“Ilo Loļātāt an Eo Ejeļā Men Otemjeļo̧k”
Kōmeļeļe jan Christopher Wormell
Ke ikar delo̧n̄eļo̧k jikin kaminene eo an mijinede āinwōt juon mijinede eo ej jerbal aolep raan, ikar lo bwe ekar lukkun lōn̄ men ko n̄an ekkatak. Ikar kate eō jon̄an wōt aō maron̄ n̄an ekkatak, n̄an kōkajoorļo̧k naan in kam̧ool eo aō, im n̄an ekkaļ ioon pedped eo em̧ōj aō kar kadede kalōke. Ikōn jar, kajjitōk ippān Jemedwōj Ilan̄ juon kajjitōk, innem kappukot uwaak ko. Iminene in ekar ukōt mour eo aō.
Juon raan ke ikar jerbal āinwōt juon mijinede ilo Peru, juon m̧ōtta elder ekar bōk juon leta eo me ej kōjeļļāiki ke jemān ļeo m̧ōttan ekar jidimkij an mej. Ekar dān in kōmjaļaaļ. “Etke Jemedwōj Ilan̄ Ekar kōtļo̧k bwe en endein?” ekar jan̄.
Kajjitōk in ekar un̄ūr buruō. Bōn̄on eo, ikar bukwelōlō im ikar kajjitōk ippān Jema Ilan̄ ejja kajjitōk in wōt. Innem, ke ij etale Bok in Mormon, meja ekar jejjete 2 Nipai 2:24, eo ej ba, “Ak lo, aolep men kar kōm̧anm̧an ilo ļoļātāt an Eo ejeļā men otemjeļo̧k.”
Eoon eo ekar pād wōt ilo buruō im ekar jab jako. Ikar je juon kaat n̄an elder eo im kobaik eoon eo āinwōt m̧ōttanļo̧k naan in kam̧ool eo aō. Ikar kam̧oole bwe aolep men renaaj EM̧M̧AN kōnke Jemedwōj Ilan̄ ej kōm̧anm̧an men otemjeļo̧k ilo ļoļātāt. Jemaron̄ lōke E kōnke E ej iakwe kōj im ejeļā kōn men otemjej.
Tarrin juon in jimaten iiō tokālik, ikar jerbal ilo toļ ko ilo Peru ke mijen būreejtōn eo aō ekar ko̧o̧l eō ilo aō jab kōtmene. Ekar ba n̄an n̄a bwe Jema em̧ōj an mej rājetin ānbwinin im epād ilo juon jekjek ekauwōtata. Ejjab to ālkin iien eo, jema ekar jako. Ikar lukkuun buromōj, ikar en̄jake aō eddodo kōn kajjitōk in, “Ewi wāween aō maron̄ nej eļļā jān menin?”
Ikar jar n̄an Jema Ilan̄ n̄an bōk juon uwaak. Eļaptata ikar kōņaan jeļā etke jema ejaam mej ilo aō jab pād turin n̄an kōjem̧ļo̧k ippān. Ikar oktakļo̧k n̄an Bok in Mormon, kōpelļo̧k e, im riiti ejja naan ko wōt me ikar kwaļo̧k n̄an elder eo elōn̄ allōn̄ ko m̧oktaļo̧k: “Ak lo, aolep men kar kōm̧anm̧an ilo ļoļātāt an Eo ejeļā men otemjeļo̧k.” Naan kein rekar kobrak aō kōn eļap aeņōm̧m̧an im ekar lo̧mo̧o̧ren eō ke ikar jebwābwe.
Jema ilo mour in em̧ōj jako, ak Jemedwōj Ilan̄ enaaj pād wōt ijeņ iien otemjej ilo iien ao aikuji. Jemedwōj Ilan̄ ej kōm̧anm̧an men otemjej ilo ļoļātāt eo An, im ilo ad kappukot im kōm̧m̧ane ijo koņaad n̄an kōpooj kōj make, jemaron̄ lo uwaak ko reaorōk.