ta kōttōpar ko komaron̄ kōm̧m̧ani?” Kwon kapidodoik ļo̧k.
Eļan̄n̄e en kar juon men kokōņaan bwe ajri im jodikdik ro ren jeļā ilo an menin kōm̧m̧an, ta eo kwon kar kōņaan?
Sister Cordon: Menin ej juon iien em̧m̧an im ekabwilōn̄lōn̄ n̄an eddōkļo̧k āinwōt kar Rilo̧mo̧o̧r! Eļan̄n̄e jej ļōmņake wōt, “Ta eo ij mije?” jemaron̄ keememej bwe em̧ōj kadede ad kōm̧m̧ane elōn̄ men ko n̄an erom̧ āinwōt E. Ekkatak gospel eo ej bōk jikin ilo elōn̄ kapijuknen im ilo mōn jar eo. Jej jerbal im bōk koņaad ilo m̧akūtkūt ko. Jibadbad in ekāāl ej juon wāween n̄an kōj bwe jen kommane ilo elon uinin im eddoik m̧akūtkūt ko jej ekkatak kaki—im lukkuun lale eddōkļo̧k eo ilo eria ko emen me Rilo̧mo̧o̧r ekar eddōkļo̧k kake: mour in jetōb, iiaio, ānbwin, im jelāļo̧kjen. (lale Luk 2:52). Menin enaaj bōktok lan̄lōn̄, aeņōm̧m̧an, im m̧ōņōņō eo ejjeļo̧k jem̧ļo̧kin n̄an kōj aolep ilo ad ļoor Rilo̧mo̧o̧r!
Sister Jones: Eddōkļo̧k ej pedped wōt ioon Rilo̧mo̧o̧r, pedped ioon baam̧le, im rejtak ko jān Kabun̄ in. Menin epidodo im ļap meļeļe ilo ad katoļo̧k e kōj jān būrokūraam ko m̧oktaļo̧k Kajjojo renaaj eddōkļo̧k. Ij kōjatdikdik bwe ajri, jodikdik, ritōl, im baam̧le ko aer renaaj meļeļe bwe wāween in jemaron̄ tōpare im jemaron̄ mour kake n̄an aolep ajri ro nejin Jemedwōj Ilan̄ ipeļaakin laļ in n̄an eddōkļo̧k ippān doon im en̄jake lan̄lōn̄ ilo iaļan Bujen in. Menin eban juon men eo eļap oktakin ak juon kein ekkatak eo epen im eib. Ej kōm̧m̧an eļapļo̧k kōn ta eo em̧ōj kadede kar kōm̧m̧ane, ilo an Jetōb tōl kōj, bwe kijejeto ko ad rem̧ool remaron̄ kōļapļo̧k maron̄ n̄an iakwe im tiljek ilo ad ļoor Rilo̧mo̧o̧r.
Etke eaorōk n̄an jodikdik im ajri ro n̄an eddōkļo̧k āinwōt Rilo̧mo̧o̧r?
Sister Jones: Moktata im ejjab diktata, rekar kōm̧m̧an bujen n̄an ļoor E aolep iien. Em̧ōj aer kar kōm̧m̧an bujen n̄an “jutak āinwōt rikam̧ool ro an Anij ilo aolep iien ko im ilo aolep men otemjem̧ļo̧k, im ilo aolep jikin ko” (Mosaia 18:9 Kōn menin rej aikuj n̄an eddōļo̧k āinwōt kar E: mour in jetōb, iiaio, ānbwin, im jeļāļo̧kjeņ. Bujen ko aer rejjab unin wōt aer aikuj kōm̧m̧ane menin, ak rej barāinwōt leļo̧k mālim im maron̄ n̄an jipan̄ er kōttōpraki kōttōpar ko aer.
Brother Owen: Kōttōpar ko ad ilo mour in ej n̄an ļoor im erom̧ āinwōt Jemedwōj Ilan̄ im Nejin Jisōs Kraist. Ikar kōņaan bwe in āinwōt er. Kōm kar jino kōm̧m̧an menin ke kōm kar rem̧m̧an ded wōt, kōn menin ekar wōr juon jon̄ak ilo aolepān mour ko am. Im jej lukkuun ļoor Rilo̧mo̧o̧r n̄e jej kōm̧m̧ani men ko E ekar kōm̧m̧ani.
Sister Cordon: Rilo̧mo̧o̧r ej ad waanjon̄ak ilo aolep men. Jej ekkatak kōn mour eo An im mijen im katak ko kōnke E ej aolep men otemjej jej kōjatdikdik n̄an erom̧. Ak kōnke kōj kajjojo jejeņoļo̧k, kōj kajjojo elōn̄ mōlid im ad kapeel ko me jej aikuj ejaaki n̄an erom̧ āinwōt E. Kōttōpar in ekāāl ej leļo̧k n̄an ajri im jodikdik ro juon iien ejeņoļo̧k n̄an eddōkļo̧k ilo wāween ko rejeņoļo̧k, n̄an ejaake menin letok ko aer kajjojo, im n̄an kakilene men ko rej en̄jake rej im̧we er n̄an kōm̧m̧ani n̄an erom āinwōt Rilo̧mo̧o̧r. En̄n̄e baba ej lo ta ko rekar kakkure. Ejjeļo̧k juon laajrak n̄an kōļļāiki n̄e ededeļo̧k. Kōttōpar ko jej kōm̧m̧ani n̄an wōnm̧aanļo̧k wōt ilo iaļan bujen in enaaj oktak, ak ippān doon jenaaj jim̧or ekkatak im eddōkļo̧k im epaakeļo̧k ad Rilo̧mo̧o̧r.
Ta am̧ kōjatdikdik ke ajri im jodikdik ro renaaj en̄jake n̄e rej bōk koņaer?
Sister Cordon: Ij kōjatdikdik bwe renaaj bōk meļeļe em̧ūlaļ ļo̧k kōn kadkad eo aer indeeo im en̄jake bwe rekkar. N̄e jejeļā bwe wōn kōj im An wōn kōj, jeoktak ad kōm̧m̧an. Renaaj ekkatak n̄an kile bwe ta ko rej ba ilo pijaan alooj ko rejjab m̧ool, kōnke rej aolep en̄jake wāween an Jetōb eo kōnono n̄an er. Renaaj peran ilo er make im ilo mour kwojarjar eo aer āinwōt jiron̄ im likao ro nejin Anij.
Sister Jones: Jekōņaan bwe ren en̄jake im kōjatdikdik ilo Jisōs Kraist, n̄an en̄jake aeņōm̧m̧an eo me ej itok jān kōjparok kien ko, n̄an en̄jake jem̧jerā eo em̧m̧an, n̄an ekkatak peran, n̄an en̄jake lan̄lōn̄ ilo jerbal n̄an ro jet, im n̄an en̄jake m̧ōņōņō im kūrm̧ool ilo ad bōk koņaad ilo jerbal in lo̧mo̧o̧r.
Brother Owen: Ij kōjatdikdik bwe ajri ro renaaj meļeļe gospel eo ilo wāween eo me enaaj pād ilo kōļmenļo̧kjeņ im un̄ur buruōer. Menin ejjab n̄an kōkaļļeik ta ko rededeļo̧k. Ej juon jerbal in ekkatak im erom̧ āinwōt Rilo̧mo̧o̧r. Ij lukkuun kōjatdikdik bwe ajri ro nejid im ro jej jerbal in karejar n̄an er renaaj en̄jake peran ilo aer meļeļe gospel eo n̄an katakin ro jet. N̄an waanjon̄ak, ij kōjatdikdik bwe jemaron̄ kajjitōkin ajri ro nejid juon kajjitōk kōn gospel in im jenaaj ron̄jake juon uwaak eo eļap meļeļein kōnke rekar ekkatak kake im m̧ōttanļo̧k kadkadier.
Ewi wāween an pāāren ro naaj jeļā eļan̄n̄e būrokūraam in an Ajri im Jodikdik eļap tōprakier ilo mōko mōer?
Brother Owen: Inaaj kar kappukot leen ko an Jetōb Galatia 5, āinwōt aeņōm̧m̧an eo eļap ilo m̧ōko. Ij ļōmņak ajri ro nejier renaaj ļapļo̧k aer jouj, im iakwe. Ajri ro nejier renaaj kōņaan bwe ren pād ippān baam̧le eo aer. Enaaj ļapļo̧k aer jar im kappukot uwaak ko. Renaaj lo em̧m̧anļo̧k ejjab ilo mour in jetōb wōt ak barāinwōt mour in iiaio, ānbwin, im jeļāļo̧kjen.
Sister Jones: Renaaj jeļā bwe eļap tōprakin n̄e jem̧jerā ko rej kajoorļo̧k, ro uwaan baam̧le eo rej en̄jake m̧ool in an em̧m̧anļo̧k im kajeon̄ wōt men̄e rej ioon apan̄, ilo aer kwaļo̧k aer rejtake im kea kōn ro jet, im āinwōt im̧we eo an Jetōb ej pād aolep iien ilo mōko mōer. Ro uwaan baam̧le eo remaron̄ lo juon jem̧jerā erreo ikōtaan ta eo rej kōm̧m̧ane aolep raan im mour eo an Kraist. Bolen enaaj ļapļo̧k kam̧m̧oolol kōn anemkwoj im ukweļo̧k, kōkm̧anm̧anļo̧k m̧wil, ļapļo̧k peran, kijejeto ko n̄an ļōmņak kōn ro jet im jab kwe wōt, im ļapļo̧k kam̧m̧oolol kōn Rilo̧mo̧o̧r, mour eo An, katak ko An, waanjon̄ak ko An, im Pinmuur eo An im Jerkakpeje eo.
Kapilōk ta eo kwomaron̄ kar leļo̧k n̄an pāāren ro me remaron̄ mijak jidik kōn aer kar kajejtokjen būrokūraam ko an Kabun̄ in m̧oktaļo̧k.
Sister Cordon: Aeet jej iakwe būrokūraam ko m̧oktaļo̧k, kōnke kajjojo iaad jekar ejaake im ekar wōr ad iien em̧m̧an n̄an lo an ro jet eddōkļo̧k ilowaan wōt būrokūraam in. Rekar im̧we kōn iien ko aer. Ak jej ke lukkun kam̧m̧oolol kōn revelesōn kein me rej wōnm̧aanļo̧k wōt? Irooj ej aikuji kōj n̄an wōnm̧aanļo̧k wōt ilo ad eddōkļo̧k im oktak, im E ej aikuj būrokūraam ko n̄an eddōkļo̧k im oktak n̄an kake aikuj ko an membōr ro ipeļaakin laļ in. Jej aolep kajeon̄ n̄an kōkm̧anm̧anļo̧k im n̄an erom̧ Kabun̄ im armej ro me Jemedwōj Ilan̄ ejeļā im ej aikuj kōj bwe jen erom̧.
Sister Jones: Em̧ōj ad jeram̧m̧an kōn būrokūraam ko m̧oktaļo̧k im jemaron̄ kam̧m̧oolol kōn aolep men ko me jekar ekkatak im iooni. Menin ej juon jijen em̧m̧an im ekāāl, im ej juon iien em̧m̧an n̄an kappukot tōl eo an Irooj n̄an ekkatak im eddōkļo̧k ilo wāween ko rekāāl im reim̧we.
Ewi wāween an ritōl ro maron̄ jipan̄ ajri im jodikdik ro ilo eddōkļo̧k eo aer make?
Brother Owen: Moktata, ij ļōmņak ritōl ro rerūtto rej aikuji kalimjōkļo̧k ajri in ak likao ak jiron̄ ro āinwōt an Anij kalimjōk er, meļeļein wōn eo armej en emaron̄ erom̧, ejjab wōn er kiiō. Jino kōn jem̧ļo̧k eo ilo kōļmenļo̧kjen. Bōk erreim̧aanļo̧k eo aetok. Menin enaaj bōk iien. Lale ta eo ajri im jodikdik ro remaron̄ erom̧. Ejaak juon jem̧jerā eo me n̄e kwoj aikuj kōnono ippān jodikdik ro, rej kautiej eok jon̄an rej ron̄jake eok.
Barāinwōt, jeļā kajjien ro jineer im jemaer. Lale ippāer ewi wāween am̧ maron̄ jipan̄. Kautiej eddo ko aer āinwōt jet pāāren.
Sister Jones: Būraimere ejjeļo̧k an doulul ak būreejtōnji ilo kūlaaj ejjab āinwōt likao im jiron̄ ro bwe ewōr aer. Ritōl im rikaki ro an Būraimere, barāinwōt būratōr im sister ro rej jerbal in karejar, rej letok jipan̄ n̄an ajri ro me rejjab jutak likier ilo gospel ilo mōko mōer. Eaorōk, ijoke, bwe jej aolep iien kautiej jem̧jerā eo ikōtaan ajri ro, jodikdik ro, im ro jineer im jemaer, kōjekdoon jekjek ko ilo mōko imōer. Būrokūraam in an Ajri im Jodikdik remaron̄ bōk juon wāween n̄an kūr tok aolepān baam̧le eo n̄an itok im lo im itok im jipan̄. Emaron̄ meļeļein n̄an kōkajoorļo̧k aolepān baam̧le eo, remaron̄ ak remaron̄ jab membōr in Kabun̄ eo an Jisōs Kraist im Armej ro Rekwojarjar ilo Raan ko Āliktata.
Sister Cordon: Elōn̄ ippād ajri im jodikdik ro me pāāren ro aer rejjab jar ilo Jabōt ak elōn̄ aer ro jineer im jemaer me eļap aer iakwe er. Inaaj kapilōk ritōl ro n̄an jeļā kajjien pāāren ro im lale ta kōttōpar ko im kōjatdikdik ko aer n̄an ajri ro nejier. Kom̧ maron̄ barāinwōt. Ilo ad jerbal ippān doon ippān pāāren ro, jenaaj kōkajoorļo̧k kajjojo im mōko mōer im barāinwōt kapilōk ajri im jodikdik ro n̄an kōkajoorļo̧k mōko mōn doon.
Ta eo kwonaaj ba n̄an kairūj pāāren ro ro rej mijak bwe remaron̄ jab jipan̄ ajri ro nejier tōprak ilo būrokūraam in an Ajri im Jodikdik ro.
Sister Cordon: Men eo em̧m̧an ej bwe em̧ōj ad kadede kōm̧m̧ani men kein. Baam̧le ko em̧ōj aer kadede ekkatak ippān doon kōn gospel eo. Em̧ōj kadede ad kōm̧m̧an jerbal in jipan̄ ko im m̧akūtkūt ko. Ekar baj wōr wōt ad jibadbad n̄an eddōkļo̧k, kiiō jej mijōk wōt wāween ko an kar Kraist eddōkļo̧k.
Ilo ad jijjet ippān ajri ro nejid, ij ļōmņak jenaaj itok limoōd kake. Komaron̄ ron̄jake wōt buruōn ajri ro nejim ilo wāween eo aolep jeļļ kake. Jemedwōj Ilan̄ ekōņaan bwe ajri ro nejim ren eddōkļo̧k, lo m̧ōņōņō, im jepļaak im mour ippcn. Kwonaaj en̄jake an Jetōb Kwojarjar tōl eok ilo am̧ kajjieon̄ kōm̧m̧an ippan doon bwe gospel eo im Jisōs Kraist ren m̧ōttan ļo̧k mour eo am̧.
Sister Jones: Jino ilo wāween eo me em̧m̧an n̄an baam̧le eo am̧. Lōke bwe enaaj wōr ippam̧ jipan̄ eo jān Lan̄. Kappukot tōl eo an Jetōb. Būrokūraam in an Ajri im Jodikdik ro renaaj jet kein jerbal ko raorōk n̄an kōm̧m̧ani eddo ko an pāāren. Elōn̄ eddo an ro jinen im jemen rainin ilo aer tōl im kōkajjiririk baam̧le ko. Epidodo jet iien n̄an en̄jake ad eddodo. Būrokūraam in an Ajri im Jodikdik ro renaaj jipan̄ ro jinen im jemenkōkm̧anm̧anļo̧k ta eo emenin aikuj jān ta eo eaorōk. Jipan̄ baam̧le ko ad ekkatak wāween n̄an ļoor Rilo̧mo̧o̧r kōn im̧we eo an Jetōb Kwojarjar elukkun aorōk n̄an kōj aolep im jenaaj en̄jake iakwe eo an Irooj im bōk kōjeram̧m̧an ko.
Brother Owen: Ij ļōmņak kwonaaj lukkun aikuj jipan̄ ajri ro im jodikdik ro. Kwojjab aikuj kōm̧m̧ane menin makeļok iaam̧. Ej itok wōt jān mour tiljek im niknik ilo jar im ejaaki iminene ko me rekwojarjar im kōm̧m̧an ko rejim̧we aolep raan ippān baam̧le eo am̧. Jino kōn jet men ko repidodo, reļam waan, iminene ko rem̧m̧an, im kwonaaj lo elōn̄ menin bwilōn̄ ko ilo mour ko an ajri ro nejim.